ལུ༌ཀ༌ 16
16
ཆག༌ཟོད༌ ཧུ༌ཤར༌ཞིག༌གི༌ རུངས༌།
16:1-15
1གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “མི༌ ཆུག༌པོ༌ཞིག༌ག༌ ཁོའེ༌ ཆག༌ཟོད༌པོའེ༌ ནོར༌ གོད༌ལ༌ ཏང༌དུག༌ ཟེར༌ཏེ༌ སྤེ༌ར༌ ཚོར༌པ༌ 2ཁོའེ༌ ཆག༌ཟོད༌པོ༌ བོད༌ཏེ༌ ཟེརས༌, ‘ཁྱོ༌རང༌ངི༌ སྐོར༌ལ༌ ངའེ༌ ཅི༌ ཚོར༌ར༌ནོག༌? ཁྱོ༌རང༌ང༌ ཀལ༌ཁན༌ནི༌ ཁག༌ དང༌ པེ༌ནེ༌ རྩི༌རུག༌གུན༌ ཏོང༌, ཏ༌ནེ༌ཕར༌ལ༌ ངའེ༌ ཁྱོ༌རང༌ ཆག༌ཟོད༌དི༌ ཀོ༌སའེ༌ཀ༌ བོར༌ར༌མེད༌།’”
3“ཆག༌ཟོད༌པོའེ༌ ཁོ༌རང༌ང༌ ཟེརས༌, ‘ཏ༌ ངའེ༌ ཅི༌ ཅོ༌གོས༌? སྤོན༌བོའེ༌ ངའ༌ ལས༌ནེ༌ ཕིངས༌། ས༌ སྐོ༌ཅེས༌སི༌ ཁྱུད༌ ངའ༌ མེ༌རག༌, ལྩང༌ང༌ལ༌ ངའ༌ ཁྲེལ༌ཅེས༌རག༌། 4ལས༌ནེ༌ ཕིངས༌ཏེ༌ སྟིང༌ནེ༌ མི༌གུན༌ནི༌ ང༌ ཁོང༌གུན༌ནི༌ ཁང༌པའེ༌ ནང༌ང༌ དུག༌ས༌ དང༌ ཟན༌ ཏང༌ཅེས༌སི༌ ཕིའ༌ ཅི༌ ཅོ༌གོ༌ཤེས༌པོ༌ ང༌ ཧ༌གོ༌།’”
5“ཏེ༌ནེ༌ ཁོའེ༌ སྤོན༌བོའེ༌ བུ༌ལོན༌ ཏངས༌ཏེ༌ ཡོད༌ཁན༌ ཚང༌མ༌ རེ༌རེ༌ ཅོས༌ཏེ༌ བོདས༌། ཏང༌པོ༌བོའ༌ ཏྲིས༌, ‘ཁྱོ༌རང༌ང༌ ངའེ༌ སྤོན༌བོའ༌ ཤལ༌གོ༌ཤེས༌སི༌ བུ༌ལོན༌ ཙམ༌ ཡོད༌?’ 6ཁོའེ༌ ལན༌ཏངས༌, ‘ཨོ༌ལིཝ༌ཝི༌ མར༌ནག༌ ལི༌ཀྲར༌ སྟོང༌སུམ༌།’ ཁོའེ༌ ཟེརས༌, ‘གྱོགས༌པ༌ ཁྱོ༌རང༌ངི༌ བུ༌ལོན༌ནི༌ ཐོ༌ ཁྱོངས༌ཏེ༌ སྟོང༌ ཅིག༌ནང༌ཕེད༌ བྲིས༌།’”
7“ཏེ༌ནེ༌ ཁོའེ༌ ཡང༌ཅིག༌ག༌ ཏྲིས༌, ‘ཁྱོ༌རང༌ང༌ བུ༌ལོན༌ ཤལ༌གོ༌ཤེས༌ ཙམ༌ ཡོད༌?’ ཁོའེ༌ ལན༌ཏངས༌, ‘ཀྲོ༌ ཀྱི༌ལོ༌ག༌རམ༌ སྟོན༌ ཉི༌ཤུ༌’, ཡང༌ ཁོའེ༌ ཟེརས༌, ‘ཁྱོ༌རང༌ངི༌ བུ༌ལོན༌ནི༌ ཐོ༌ ཁྱོངས༌ཏེ༌ སྟོན༌ ཅུ༌རུག༌ བྲིས༌།’”
