Génesis 31
31
Pa Jacob yaychavalhtajey ca niclôtc'oya pa Labán
1Pa Jacob p'alha ti yitôôysha papi lhcles pa Labán ti yichey ti nifaclesh: “Ja Jacob t'acum'e lhacôm'a nava yitsôt'ajesh ja tata, lhe'naa ti acôjeshiin.” 2Pa Jacob yi'van shta pa Labán ti nit'ôyi'sheey ca isa' ca novalhsha'ne yiey pan lhjunash lhapesh. 3Lhechesh pa yit'esha pa Lhcaanvacle pa Jacob: “Mapecley ja lhcootsjat japi anavot, yiey jan yie' japi avelhavot, pa javo'ach'e jayu.”
4Pa Jacob vancacheney lhpa Raquel shi' lhpa Lea, ca ninachey pa joot yiey pan yie' shi' pava lhclôy, 5pa yit'esha:
—Tsitô'ya nôqueesh na atataelh ti nit'ôyi'sheey ca nitsiisclaneshi yiey jan lhjunash ti nich'a. Taj ti pa lh'Dios ja tata yajatesh ti yi'yijop. 6Avaatsheelh natô'yelha jô ti is ti jaycumem'in ja atataelh. 7Taj ti lhavaatsha tsijôts'ôclôn'in, pa yajatesh ti nivaychaclaj ca lhfanishesh lhca tsitisesh. Taj ti vooy pa Dios ninvashanem pa ca lhfanishayish; 8pa vena lhjunash, ti mellh ti yit'esh: ‘C'ashayanesh jayu pava tashinshtas c'ayooysha'ne’, lhetajeesh ca lhacôm'a pava ôcjeclôy ca c'ayooysha'ne pava lhcles. Shi' ca niteesh lhôn: ‘C'ashayanesh jayu pava vanisch'esha'ne’, pa lhacôm'ataja pava lhcles ca vanisach'esha'ne. 9Nôque lhfanishesh pa Dios ti nijôclesh pava lhclôy pa nijutyam.
10“Caaj pa nalhu pava tashinshtas ti tavoyey, pa janjujom ti ja'van pava fusunjas tashinshtaychey ti vacactineshaneen ti vanisch'esha'ne, c'ayooysha'ne shi' pava climclimshisha'ne. 11Côque yitsômaat lhechesh ti tônyi pa lh'ángel pa Dios, pa jacuulh: ‘Nôque jôv'e'’. 12Lhechesh pa yit'eshyi ja ángel: ‘Ovalhsha'ne jum, pa lhavan jayu lhacôm'a nava fusunjas ti vacactinesh nava ôcjeclôy ti vanisch'esha'ne, c'ayooysha'ne shi' nava climclimshi, lhayaash ti tsitô'ya lhacôm'a nava yisnatesh'am ja Labán. 13Yivaatsha ya Dios ti lhasvan'e lhapesh ja Betel. Lhech'e ti lhôtsiy'e ca vatshachivo lhja utej pa lhasnateshyam ca afaclech.*xg* ¡Anshi'a! Aneetsham pa meey ja lhech'e; mapecley ja cotsjaat jan lhanvat'aj'e.’
14Lhechesh pa yicuulh lhpa Raquel shi' lhpa Lea:
—Yivaatsheelh palha ampa jayu ca nicôyôjeshelh ja tata. 15Jô lhôn, pa tsijônelhey papu ti tavujuya. ¡Pa tcashayelhyish shta, pa vatsôôtjatesh pava lhshayanesh ti jaspa ajayaselhyish! 16Yijô' jô, lhacôm'a nava lhavanjas nava nijôclesh pa Dios ja tataelh pa shtantsôt'ajesh shi' napi catsicles. Pa tajulhey ca asnatesh lhacôm'a pava yit'esha pa Dios.
Pa Jacob tay'e pa Padan-aram
17-18Pa Jacob vataasclansha'ne ca napecley pa Canaán, yiey pan yie' pa lhtata Isaac. Pa yan'apee papi lhcles shi' papi lhjayash pava camellos. Pa yichaaj lhacôm'a pavan caajem, yichaaj shta lhacôm'a pava lhclôy pavan tôlhesha pa lhcumjayash yiey pa Padan-aram. 19Lhan'e pa Labán pa yichey peelh lhjoot ti yivoc'ajatsha'ne pava tashinshtas. Lhan'e lhpa Raquel pa tacuteshc'oya pava lhasnatsjes dioseclesh pan yitsôt'ajesh pa t'ajôj'esha'ne. 20Nôque lhjunash pa Jacob ti t'acutc'oya pa Labán arameo, ti ninanfacleem ti yich. 21Yiclôtesh lhacôm'a pava caajem. Yichey tatsha pacham pa tovôc Éufrates, pa t'ajuyey yiey lhpa utiyuc lhey Galaad.
