ལུ༌ཀ༌ 19
19
ཟཀ༌ཀཱ༌འེས༌ ཁྲལ༌ནེན༌ཁན༌ནི༌ སྐོར༌།
19:1-10
1གཙོ༌བོ༌ ཡེ༌ཤུ༌ ཡེ༌རི༌ཀོ༌ གྲོང༌ཁྱེར༌ གྱུད༌ཏེ༌ སྐྱོད༌ ཟ༌ནེ༌, 2ཏེ༌རུ༌ ཁྲལ༌ནེན༌ཁན༌ནི༌ སྤོན༌བོ༌ ཟཀ༌ཀཱ༌འེས༌ ཟེར༌ཁན༌ མི༌ ཆུག༌པོ༌ཞིག༌ ཡོད༌པིན༌། 3ཁོའ༌ ཡེ༌ཤུ༌ ཇལ༌ཅེས༌སི༌ དོད༌པ༌ ཡོད༌པིན༌, ཨིན༌ནའང༌ མི༌ཚོགས༌ དང༌ ཁོའེ༌ གོ༌བོ༌ ཆུ༌ངུན༌ ཡོད༌ཅེས༌པོའེ༌ ཡེ༌ཤུ༌ ཇལ༌ མ༌ཉན༌། 4ཁོ༌ སྔུན༌ལ༌ བང༌ཏངས༌ཏེ༌ ཡེ༌ཤུའ༌ ལྟ༌ཅེས༌ལ༌ ཁོང༌ སྐྱོད༌ཅེས༌ཅན༌ནི༌ ལམ༌མི༌ཀ༌ ཡོད༌ཁན༌ནི༌ སི༌ཀ༌མོར༌རི༌ ལྕང༌མའེ༌ཀ༌ ཛགས༌།
5ཡེ༌ཤུ༌ ཏེ༌ ནས༌སའེ༌ཀ༌ ལེབ༌བ༌ཅིག༌, ཀེན༌ལ༌ ཟིགས༌ཏེ༌ ཁོའ༌ མོལས༌, “ཟཀ༌ཀཱ༌འེས༌, ཡོག༌ག༌ གྱོགས༌པ༌ བབས༌ཏེ༌ ཡོང༌། དི༌རིང༌ ངའ༌ ཁྱོ༌རང༌ངི༌ ཁང༌པ༌ བྲང༌ས༌ དུག༌གོས༌།” 6ཏེ༌ནེ༌ ཁོ༌ གྱོགས༌པ༌ བབས༌ཏེ༌, མ༌ ཐད༌པོ༌ ཉམ༌པོ༌ ཡེ༌ཤུའ༌ ཁོ༌རང༌ངི༌ ཁང༌པ༌ གའ༌སུས༌ ཞུས༌། 7ཏེ༌རུ༌ ཡོད༌ཁན༌ནི༌ མི༌ཚང༌མའེ༌ ཏེ༌བོ༌ ཐོང༌ཏེ༌ བ༌ག༌བོ༌གེ༌ ཤད༌ཨིན༌ ཟེརས༌, “ཁོང༌ མི༌ སྡིག༌ཅན༌ ཉམ༌པོ༌ ཞུགས༌ས༌ སྐྱོད༌།”
8ཟཀ༌ཀཱ༌འེས༌ ལངས༌ཏེ༌ གཙོ༌བོའ༌ ཟེརས༌, “གཙོ༌བོ༌ལེ༌ ཟིགས༌སའང༌ ངའ༌ ཡོད༌ཁན༌ནི༌ ནོར༌ ཕེད༌པོ༌ ངའེ༌ ཉལ༌བ༌ཅན༌གུན༌ལ༌ ཏང༌ཨིན༌ ཡང༌ ཀལ༌ཏེས༌ ངའེ༌ སུ༌ཞིག༌ག༌ གོབ༌སྐོར༌ཏེ༌ པེ༌ནེ༌ ལེན༌ཏེ༌ ཡོད༌ན༌, ཏེ༌བོའེ༌ ཞི༌ལྡབ༌ ངའེ༌ ལོགས༌ཏེ༌ ཏང༌ཨིན༌།”
9ཡེ༌ཤུའི༌ ཁོའ༌ མོལས༌, “དི༌རིང༌ འི༌ ཁང༌པའེ༌ ནང༌ང༌ ཐར༌པ༌ ལེབས༌ཏེ༌ ཨིན༌ ཅིའ༌ཟེར༌ན༌ ཁོའང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌། 10མི༌རིགས༌སི༌བུ༌ སྟོར༌ཁན༌གུན༌ ཙལ༌ཅེས༌ དང༌ སྐྱོབ༌ཅེས༌ལ༌ ཡོངས༌ཏེ༌ ཨིན༌།”
