Zhan 18

Zhezü ẅɛn vra

(Nyɛ́n nyan Matie 26:47-56; mán Markɛ̀n 14:43-50 wrú lɔ mɛ̀n)

1Ɛnvra léyi Zhezü dɔ́ ankà ndɔ lɔ trɔ nɔn, nɛ̀n mán n'ɛsɛnkɛn-bɔ̀ mɛhi yɔ hɔ́n Sedrɔn shigbɛ́-shi mɛẅi. Nanvrɛn lɔ ɛkɛ̀tɛ̀ cɛ tɔ̀n ndù kɩ nɛ́n mán n'ɛsɛnkɛn-bɔ̀ mɛhi yɔ bru ɛkɛ̀tɛ̀ cɛ lɔ mɛ̀n. 2Zhüda léyi kɛ hɛ́ nɛ̀n nɔn mán nyri ɛyri lɔ, ɔmuhi Zhezü mán n'ɛsɛnkɛn-bɔ̀ kɛ vá nanvrɛn lɔ ɛburi-buri nɔn. 3Zhüda hɔ́n ɛkɛ̀tɛ̀ cɛ lɔ mɛ̀n, nɛ̀n sɩ́ gɔliɛ-bɔ̀ fɛcüè mán anwrɔn hɔ̀n léyi Ɔwɔ-cice-bɔ̀ cüìcüì mán Ɔwɔ-nyanmàn-sùva-wá-bɔ̀ tán nɛ̀n nɔn; anhà-kɔ́n ci, kɛniɛn mán ɛnhyà-lakà dú yɔ antamɛ̀n. 4Zɛtɛn Zhezü léyi nyri eci léyi kɛ lɛ wɔɛ̀n nɔn, nán esù hɔ́n y'ɛtɛ̀sɛ̀n kɩ ke yrɛ yɔ le: “Antɔn nye jiɛ?” 5Yɔ dɔ̀ le: “Nazàrɛtɛ̀n-wrɔn Zhezü.” Zhezü kɛ dɔ́ yɔ le: “Nyàn mɛ̀n.” Kɩ Zhüda léyi kɛ hɛ́ nɛ̀n nɔn, nyɔn nanvrɛn yɔ mɛhi. 6Ɛnvra léyi Zhezü dɔ́ yɔ le: “Nyàn mɛ̀n”, yɔ nán esù ɛmɛẅi kɩ yɔ bore ɛnhibɩ́ɛ. 7Zhezü vru ke yrɛ yɔ le: “Antɔn nye jiɛ?” Yɔ dɔ̀ le: “Nazàrɛtɛ̀n-wrɔn Zhezü.” 8Zhezü mrɛ́n yɔ ɔmùan le: “Mɛ́n gɔ̀ dɔ́ nyɛ̀n le mɛ̀n. Ke dú kɛ mɛ̀n de nye ji mɛ̀n nɔn hô, nyɛ́n teze anwrɔn ndɔ hɔ̀n lɔ kɛ̀ hɔ̀n.”

9Ɔmu lɔ de ankà léyi nɛ́n dɔ̀ nɔn kɛ lɛ sá nmù nɔn: “Anwrɔn hɔ̀n léyi vɛ́n, Dade, ɛ̀ tán mɛ̀n nɔn, mɛ̀n sɩ̀ hán ɛnzri mán kɛ̀ zrɛ̀n hàn.” 10Simɔn Piɛrɛ̀n ẅɛn ɛnyan-she; nɛ̀n bɩ́ ɛnyan lɔ nɛ̀n wí Ɔwɔ-cice-wrɔn cüìcüì ci-bɩtan-wrɔn lɔ ezì-kɔrɛ̀ nukù. (Eci-bɩ̀tan-wrɔn ndɔ lɔ ye bi nɛ̀n Malküsɛ̀n) 11Tɛ́n Zhezü kɛ dɔ́ Piɛrɛ̀n le: “Bɩ v'ɛnyan-she lɔ hɛ̀n n'ɛhɛ́n-yriɛ. E tro le mɛ́n sɩ̀ mi ɛgbànkàn shi grashɛ̀n léyi Dade tán mɛ̀n nɛ́n?”

