ལུ༌ཀ༌ 9
9
ཡེ༌ཤུའི༌ ལོབ༌ཕྲུགས༌ རྕུག༌ཉིས༌པོ༌ ཀལ༌ལ༌ ཛདས༌།
9:1-9
1གཙོ༌བོ༌ ཡེ༌ཤུའི༌ ལོབ༌ཕྲུགས༌ རྕུག༌ཉིས༌པོའ༌ བོད༌ད༌ ཛད༌ཏེ༌ རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌ ཚང༌མ༌ ཕིང༌ཅེས༌ དང༌ ནད༌ ཕན༌ཅུག༌ཅེས༌སི༌ ཁྱུད༌ དང༌ ཝང༌ཆ༌ སལ༌ལ༌ ཛདས༌། 2ཡང༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཅེས༌ དང༌ ཟུ༌མོ༌ ཡོང༌ཁན༌གུན༌ ཕན༌ཅུག༌ཅེས༌ལ༌ ཏེ༌ཀ༌ནེ༌ ལམ༌ཅུག༌ག༌ ཛདས༌། 3ཁོང༌གུན༌ལ༌ མོལས༌, “ཁྱོ༌རང༌གུན༌ནི༌ བེས༌སི༌ ཕིའ༌ གྲུལ༌ཅེས༌སི༌ བེར༌ཀ༌, ཡ༌ ཇོ༌ལ༌, ཡ༌ ཁར༌ཇི༌ ཡ༌ པེ༌ནེ༌ ཡ༌ ཀོས༌ལག༌ ཐེ༌བ༌ མ༌ཁུར༌། 4ཁྱོ༌ཞའ༌ དུག༌ས༌ ཏང༌ཁན༌ནི༌ ཏེན༌ན༌ ཁང༌པའེ༌ ནང༌ང༌ དུག༌ ནམ༌ ཚོག༌པ༌ ཏེ༌ གྲོང༌ཁྱེར༌ནེ༌ བིང༌ཏེ༌ མི༌ཆའ༌། 5ཀལ༌ཏེས༌ གྲོང༌ཁྱེར༌ཞིག༌གི༌ ནང༌ང༌ སུ༌ཞིག༌གིའང༌ ཁྱོ༌ཞའ༌ གའ༌སུས༌ མ༌ཅོ༌ན༌, ཏེ༌ གྲོང༌ཁྱེར༌ནེ༌ བིང༌ཏེ༌ ཆའ༌ ཟ༌ནེ༌ རང༌ངི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ སྟོན༌།”
6ཁོང༌གུན༌ གམ༌ཡུལ༌ནེ༌ གམ༌ཡུལ༌ལ༌ སྐྱོད༌ཏེ༌ ཀ༌རུང༌ས༌ གའ༌མོའེ༌ ནས༌ཚུལ༌ ཤདས༌ ཡང༌ ཟུ༌མོ༌ ཡོང༌ཁན༌གུན༌ ཕན༌ཅུག༌ག༌ ཛདས༌།
7ཀའ༌ལོན༌ ཧེ༌རོད༌ལ༌ ཡེ༌ཤུའི༌ ཛད༌ཁན༌ ཚང༌མ༌ ཚོར༌པ༌ ཐ༌མ༌ཐེ༌ཚོམས༌ སོང༌ ཅིའ༌ཟེར༌ན༌ ཁ༌ཅིག༌གི༌ ཡོ༌ཧཱ༌ནན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌ནོག༌ ཟེར༌རད༌པིན༌། 8ཞན༌ ཁ༌ཅིག༌གི༌ སྔུན༌མའེ༌ ལུང༌སྟོན༌པ༌ ཨེ༌ལི༌ཡཱ༌ སྔོན༌ཏེ༌ ཨིན༌ནོག༌ ཡང༌ ཁ༌ཅིག༌གི༌ སྔུན༌མའེ༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ སོན༌ཏེའ༌ ལངས༌ཏེ༌ ཨིན༌ནོག༌ ཟེརས༌། 9ཧེ༌རོད༌དི༌ ཟེརས༌, “ངའེ༌ ཡོ༌ཧཱ༌ནན༌ནི༌ གོ༌ ཅད༌ཅུགས༌ཏེ༌ ཨིན༌པིན༌། ཏེ༌ནེ༌ འི༌བོ༌ སུ༌ ཨིན༌ནོག༌ ཀ༌བོའེ༌ སྐོར༌ལ༌ ང༌ ཧ༌ལས༌ཤེས༌སི༌ སྤེ༌ར༌གུན༌ ཚོར༌ཨིན༌ ཨིན༌ནོག༌” ཡང༌ ཁོའེ༌ ཡེ༌ཤུ༌ ཐོང༌ཅེས༌སི༌ སྐབ༌ཞིག༌ ཙལ༌ལད༌པིན༌།
