Zhan 14

Zhezü dú ɛnlevri léyi ke sɩ́ bɔ̀ Ɔwɔ Zi nyri nɔn

1“Nyɛ́n bɩ́ dú ɛnkrɛ̀ta-kuemɛ̀n, ɔmu lɔ de Zhezü kɛ dɔ́ yɔ nɔn. Nyɛ́n bú Ɔwɔ ankà nyɛ́n tán ankàẅì, ô nyɛ́n bú m'ankà mán nyɛ́n tán ankàẅì. 2Ɛyri bobrebe dú Dade bɩ́ lɔ mɛ̀n kɩ mɛ hɔ̀n mɛ̀n hán ɛyri tɔ̀n mɛ̀n hɛ́n nyɛ̀n hán. Ke dú kɛ kè sɩ̀ dù annànwɔrɛ hô, mɛ́n sɩ̀ dɔ́ nyɛ̀n. 3Kɩ ɛnvra léyi mɛ lɛ hɔ̀n mɛ̀n hán ɛyri lɔ nɔn, me le vru mɛ̀n và kɩ me le bɩ́ nyɛ̀n mɛ̀n sɩ́ ɛtɛ̀sɛ̀n, ô ɛyri léyi mɛ́n dù nɔn, nyɛ́n mán nyɛ́n dú nanvrɛn. 4Nyɛ́n nyri ɛnlevri léyi kɛ hɔ́n ɛyri léyi mɛ hɔ̀n nɔn.” 5Toma kɛ dɔ́ nɛ̀n le: “Ɛẅɛnwrɔn, bɔ̀ sɩ̀ nyrì ɛyri léyi ɛ hɔ̀n nɔn. Awɔntan de bɔ́ lɛ hán bɔ́ nyri ɛnlevri lɔ nɛ́n?” 6Zhezü mrɛ́n nɛ̀n ɔmùan le: “Mɛ̀n dú ɛnlevri, mɛ̀n dú ankà-annanwɔrɛ, mɛ̀n dú ɛwúvà-kɔrɛ̀. Ɔwrɔn zriɛmɛ́n ke sɩ̀ hɔ́n Dade nanvrɛn ke dú kɛ nɛ̀n sɩ̀ cì m'eyri. 7Ke dú kɛ nyɛ́n nyri mɛ̀n hô, nye le nyri Dade mán. Kɩ zɛtɛ̀ lɔ, nyɛ́n nyri nɛ̀n, kɩ nyɛ́n kán nɛ̀n mán.”

8Filipɛ̀n kɛ dɔ́ nɛ̀n le: “Ɛẅɛnwrɔn, è yé bɔ̀ Ɔwɔ Zi kɩ kɛ lɛ zrɔ bɔ̀.” 9Zhezü mrɛ́n nɛ̀n ɔmùan le: “Ɛnvra sheshemɛ̀n de mɛ̀n dú nyɛ̀n ɛmɛ̀n nɔn, kɩ ɛ vá nyri mɛ̀n hàn Filipɛ̀n? Ɔwrɔn léyi kán mɛ̀n nɔn, kán Dade. Cɛci kruhú kɛ ɛ dɔ̀ le: ‘Yé bɔ̀ Ɔwɔ Ziɛ?’ 10E sɩ́ bútan le mɛ̀n dú Dade mɛ̀n, kɩ Dade mán dú mɛ̀n ɛmɛ̀n hàn? Ankà-dɔ̀ hɔ̀n léyi mɛ tán nyɛ̀n ɛnvra lɔ fɛn nɔn, ke sì dù me yri kɛ vá. Dade léyi dú mɛ̀n ɛmɛ̀n nɔn, kɛ hán nɛ́n dùku n'ɔkɔ̀hɔ̀n. 11Nyɛ́n bú m'ankà nyɛ́n tán ankaẅì ɛnvra léyi mɛ dɔ̀ le: mɛ́n dú Dade mɛ̀n kɩ Dade mán dú mɛ̀n ɛmɛ̀n. Ke sɩ̀ zrɔ mán, n'ɔkɔ̀hɔ̀n léyi nɛ̀n hán nɔn, hɩ kruhú nyɛ́n bütan ankàẅì. 12Annanwɔrɛ mɛ̀n mɛ dɔ́ nyɛ̀n le: ɔwrɔn léyi ke bú m'ankà kɛ tán ankaẅì nɔn, nɛ lɛ hán nɛ́n mán, ɛci hɔ̀n léyi mɛ hán nɔn. Nɛ lɛ hán yɔ kɛ lɛ sàn sevri, ɔmuhi mɛ hɔ́n Dade tɛsɛ̀n nɔn. 13Kɩ mɛ lɛ hán ɛci hɔ̀n lɔ fɛn léyi nyɛ lɛ sán m'ebɩmɛ̀n nɔn, ô Ɛnẅì kè yé nɛ́n Zi ci-zrɔ lɔ. 14Ke dú kɛ nyɛ sán mɛ̀n eci m'ebɩmɛ̀n hô, mɛ lɛ hán eci lɔ.”

