Lükɛ̀n 12

Zhezü kɛ dɔ́ n'ɛsɛnkɛn-bɔ̀ kɛ wá y'edomɛ̀n esùva anbrádì ci-hán tɛsɛ̀n

(Nyɛ́n nyan Matie 10:26-27 wrú lɔ mɛ̀n)

1Hɩ vra lɔ anwrɔn tɛ̀bru bɔrɛkru, kɩ̀ anwrɔn janbɔ̀, yɔ esùnan mɛ̀n lɔ, yɔ kasrɛ yɔ nyran hɔ̀n. Zhezü bukru kɛ dɔ́ n'ɛsɛnkɛn-bɔ̀ ankà: “Nyɛ́n wá ny'edomɛ̀n esùva Ɔwɔ-nyanmàn-sùva-wá-bɔ̀ ci-fɔ́-ci tɛsɛ̀n, hɩ mɛ̀n kɛ dɔ̀ le, y'anbrádì ci-hán tɛsɛ̀n. 2Ɛci-ban-ci hɔ̀n lɔ fɛn kɛ lɛ srɔ ɛntrɛ, kɩ yɛ lɛ cɔ́ ankà-bán-ankà lɔ fɛn ye nyrì. 3Hɩ le kruhú de ankà lɔ fɛn léyi yɛ lɛ dɔ́ ɛyri-yɔwɔ mɛ̀n nɔn, yɛ lɛ yá nɛ̀n ɛcɛ̀n yri-kàn mɛ̀n, kɩ hɩ léyi yɛ dɔ́ ɔwrɔn nukù tɛsɛ̀n, ɔmùan ɛnhisemɛ̀n, anwɔn mɛ̀n nɔn, dú ankà léyi ye le di bobo ɔwɔn wú, yɛ tán anwrɔn kɛ̀ yá nɔn.”

Ɔwrɔn léyi ke ji le ye sù nɔn

(Nyɛ́n nyan Matie 10:28-31 wrú lɔ mɛ̀n)

4“Mɛ dɔ́ nyɛ̀n, nyɛ́n, m'annyrán hɔ̀n: nyɛ́n bɩ́ sú anwrɔn hɔ̀n léyi ke wri edùwrú ẅia, kɩ ke sɩ́ vru hán eci nyàntɛn zriɛmɛ́n nɔn. 5Me le yé nyɛ̀n eci léyi ke ji le nyɛ́n sù nɔn: nyɛ́n sú Ɔwɔ léyi, owù mɛẅi lɔ ẅɛn ɛkɔrɛ̀srɔn kɛ lɛ kɔ́n nyɛ̀n di ɛnhyà mɛ̀n nɔn; hɛ̀ɛ̀, mɛ dɔ́ nyɛ̀n, nɛ́n de ke ji le nyɛ́n sú nɛ̀n nɔn! 6Kɛ̂, ye sɩ́ hɛ́ annrɛ́n ẅì hɔ̀n ɛnri kɔprɛ̀ anhyrɛ̀ hà? Hɩ lɔ mán kɩ, ɛnzriɛmɛ́n ankà ke sɩ́ yuru Ɔwɔ esùva. 7Kɩ ny'ɛnkruẅíe dùku mán yɛ krɛ̀. Ɛnjansù ke bɩ́ ẅɛn nyɛ̀n: nyɛ́n ẅɛ̀n anhàn vrán annrɛ́n ẅì hɔ̀n bobrebe.”

Zhezü nyrì mán n'eteze

(Nyɛ́n nyan Matie 10:32-33; 12:32; 10:19-20 wrú lɔ mɛ̀n)

8“Mɛ dɔ́ nyɛ̀n: ke dú kɛ ɔwrɔn totɔtɔ̀n kɛ hán tán anwrɔn ke nyrì le nɛ́n mɛhi bɔ́ dù, ɔwrɔnẅì Ẅì mán kɛ lɛ hán Ɔwɔ kùyüre-bɔ̀ ke nyrì le mɛ̀n mán nɛ́n mɛhi bɔ́ dù. 9Tɛ́n ke dú kɛ ɔwrɔn kɛ dɔ̀ le, nɛ̀n sɩ̀ nyri mɛ̀n anwrɔn zìwú, ɔwrɔnẅì Ẅì mán kɛ lɛ dɔ́ Ɔwɔ kùyüre-bɔ̀ zìwú le: mɛ̀n sɩ̀ nyri nɛ̀n. 10Ɔwrɔn totɔtɔ̀n léyi kɛ dɔ́ ankà gbàn ku ɔwrɔnẅì Ẅì ɛwú nɔn, nɛ lɛ cɔ́ ɛgbàn-bɩ̀-ce, tɛ́n, ɔwrɔn léyi kɛ lɛ wora Ɛnhɛ́n Prɔnprɔn nɔn, nɛ́n sɩ̀ cɔ́ ɛgbàn-bɩ̀-ce. 11Ɛnvra léyi ye le sɩ́ nyɛ̀n ɛmrɛ̀n-ci-bɔ̀ zìwú, Ɔwɔ-sɛ́n-wɔn hɔ̀n lɔ mɛ̀n; ɛnvra tɔ̀n hô, ɛcüìcüì-bɔ̀ zìwú nɔn, ɛnkrɛ̀ta ke bɩ́ ku nyɛ̀n ny'ankà dɔ́ mɛ̀n, 12ɔmuhi Ɛnhɛ́n Prɔnprɔn ke le yé nyɛ̀n, ɛnvra zri lɔ, ankà léyi ke ji le nyɛ́n dɔ̀ nɔn.”

