ལུ༌ཀ༌ 13
13
སྡིག༌པ༌གུན༌ནི༌ཀ༌ གྱོད༌པ༌ ཅོ༌ཅེས༌།
13:1-9
1མི༌ ཁ༌ཅིག༌གི༌ གཙོ༌བོ༌ ཡེ༌ཤུའ༌ རོམ༌མི༌ ཀའ༌ལོན༌ པི༌ལ༌ཏུའི༌ གཱ༌ལིལ༌ལི༌པ༌ ཁ༌ཅིག༌ ཆོད༌ཁང༌ང༌ ཆོད༌པ༌ ཕུལ༌ ཟ༌ནེ༌ སད༌ཁན༌བོའེ༌ སྐོར༌ལ༌ ཤདས༌། 2ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ ཏེ༌ གཱ༌ལིལ༌ལི༌པ༌གུན༌ལ༌ ཏེ༌ཟུག༌ རྡུག༌ངལ༌ ཐོང༌པ༌, ཞན༌ གཱ༌ལིལ༌ལི༌པ༌ ཚང༌མའེ༌ སང༌ མང༌ང༌ སྡིག༌ཅན༌ ཨིན༌གྲོ༌ སམ༌མ༌ རག༌ག༌? 3ངའེ༌ ཁྱོ༌ཞའ༌ ཟེར༌རད༌, ཏེ༌བོ༌ དེན༌བ༌ མ༌ནོག༌, ཨིན༌ནའང༌ གྱོད༌པ༌ མ༌ཅོ༌ན༌, ཁྱོ༌ཞ༌གུན༌ནའང༌ མེད༌ཁན༌ ཅོའ༌ ཛད༌ཨིན༌། 4ཡ༌ སི༌ལོམ༌མི༌ རྩིག༌པ༌ རྡིབས༌ཏེ༌ ཤི༌ཁན༌ནི༌ མི༌ ཅོབ༌རྒྱད༌པོ༌ ཡེ༌རུ༌ཤ༌ལེམ༌པ༌ ཚང༌མའེ༌སང༌ མང༌ང༌ སྡིག༌ཅན༌ ཨིན༌གྲོ༌ སམ༌མ༌ རག༌ག༌? 5ངའེ༌ ཁྱོ༌ཞའ༌ ཟེར༌རད༌, ཏེ༌བོ༌ དེན༌བ༌ མ༌ནོག༌, ཨིན༌ནའང༌ ཁྱོ༌ཞའེ༌ གྱོད༌པ༌ མ༌ཅོ༌ན༌, ཁྱོ༌ཞ༌གུན༌ནའང༌ མེད༌ཁན༌ ཅོའ༌ ཛད༌ཨིན༌།”
6ཏེ༌ནེ༌ ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌, “མི༌ཞིག༌གི༌ ཁོ༌རང༌ངི༌ རྒུན༌ཚས༌སི༌ ནང༌ང༌ ཕིག༌གི༌ ཁ༌ཟས༌སི༌ ལྕང༌མ༌ ཙུགས༌ཏེ༌, བྲས༌བུ༌ ཙལ༌ལ༌ སོང༌ ཨིན༌ནའང༌ བྲས༌བུ༌ མ༌ཐོབ༌། 7ཁོའེ༌ ཚས༌ཁན༌ལ༌ ཟེརས༌, ‘ལོ༌ སུམ༌ སོང༌ འི༌ ལྕང༌མའེ༌ ཀ༌ནེ༌ ང༌ བྲས༌བུ༌ ཅིག༌གའང༌ མ༌ཐོབ༌། ཅད༌ཏེ༌ ཕངས༌ཏོང༌, ཏོན༌མེད༌ལ༌ ནས༌ས༌ སྒགས༌ཏེ༌ བོར༌དུག༌།’”