Ɛnhɛ́n Prɔnprɔn yure mùan-wá

15“Ke dú kɛ nyɛ cüɛn mɛ̀n hô, nyɛ lɛ ẅɛn m'ɛnyanmàn hɔ̀n lɔ nyɛ́n hɛ́n. 16Mɛ lɛ sán Dade kɛ̀ tán nyɛ̀n ɔwrɔn nyantɛn tɔ̀n kɛ wá nyɛ̀n ɛkɔrɛ̀, annanwɔrɛ Hɛ́n Prɔnprɔn, ô nɛ̀n dú nyɛ̀n ɛmɛ̀n ɛnvra lɔ fɛn. 17Ɛnhibù ke sɩ̀ bɩ́ nɛ̀n rɔ́, ɔmuhi nɛ́n sɩ̀ kán yi, kɩ nɛ́n sɩ̀ nyri yi rɔ́ nɔn. Tɛ́n nyɛ́n, nyɛ́n nyri nɛ̀n, ɔmuhi nɛ́n mɛhi nyɛ́n dù, kɩ nɛ̀n dú nyɛ̀n ɛmɛ̀n nɔn. 18Mɛ́n sɩ̀ teze nyɛ́n zriɛ kɛ̀ hán ezhe-ẅì hɔ̀n hɔ́; me le vru mɛ̀n vá nyɛ̀n ɛmɛ̀n. 19Ɛnvra buriemɛ̀n ɛnhibù ke sɩ̀ vru kán mɛ̀n, tɛ́n nyɛ́n, nyɛ lɛ kán mɛ̀n, ɔmuhi mɛ̀n dú ɔkɔrɛmɛ̀n kɩ nyɛ́n mán nye le dú ɔkɔrɛmɛ̀n nɔn. 20Ɛnvra léyi ɛnbì ndɔ lɔ kɛ lɛ cɔ̀ nɔn, nye le nyri ɔmu le mɛ̀n dú Dade mɛ̀n, kɩ nyɛ́n dú mɛ̀n ɛmɛ̀n, kɩ mɛ̀n dú nyɛ̀n ɛmɛ̀n.”