ཡོག༌པོ༌ རྕུའི༌ རུངས༌།
19:11-27
11མི༌གུན༌ནི༌ ཉན༌ཨིན༌ ཡོད༌ ཟ༌ནེ༌, གཙོ༌བོ༌ ཡེ༌ཤུའི༌ ཁོང༌གུན༌ལ༌ རུངས༌ཤིག༌ ཤད༌ད༌ ཛདས༌ ཅིའ༌ཟེར༌ན༌ ཁོང༌ ཡེ༌རུ༌ཤ༌ལེམ༌ གྱལ༌སའེ༌ ཉེ༌མོའ༌ ཡོད༌པིན༌ ཡང༌ མི༌གུན༌ནི༌ དཀོན༌མཆོག༌གི༌ གྱལ༌སྲིད༌ ཏེན༌ན༌ ཟ༌ནེ༌ སྔོན༌ཅེས༌ ཨིན༌ནོག༌ སམ༌མད༌པིན༌། 12ཁོང༌ངི༌ མོལས༌, “སྐུ༌ཁྲག༌ཞིག༌ ཡུལ༌ ཐག༌རིང༌ཞིག༌ག༌ གྱལ༌པོའེ༌ ཀོ༌ས༌ ལེན༌ཏེ༌ ལོགས༌ཏེ༌ ཡོང༌ཅེས༌ལ༌ སོང༌། 13ཁོ༌ ཆའེ༌ སང༌ སྔུན༌ལ༌ ཁོ༌རང༌ངི༌ ཡོག༌པོ༌ རྕུ༌ བོད༌ཏེ༌, ཁོང༌ རེ༌རེའ༌ ཟླ༌ཝ༌ སུམ༌མི༌ ལ༌ཆའ༌ དྲན༌དྲའེ༌ པེ༌ནེ༌ ཏངས༌ཏེ༌ ཟེརས༌, ‘ང༌ ལོགས༌ཏེ༌ ཡོང༌ཡོང༌ ཚག༌པ༌ འི༌ པེ༌ནེ༌བོའ༌ ཚོང༌ལེན༌ ཅོས༌།’ 14ཨིན༌ནའང༌ ཏེ༌ ཡུལ༌ལི༌ མི༌ཚང༌མའེ༌ ཁོའ༌ ནཕ༌རད༌ ཅོས༌པ༌, ཁོའེ༌ སྟིང༌རང༌ནེ༌ མི༌ ཁ༌ཅིག༌, ‘འི༌ མི༌བོ༌ ང༌ཞའེ༌ གྱལ༌པོ༌ ཅོའ༌ལ༌ ང༌ཞ༌གུན༌ ཐད༌ད༌ མེ༌རག༌ ཟེར༌ར༌ལ༌ ཀལས༌།’”
15“ཨིན༌ནའང༌ ཁོ༌ གྱལ༌པོ༌ གྱུར༌ཏེ༌ ལོག༌ཏེ༌ ཡོངས༌། ཏེ༌ནེ༌ ཚོང༌ ཏངས༌ཏེ༌ ཙམ༌ ཁྱེ༌ ཐོབ༌ཏོག༌ ལྟ༌ཅེས༌ལ༌ ཁོའེ༌ པེ༌ནེ༌ ཏངས༌ཁན༌ནི༌ ཡོག༌པོ༌གུན༌ བོདས༌། 16ཡོག༌པོ༌ ཏང༌པོ༌ ཡོངས༌ཏེ༌ ཟེརས༌, ‘སྤོན༌བོ༌ལེ༌, ཉེ༌རང༌ངི༌ པེ༌ནེ༌ ཏང༌ཁན༌བོའེ༌ རྕུ༌ལྡབ༌པོ༌ ངའ༌ ཇོར༌།’”