Ye sɩ́ Zhezü Hanɛ̀n zìwú

12Gɔliɛ-bɔ̀ fɛcüè, y'ɔwrɔn cüìcüì mán Zhüifɛ̀n-bɔ̀ yrí-nan-bɔ̀ ẅɛn Zhezü kɩ zɛtɛn kora nɛ̀n. 13Yɔ gɔ́ sɩ́ nɛ̀n Hanɛ̀n nanvrɛn. Hanɛ̀n dú Kahifɛ̀n nɛ́n nɛ́ncrɛ̀ léyi dú Ɔwɔ-cice-wrɔn cüìcƐì ɛnnanwàn ndɔ lɔ mɛ̀n nɔn. 14Tɛ́n, Kahifɛ̀n de kran ankà yé Zhüifɛ̀n-bɔ̀ cüìcüì hɔ̀n le: “Zrɔ tán ɔmu le ɔwrɔn zri ke wú fɛcüè mumù lɔ kruhú.”

Piɛrɛn kɛ wrɔ́n anmanta le nɛ̀n sɩ̀ dù Zhezü sɛnkɛn-wrɔn

(Nyɛ́n nyan Matie 26:69-70; Markɛ̀n 14:66-68; mán Lükɛ̀n 22:55-57 wrú lɔ mɛ̀n)

15Simɔn Piɛrɛ̀n mán nɛ́n nyran ɛsɛnkɛn-wrɔn tɔ̀n mɛhi dú Zhezü ɛmɛẅi. Zhezü sɛnkɛn-wrɔn ndɔ lɔ Ɔwɔ-cice-wrɔn cüìcüì lɔ gɔ́ nyri nɛ̀n, hán tán kɩ nɛ́n mán Zhezü mɛhi yɔ bru envra zri lɔ Ɔwɔ-cice-wrɔn cüìcüì wɔn-sɛ̀n bɩ́ lɔ mɛ̀n. 16Tɛ́n Piɛrɛ̀n nyɔn ɛntrɛ angbàtà tɛ̀sɛ̀n. Zɛtɛn Zhezü sɛnkɛn-wrɔn ndɔ léyi Ɔwɔ-cice-wrɔn cüìcüì lɔ nyrì nɔn srɔ ɛntrɛ kɩ dɔ́ ɛnnyɔnwrɔn léyi kɛ nán esù-gbàtà nɔn ankà, kɩ nɛ̀n hán Piɛrɛ̀n bru ebɩ́ vriemɛ̀n. 17Eci-bɩ̀tan-hi léyi kɛ nán angbàtà nɔn, kɛ dɔ́ Piɛrɛ̀n le: “Vɛ́n mán è sì dù Ɔwrɔn ndɔ lɔ n'ɛsɛnkɛn-wrɔn tɔ̀n hàn?” Piɛrɛ̀n mrɛ́n ɔmùan kɛ dɔ̀ le: “Hɔ̂, mɛ̀n sɩ̀ dù n'ɔwrɔn zriɛmɛ́n.”

18Ɔmuhi ɔwrɔ̀ ke cüe nɔn, eci-bɩtan-bɔ̀ mán ɛyri-nan-bɔ̀ kɛ́n ɛnhyà kɩ bɔrɛkru ɛtɛ̀sɛ̀n. Piɛrɛ̀n mán nyɔn yɔ ɛtɛsɛ̀n kɩ kɛ yɩ́ ɛnhyà.

Ɔwɔ-cice-wrɔn cüìcüì ke yrɛ Zhezü ankà

(Nyɛ́n nyan Matie 26:59-66; Markɛ̀n 14:55-64; mán Lükɛ̀n 22:66-71 wrú lɔ mɛ̀n)

19Ɔwɔ-cice-wrɔn cüìcüì ke yrɛ Zhezü ankà, n'ɛsɛnkɛn-bɔ̀ mán n'ankà-yé wú. 20Zhezü mrɛ́n nɛ̀n ɔmùan le: “Mɛ̀n dɔ́ ankà fɛcüè mɛ̀n anwrɔn lɔ fɛn zìwú; me yé ankà ɛnvra lɔ fɛn Ɔwɔ-sɛ́n-wɔn hɔ̀n mán Ɔwɔ-cice-wɔn lɔ mɛ̀n, ɛyri léyi Zhüifɛ̀n-bɔ̀ lɔ fɛn kɛ bɔrɛkru nɔn; mɛ́n sɩ́ dɔ́ ankà zriɛmɛ́n ɛbán mɛ̀n. 21Ecitan Kruhù kɛ e yrɛ mɛ̀n ankà hà? È yrɛ anwrɔn hɔ̀n léyi yá ankà léyi mɛ̀n dɔ́ yɔ nɔn; yɔ tɛn yɔ nyri anvrɛnvrɛn mɛ̀n ankà léyi mɛ́n dɔ̀ nɔn.” 22Ɛnvra léyi Zhezü dù kɛ dɔ́ ankà nɔn, ɛyri-nan-bɔ̀ lɔ ɔtɔ̀n léyi nyɔn nɛ̀n ɛtɛsɛ̀n nɔn, sɩ́ nɛ̀n nukù kɩ kɛ dɔ̀ le: “Ɔmu de ɛ dɔ́ Ɔwɔ-cice-wrɔn cüìcüì ankà nɛ́n?” 23Zhezü mrɛ́n nɛ̀n ɔmùan le: “Ke dú kɛ mɛ̀n dɔ́ ankà gbàn hô, è ye bɔ̀ eci lɔ mɛ̀n léyi mɛ̀n dɔ́ ankà gbàn nɔn; tɛ́n ke dú kɛ mɛ̀n dɔ́ ankà anvrɛnvrɛn hô, cɛci kruhú kɛ ɛ gɔ́n mɛ̀n hàn?” 24Ankorɛ̀ dú nɛ̀n ɛnvra lɔ fɛn anhɛ́ mɛ̀n, zɛtɛn Hanɛ̀n hán yɔ, yɔ sɩ́ nɛ̀n Ɔwɔ-cice-wrɔn cüìcüì Kahifɛ̀n nanvrɛn.