Pa Labán voqu'e pa Jacob
22Pu'janach'e pava nalhus ti yitô'ya pa Labán pa Jacob ti yiclôt. 23Lhechesh pa yich tanôôycheelh papi lhavelhavot ti voqu'e'. Pa napu'yama pava nalhus ti yôfisch'e pava uticuy Galaad. 24Lhechesh pa lhech tulh ti tanôclitem pa Dios pa Labán arameo ti lhtsômat'esh, pa yit'esha: “Ach'anyi, ya aj ca iyitesha pa ca at'esha ja Jacob.”
25Pa Labán yôfis'e pa Jacob pava uticuy yiey pa Galaad, yiey pan t'ichay'e pa Jacob. Pa lhech t'ichay'e yitsha pa Labán shi' papi lhavelhavot, 26pa yit'esha pa Jacob:
—¿She pa lhasnatesh? ¿Ta lhayaash ti lhasjôtsôclôn'in? ¡Ti lhanchaaj napi yicles lhjôney papi lhancumtesesh pa vatvatclônjayash!
27¿Ta lhayaash ti lhasjôtsôclôn'in pa lhavaatfichyic'oya ti lhclôt, pa naanfacyam? Ca apisa ca nôstôya, pa shtanshamtaj'in ca shtaneecju pa chinclôquitaj shta java lhanotas shi' ja arpa. 28Pa naavashanyam shta ca vatfineelh napi yicles shi' napi yintôclishjes. ¡Lhasnatesh ca nintajulhey! 29Yivaatsha nicaajtaj jayu pa ca yifanisheelh'ash, taj ti ca jonshaaj niyôjiyi pa lh'Dios ja atata yit'eshyi: ‘Ach'anyi, ya aj ca iyitesha pa ca at'esha ja Jacob.’ 30Taj ti uj ti lhteesh ca mapecley pa lhajpôyich pa atata, lhe'naa ti lhôc, ¿ta lhayaash ti lhatcutesh java yidiosec?
31Lhechesh pa yicuulh pa Jacob pa Labán:
—Tôlh'ejop ti tsijovay'in. Jaychavalhey ca asjôclesh lhôn napi acles ca anivalhyi. 32Taj ti papu ca nôôvtaj'e napi nôquee ca nicaajtajem java adiosec, ¡pa nivaf jayu! Napi yivelhavot shinvanesh: anfacyam ca nicaajtaj pa natsôt'ajesh, pa achaaj.
Taj pa Jacob nintô'ya lhpa Raquel ti t'acutesh pava vatdiosec.
33Pa Labán nicastas'in pa Jacob yiey pa lhatsha'nuvo, pa nijooylhajat lhpa Lea shi' papi napu lhcavoque, taj ti ninvan pava lhdiosec. Ti tay'ôcji pa lhatsha'nuvoa lhpa Lea pa yich'ôcji pa yitsôt'ajesh lhpa Raquel. 34Lhpa lhech t'acum'e pava diosec pa yan'ôcji lhpa vatcaclôvte pa yiesh'apee. Pa Labán vo'tajey'ôcji pava tsha'nuvos taj ti ninvan. 35Lhechesh pa yit'esha lhpa Raquel:
—Tata, ya aj ca asuya, lhayaash ti sajop ca vatsavat'ay, tôlh'ejop ti jayvoyeey.