17“སྤོན༌བོའེ༌ ཁོའ༌ ཟེརས༌, ‘གྱལ༌ལ༌ ཅོས༌, ཡོག༌པོ༌ ཟང༌པོ༌, ཁྱོ༌རང༌ ཉུ༌ངུན༌ཞིག༌གི༌ ནང༌ང༌ ཨིད༌ཤེས༌ཅན༌ ལུས༌པ༌, ཁྱོ༌རང༌ང༌ ངའེ༌ གྱལ༌ས༌ རྕུའི༌ཀ༌ ཝང༌ཆ༌ ཏང༌ངད༌།’”
18“ཡོག༌པོ༌ ཉིས༌པ༌བོ༌ ཡོངས༌ཏེ༌ ཟེརས༌, ‘སྤོན༌བོ༌ལེ༌, ཉེ༌རང༌ངི༌ པེ༌ནེ༌ ཏང༌ཁན༌བོའེ༌ ལྔ༌ལྡབ༌པོ༌ ངའ༌ ཇོར༌།’”
19“སྤོན༌བོའེ༌ ཁོའ༌ ཟེརས༌, ‘ཁྱོ༌རང༌ང༌ གྱལ༌ས༌ ལྔའེ༌ཀ༌ ཝང༌ཆ༌ ཏང༌ངད༌།’”
20“ཏེ༌ནེ༌ ཡོག༌པོ༌ སུམ༌པ༌ ཡོངས༌ཏེ༌ ཟེརས༌, ‘སྤོན༌བོ༌, ཉེ༌རང༌ངི༌ པེ༌ནེ༌ ངའེ༌ ལག༌ཕིས༌སི༌ ནང༌ང༌ ཏུམས༌ཏེ༌ སྦས༌ཏེ༌ བོར༌པིན༌, ཏ༌ ལོགས༌ཏེ༌ ནམས༌། 21ང༌ ཉེ༌རང༌ང༌ ཇིགས༌ ཅིའ༌ཟེར༌ན༌ ཉེ༌རང༌ སྤོན༌བོ༌ སྙིང༌རྗེ༌ མེད༌ཁན༌, མ༌ཏང༌ང༌ ལེན༌ཁན༌ དང༌ མ༌ཏབ༌ཁན༌ནི༌ ཀ༌ནེ༌ རྔ༌ཁན༌ ཨིན༌ནོག༌།’”
22“སྤོན༌བོའེ༌ ཁོའ༌ ཟེརས༌, ‘ཡོག༌པོ༌ ངན༌པ༌, ཁྱོ༌རང༌ངི༌ ཟེར༌ཁན༌གུན༌ གྱུད༌ཏེ༌ ངའེ༌ ཁྱོ༌རང༌ང༌ ཁྲིམས༌ཅད༌ཨིན༌། ང༌ སྙིང༌རྗེ༌ མེད༌ཁན༌ ཡང༌ ང༌ མ༌ཏང༌ང༌ ལེན༌ཁན༌ དང༌ མ༌ཏབ༌ཁན༌ནི༌ ཀ༌ནེ༌ རྔ༌ཁན༌ ཨིན༌ཁན༌བོ༌ གྱུས༌ཡོད༌ཏེའང༌, 23ཁྱོ༌རང༌ངི༌ ངའེ༌ པེ༌ནེ༌བོ༌ མུལ༌ཛོད༌ཁང༌ངི༌ ནང༌ང༌ ཅི༌ཕིའ༌ མ༌ཏངས༌པིན༌? ཀལ༌ཏེས༌ ཏངས༌པིན༌ན༌, ང༌ ཡོངས༌ཏེ༌ ཕར༌ཉམ༌པོ༌ ང༌རི༌ པེ༌ནེ༌ ལེན༌ཏེ༌ ཡོད༌གྲོ༌།’”
24“ཏེ༌ནེ༌ སྤོན༌བོའེ༌ ཏེ༌ཀ༌ ལངས༌ཏེ༌ ཡོད༌ཁན༌གུན༌ལ༌ ཟེརས༌, ‘ཁོའེ༌ ཀ༌ནེ༌ པེ༌ནེ༌བོ༌ ལེན༌ཏེ༌ རྕུ༌ལྡབ༌ ཇོར༌ཁན༌བོའ༌ ཏོང༌།’”
25“ཁོང༌གུན༌ནི༌ ཟེརས༌, ‘སྤོན༌བོ༌, ཁོའེ༌ ལག༌ག༌ རྕུ༌ལྡབ༌ མང༌ང༌ པེ༌ནེ༌ ཡོད༌ཏེ༌ ཨིན༌ནོག༌།’”