8“ཚས༌ཁན༌ནི༌ ལན༌ཏངས༌, ‘སྤོན༌བོ༌, ཏ༌རུང༌ ལོ༌ ཅིག༌ བོར༌ར༌ ཛད༌, ངའེ༌ ཀྱིར༌སྐོར༌ཏེ༌ ས༌ སྐོས༌ཏེ༌ ལུད༌ ཏང༌ཨིན༌། 9ཀལ༌ཏེས༌ སྟིང༌མ༌ ལོ༌ བྲས༌བུ༌ ཆགས༌ན༌ གྱལ༌ལ༌ སོང༌, ཨིན༌ནའང༌ མ༌ཆགས༌ན༌ ཅད༌ཨིན༌།’”
ཡེ༌ཤུའི༌ ཤབ༌བད༌དི༌ ཞག༌ག༌ ཕན༌ཅུག༌ག༌ ཛདས༌།
13:10-17
10ཤབ༌བད༌དི༌ ངལ༌ཚོའེ༌ ཞག༌ག༌ གཙོ༌བོ༌ ཡེ༌ཤུའི༌ ཡ༌ཧུ༌དཱ༌པའེ༌ དུ༌ཁང༌ཞིག༌གི༌ ནང༌ང༌ ལབ༌ཞ༌ སལ༌ ཟ༌ནེ༌ 11བུད༌ཁན༌ནི༌ ལོ༌ ཅོབ༌རྒྱད༌ནེ༌ ཕར༌ལ༌ གོང༌པོའེ༌ ཁོངས༌ཅུག༌ཁན༌ནི༌ བུ༌མོ༌ཞིག༌ ཡོད༌པིན༌, ཁོ༌ གུ༌རུ༌ སོང༌ཏེ༌ ཀྲང༌པོའ༌ ལངས༌ ཉན༌ན༌ མེད༌པིན༌། 12ཡེ༌ཤུའི༌ ཁོ༌ ཟིགས༌ས༌ཅིག༌ དུན༌ལ༌ བོད༌ད༌ ཛད༌ཏེ༌ མོལས༌, “བུ༌མོ༌, ཁྱོ༌རང༌ འི༌ ཟུ༌མོ༌ནེ༌ ཐར༌ཨིན༌།” 13ཁོང༌ངི༌ ཁོའེ༌ཀ༌ ཆག༌ བོར༌ར༌ ཛད༌ད༌ཅིག༌, ཏེན༌ན༌མལ༌ལ༌ ཁོ༌ ཀྲང༌པོའ༌ ལང༌ཉན༌ཏེ༌ དཀོན༌མཆོག༌ག༌ སྟོད༌པ༌ ཕུལས༌།
14ཨིན༌ནའང༌ དུ༌ཁང༌ངི༌ འུ༌སྐྱོང༌ངི༌ ཤབ༌བད༌དི༌ ཞག༌ག༌ ཡེ༌ཤུའི༌ ནད༌ ཕན༌ཅུག༌ག༌ ཛད༌ པ༌སང༌, སྲོ༌ ཡོངས༌ཏེ༌ མི༌ཚོགས༌ལ༌ ཟེརས༌, “ཞག༌ དྲུག༌ ལས༌ ཅོ༌ ཆོགས༌ཏེ༌ ཨིན༌ནོག༌། ཏེན༌ན༌ ཞག༌ དྲུག༌གི༌ ནང༌ང༌ ནད༌ནེ༌ ཕན༌ཅུག༌ཅེས༌ལ༌ ཡོང༌, ཨིན༌ནའང༌ ཤབ༌བད༌དི༌ ཞག༌ག༌ ཕན༌ཅུག༌ མི༌ཉན༌།”
15གཙོ༌བོའེ༌ ཁོའ༌ མོལས༌, “ཁ༌ཆོས༌པ༌ ཁྱོ༌ཞའེ༌ ལང༌ཏོ༌ དང༌ བུང༌བུ༌ ཤབ༌བད༌དི༌ ཞག༌ག༌ བྲེས༌ནེ༌ ཀྲོལ༌ཏེ༌ ཆུ༌ ཏང༌ང༌ ཁྱེར༌ར༌ མེད༌ད༌? 