ཡེ༌ཤུའི༌ མི༌ སྟོང༌ལྔའ༌ ཁར༌ཇི༌ སལས༌།
9:10-17
10གཙོ༌བོ༌ ཡེ༌ཤུའི༌ སྐུ༌ཚབས༌གུན༌ ལོག༌ཏེ༌ ཡོངས༌ཏེ༌ ཁོང༌གུན༌ནི༌ ཅོས༌ཁན༌ ཚང༌མའེ༌ སྐོར༌ལ༌ ཤདས༌, ཡང༌ ཡེ༌ཤུའི༌ ཁོང༌གུན༌ ཅིག༌པོ༌ ཁྲིད༌ཏེ༌ བེད༌སའི༌ད༌ ཟེར༌ཁན༌ནི༌ གྲོང༌ཁྱེར༌ལ༌ སྐྱོདས༌། 11ཨིན༌ནའང༌ མི༌ཚོགས༌ལ༌ ཏེ༌བོ༌ གྱུས༌སོང༌ཏེ༌ ཁོང༌ངི༌ སྟིང༌རང༌ནེ༌ བྲངས༌ཏེ༌ སོང༌། ཡེ༌ཤུའི༌ ཁོང༌གུན༌ལ༌ གའ༌སུས༌ ཞུས༌ཏེ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ད༌ ཛདས༌ ཡང༌ ཁོང༌ངི༌ ཟུ༌མོ༌ ཡོངས༌ཏེ༌ ཡོད༌ཁན༌གུན༌ ཕན༌ཅུག༌ག༌ ཛདས༌།
12ཉི༌མ༌ གོར༌གོར༌ལ༌, ལོབ༌ཕྲུགས༌ རྕུག༌ཉིས༌པོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “ཉེ༌ཁོར༌རི༌ ནས༌ས༌ དང༌ གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ ཡང༌ དུག༌ས༌ ཙལ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌ ཅིའ༌ཟེར༌ན༌ ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌།”
13ཡེ༌ཤུའི༌ མོལས༌, “ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།”
ཁོང༌གུན༌ནི༌ ལན༌ཏངས༌, “ང༌ཞའ༌ འི༌ མི༌ཚོགས༌ལ༌ གབ༌ཅེས༌སི༌ ཟན༌ ཉོའ༌ སོང༌ཏེ༌ མ༌ནེ༌, ང༌ཞའེ༌ ལག༌ག༌ ཏ༌གི༌ ལྔ༌ དང༌ ཉ༌ ཉིས༌ མ༌ནེ༌ མེད༌” 14ཏེ༌རུ༌ ཡོད༌ཁན༌ནི༌ བུ༌ཚ༌གུན༌ ནི༌#9:14 ཏེ༌ མི༌ཚོགས༌སི༌ ནང༌ང༌ བུ༌མོ༌ དང༌ ཕྲུ༌གུ༌ གུན༌ནའང༌ ཡོད༌པིན༌ ཨིན༌ནའང༌ ཁོང༌གུན༌ མ༌རྩིའ༌ ཨིན༌ནོག༌ ཀྲངས༌ཀ༌ སྟོང༌ལྔ༌ ཟམ༌ཤིག༌ ཡོད༌པིན༌།
ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “ཏ༌ ཚང༌མ༌ ཧ༌ལམ༌ ལྔབ༌ཅུ༌ ལྔབ༌ཅུའི༌ སྡེ༌ ཅོས༌ཏེ༌ དུག༌ཅུག༌།”
15ཏེ༌ནེ༌ ཁོང༌ངི༌ མོལ༌ཁན༌ ནང༌ཞིན༌ ཁོང༌གུན༌ནི༌ མི༌ཚང༌མ༌ དུག༌ཅུགས༌། 16ཡེ༌ཤུའི༌ ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌། 17ཁོང༌ ཚང༌མ༌ གྲང༌གྲང༌ ཟོས༌ ཡང༌ ལོབ༌ཕྲུགས༌གུན༌ནི༌ ལག༌ལུས༌གུན༌ ལྡུས༌པ༌ པག༌ཙེ༌ རྕུག༌ཉིས༌ གང༌།
པི༌ཏྲར༌རི༌ ཡེ༌ཤུ༌ སུ༌ ཨིན༌ཁན༌བོ༌ ཤདས༌།
9:18-27
18ཞག༌ཤིག༌ གཙོ༌བོ༌ ཡེ༌ཤུ༌ ཅིག༌པོ༌ མོས༌ལམ༌ ཞུའ༌ སྐྱོདས༌ ཁོང༌ངི༌ ལོབ༌ཕྲུགས༌གུན༌ ཁོང༌ངི༌ ཉེ༌མོའ༌ ཡོད༌པིན༌, ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “མི༌གུན༌ནི༌ ང༌ སུ༌ ཨིན༌ནོག༌ ཟེར༌དུག༌?”
19ཁོང༌གུན༌ནི༌ ལན༌ཏངས༌, “ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌, ཡང༌ ཞན༌མ༌གུན༌ནི༌ ལུང༌སྟོན༌པ༌ ཤི༌ཁན༌གུན༌ནི༌ ཕྲོ༌ནེ༌ ཅིག༌ཅིག༌ སོང༌ཏེའ༌ ལངས༌ཏེ༌ ཨིན༌ནོག༌ ཟེར༌དུག༌།”
20ཡེ༌ཤུའི༌ མོལས༌, “ཁྱོ༌ཞའེ༌ ང༌ སུ༌ ཨིན༌ནོག༌ ཟེར༌རད༌།”
པི༌ཏྲར༌རི༌ ལན༌ཏངས༌, “ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཞུགས༌ཏེ༌ ཨིན༌ནོག༌།”
21ཡེ༌ཤུའི༌ ཁོང༌གུན༌ལ༌ ཏེ༌ སྤེ༌ར༌གུན༌ སུའང༌ མི༌ཤད༌ཅེས༌ལ༌ བཀའ༌ སལས༌། 22ཁོང༌ངི༌ མོལས༌, “ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ མི༌རིགས༌སི༌བུའ༌ རྡུག༌ངལ༌ མང༌པོ༌ ཉོངས༌ཏེ༌ ཤི༌གོ༌ཤེས༌ ཡང༌ ཞག༌ སུམ༌པའེ༌ ཞག༌ག༌ སོན༌པོ༌ ལང༌ཨིན༌།”