26“སྤོན༌བོའེ༌ ལན༌ཏངས༌, ‘འོ༌ན༌, ཏངས༌ཁན༌བོ༌ གྱལ༌ལ༌ ཅོས༌ཏེ༌ ཀོལ༌ཁན༌གུན༌ལ༌ མང༌ང༌ ཏང༌ཨིན༌, ཨིན༌ནའང༌ མ༌ཀོལ༌ཁན༌གུན༌ནི༌ ཀ༌ནེ༌ ཉུ༌ངུན༌ ཡོད༌ཁན༌བོའང༌ ཁྱེར༌ཨིན༌། 27ཏ༌ ངའ༌ གྱལ༌པོ༌ གྱུར༌ཏེ༌ ཁོང༌གུན༌ནི༌ཀ༌ ཝང༌སྲུལ༌ མ༌ཐད༌ཁན༌ནི༌ ངའེ༌ གྲ༌འོ༌གུན༌ ངའེ༌ དུན༌ལ༌ ཁྱོངས༌ཏེ༌ སོད༌།’”
ཡེ༌ཤུའ༌ གྱལ༌པོའེ༌ ཚུལ༌ལ༌ གའ༌སུས༌ ཞུས༌།
19:28-40
28ཏེ༌གུན༌ མོལ༌ ཚར༌ར༌ཅིག༌ གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ནི༌ སྔུན༌སྔུན༌ལ༌ ཡེ༌རུ༌ཤ༌ལེམ༌མ༌ སྐྱོད༌། 29ཁོང༌ ཨོ༌ལིཝ༌ཝི༌ རི༌ཀ༌#19:29 ཏེ༌ རི༌བོའི༌ཀ༌ ཨོ༌ལིཝ༌ཝི༌ ལྕང༌མ༌ མང༌པོ༌ སྐྱེས༌ཏེ༌ ཡོད༌པ༌ ཏེ༌བོའ༌ ཨོ༌ལིཝ༌ཝི༌ རི༌ ཟེར༌རད༌པིན༌། ཡོད༌ཁན༌ བེད༌ཕ༌གེ༌ དང༌ བེད༌ཐཱ༌ནི༌ གྲོང༌སེབ༌གུན༌ལ༌ ལེབ༌ཀྱིས༌ ཡོད༌ད༌ཅིག༌, ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌ ཉིས༌ སྔུན༌ལ༌ ལམ༌ཅུག༌ག༌ ཛད༌ཏེ༌, 30མོལས༌, “འ༌ གྲོང༌སེབ༌བི༌ ནང༌ང༌ སོང༌, ཏེ༌རུ༌ ལེབ༌བ༌ཅིག༌, སུའང༌ མ༌ཞོན༌ཁན༌ནི༌ བུང༌སར༌ཞིག༌ ཏགས༌ཏེ༌ ཐོང༌ཅེན༌, ཏེ༌བོ༌ ཀྲོལ༌ཏེ༌ འི༌རུ༌ ཁྱོང༌། 31ཀལ༌ཏེས༌ སུ༌ཞིག༌གི༌, ‘ཁྱོ༌ཞའེ༌ བུང༌སར༌བོ༌ ཅི༌ཕིའ༌ ཀྲོལ༌ལད༌’ ཟེར༌ན༌, ‘གཙོ༌བོའ༌ སྒོས༌དོམ༌ དུག༌’ ཟེར༌།”
32སྔུན༌ལ༌ ཀལ༌ཁན༌ནི༌ ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ མོལ༌ཁན༌ ནང༌ཞིན༌ ཐོང༌། 33བུང༌སར༌བོ༌ ཀྲོལ༌ ཟ༌ནེ༌ ཏེ༌བོའེ༌ དག༌པོ༌གུན༌ནི༌ ཁོང༌གུན༌ལ༌ ཏྲིས༌, “བུང༌སར༌བོ༌ ཅི༌ཕིའ༌ ཀྲོལ༌ལད༌?”