8“སྤོན༌བོའེ༌ ཀྲང༌པོ༌ མེད༌ཁན༌ནི༌ ཆག༌ཟོད༌པོའ༌, སམ༌བ༌ཅན༌ནི༌ ལས༌ ཅོས༌ཁན༌བོའེ༌ ཕིའ༌ སྟོད༌པ༌ ཏངས༌། འི༌ ཇིག༌རྟེན༌པ༌གུན༌ ཁོ༌རང༌གུན༌ནི༌ ཕྲོ༌པ༌གུན༌ ཉམ༌པོ༌ བྲེལ༌ ཅོ༌ཅེས༌སི༌ ནང༌ང༌, དཀོན༌མཆོག༌གི༌ འོད༌དི༌ ནང༌ང༌ དུག༌ཁན༌ མི༌གུན༌ནི༌ སང༌ མང༌ང༌ ཤང༌པོ༌ ཡོད༌ཏེ༌ ཨིན༌ནོག༌། 9ངའེ༌ ཁྱོ༌ཞ༌གུན༌ལ༌ ཟེར༌རད༌, ཁྱོ༌ཞའེ༌ ཇིག༌རྟེན༌ནི༌ ནོར༌གུན༌ ཞན༌མ༌ ཕན༌ཐོགས༌ ཏང༌ཅེས༌ དང༌ ཁོང༌གུན༌ ཉམ༌པོ༌ ཛ༌འོ༌ ཅོ༌ཅེས༌ལ༌ ཀོལ༌། ཏེ༌ནེ༌ ནོར༌བོ༌ མེད༌ཁན༌ ཆའ༌ཅིག༌, ནམ༌ཁའེ༌ ཁང༌པའེ༌ ནང༌ང༌ ཁྱོ༌ཞ༌གུན༌ལ༌ གའ༌སུས༌ ཞུ༌ཨིན༌།”
10“ཉུ༌ངུན༌ཞིག༌གི༌ ནང༌ང༌ ལོ༌ཁྱེལ༌ཅན༌གུན༌, མང༌པོའེ༌ ནང༌ངའང༌ ལོ༌ཁྱེལ༌ཅན༌ ལུས༌ཨིན༌། ཉུ༌ངུན༌ཞིག༌གི༌ ནང༌ང༌ ཀྲང༌པོ༌ མ༌ཅོ༌ཁན༌གུན༌ནི༌ མང༌པོའེ༌ ནང༌ངའང༌ ཀྲང༌པོ༌ མི༌ཅོ༌། 11ཀལ༌ཏེས༌ ཁྱོ༌ཞ༌ ཇིག༌རྟེན༌ནི༌ ནོར༌རི༌ ལག༌ལེན༌ ཅོ༌ཅེས༌སི༌ ནང༌ང༌ ལོ༌ཁྱེལ༌ཅན༌ མེད༌ན༌ ཏེ༌ནེ༌ སུའི༌ ཁྱོ༌ཞའ༌ ནམ༌ཁའེ༌ དེན༌བའེ༌ ནོར༌ སྟད༌ཨིན༌། 12ཀལ༌ཏེས༌ ཁྱོ༌ཞའ༌ ཞན༌མའེ༌ ནོར༌རི༌ ནང༌ང༌ ལོ༌ཁྱེལ༌ཅན༌ མེད༌ན༌, ཏེ༌ནེ༌ ཁྱོ༌ཞ༌རང༌ངི༌ ཨིན༌ཁན༌བོ༌ སུའི༌ ཁྱོ༌ཞའ༌ ཏང༌ཨིན༌།”