Piɛrɛ̀n vru wrɔ́n anmanta le nɛ̀n sɩ̀ dù Zhezü sɛnkɛn-wrɔn

(Nyɛ́n nyan Matie 26:71-75; Markɛ̀n 14:69-72; mán Lükɛ̀n 22:58-62 wrú lɔ mɛ̀n)

25Ɛnvra lɔ mɛ̀n, Simɔn Piɛrɛ̀n tɛn yɛ́ kɛ yɩ́ ɛnhyà. Ye yrɛ nɛ̀n le: “Vɛ́n mán è sɩ̀ dù ɔwrɔn ndɔ lɔ n'ɛsɛ̀nkɛn-wrɔn tɔ̀n hàn?” Tɛ́n Piɛrɛ̀n kɛ wrɔ́n anmanta kɛ dɔ̀ le: “Hɔ̂, mɛ̀n sì dù n'ɔwrɔn.” 26Ɔwɔ-cice-wrɔn cüìcüì ci-bɩ̀tan-wrɔn tɔ̀n léyi dú ɔwrɔn léyi Piɛrɛ̀n wi nukù, n'ɛmɛ̀n mɛ̀n wrɔn nɔn, kɛ dɔ́ Piɛrɛ̀n le: “Mɛ̀n sɩ̀ kàn mɛ́n vɛ́n mán Zhezü mɛhi ɛkɛ̀tɛ̀ cɛ lɔ mɛ̀n hàn?” 27Tɛ́n Piɛrɛ̀n vru mrɛ́n ɔmùan le ndɔ lɔ ɛyɔ̀n. Kɩ ɛnvra zri lɔ mɛ̀n ɔkɔ̀sɔ̀-cüì tɔ̀n dí nkù.

Ye sɩ́ Zhezü Pilatɛ̀n zìwú

(Nyɛ́n nyan Matie 27:1-2,11-14; Markɛ̀n 15:1-5; mán Lükɛ̀n 23:1-5 wrú lɔ mɛ̀n)

28Zɛtɛn yɔ dú Kahifɛ̀n nanvrɛn ye bɩ́ Zhezü yɔ hɔ́n Pilatɛ̀n léyi dú govran nɔn zìwú. Ye sɩ́ nɛ̀n ɔsɔwrɔ̀ futàn. Tɛ́n Zhüifɛ̀n-bɔ̀ cüìcüì hɔ̀n ke sì bru Pilatɛ̀n bɩ́ lɔ mɛ̀n, ɔmuhi yɔ sɩ́ ji yɔ dú ɛnbrá mɛ̀n yakɛ yɔ zî abutùkumɛ́n-kɔ́ nyanmán-bì ci-zî lɔ nɔn. 29Hɩ le kruhú de govran Pilatɛ̀n hɔ́n cɔ́ yɔ ɛntrɛ. Ne yrɛ yɔ le: “Ankà tán de yɛ dɔ́ ku Ɔwrɔn ndɔ lɔ ɛwú nɛ́n?” 30Yɔ mrɛ́n nɛ̀n ɔmùan le: “Ke dú kɛ kè sɩ̀ dù eci-gbangbàn-hán-wrɔn hô, bɔ́ sɩ̀ ẅɛn nɛ̀n bɔ̀ và sɩ́ mɛ́n.” 31Pilatɛ̀n kɛ dɔ́ yɔ le: “Nyɛ́n dùku nyɛ́n bɩ́ nɛ̀n, ô nyɛ́n ci nɛ̀n ɛmrɛ̀n ny'ɛnyanmàn lɔ wú.” Yɔ mrɛ́n ɔmùan le: “Bɔ̀ sì ẅɛ̀n ɛkɔrɛ̀-levri hɩ b'á dí ɔwrɔn owúemɛ̀n nɔn.”