Pa Labán vo'tajeysha'ne pava lhdiosec taj ti ninvan. 36Pa suy pa Jacob pa yiyôjaa pa Labán cavôque yit'esha:
—¿She peelh jasnatesh? ¿Ta yie' pa yisasch'e ti uj ti lhen ti lhtatvoyich'e? 37Apis ti lhascastas'in, taj ti, ¿apis ti lhavan pava acoqueclitôy tôlh'e' ja ajpôyich? ¡An'e t'ajuyish'e napi avelhavot shi' napi tsitsôt'ajesh, secl'esh ca niteetsha napi napu' ti yie' papi yijô'! 38Veinte java yincôpes ti jôqueshch'e ti jaycum'am'in, nive'lhaaesh ca nascavafesh java aclôy tashinshtas shi' java tashinshtaychey. Nive'lhaaesh ca tuj pava aclôy. 39Nive'lhaaesh ca nichaj'ay pa ti yijuj'in pava suy yaquisetes, vooy ti jashayan'am pa ti amc'oya. Pa nalhu ja't'ajesha pa tulh ti chitacutesh java aclôy, pa lht'alhyi ca jashayan'am. 40Java nalhus tsiclôn pa cus, vooy java tulhis tsiclôn java cuyis, ¡pa tanca yimô' jô! 41Veinte java yincôpes ti jôv'e' ja ajpôyich, pa nôque yijunash: napi napu' acles jaycum'apee java catorce yincôpes. Vooy java aclôy jaycum'apee seis java nincôpes; pa ve'lhach'e ti lhanvaych'aclajyam pa ti lhanjutyi. 42Ca amayam pa lh'Dios ca Abraham, pa Dios, pan t'a'lhey ja tata Isaac, jalheclôjesh ti tan jayu pa ca anjutajyam ca aschen. Vooy pa Dios tsivanesh ja yitacshinjayash shi' ca lhjunash ca yicumjayash pa tanôclit'am pa lhech tulh.
Pa Jacob shi' pa Labán yisnatesh pa vatpeya'esh
43Lhechesh pa yicuulh pa Labán pa Jacob:
—Napi ajayas yivaatsha yicles; napi acles yintôclishjes. Nava tashinshtas tsitsôt'ajesh ti yiclôy; ¡lhacôm'a nava lhavan ti tsitsôt'ajesh! Nôquen lhayaash, ¿She pa isjop ca jasnatshem nôqueesh napi yicles shi' napi lhcles napin caajem? 44Lhe'naa ti tajulhey, avaatsha ya chi' shta ca shtasnatesh pa ca shtavatpeya'esh ca natjuya ca ninôôclheeshjoo casvaatsha ti cas pu'.
45Lhechesh pa t'acum'e pa Jacob lhpa utej pa yitsemaj. 46Pa yit'esh papi lhavelhavot:
—¡Anayjatelhvane pava utes!
Pa nayjatvane lhacôm'a pava utes ti yaclôpju. Pa lhech tsaccun'e shalheema pava yaclôpju utes. 47Pa Labán yeyiyanesh pa lhech'e pa yitsôt'ajesh lhcliish “Jegar Sahaduta”, vooy ja Jacob yit'esha yitsha “Galaad”. 48Lhechesh pa yit'esh pa Labán:
—Nôqueesh, navôque chiyaclôpju utes shtavatvanesh casvaatsha ti cas pu'.
Lhe'naa ti lheyesh Galaad pa lhech'e, 49lheyesh shta Mizpa, lhayaash ti yit'esh pa Labán:
—Vooy pa Lhcaanvacle vanujumatsenjooj jayu avaatsha ya chi' shta ca nishtavatvantaja. 50Ca niasclantajeshi napi yicles ja't'ajesha ca ajayaseesh pap'elh, lhama ampapu taj ca shinvanesh casvaatsha, vooy pa Dios shinvanesh.
51Pa ve'lheesh yit'eshaan pa Labán pa Jacob:
—A'va, navôque chiyaclopju utes shi' lha chitsemaaj utej pa caspu'jop casvaatsha. 52Nava chiyaclopju utes shi' lha chitsemaaj nôôclheesha ti tan jayu avaatsha ti tanca yalhecha pa ca sht'ônjatshi ca sht'ajuyvatjulh. 53Pa ca nentajjoom casvaatsha pa lh'Dios ca act'eech Abraham shi' ca yict'eech Nacor.
Pa lhechesh pa Jacob pa yetôn pa lh'Dios pan yôclôj pa lhtata Isaac. 54Lhechesh pa yisnatesh pa lhcufayjat pa Jacob yiey lhpa utiyuc. Pa tôney papi lhavelhavot ca natsaccunelh. Lhacôm'a ti tsaccunch'e, pa mônlhee lhpa utiyuc ti tulh'in.
55C'oya ti nich'a nalhu ti nitshaam pa Labán pa vatfineelhsha'ne papi lhantôclishjes shi' papi lhcles. Ti yivaclhitesh pa yit'eshem pa is, pa vapecley pa lhcootsjat.