13“ཡོག༌པོ༌ཞིག༌གི༌ སྤོན༌བོ༌ ཉིས༌སི༌ ཞབས༌ཏོག༌ ཅོ༌ མི༌ཉན༌, ཅིག༌པོའ༌ ནཕ༌རད༌ ཡང༌ ཅིག༌པོའ༌ ཅེས༌པ༌ ཅོ༌ཨིན༌, ཡ༌ ཅིག༌པོའ༌ སྙིང༌ནེ༌ ཞབས༌ཏོག༌ ཡང༌ ཅིག༌པོའ༌ མ༌ཐད༌ད༌ ཞབས༌ཏོག༌ ཞུའ༌ནོག༌། ཏེན༌ན༌ ཙོགས༌ལ༌ དཀོན༌མཆོག༌ དང༌ ནོར༌ ཉིས༌ཀོའ༌ ཞབས༌ཏོག༌ ཞུ༌ མི༌ཉན༌།”
14ཏེ༌ ཚང༌མ༌ ཏེ༌ཀ༌ ཡོད༌ཁན༌ནི༌ ནོར༌དོད༌ཅན༌ ཕ༌རུ༌ཤི༌པ༌གུན༌ནི༌ ཚོར༌པ༌, ཁོང༌གུན༌ནི༌ ཡེ༌ཤུའ༌ ཁྲེལ༌གོད༌ ཏངས༌། 15ཡེ༌ཤུའི༌ ཁོང༌གུན༌ལ༌ མོལས༌, “མི༌གུན༌ནི༌ དུན༌ལ༌ ཁྱོ༌ཞ༌གུན༌ནི༌ ཁྱོ༌ཞ༌རང༌ ཀྲང༌པོ༌ ཨིན༌ཁན༌ སྟན༌ཅེས༌ལ༌ ཐད༌དུག༌, ཨིན༌ནའང༌ ཁྱོ༌ཞའེ༌ སྙིང༌གུན༌ དཀོན༌མཆོག༌གི༌ ཁྱེན༌ན༌ནོག༌། མི༌གུན༌ནི༌ མ༌ རིན༌ཅན༌ ཐེ༌ཁན༌བོ༌, དཀོན༌མཆོག༌གི༌ སྐུན༌དུན༌ལ༌ ཏེ༌བོ༌ ཁམ༌ལོག༌ ཐེ༌ཨིན༌།”
ཞན༌ཡང༌ ལབ༌ཞའ༌ རིག༌།
16:16-18
16གཙོ༌བོ༌ ཡེ༌ཤུའི༌ མོལས༌, “བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ བྲིའ༌ ཛད༌ཁན༌གུན༌ ཡོ༌ཧཱ༌ནན༌ནི༌ ཏུས༌ ཚག༌པ༌ ཤད༌ད༌ ཛདས༌། ཏེ༌ཏུས༌ནེ༌ ཕར༌ལ༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཨིན༌ ཨིན༌ནོག༌, ཡང༌ ཏེ༌ནང༌ང༌ ཆ༌ཅེས༌སི༌ རྩོན༌གྲུས༌ ཚང༌མའེ༌ ཅོ༌ཨིན༌ ཨིན༌ནོག༌། 17ཨིན༌ནའང༌ དཀོན༌མཆོག༌གི༌ བཀའ༌ཁྲིམས༌སི༌ ཨི༌གེ༌ ཡ༌ ཙག༌ཅིག༌ སྟོར༌རི༌ སང༌, ནམ༌ཁའ༌ དང༌ ས༌ ཉིས༌ཀོ༌ སྟོར༌ཅེས༌པོ༌ ལ༌མོ༌ ཨིན༌།”
18“ཁོ༌རང༌ངི༌ ན༌མ༌ ཅད༌ཏེ༌ ཞན༌ བུ༌མོ༌ཞིག༌ ཉམ༌པོ༌ ན༌མ༌ ཅོ༌ཁན༌བོའེ༌ ལོག༌ཡེམ༌ ཅོས༌ཏེ༌ ཨིན༌ནོག༌, ཡང༌ ཅད༌ཁན༌ནི༌ བུ༌མོ༌ ཉམ༌པོ༌ ན༌མ༌ ཅོ༌ཁན༌བོའེང༌ ལོག༌ཡེམ༌ ཅོས༌ཏེ༌ ཨིན༌ནོག༌།”