23ཏེ༌ནེ༌ ཁོང༌ངི༌ ཁོང༌ ཚང༌མ༌ལ༌ མོལས༌, “ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ ཞག༌ཏང༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌། 24རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌། 25མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ དེན༌བའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌། 26ཀལ༌ཏེས༌ སུ༌ཞིག༌གི༌ ང༌ དང༌ ངའེ༌ ལབ༌ཞའེ༌ སྤང༌པོ༌ ཏང༌ཅེས༌ལ༌ ཁྲེལ༌བ༌ ཚོར༌ན༌, ང༌ མི༌རིགས༌སི༌བུ༌ ང༌རང༌ངི༌ ཟིར༌རྗིད༌ དང༌ ཡབ༌བི༌ ཟིར༌རྗིད༌དི༌ ནང༌ང༌ ཏམ༌པའེ༌ ཕོ༌ཉ༌གུན༌ ཉམ༌པོ༌ ལོགས༌ཏེ༌ ཡོང༌ ཟ༌ནེ༌, ངེའང༌ ཁོའེ༌ཀ༌ ཁྲེལ༌བ༌ ཚོར༌ཨིན༌། 27ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ཡོད༌ཁན༌ ཁ༌ཅིག༌གི༌ དཀོན༌མཆོག༌གི༌ གྱལ༌སྲིད༌ ཐོང༌ཏེ༌ མ༌ནེ༌ མི༌ཤི༌།”
ཡེ༌ཤུའི༌ ཟིར༌རྗིད༌ ཇལ༌།
9:28-36
28ཏེ༌གུན༌ མོལ༌ཏེ༌ ཧ༌ལམ༌ ཞག༌ རྒྱད༌དི༌ སྟིང༌ནེ༌ ཡེ༌ཤུའི༌ པི༌ཏྲར༌, ཡོ༌ཧཱ༌ནན༌ དང༌ ཡ༌ཀོབ༌ ཁྲིད༌ཏེ༌ རི༌ཞིག༌གི༌ཀ༌ མོས༌ལམ༌ ཞུའ༌ལ༌ སྐྱོདས༌། 29མོས༌ལམ༌ ཞུ༌ཨིན༌ ཡོད༌ ཟ༌ནེ༌ ཁོང༌ངི༌ ཞལ༌དོང༌ངི༌ ནང༌ང༌ གྱུར༌ཇ༌ ཡོངས༌, ཡང༌ ཁོང༌ངི༌ ནམ༌ཟའ༌ ལྟ༌མི༌ཉན༌ཅེས༌ འོད༌ཅན༌ ཀར༌པོ༌ གྱུར༌། 30ཧུན༌མེད༌ལ༌ ཁོང༌གུན༌ནི༌ མི༌ ཉིས༌, མོ༌ཟེས༌ དང༌ ཨེ༌ལི༌ཡཱའེ༌ ཡེ༌ཤུ༌ ཉམ༌པོ༌ ཞལ༌ཏ༌ སལ༌ཨིན༌ ཇལ༌། 31ཟིར༌རྗིད༌དི༌ ནང༌ང༌ ཁོང༌གུན༌ནི༌ ཡེ༌ཤུ༌ ཇིག༌རྟེན༌ནེ༌ སྐྱོད༌ཅེས༌སི༌ སྐོར༌ལ༌ མོལ༌ལ༌ ཛད༌ཨིན༌ ཚོར༌, ཀ༌བོ༌ ཡེ༌རུ༌ཤ༌ལེམ༌མི༌ ནང༌ང༌ ཁོང༌ངི༌ གྱོགས༌པ༌ གྲུབ༌ཅུག༌ག༌ ཛད༌ཨིན༌།