Currently Selected:
Génesis 31: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
Génesis 31
31
Pa Jacob yaychavalhtajey ca niclôtc'oya pa Labán
1Pa Jacob p'alha ti yitôôysha papi lhcles pa Labán ti yichey ti nifaclesh: “Ja Jacob t'acum'e lhacôm'a nava yitsôt'ajesh ja tata, lhe'naa ti acôjeshiin.” 2Pa Jacob yi'van shta pa Labán ti nit'ôyi'sheey ca isa' ca novalhsha'ne yiey pan lhjunash lhapesh. 3Lhechesh pa yit'esha pa Lhcaanvacle pa Jacob: “Mapecley ja lhcootsjat japi anavot, yiey jan yie' japi avelhavot, pa javo'ach'e jayu.”
4Pa Jacob vancacheney lhpa Raquel shi' lhpa Lea, ca ninachey pa joot yiey pan yie' shi' pava lhclôy, 5pa yit'esha:
—Tsitô'ya nôqueesh na atataelh ti nit'ôyi'sheey ca nitsiisclaneshi yiey jan lhjunash ti nich'a. Taj ti pa lh'Dios ja tata yajatesh ti yi'yijop. 6Avaatsheelh natô'yelha jô ti is ti jaycumem'in ja atataelh. 7Taj ti lhavaatsha tsijôts'ôclôn'in, pa yajatesh ti nivaychaclaj ca lhfanishesh lhca tsitisesh. Taj ti vooy pa Dios ninvashanem pa ca lhfanishayish; 8pa vena lhjunash, ti mellh ti yit'esh: ‘C'ashayanesh jayu pava tashinshtas c'ayooysha'ne’, lhetajeesh ca lhacôm'a pava ôcjeclôy ca c'ayooysha'ne pava lhcles. Shi' ca niteesh lhôn: ‘C'ashayanesh jayu pava vanisch'esha'ne’, pa lhacôm'ataja pava lhcles ca vanisach'esha'ne. 9Nôque lhfanishesh pa Dios ti nijôclesh pava lhclôy pa nijutyam.
10“Caaj pa nalhu pava tashinshtas ti tavoyey, pa janjujom ti ja'van pava fusunjas tashinshtaychey ti vacactineshaneen ti vanisch'esha'ne, c'ayooysha'ne shi' pava climclimshisha'ne. 11Côque yitsômaat lhechesh ti tônyi pa lh'ángel pa Dios, pa jacuulh: ‘Nôque jôv'e'’. 12Lhechesh pa yit'eshyi ja ángel: ‘Ovalhsha'ne jum, pa lhavan jayu lhacôm'a nava fusunjas ti vacactinesh nava ôcjeclôy ti vanisch'esha'ne, c'ayooysha'ne shi' nava climclimshi, lhayaash ti tsitô'ya lhacôm'a nava yisnatesh'am ja Labán. 13Yivaatsha ya Dios ti lhasvan'e lhapesh ja Betel. Lhech'e ti lhôtsiy'e ca vatshachivo lhja utej pa lhasnateshyam ca afaclech.*xg* ¡Anshi'a! Aneetsham pa meey ja lhech'e; mapecley ja cotsjaat jan lhanvat'aj'e.’
14Lhechesh pa yicuulh lhpa Raquel shi' lhpa Lea:
—Yivaatsheelh palha ampa jayu ca nicôyôjeshelh ja tata. 15Jô lhôn, pa tsijônelhey papu ti tavujuya. ¡Pa tcashayelhyish shta, pa vatsôôtjatesh pava lhshayanesh ti jaspa ajayaselhyish! 16Yijô' jô, lhacôm'a nava lhavanjas nava nijôclesh pa Dios ja tataelh pa shtantsôt'ajesh shi' napi catsicles. Pa tajulhey ca asnatesh lhacôm'a pava yit'esha pa Dios.
Pa Jacob tay'e pa Padan-aram
17-18Pa Jacob vataasclansha'ne ca napecley pa Canaán, yiey pan yie' pa lhtata Isaac. Pa yan'apee papi lhcles shi' papi lhjayash pava camellos. Pa yichaaj lhacôm'a pavan caajem, yichaaj shta lhacôm'a pava lhclôy pavan tôlhesha pa lhcumjayash yiey pa Padan-aram. 19Lhan'e pa Labán pa yichey peelh lhjoot ti yivoc'ajatsha'ne pava tashinshtas. Lhan'e lhpa Raquel pa tacuteshc'oya pava lhasnatsjes dioseclesh pan yitsôt'ajesh pa t'ajôj'esha'ne. 20Nôque lhjunash pa Jacob ti t'acutc'oya pa Labán arameo, ti ninanfacleem ti yich. 21Yiclôtesh lhacôm'a pava caajem. Yichey tatsha pacham pa tovôc Éufrates, pa t'ajuyey yiey lhpa utiyuc lhey Galaad.