མི༌ ཆུག༌པོ༌ཞིག༌ དང༌ ལ༌ཟར༌རས༌།
16:19-31
19“ཆུག༌པོ༌ མི༌ཞིག༌ ཀོ༌ཤེན༌ དང༌ རི༌ཤེམ༌མི༌ ཀོས༌ལག༌ རིན༌ཅན༌ གོན༌ཏེ༌, ཞག༌ཏང༌ གྲོན༌ཏང༌ཨིན༌ སྐྱིད༌པོ༌ ཅོ༌ཨིན༌ དུག༌གད༌པིན༌། 20ཁོའེ༌ སྒོའེ༌ དུན༌ལ༌ ཟུགས༌པོ༌ གང༌པོའ༌ ཤོའ༌ བིང༌ཏེ༌ ཡོད༌ཁན༌ ལ༌ཟར༌རས༌ ཟེར༌ཁན༌ནི༌ ལྩང༌ཁན༌ཞིག༌ དུག༌གད༌པིན༌། 21ཁོའེ༌ མི༌ ཆུག༌པོ༌བོའེ༌ ཅོག༌ཙེ༌ ཀ༌ནེ༌ བུད༌ཁན༌གུན༌ ཟའ༌ཅེས༌སི༌ དོད༌པ༌ ཅོའད༌པིན༌, ཏེ༌ཀ༌ ནན༌མ༌ ཁྱི༌གུན༌ ཡོངས༌ཏེ༌ ཁོའེ༌ མ༌ཁའ༌གུན༌ ལྡག༌གད༌པིན༌།”
22“ཞག༌ཤིག༌ ལྩང༌ཁན༌བོ༌ ཤི༌, ཡང༌ དཀོན༌མཆོག༌གི༌ ཕོ༌ཉ༌གུན༌ སྐྱོད༌ཏེ༌ ཁོ༌ ཨབ༌ར༌ཧམ༌ ཡོད༌ས༌ ཁུར༌ཏེ༌ ཁྱེར༌ར༌ ཛདས༌། མི༌ ཆུག༌པོ༌བོའང༌ ཤི༌ ཡང༌ སུབས༌། 23ཉལ༌ཝའེ༌ ནང༌ང༌ རྡུག༌ངལ༌ སྲན༌ཏྲེ༌ ཐོང༌ཨིན༌, ཁོའེ༌ ནམ༌ཁའ༌ ལྟས༌པ༌ ཐག༌རིང༌ཞིག༌ནེ༌ ཨབ༌ར༌ཧམ༌ དང༌ ཁོང༌ངི༌ དུན༌ལ༌ ལ༌ཟར༌རས༌ ཐོང༌།”
24“ཁོའེ༌ སྐད༌ ཆེན༌མོ༌ ཉམ༌པོ༌ ཟེརས༌, ‘ཨ༌བ༌ ཨབ༌ར༌ཧམ༌, ངའེ༌ཀ༌ སྙིང༌རྗེ༌ ཛདས༌ཏེ༌ ལ༌ཟར༌རས༌སི༌ ཛི༌གུ༌བོ༌ ཆུའི༌ ནང༌ང༌ ཅུགས༌ཏེ༌ ངའེ༌ ལྕེ༌བོ༌ ཀྲང༌མོ༌ ཅོ༌ ཅུག༌ག༌ ཀལ༌ལ༌ ཛད༌དའང༌, ཅིའ༌ཟེར༌ན༌ ང༌ འི༌ མེ༌ ནང༌ང༌ རྡུག༌ངལ༌ ཆེན༌མོ༌ ཐོང༌ང༌རག༌།’”