16ཏེ༌ནེ༌ བུད༌ཁན༌ནི༌ ལོ༌ ཅོབ༌རྒྱད༌ནེ༌ ཕར༌ལ༌ ཤེ༌ཏན༌ནི༌ ལྡམས༌ཏེ༌ བོར༌ཁན༌ནི༌ ཨབ༌ར༌ཧམ༌མི༌ པུར༌གྱུད༌ འི༌ བུ༌མོ༌བོ༌ ཤབ༌བད༌དི༌ ཞག༌ག༌ ཐར༌ཅུག༌ མ༌གོས༌ས༌?” 17ཡེ༌ཤུའི༌ ཏེ༌གུན༌ མོལ༌ལ༌ཅིག༌, ཁོང༌ངི༌ གྲ༌འོ༌གུན༌ ཁྲེལ༌བ༌ སོང༌, ཨིན༌ནའང༌ མི༌ཚོགས༌ གང༌པོ༌ ཡེ༌ཤུའི༌ ཛད༌ཁན༌ནི༌ ཧ༌ལས༌ཤེས༌སི༌ ཆག༌ལས༌གུན༌ ཐོངས༌ཏེ༌ མ༌ ཐད༌པོ༌ སོང༌།
ཉུངས༌སྐར༌རི༌ ས༌འོན༌ནི༌ རུངས༌།
13:18-21
18ཏེ༌ནེ༌ གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ གྱལ༌སྲིད༌པོ༌ ཅི༌ ཙོགས༌ ཨིན༌ནོག༌? ངའེ༌ ཏེ༌བོ༌ ཅི༌ཞིག༌ ཉམ༌པོ༌ ལྡུར༌? 19ཏེ༌བོ༌ ནི༌ ཉུང༌སྐར༌རི༌ ས༌འོན༌ ཙོགས༌ ཨིན༌ནོག༌ ཀ༌བོ༌ མི༌ཞིག༌གི༌ ཁོ༌རང༌ངི༌ ཚས༌སི༌ ནང༌ང༌ ཏབ༌བ༌ལ༌ ཁྱེརས༌, ཏེ༌བོ༌ སྐྱེས༌ཏེ༌ ལྕང༌མའ༌ ལྡན༌, ཡང༌ ནམ༌ཁའེ༌ ཅ༌གུན༌ནི༌ ཏེ༌བོའེ༌ ཡལ༌གེ༌ཀ༌ ཚངས༌ ཅོས༌།”
20ཡེ༌ཤུའི༌ ཡང༌སྐྱར༌ ཏྲིའ༌ ཛདས༌, “ངའེ༌ དཀོན༌མཆོག༌གི༌ གྱལ༌སྲིད༌པོ༌ ཅི༌ཞིག༌ ཉམ༌པོ༌ ལྡུར༌? 21ཏེ༌བོ༌ སྐྱུར༌ ཙོགས༌ ཨིན༌, ཀ༌བོ༌ བུ༌མོའེ༌, ཕེ༌ མང༌པོའེ༌ ནང༌ང༌ སྲེས༌ཏེ༌ རུས༌པ༌ སྐྱུར༌བོ༌ པག༌པའེ༌ གང༌པོའེ༌ ནང༌ང༌ ཁྱེད༌།”
གྱས༌སྒོ༌ ཕྲ༌མོའི༌ རུངས༌།
13:22-30
22གཙོ༌བོ༌ ཡེ༌ཤུ༌ གྲོང༌ཁྱེར༌ དང༌ གམ༌ཡུལ༌ གུན༌ གྱུད༌ཏེ༌ ཡེ༌རུ༌ཤ༌ལེམ༌ ཆོགས༌ལ༌ སྐྱོད༌ ཟ༌ནེ༌ ཁོང༌ངི༌ ལབ༌ཞ༌ སལ༌ལ༌ ཛདས༌། 23མི༌ཞིག༌གི༌ ཡེ༌ཤུའ༌ ཏྲིས༌, “གཙོ༌བོ༌ལེ༌ མི༌ ཉུ༌ངུན༌ཞིག༌ག༌ མ༌ནེ༌ ཐར༌པ༌ མི༌ཐོབ༌བ༌?”