32པི༌ཏྲར༌ དང༌ ཁོའེ༌ ཕྲོ༌པ༌གུན༌ ཉིད༌ལ༌ ཆེན༌ ཡོད༌པིན༌, ཨིན༌ནའང༌ ཉིད༌ ཚད༌ད༌ཅིག༌ ཁོང༌གུན༌ནི༌ ཡེ༌ཤུའི༌ ཟིར༌རྗིད༌ དང༌ ཁོང༌ ཉམ༌པོ༌ ཞངས༌ཏེ༌ ཡོད༌ཁན༌ནི༌ མི༌ ཉིས༌ཀོ༌ ཇལ༌། 33ཡང༌ མོ༌ཟེས༌ དང༌ ཨེ༌ལི༌ཡཱ༌ ཡེ༌ཤུ༌ནེ༌ བེ༌ཏེ༌ སྐྱོད༌ ཟ༌ནེ༌ པི༌ཏྲར༌རི༌ ཡེ༌ཤུའ༌ ཟེརས༌, “སྤོན༌བོ༌ལེ༌, ང༌ཞའ༌ འི༌ཀ༌ ཡོད༌ཅེས༌པོ༌ གྱལ༌ལ༌ སོང༌། ང༌ཞའེ༌ ཞུགས༌ས༌ སུམ༌ རྩིག༌ཨིན༌, ཉེ༌རང༌ངི༌ ཕིའ༌ ཅིག༌, མོ༌ཟེས༌སི༌ ཕིའ༌ ཅིག༌, ཡང༌ ཨེ༌ལི༌ཡཱའེ༌ ཕིའ༌ ཅིག༌།” ཁོའ༌ ཅི༌ ཟེར༌གོ༌ཤེས༌པོ༌ ཧ༌མ༌གོ༌པ༌, ཁོའེ༌ ཏེ༌བོ༌ ཟེརས༌།
34ཁོའེ༌ ཏེ༌གུན༌ ཟེར༌ཨིན༌ ཡོད༌ ཟ༌ནེ༌ སྲིན༌ཞིག༌ བབས༌ཏེ༌ ཁོང༌གུན༌ ཀབས༌, སྲིན༌ནི༌ ཀབ༌ཨིན༌ ཡོད༌ ཟ༌ནེ༌ ཁོང༌གུན༌ སྲན༌ཏྲེ༌ ཇིགས༌། 35ཏེ༌ནེ༌ སྲིན༌ནི༌ ནང༌ནེ༌ སུང༌སྐད༌ཅིག༌གི༌ མོལས༌, “འི༌བོ༌ ངའེ༌ སྲས༌ ང༌རང༌ངི༌ ལྡམ༌ཁན༌བོ༌ ཨིན༌, ཁོའེ༌ ཟེར༌ཁན༌གུན༌ལ༌ ཉོན༌།” 36སུང༌སྐད༌པོ༌ ཚར༌ར༌ཅིག༌, ཁོང༌གུན༌ནི༌ ཡེ༌ཤུ༌ ཅིག༌པོ༌ མ༌སྟོགས༌ སུའང༌ མ༌ཇལ༌། ལོབ༌ཕྲུགས༌གུན༌ནི༌ ཐོང༌ཁན༌ དང༌ ཚོར༌ཁན༌གུན༌ ཏེ༌ཏུས༌ལ༌ སུའང༌ མ༌ཤད༌ད༌ སངས༌ཏེ༌ བོརས༌།
ཡེ༌ཤུའི༌ བུ༌ཚ༌ཞིག༌གི༌ ནང༌ནེ༌ རྡུད༌ ཕིང༌ང༌ ཛདས༌།
9:37-45
37སྟིང༌མ༌ཞག༌ག༌ ཁོང༌གུན༌ རི༌ནེ༌ བབས༌ཏེ༌ སྐྱོད༌ད༌ཅིག༌, མི༌ཚོགས༌ ཆེན༌མོ༌ཞིག༌ ཡེ༌ཤུ༌ ཐུག༌ག༌ལ༌ ཡོངས༌། 38མི༌ཚོགས༌སི༌ ཕྲོ༌ནེ༌ མི༌ཞིག༌གི༌ ཀུ༌ཅོ༌ ཏང༌ཨིན༌ ཟེརས༌, “ལོབ༌བོན༌ལེ༌, ཇུ༌ཇུ༌ ངའེ༌ བུ༌ཚ༌ ཕན༌ཅུག༌ག༌ ཛད༌དའང༌, ཁོ༌ ངའེ༌ ཕྲུ༌གུའ༌ ཅིག༌ཅིག༌པོ༌ ཨིན༌། 39རྡུད༌པོ༌ ངའེ༌ བུ༌ཚའེ༌ ནང༌ང༌ ཞུགས༌ས༌ཅིག༌ ཁོའེ༌ ཀུ༌ཅོ༌ སྲན༌ཏྲེ༌ ཏང༌དུག༌ ཡང༌ ཁོ༌ ས༌ གྱབས༌ཏེ༌ ཟུགས༌པོ༌ གང༌པོ༌ དར༌ཨིན༌ ཁའ༌ནེ༌ སྦོའ༌ བིང༌དུག༌། ཏུས༌ མང༌ཆེའ༌ རྡུད༌པོ༌ ཁོའེ༌ ནང༌ང༌ དུགས༌ཏེ༌ ཁོའ༌ ནགས༌ སྲན༌ཏྲེ༌ སྟན༌དུག༌། 40ཉེ༌རང༌ངི༌ ལོབ༌ཕྲུགས༌གུན༌ལ༌ རྡུད༌པོ༌ ཕིང༌ ཇུ༌ཇུ༌ ཟེར༌ཏེ༌ ཞུ༌ཝ༌ ཕུལ༌པིན༌ ཨིན༌ནའང༌ ཁོང༌གུན༌ལ༌ ཏེ༌བོ༌ ཕིང༌ མ༌ཉན༌།”