32Ɔmu lɔ de Zhezü mùan ankà lɔ dɔ̀ nɔn, kɛ lɛ hán tán, ô kè yé owù léyi ne le wù nɔn. 33Pilatɛ̀n dú ɛntrɛ bru ɛbemɛ̀n; nɛ̀n bi Zhezü kɩ ne yrɛ yi le: “E dú Zhüifɛ̀n-bɔ̀ nɛncüìɛ?” 34Zhezü mrɛ́n ɔmùan le: “Ɛ dɔ́ ndɔ lɔ ɔmuhi vɛ́n mumù de è tro, kale anwrɔn de dɔ́ mɛ́n m'ankà nɛ́n?” 35Pilatɛ̀n mrɛ́n ɔmùan le: “Zhüifɛ̀n-wrɔn dú mɛ̀n hàn? V'anmàn ɛnhiwú bɔ̀ mán Ɔwɔ-cice-bɔ̀ cüìcüì hɔ̀n ẅɛn mɛ́n vá sɩ́ mɛ̀n; ecitan ɛ̀ hán hàn?” 36Zhezü mrɛ́n ɔmùan le: “M'ɛnnɛ̀ncüì-dúyri ke sɩ̀ dù ɛnu ɛnhibù ndɔ lɔ tɛn; ke dú kɛ m'ɛnnɛ̀ncüì-dúyri kè dú ɛnhibù ndɔ lɔ tɛn hô, m'ɛci-bɩ̀tan-bɔ̀ kɛ lɛ kɔ́n anhà ô ye bɩ́ ẅɛn mɛ̀n yɔ tán Zhüifɛ̀n-bɔ̀ cüìcüì hɔ̀n. Tɛ́n hɔ̂, m'ɛnnɛ̀ncüì-dúyri kè sɩ̀ dù ɛnhibù ndɔ lɔ tɛn.” 37Zɛtɛn Pilatɛ̀n mrɛ́n nɛ̀n ɔmùan le: “Zɛtɛn e dú ɛnnɛ̀ncüìɛ?” Zhezü mrɛ́n ɔmùan le: “Hɩ de ɛ dɔ̀ nɔn: mɛ̀n dú ɛnnɛ̀ncüì. Ye bî mɛ̀n, kɩ mɛ̀n vá ɛnhibù wú ankà annànwɔrɛ dɔ́-yri. Ɔwrɔn totɔtɔ̀n léyi dú ankà annànwɔrɛ mɛ̀n-wrɔn nɔn, ke die ankà léyi mɛ dɔ́ nɔn nukùɛ.” 38Pilatɛ̀n ke yrɛ nɛ̀n le: “Cɛci dú ankà annanwɔrɛ hà?”

Ye di Zhezü owúemɛ̀n

(Nyɛ́n nyan Matie 27:15-31; Markɛ̀n 15:6-20; mán Lükɛ̀n 23:13-25 wrú lɔ mɛ̀n)

Ɛnvra léyi Pilatɛ̀n dɔ́ ankà ndɔ hɔ̀n lɔ trɔ nɔn, nɛ̀n vru nɛ̀n srɔ ɛntrɛ nɛ̀n hɔ́n Zhüifɛ̀n-bɔ̀ zìwú. Nɛ dɔ́ yɔ le: “Mɛ́n sɩ́ cɔ́ nwùbɔ́ ankà zriɛmɛ́n ɔwrɔn ndɔ lɔ wú. 39Tɛ́n ny'edù-ci léyi nyɛ́n ẅɛ̀n nyɛ hán nɔn, ɛnnanwàn lɔ fɛn, abutùkumɛ́n-kɔ́ nyanmán-bì lɔ, me teze anwɔn-mɛ̀n-wá-wrɔn tɔ̀n mɛ tán nyɛ̀n. Nye ji le mɛ̀n teze Zhüifɛ̀n-bɔ̀ nɛncüì lɔ mɛ̀n tán nyɛ̀n hàn?” 40Yɔ mrɛ́n nɛ̀n ɔmùan, yɔ di bobo yɔ dɔ̀ le: “Hɔ̂, ke sɩ̀ dù nɛ́n! Barabasɛ̀n de bɔ́ ji nɔn!” Tɛ́n, Barabasɛ̀n ndɔ lɔ, nɛ̀n dú eci-gbangbàn-hán-wrɔn tɔ̀n.

Currently Selected:

Zhan 18: ƐAA03

Highlight

Copy