ཁོང༌ངི༌ ལན༌སལས༌, 24“སྒོ༌ ཕྲ༌མོ༌ནེ༌ ཞུགས༌ཤེས༌སི༌ རྩོན༌གྲུས༌ སྲན༌ཏྲེ༌ ཅོས༌, ཅིའ༌ཟེར༌ན༌ ངའེ༌ ཁྱོ༌ཞའ༌ ཟེར༌རད༌, མི༌ མང༌པོའེ༌ ཏེ༌ནང༌ནེ༌ ཞུགས༌ཤེས༌སི༌ རྩོན༌གྲུས༌ ཅོ༌ཨིན༌, ཨིན༌ནའང༌ ཞུགས༌ མི༌ཉན༌། 25ཁང༌དག༌ ལངས༌ཏེ༌ སྒོ༌ ཅུག༌ཚར༌ར༌ཅིག༌, ཁྱོ༌ཞ༌གུན༌ ཕི༌ལོག༌ག༌ ལུས༌ཏེ༌ སྒོ༌ རྡུང༌ཨིན༌ ཇུ༌ཇུ༌, ‘གཙོ༌བོ༌ལེ༌ ང༌ཞའེ༌ ཕིའ༌ སྒོ༌ ཕེའ༌ཛད༌’ ཟེར༌ཨིན༌། ཁོའེ༌ ལན༌ཏང༌ཨིན༌, ‘ངའེ༌ ཁྱོ༌ཞའ༌ ཤེས༌ས༌མེད༌ ཡ༌ ཁྱོ༌ཞའ༌ ཀ༌ནེ༌ ཡོངས༌ཏེ༌ ཨིན༌ ངའ༌ གྱུས༌མེད༌།’ 26ཏེ༌ནེ༌ ཁྱོ༌ཞའེ༌ ཟེར༌ཨིན༌, ‘ང༌ཞའེ༌ ཉེ༌རང༌ ཉམ༌པོ༌ ཟོས༌པིན༌ ཐུངས༌པིན༌, ང༌ཞའེ༌ གྲོང༌ཁྱེར༌རི༌ ལམ༌གུན༌ནི༌ཀ༌ ཉེ༌རང༌ངི༌ ལབ༌ཞ༌ སལ༌ལ༌ ཛདས༌།’ 27ཨིན༌ནའང༌ ཁོའེ༌ ལན༌ཏང༌ཨིན༌, ‘ངའེ༌ ཁྱོ༌ཞའ༌ ཤེས༌ས༌མེད༌ ཡ༌ ཁྱོ༌ཞའ༌ ཀ༌ནེ༌ ཡོངས༌ཏེ༌ ཨིན༌ ངའ༌ གྱུས༌མེད༌, ལས༌ ངན༌པ༌ ཅོ༌ཁན༌གུན༌ ངའེ༌ ཀ༌ནེ༌ ཐག༌རིང༌ང༌ སོང༌།’”
28“ཨབ༌ར༌ཧམ༌, ཨི༌སཱག༌, ཡ༌ཀོབ༌ དང༌ ལུང༌སྟོན༌པ༌ ཚང༌མ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཡང༌ ཁྱོ༌ཞ༌གུན༌ ཕི༌ལོག༌ག༌ ཕངས༌ཁན༌བོ༌ ཁྱོ༌ཞའེ༌ ཐོང༌ང༌ཅིག༌, ཁྱོ༌ཞའ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌། 29མི༌གུན༌ ཤར༌, ལྷོ༌, ནུབ༌, བྱང༌ནེ༌ ཡོངས༌ཏེ༌, དཀོན༌མཆོག༌གི༌ གྱལ༌སྲིད༌དི༌ ནང༌ང༌ དོན༌ཏང༌ངི༌ ཕིའ༌ རང༌ངི༌ ནས༌སའེ༌ཀ༌ དུག༌ཨིན༌། 30ཏན༌ཏན༌, སྟིང༌ཇུག༌ག༌ ཡོད༌ཁན༌གུན༌ གོའ༌ ལེབ༌ཨིན༌ ཡང༌ གོའ༌ ཡོད༌ཁན༌གུན༌ སྟིང༌ཇུག༌ག༌ ལུས༌ཨིན༌།”
ཡེ༌ཤུའ༌ ཡེ༌རུ༌ཤ༌ལེམ༌པ༌གུན༌ནི༌ཀ༌ ཐུགས༌སྐྱོ༌མོ༌ སྐྱོདས༌།