41ཡེ༌ཤུའི༌ མོལས༌, “ཏད༌པ༌ མེད༌ཁན༌ དང༌ མི༌རབས༌ ངན༌པ༌, ནམ༌ཚོག༌པ༌ ང༌ ཁྱོ༌ཞ༌གུན༌ ཉམ༌པོ༌ དུག༌? ནམ༌ཚོག༌པ༌ ངའེ༌ ཁྱོ༌རང༌གུན༌ལ༌ སྲན༌གོས༌? ཁྱོ༌རང༌ངི༌ བུ༌ཚ༌བོ༌ འི༌ཀ༌ ཁྱོང༌།”
42བུ༌ཚ༌བོ༌ ཡོང༌ ཟ༌ནེ༌ རྡུད༌པོའེ༌ ཁོ༌ ས༌ གྱབས༌ཏེ༌ ཟུགས༌པོ༌བོ༌ དར༌ཨིན༌ ལུས༌། ཨིན༌ནའང༌ ཡེ༌ཤུའི༌ རྡུད༌པོའ༌ ཁའ༌སྐྱེའ༌ ཛད༌ཏེ༌ བུ༌ཚ༌བོ༌ ཕན༌ཅུག༌ག༌ ཛདས༌ ཡང༌ ཁོ༌ ཁོ༌རང༌ངི༌ ཨ༌བའ༌ སྟདས༌། 43ཁོང༌ ཚང༌མ༌ དཀོན༌མཆོག༌གི༌ ཆག༌ལས༌ ཇིགས༌པོ༌ ཐོང༌ཏེ༌ ཧ༌ལས༌།
མི༌ཚང༌མའེ༌ ཡེ༌ཤུའི༌ ཛད༌ཁན༌ ཚང༌མ༌ ཧ༌ལས༌ཏེ༌ ལྟེན༌ ཡོད༌ ཟ༌ནེ༌, ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, 44“ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌: མི༌རིགས༌སི༌བུའ༌ ངོ༌ལོག༌ ཅོས༌ཏེ༌ གྲ༌འོ༌གུན༌ནི༌ ལག༌ག༌ སྟད༌ཨིན༌།” 45ཨིན༌ནའང༌ ཁོང༌གུན༌ལ༌ ཡེ༌ཤུའི༌ མོལ༌ཁན༌བོ༌ ཧ༌མ༌གོ༌ ཅིའ༌ཟེར༌ན༌ ཏེ༌གུན༌ སང༌ཝའེ༌ ནང༌ང༌ བོར༌ར༌ ཛད༌ཏེ༌ ཨིན༌པིན༌, ཡང༌ ཁོང༌གུན༌ལ༌ ཏེ༌བོའེ༌ ཏོན༌བོ༌ ཏྲི༌ཅེས༌སི༌ ཧམ༌པ༌ མ༌ཡོངས༌།
དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཀྲག༌ཤོག༌།
9:46-50
46ལོབ༌ཕྲུགས༌གུན༌ནི༌ ནང༌ང༌ ཁོ༌རང༌གུན༌ནི༌ ཕྲོ༌ནེ༌ ཀྲག༌ཤོག༌ སུ༌ ཨིན༌ ཟེར༌ཨིན༌ ཟེར༌ཟེར༌ གོ༌ཟུག༌། 47གཙོ༌བོ༌ ཡེ༌ཤུའི༌ ཁོང༌གུན༌ནི༌ སམ༌བ༌ ཁྱེན༌པ༌ ཁོང༌ངི༌ ཕྲུ༌གུ༌ ཆུ༌ངུན༌ཞིག༌ ཁྱོངས༌ཏེ༌ ཁོང༌རང༌ངི༌ ལྡོའ༌ ལང༌ཅུག༌ག༌ ཛདས༌། 48ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ མིང༌ངི༌ ནང༌ང༌ སུ༌ཞིག༌གི༌ འི༌ ཕྲུ༌གུ༌ ཙོགས༌ཤིག༌ག༌ གའ༌སུས༌ ཅོ༌ན༌ ངའ༌ གའ༌སུས༌ ཅོས༌ཏེ༌ ཨིན༌ ཡང༌ སུ༌ཞིག༌གི༌ ངའ༌ གའ༌སུས༌ ཅོ༌ན༌ ང༌ ཀལ༌ལ༌ ཛད༌ཁན༌ནི༌ ཡབ༌བ༌ གའ༌སུས༌ ཞུས༌ཏེ༌ ཨིན༌། ཁྱོ༌ཞའེ༌ ཕྲོ༌ནེ༌ ཆུང༌ཤོག༌པོ༌ ཀྲག༌ཤོག༌ ཨིན༌།”
49ཡོ༌ཧཱ༌ནན༌ནི༌ ཟེརས༌, “གཙོ༌བོ༌, མི༌ཞིག༌གི༌ ཉེ༌རང༌ངི༌ ཚན༌ ཁུར༌ཏེ༌ རྡུད༌ ཕིང༌ང༌ ང༌ཞའེ༌ ཐོང༌, ཡང༌ ང༌ཞའེ༌ ཁོའ༌ ཏེ༌བོ༌ ཅོ༌ མི༌ཅུག༌ཅེས༌སི༌ རྩོན༌གྲུས༌ ཅོས༌པིན༌ ཅིའ༌ཟེར༌ན༌ ཁོ༌ ང༌དང༌ངི༌ ཕྲོ༌པ༌ མན༌པིན༌།”
50ཨིན༌ནའང༌ ཡེ༌ཤུའི༌ མོལས༌, “ཁོའ༌ སྒག༌ མ༌སྒག༌, སུ༌ཞིག༌གི༌ ཁྱོ༌ཞའེ༌ གྱབ༌གལ༌ མ༌ཅོ༌ན༌ ཁོ༌ ཁྱོ༌ཞའེ༌ ཆོགས༌ལ༌ ཨིན༌ནོག༌།”
ས༌མར༌རི༌ཡཱ༌པ༌གུན༌ནི༌ ཡེ༌ཤུའ༌ རྩི༌ཝ༌ མ༌ཅོས༌།
9:51-56
51གཙོ༌བོ༌ ཡེ༌ཤུ༌ ནམ༌ཁའ༌ ལེན༌ཅེས༌སི༌ ཏུས༌ ཉེ༌མོ༌ ལེབ༌པ༌ སེམས༌སི༌ ནང༌ང༌ ཐེ༌ཚོམས༌ མ༌ཛད༌ད༌ ཁོང༌ ཡེ༌རུ༌ཤ༌ལེམ༌ ཆོགས༌ལ༌ སྐྱོད༌ད༌ ཛདས༌། 52ཁོང༌ངི༌ ལོན༌ ཁྱེར༌ཁན༌ ཁག༌ཅིག༌ སྔུན༌ལ༌ ལམ༌ཅུག༌ག༌ ཛདས༌, ཆེན༌ ཡོད༌ ཟ༌ནེ༌ ཁོང༌གུན༌ ས༌མར༌རི༌ཡཱ༌ ཡུལ༌ཇོངས༌སི༌ གམ༌ཡུལ༌ཞིག༌ག༌ སོང༌ཏེ༌ ཡེ༌ཤུ༌ མི༌གུན༌ ཉམ༌པོ༌ ཐུག༌ཅེས༌ལ༌ གྲལ༌གྲིག༌ ཅོས༌། 53ཨིན༌ནའང༌ ཏེ༌ གམ༌ཡུལ༌པ༌གུན༌ནི༌ ཁོང༌ང༌ གའ༌སུས༌ མ༌ཞུས༌ ཅིའ༌ཟེར༌ན༌ ཁོང༌ ཡེ༌རུ༌ཤ༌ལེམ༌མ༌ སྐྱོད༌ད༌ ཛད༌ཅེས༌པོ༌ ཁོང༌གུན༌ལ༌ གྱུས༌སོང༌། 54ཁོང༌ངི༌ ལོབ༌ཕྲུགས༌ ཡ༌ཀོབ༌ དང༌ ཡོ༌ཧཱ༌ནན༌ནི༌ ཏེ༌བོ༌ ཐོང༌ང༌ཅིག༌ ཟེརས༌, “གཙོ༌བོ༌, ཉེ༌རང༌ ཐུགས༌ཐད༌ན༌ ང༌ཞའེ༌ ནམ༌ཁའ༌ནེ༌ མེ༌ བབས༌ཏེ༌ ཁོང༌གུན༌ མེད༌ཁན༌ ཅོ༌ཅེས༌ལ༌ བཀའ༌ ཏང༌ངའ༌?”