34ཁོང༌གུན༌ནི༌ ལན༌ཏངས༌, “གཙོ༌བོའ༌ སྒོས༌དོམ༌ དུག༌།” 35ཏེ༌ནེ༌ ཁོང༌གུན༌ནི༌ བུང༌སར༌བོ༌ ཡེ༌ཤུ༌ ཡོད༌ས༌ ཁྱོངས༌ཏེ༌ ཁོང༌རང༌གུན༌ནི༌ ཀོས༌ ཏེ༌བོའ༌ སྟདས༌ ཡང༌ ཡེ༌ཤུ༌ ཏེ༌བོའེ༌ཀ༌ ཞོནས༌།
36ཡེ༌ཤུ༌ སྐྱོད༌ ཟ༌ནེ༌, མི༌གུན༌ནི༌ རང༌རང༌ངི༌ ཀོས༌ ཁོང༌ སྐྱོད༌སའེ༌ ལམ༌མི༌ཀ༌ ཏིངས༌། 37ཁོང༌ ཨོ༌ལིཝ༌ཝི༌ རི༌ནེ༌ ཐུར༌ལ༌ ཆའ༌ཁན༌ནི༌ ལམ༌མི༌ ནས༌སའེ༌ ཉེ༌མོའ༌ ལེབ༌བ༌ཅིག༌, ཁོང༌ང༌ བྲངས༌ཏེ༌ ཡོང༌ཁན༌ ཚང༌མའེ༌, ཁོང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཐོང༌ པ༌སང༌ གའ༌མོ༌ ཉམ༌པོ༌ དཀོན༌མཆོག༌ག༌ སྟོད༌པ༌ ཕུལ༌ཅེས༌ གོ༌ཟུགས༌ཏེ༌ ཟེརས༌,
38“‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌
སྐྱོད༌ཁན༌ནི༌ གྱལ༌པོ༌ ཅིན༌ལབས༌ཅན༌།’#སུང༌གུར༌ 118:26
ནམ༌ཁའེ༌ ནང༌ང༌ ཞི༌དེ༌ དང༌ ནམ༌ཁའེ༌ ཐོ༌ཤོག༌ག༌
ཞུགས༌ཁན༌ནི༌ དཀོན༌མཆོག༌ག༌ སྤལ༌ ཁྱོང༌ཨིན༌།”
39ཏེ༌ མི༌ཚོགས༌སི༌ ཕྲོ༌ནེ༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, “ལོབ༌བོན༌ལེ༌, ཉེ༌རང༌ངི༌ ལོབ༌ཕྲུགས༌གུན༌ལ༌ ཁའ༌སྐྱེའ༌ ཛད༌ཏེ༌ ཏེ༌ཟུག༌ ཟེར༌ཅེས༌ནེ༌ སྒག༌ག༌ ཛད༌དའང༌།”
40ཁོང༌ངི༌ ལན༌སལས༌, “ངའེ༌ ཁྱོ༌ཞའ༌ ཟེར༌རད༌, ཀལ༌ཏེས༌ ཁོང༌གུན༌ ཅུབ༌ཅད༌ན༌, འི༌ རྡོའ༌གུན༌ནི༌ ཀུ༌ཅོ༌ ཏང༌ཏེ༌ སྟོད༌པ༌ ཕུལ༌ཨིན༌།”
ཡེ༌ཤུ༌ ཡེ༌རུ༌ཤ༌ལེམ༌པ༌གུན༌ནི༌ ཕིའ༌ ངུའ༌ ཛདས༌།
19:41-44
41ཡེ༌རུ༌ཤ༌ལེམ༌ གྱལ༌སའེ༌ ཉེ༌མོ༌ ལེབ༌བ༌ཅིག༌ གྱལ༌སའ༌ ཟིགས༌ཏེ༌ གཙོ༌བོ༌ ཡེ༌ཤུ༌ ཤུམ༌ས༌ ཛདས༌ 42ཡང༌ ཁོང༌ངི༌ མོལས༌, “ཀལ༌ཏེས༌ ཁྱོ༌ཞའ༌ ཡེ༌རུ༌ཤ༌ལེམ༌པ༌གུན༌ནི༌ དི༌རིང༌ངི༌ ཞག༌ག༌ ཞི༌དེ༌ ཐོབ༌ཅེས༌སི༌ ལམ༌བོ༌ ཤེས༌པིན༌ན༌, ཁྱོ༌ཞའ༌ ཐོབ༌ཏེ༌ ཡོད༌གྲོ༌ ཨིན༌ནའང༌ དག༌ས༌ ཏེ༌བོ༌ ཁྱོ༌ཞ༌གུན༌ནི༌ མིག༌ནེ༌ སྦས༌ཏེ༌ བོར༌ཏེ༌ ཨིན༌ནོག༌། 43ཁྱོ༌ཞ༌གུན༌ནི༌ཀ༌ ཏེ༌ ཞག༌པོ༌ ལེབ༌ཨིན༌ ནམ༌ ཁྱོ༌ཞའེ༌ གྲ༌འོ༌གུན༌ནི༌ ཁྱོ༌ཞའེ༌ གྱལ༌ས༌ ཀྱིར༌སྐོར༌ཏེ༌ རྩིག༌པ༌ རྩིགས༌ཏེ༌ ཆོགས༌ ཚང༌མ༌ནེ༌ ཁྱོ༌ཞའེ༌ཀ༌ སྤུང༌གོལ༌ ཅོ༌ཨིན༌། 44གྱལ༌ས༌བོ༌ ཁྲེས༌ཏོར༌ ཅོས༌ཏེ༌ མི༌གུན༌ སད༌ཏེ༌ མེད༌ཁན༌ ཅོ༌ཨིན༌། རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌ ཅིའ༌ཟེར༌ན༌ དཀོན༌མཆོག༌ ཁྱོ༌ཞའ༌ སྐྱོབ༌བ༌ ཡོང༌ཁན༌ནི༌ ཏུས༌པོ༌ ཁྱོ༌ཞ༌གུན༌ནི༌ ངོ༌ མ༌ཤེས༌།”
ཚོང༌པ༌གུན༌ ཆོད༌ཁང༌ངི༌ ནང༌ནེ༌ ཕིང༌ང༌ ཛདས༌།
19:45-48
45ཏེ༌ནེ༌ གཙོ༌བོ༌ ཡེ༌ཤུ༌ ཆོད༌ཁང༌ང༌ སྐྱོད༌ཏེ༌ སྲོག༌ཆོད༌ལ༌ ཕུལ༌ཅེས༌སི༌ སེམས༌ཅན༌ ཙོང༌ཁན༌གུན༌ ཕིང༌ཅེས༌ གོ༌ཟུག༌ ཛདས༌། 46ཡེ༌ཤུའི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ཁང༌པའ༌ མོས༌ལམ༌ ཞུས༌སའེ༌ ཁང༌པ༌ ཟེར༌ཨིན༌’,#ཡེ༌ཤ༌ཡཱ༌ 56:7 ཨིན༌ནའང༌ ‘ཁྱོ༌ཞ༌གུན༌ནི༌ འི༌བོ༌ ཅག༌པ༌གུན༌ནི༌ བའོ༌ ཅོས༌ཏེ༌ དུག༌།’#ཡེ༌རེམ༌ཡཱ༌ 7:11 ”
47ཞག༌ཏང༌ ཁོང༌ངི༌ ཆོད༌ཁང༌ངི༌ ནང༌ང༌ ལབ༌ཞ༌ སལ༌ལ༌ ཛད༌དད༌པིན༌། བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡུལ༌མིའི༌ འུ༌སྐྱོང༌གུན༌ནི༌ ཁོང༌ སད༌ཅེས༌སི༌ ཐབས༌ ཙལ༌ཅེས༌ གོ༌ཟུག༌། 48ཨིན༌ནའང༌ ཁོང༌གུན༌ལ༌ སྐབས༌ མ༌ཐོབ༌ ཅིའ༌ཟེར༌ན༌ ཡེ༌ཤུའི༌ ལབ༌ཞ༌ ཆུ༌ངུན༌ཞིག༌གའང༌ བུད༌ མ༌ཅུག༌ག༌ ཉན༌ཅེས༌ལ༌ མི༌ཚང༌མའ༌ ཐད༌དད༌པིན༌།
Currently Selected:
ལུ༌ཀ༌ 19: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