Pa Labán voqu'e pa Jacob
22Pu'janach'e pava nalhus ti yitô'ya pa Labán pa Jacob ti yiclôt. 23Lhechesh pa yich tanôôycheelh papi lhavelhavot ti voqu'e'. Pa napu'yama pava nalhus ti yôfisch'e pava uticuy Galaad. 24Lhechesh pa lhech tulh ti tanôclitem pa Dios pa Labán arameo ti lhtsômat'esh, pa yit'esha: “Ach'anyi, ya aj ca iyitesha pa ca at'esha ja Jacob.”
25Pa Labán yôfis'e pa Jacob pava uticuy yiey pa Galaad, yiey pan t'ichay'e pa Jacob. Pa lhech t'ichay'e yitsha pa Labán shi' papi lhavelhavot, 26pa yit'esha pa Jacob:
—¿She pa lhasnatesh? ¿Ta lhayaash ti lhasjôtsôclôn'in? ¡Ti lhanchaaj napi yicles lhjôney papi lhancumtesesh pa vatvatclônjayash!
27¿Ta lhayaash ti lhasjôtsôclôn'in pa lhavaatfichyic'oya ti lhclôt, pa naanfacyam? Ca apisa ca nôstôya, pa shtanshamtaj'in ca shtaneecju pa chinclôquitaj shta java lhanotas shi' ja arpa. 28Pa naavashanyam shta ca vatfineelh napi yicles shi' napi yintôclishjes. ¡Lhasnatesh ca nintajulhey! 29Yivaatsha nicaajtaj jayu pa ca yifanisheelh'ash, taj ti ca jonshaaj niyôjiyi pa lh'Dios ja atata yit'eshyi: ‘Ach'anyi, ya aj ca iyitesha pa ca at'esha ja Jacob.’ 30Taj ti uj ti lhteesh ca mapecley pa lhajpôyich pa atata, lhe'naa ti lhôc, ¿ta lhayaash ti lhatcutesh java yidiosec?
31Lhechesh pa yicuulh pa Jacob pa Labán:
—Tôlh'ejop ti tsijovay'in. Jaychavalhey ca asjôclesh lhôn napi acles ca anivalhyi. 32Taj ti papu ca nôôvtaj'e napi nôquee ca nicaajtajem java adiosec, ¡pa nivaf jayu! Napi yivelhavot shinvanesh: anfacyam ca nicaajtaj pa natsôt'ajesh, pa achaaj.
Taj pa Jacob nintô'ya lhpa Raquel ti t'acutesh pava vatdiosec.
33Pa Labán nicastas'in pa Jacob yiey pa lhatsha'nuvo, pa nijooylhajat lhpa Lea shi' papi napu lhcavoque, taj ti ninvan pava lhdiosec. Ti tay'ôcji pa lhatsha'nuvoa lhpa Lea pa yich'ôcji pa yitsôt'ajesh lhpa Raquel. 34Lhpa lhech t'acum'e pava diosec pa yan'ôcji lhpa vatcaclôvte pa yiesh'apee. Pa Labán vo'tajey'ôcji pava tsha'nuvos taj ti ninvan. 35Lhechesh pa yit'esha lhpa Raquel:
—Tata, ya aj ca asuya, lhayaash ti sajop ca vatsavat'ay, tôlh'ejop ti jayvoyeey.