25“ཨིན༌ནའང༌ ཨབ༌ར༌ཧམ༌མི༌ ལན༌ཏངས༌, ‘བུ༌ཚ༌ ཨིད༌ཏུ༌ ཅོས༌, ཁྱོ༌རང༌ང༌ རང༌ངི༌ མི༌ཚེ༌ ནང༌ང༌ སྐྱིད༌པོ༌གུན༌ ཐོབ༌ ཟ༌ནེ༌ ལ༌ཟར༌རས༌ལ༌ རྡུག༌ངལ༌གུན༌ ཐོང༌ཏེ༌ ཨིན༌པིན༌། ཏ༌ འི༌ཀ༌ ལ༌ཟར༌རས༌ལ༌ སྐྱིད༌པོ༌ ཡང༌ ཁྱོ༌རང༌ང༌ རྡུག༌ངལ༌ ཐོང༌དུག༌, 26ཏེ༌ ཚང༌མ༌ མ༌ཚད༌ ང༌ཞའ༌ དང༌ ཁྱོ༌རང༌ངི༌ པར༌ལ༌ ལུང༌པ༌ ཆེན༌མོ༌ཞིག༌ ཡོད༌། འི༌ཀ༌ནེ༌ ཁྱོ༌རང༌ ཆོགས༌ལ༌ ཆའ༌ ཐད༌ནའང༌ ཆའ༌ མི༌ཉན༌, ཡང༌ ཏེ༌ཀ༌ནེ༌ སུ༌ཞིག༌གའང༌ ང༌ཞའ༌ ཡོད༌ས༌ ཡོང༌ མི༌ཉན༌།’”
27“ཁོའེ༌ ཟེརས༌, ‘ཇུ༌ཇུ༌ ཡབ༌ ཨབ༌ར༌ཧམ༌, ལ༌ཟར༌རས༌ ངའེ༌ ཨ༌བའེ༌ ཁང༌པ༌ ཀལ༌ལ༌ ཛད༌ཏེ༌ 28ངའེ༌ ཨ༌ཅོ༌ནོ༌ ལྔ༌ཀོའ༌ སྡིག༌པའེ༌ མི༌ཚེ༌ ཕུད༌ཅེས༌ མ༌ཕང༌ན༌ ཁོང༌གུན༌ནའང༌ འི༌ བར༌དོ༌ཅན༌ནི༌ ནས༌སའེ༌ ནང༌ང༌ ལེབ༌ཨིན༌ མོལ༌ཏེ༌ སྤང༌པུད༌ ཅུག༌ག༌ ཛད༌དའང༌།’”
29“ཨིན༌ནའང༌ ཨབ༌ར༌ཧམ༌མི༌ ལན༌ཏངས༌, ‘མོ༌ཟེས༌ དང༌ ཞན༌ ལུང༌སྟོན༌པ༌གུན༌ནི༌ བྲི༌ཁན༌གུན༌ ཁོང༌གུན༌ནི༌ ལག༌ག༌ ཡོད༌ཏེ༌ ཨིན༌ནོག༌, ཏེ༌གུན༌ལ༌ ཉན༌གོས༌།’”
30“ཁོའེ༌ ཟེརས༌, ‘ཡབ༌ ཨབ༌ར༌ཧམ༌ ཏེ༌ཟུག༌ མ༌མོལ༌། ཀལ༌ཏེས༌ ཤི༌ཁན༌གུན༌ནེ༌ ཕྲོ༌ནེ༌ ཅིག༌ ཁོང༌གུན༌ནི༌ཀ༌ ཆ༌ན༌, ཁོང༌གུན༌ནི༌ གྱོད༌པ༌ ཅོས༌ཏེ༌ སེམས༌ གྱུར༌ཨིན༌།’”
31“ཨབ༌ར༌ཧམ༌མི༌ ཁོའ༌ ཟེརས༌, ‘ཀལ༌ཏེས༌ ཁོང༌གུན༌ནི༌ མོ༌ཟེས༌ དང༌ ལུང༌སྟོན༌པ༌གུན༌ནི༌ བྲིས༌ཁན༌གུན༌ ཁའ༌ མ༌ཉན༌ན༌, ཤི༌ཁན༌གུན༌ནི༌ ཕྲོ༌ནེ༌ ལངས༌ཏེ༌ ཆའ༌ཁན༌བོའེ༌ ཁའང༌ ཁོང༌གུན༌ནི༌ མི༌ཉན༌།’”
Currently Selected:
ལུ༌ཀ༌ 16: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