13:31-35
31ཏེན༌ན༌ ཏུས༌ལ༌ ཕ༌རུ༌ཤི༌པ༌ ཁ༌ཅིག༌ ཡོངས༌ཏེ༌ ཁོང༌ང༌ ཟེརས༌, “འི༌ཀ༌ནེ༌ ཞན༌ ནས༌ས༌ཞིག༌ག༌ སྐྱོད༌ ཅིའ༌ཟེར༌ན༌ གྱལ༌པོ༌ ཧེ༌རོད༌དི༌ ཉེ༌རང༌ སད༌ཅེས༌སི༌ སྐབས༌ ཙལ༌དུག༌།”
32གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, “སོང༌ ཡང༌ ཏེ༌ ཝ༌ཙེའ༌ ཟེར༌, ‘དི༌རིང༌ དང༌ ཐོ༌རེ༌ ངའེ༌ རྡུད༌གུན༌ ཕིང༌ཅེས༌ དང༌ ནད༌པ༌གུན༌ ཕན༌ཅུག༌གད༌ ཡང༌ ཞག༌ སུམ༌པའེ༌ ཞག༌ག༌ ང༌ ཅོའ༌ ཡོང༌ཁན༌ནི༌ ལས༌པོ༌ གྲུབ༌ཨིན༌།’ 33འོ༌ན༌, དི༌རིང༌, ཐོ༌རེ༌ དང༌ ནངས༌ གུན༌ ངའེ༌ ཡེ༌རུ༌ཤ༌ལེམ༌མ༌ ཆ༌ཅེས༌སི༌ ང༌རང༌ངི༌ བེས༌པོ༌ སྒག༌ མ༌གོས༌, ཅིའ༌ཟེར༌ན༌ ཏན༌ཏན༌ ལུང༌སྟོན༌པ༌ཞིག༌ ཡེ༌རུ༌ཤ༌ལེམ༌མི༌ ཕི༌ལོག༌ག༌ མི༌སད༌།”
34“ཡེ༌རུ༌ཤ༌ལེམ༌པ༌, ཡེ༌རུ༌ཤ༌ལེམ༌པ༌, ལུང༌སྟོན༌པ༌གུན༌ སད༌ཁན༌ ཡང༌ ཁྱོ༌ཞའེ༌ཀ༌ ལམ༌ཅུག༌ག༌ ཛད༌ཁན༌གུན༌ལ༌ རྡོའ༌ གྱབས༌ཏེ༌ སད༌ཁན༌ གུན༌, ཅ༌མོའེ༌ རང༌ངི༌ ཅབ༌ཕྲུག༌གུན༌ སྐྱོབ༌ཅེས༌ལ༌ ཤོག༌པའེ༌ ཡོག༌ག༌ ལྡུའ༌ ཙོགས༌ལ༌, ངེའང༌ ཁྱོ༌ཞའ༌ ལན༌ མང༌པོ༌ ལྡུ༌ཅེས༌སི༌ དོད༌པ༌ ཅོས༌པིན༌, ཨིན༌ནའང༌ ཁྱོ༌ཞའེ༌ ངའ༌ ཅོ༌ མ༌ཅུགས༌། 35ཏ༌ ལྟོས༌, ཁྱོ༌ཞའེ༌ ཆོད༌ཁང༌ངི༌ ནང༌ང༌ ནས༌ཏེ༌ ཡོད༌ཁན༌བོ༌ བིང༌ཏེ༌ སྐྱོདས༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞའ༌ ང༌ ཡང༌སྐྱར༌ མི༌ཐོང༌ ནམ༌ཚོག༌པ༌ ཁྱོ༌ཞའེ༌, ‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌ ཨིན༌’ མི༌ཟེར༌།#སུང༌གུར༌ 118:26”
Currently Selected:
ལུ༌ཀ༌ 13: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