55ཨིན༌ནའང༌ ཡེ༌ཤུའི༌ ཁོང༌ ཆོགས༌ལ༌ གྱུར༌ར༌ ཛད༌ཏེ༌ ཁའ༌སྐྱེའ༌ ཛདས༌། 56ཏེ༌ནེ༌ ཁོང༌གུན༌ ཞན༌ གམ༌ཡུལ༌ཞིག༌ག༌ སྐྱོདས༌།
ཡེ༌ཤུའ༌ བྲང༌ཤེས༌ ལ༌མོ༌ མན༌།
9:57-62
57གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ལམ༌ནེ༌ སྐྱོད༌ ཟ༌ནེ༌ མི༌ཞིག༌གི༌ ཡེ༌ཤུའ༌ ཟེརས༌, “ཉེ༌རང༌ ཀ༌རུ༌ སྐྱོད༌ནའང༌ ང༌ ཉེ༌རང༌ང༌ བྲངས༌ཏེ༌ ཡོང༌ཨིན༌།”
58ཡེ༌ཤུའི༌ ལན༌སལས༌, “ཝ༌ཙེའ༌ ཝ༌ཚངས༌ དང༌, ནམ༌ཁའེ༌ ཅ༌ ཅ༌ཚངས༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌ མི༌རིགས༌སི༌བུའ༌ གོ༌ བོར༌ཏེ༌ ངལ༌ཚོ༌ཅེས༌སི༌ ནས༌སའང༌ མེད༌།”
59ཡེ༌ཤུའི༌ ཞན༌ མི༌ཞིག༌ག༌ མོལས༌, “ངའེ༌ སྟིང༌རང༌ནེ༌ བྲོངས༌”, ཨིན༌ནའང༌ ཁོའེ༌ ཟེརས༌, “གཙོ༌བོ༌ལེ༌, སྔུན༌ལ༌ ང༌ ཁང༌པ༌ སོང༌ཏེ༌ ང༌རང༌ངི༌ ཨ༌བ༌ ཤི༌ཏེ༌ སུབ༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ལ༌ གོངས༌པ༌ སལ༌།”
60ཡེ༌ཤུའི༌ ཁོའ༌ མོལས༌, “སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ལ༌ ཁོ༌རང༌གུན༌ནི༌ ཤི༌ཁན༌གུན༌ སུབ༌ཅུག༌, ཨིན༌ནའང༌ ཁྱོ༌རང༌ སོང༌ཏེ༌ མི༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤོད༌།”
61ཡང༌ མི༌ཞིག༌གི༌ ཟེརས༌, “གཙོ༌བོ༌, ང༌ ཉེ༌རང༌ངི༌ སྟིང༌རང༌ནེ༌ བྲངས༌ཨིན༌, ཨིན༌ནའང༌ སྔུན༌ལ༌ ང༌ ངའེ༌ ནང༌ཚངས༌ལ༌ ཇུ༌ ཟེར༌ར༌ལ༌ ཆ༌ཅུག༌ག༌ ཛད༌།”
62ཡེ༌ཤུའི༌ ཁོའ༌ མོལས༌, “ཤོལ༌ལ༌ ཐམས༌ཏེ༌ གྱབ༌བ༌ ལྟའ༌ཁན༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཞབ༌ཤི༌ ཞུའ༌ཅེས༌སི༌ འོས༌པ༌ མན༌།”
Currently Selected:
ལུ༌ཀ༌ 9: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