21“Ɔwrɔn léyi kɛ ẅɛn m'ɛnyanmàn lɔ, hɩ kɛ hán n'ɛkɔrɛzì-ci nɔn, nyàn ɔwrɔn léyi kɛ cüɛn mɛ̀n nɔn. Dade kɛ lɛ cüɛn ɔwrɔn léyi kɛ cüɛn mɛ̀n nɔn; mɛ̀n mán mɛ lɛ cüɛn nɛ̀n, kɩ me le yé nɛ̀n m'edomɛ̀n.” 22Zhüdɛ̀n (Ke sɩ̀ dù Zhüda Iskariɔtɛ̀n) kɛ dɔ́ nɛ̀n le: “Ɛẅɛnwrɔn, anwɔntan kɛ lɛ hán kè cì, e le bɩ́ v'edomɛ̀n è yé bɔ̀, hɩ ke sɩ̀ dú tán ɛnhibù nɛ́n?” 23Zhezü mrɛ́n nɛ̀n ɔmùan le: “Ɔwrɔn léyi kɛ cüɛn mɛ̀n nɔn, nɛ lɛ wá m'ɔmùan ankà-dɔ̀. Dade kɛ lɛ cüɛn nɛ̀n, kɩ Dade mán mɛ̀n, bɔ́ lɛ vá n'eyri, kɩ bɔ́ le sɔ́n ebɩ́ n'ebɩ́ lɔ mɛ̀n. 24Ɔwrɔn léyi ke sɩ̀ cüɛn mɛ̀n nɔn, nɛ́n sɩ̀ ẅɛn m'ankà-dɔ̀ nɛ̀n hɛ́n. Ankà léyi nyɛ yá mɛ dɔ̀ nɔn, kè sɩ̀ dù m'eyri kè dù kɛ vá, tɛ́n Dade léyi wá mɛ̀n ɔkɔhɔ̀n nɔn, n'eyri de ke dù kɛ và nɔn. 25Mɛ̀n dɔ́ nyɛ̀n ankà ndɔ lɔ ɛnvra léyi mɛ̀n dú nyɛ̀n ɛmɛ̀n nɔn. 26Ɔwrɔn léyi kɛ lɛ wá nyɛ̀n ɛkɔrɛ̀, Ɛnhɛ́n Prɔnprɔn léyi Dade ke le yüre m'ebɩ́mɛ̀n nɔn, ke le yé nyɛ̀n eci lɔ fɛn, kɩ ke le kore nyɛ̀n ankà lɔ fɛn léyi mɛ̀n dɔ́ nyɛ̀n nɔn.”

27“Anwɔwɔ de me teze nyɛ̀n hán nɔn, m'anwɔwɔ de mɛ tán nyɛ̀n nɔn. Mɛ́n sɩ́ tán nyɛ̀n anwɔwɔ kɛ hán ɔmu le ɛnhibù kɛ tán nɔn. Nyɛ́n bɩ́ dú ɛnkrɛta-kuemɛ̀n, ɛnjansù ke bɩ́ ẅɛn nyɛ̀n. 28Nyɛ́n yá mɛ̀n dɔ́ nyɛ̀n le: mɛ hɔ̀n, tɛ́n me le vru mɛ̀n vá nyɛ̀n ɛmɛ̀n. Ke dú kɛ nyɛ cüɛn mɛ̀n hô, pɔpüɛ̀ kɛ lɛ brá nyɛ̀n, ɔmuhi nyɛ́n nyri ɔmu le, mɛ hɔ́n Dade tɛsɛ̀n, ɔmuhi Dade sevri vrán mɛ̀n nɔn. 29Mɛ dɔ́ nyɛ̀n zɛtɛ̀ lɔ yakɛ ɛci hɔ̀n lɔ kɛ lɛ hán, ô ɛnvra léyi y'ɛnvra kɛ lɛ cɔ̀ nɔn, nyɛ́n bùtan ankaẅì. 30Nyɛ́n mɛhi bɔ́ sɩ̀ vru dɔ́ ankà bobrebe, ɔmuhi ɛhibù wú nɛncüì lɔ kɛ và nɔn. Nɛ̀n sɩ̀ ẅɛn ɛkɔrɛ̀srɔn zriɛmɛ́n m'ɛwú, 31tɛ́n ke ji le ɛnhibù ke nyrì le, mɛ cüɛn Dade kɩ mɛ hán n'ɛkɔrɛzì-ci. Nyɛ́n tɔhú, bɔ̀ cɔhɔ́ ɛnu lɔ.”

Currently Selected:

Zhan 14: ƐAA03

Highlight

Copy