Pa Labán vo'tajeysha'ne pava lhdiosec taj ti ninvan. 36Pa suy pa Jacob pa yiyôjaa pa Labán cavôque yit'esha:
—¿She peelh jasnatesh? ¿Ta yie' pa yisasch'e ti uj ti lhen ti lhtatvoyich'e? 37Apis ti lhascastas'in, taj ti, ¿apis ti lhavan pava acoqueclitôy tôlh'e' ja ajpôyich? ¡An'e t'ajuyish'e napi avelhavot shi' napi tsitsôt'ajesh, secl'esh ca niteetsha napi napu' ti yie' papi yijô'! 38Veinte java yincôpes ti jôqueshch'e ti jaycum'am'in, nive'lhaaesh ca nascavafesh java aclôy tashinshtas shi' java tashinshtaychey. Nive'lhaaesh ca tuj pava aclôy. 39Nive'lhaaesh ca nichaj'ay pa ti yijuj'in pava suy yaquisetes, vooy ti jashayan'am pa ti amc'oya. Pa nalhu ja't'ajesha pa tulh ti chitacutesh java aclôy, pa lht'alhyi ca jashayan'am. 40Java nalhus tsiclôn pa cus, vooy java tulhis tsiclôn java cuyis, ¡pa tanca yimô' jô! 41Veinte java yincôpes ti jôv'e' ja ajpôyich, pa nôque yijunash: napi napu' acles jaycum'apee java catorce yincôpes. Vooy java aclôy jaycum'apee seis java nincôpes; pa ve'lhach'e ti lhanvaych'aclajyam pa ti lhanjutyi. 42Ca amayam pa lh'Dios ca Abraham, pa Dios, pan t'a'lhey ja tata Isaac, jalheclôjesh ti tan jayu pa ca anjutajyam ca aschen. Vooy pa Dios tsivanesh ja yitacshinjayash shi' ca lhjunash ca yicumjayash pa tanôclit'am pa lhech tulh.
Pa Jacob shi' pa Labán yisnatesh pa vatpeya'esh
43Lhechesh pa yicuulh pa Labán pa Jacob:
—Napi ajayas yivaatsha yicles; napi acles yintôclishjes. Nava tashinshtas tsitsôt'ajesh ti yiclôy; ¡lhacôm'a nava lhavan ti tsitsôt'ajesh! Nôquen lhayaash, ¿She pa isjop ca jasnatshem nôqueesh napi yicles shi' napi lhcles napin caajem? 44Lhe'naa ti tajulhey, avaatsha ya chi' shta ca shtasnatesh pa ca shtavatpeya'esh ca natjuya ca ninôôclheeshjoo casvaatsha ti cas pu'.
45Lhechesh pa t'acum'e pa Jacob lhpa utej pa yitsemaj. 46Pa yit'esh papi lhavelhavot:
—¡Anayjatelhvane pava utes!
Pa nayjatvane lhacôm'a pava utes ti yaclôpju. Pa lhech tsaccun'e shalheema pava yaclôpju utes. 47Pa Labán yeyiyanesh pa lhech'e pa yitsôt'ajesh lhcliish “Jegar Sahaduta”, vooy ja Jacob yit'esha yitsha “Galaad”. 48Lhechesh pa yit'esh pa Labán:
—Nôqueesh, navôque chiyaclôpju utes shtavatvanesh casvaatsha ti cas pu'.
Lhe'naa ti lheyesh Galaad pa lhech'e, 49lheyesh shta Mizpa, lhayaash ti yit'esh pa Labán:
—Vooy pa Lhcaanvacle vanujumatsenjooj jayu avaatsha ya chi' shta ca nishtavatvantaja. 50Ca niasclantajeshi napi yicles ja't'ajesha ca ajayaseesh pap'elh, lhama ampapu taj ca shinvanesh casvaatsha, vooy pa Dios shinvanesh.
51Pa ve'lheesh yit'eshaan pa Labán pa Jacob:
—A'va, navôque chiyaclopju utes shi' lha chitsemaaj utej pa caspu'jop casvaatsha. 52Nava chiyaclopju utes shi' lha chitsemaaj nôôclheesha ti tan jayu avaatsha ti tanca yalhecha pa ca sht'ônjatshi ca sht'ajuyvatjulh. 53Pa ca nentajjoom casvaatsha pa lh'Dios ca act'eech Abraham shi' ca yict'eech Nacor.
Pa lhechesh pa Jacob pa yetôn pa lh'Dios pan yôclôj pa lhtata Isaac. 54Lhechesh pa yisnatesh pa lhcufayjat pa Jacob yiey lhpa utiyuc. Pa tôney papi lhavelhavot ca natsaccunelh. Lhacôm'a ti tsaccunch'e, pa mônlhee lhpa utiyuc ti tulh'in.
55C'oya ti nich'a nalhu ti nitshaam pa Labán pa vatfineelhsha'ne papi lhantôclishjes shi' papi lhcles. Ti yivaclhitesh pa yit'eshem pa is, pa vapecley pa lhcootsjat.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.