Ɔbrɔsa nɛ̀ncüì nyandrɛn mɛ̀n ankà-dɔ̀

13Ɔwrɔn tɔ̀n dú fɛcüè lɔ mɛ̀n kɛ dɔ́ Zhezü le: “Ankà-yé-wrɔn, ɛ̀ dɔ́ nman-ẅì le: anja léyi bo zi tán bɔ̀ nɔn, nɛ̀n dɛ́ mɛ tɛn nɛ̀n tán mɛ̀n.” 14Kɩ Zhezü kɛ dɔ́ nɛ̀n le: “M'annyrán, antɔn wá mɛ̀n ny'ankà-dɔ́-wrɔn, mán ny'ɛci-dɛ́-wrɔn hán?” 15Kɩ nɛ dɔ́ yɔ lɔ fɛn le: “Nyɛ́n wá esùva, nyɛ́n ẅɛn ny'edomɛ̀n nyɛ́n sɔhɔ́ ɛnnɛ̀ncüì-di-ankà wú, ɔmuhi, ɔwrɔnẅì wúvà annànwɔrɛ lɔ, ke sɩ̀ dù n'ɛci hɔ̀n léyi nɛ́n ẅɛ̀n nɔn hɩ wú, ke dú kɛ nɛ̀n di ɛnnɛ̀ncüì anvrɛnvrɛn mán.” 16Kɩ nɛ dɔ́ yɔ nyandrɛn ndɔ lɔ mɛ̀n ankà: “Ɔwrɔn tɔ̀n di ɛnnɛ̀ncüì, nɛ̀n ẅɛn ɛnhi, kɩ nɛ̀n ẅɛn ankɛ̀tɛ̀ kɛ hán nɛ̀n nɛ kuɛ ɛci ankrànkràn. 17Ne tro ankà kɩ nɛ dɔ́ n'edomɛ̀n le: ‘Ecitan de ke ji le mɛ̀n hán nɛ́n? Mɛ̀n sɩ̀ ẅɛ̀n ɛyri hɩ m'á hɛ́n m'ɛci-kuɛ-ci hɔ̀n lɔ fɛn nɔn.’ 18Zɛtɛn, nɛ dɔ́ n'edomɛ̀n le: ‘Nyàn eci léyi mɛ lɛ hán nɔn: me le gbe m'ɛci-hɛ́n-yri gbànvri hɔ̀n lɔ, ô mɛ́n ku ɛnyàntɛn kè sevri, zɛtɛn me le bɩ́ m'ɛci-kuɛ-ci hɔ̀n lɔ fɛn mán ndɔ hɔ̀n léyi dú m'ɛci-ẅɛn-ci nɔn mɛ́n ku ɛmɛ̀n. 19Zɛtɛn mɛ lɛ dɔ́ m'edomɛ̀n le: m'annyran-anvrɛn, ɛ̀ ẅɛn ɛci cüɛn, kɛ lɛ cɔ́ mɛ́n ɛnnanwàn bobrebe, ɛ̀ wrɔncüe, zî ɛci, mi ɛntàn, ô ɛ̀ brá pɔpüɛ̀ ɛ̀ tán v'edomɛ̀n.’ 20Tɛ́n Ɔwɔ kɛ dɔ́ nɛ̀n le: ‘Ɔbrɔsà-wrɔn! Ɛnnyran ndɔ lɔ mɛ̀n, e sɩ̀ vru dú ɔkɔrɛ-bɔ̀ mɛ̀n. Zɛtɛn, antɔn de ɛ̀ tán ɛci léyi ɛ̀ bɔrɛkru ɛ̀ hɛ́n nɛ́n?’ ”

21Zhezü vru kɛ dɔ̀ le: “Ɔmu lɔ de ke le dù tán ɔwrɔn léyi kɛ hán ɛnnɛ̀ncüì-di-kɔ̀hɔ̀n tán nɛ́n mumù, hɩ Ɔwɔ zìwú tɛ́n kè sɩ̀ dì ɛnnɛ̀ncüì nɔn.”

Bɔ̀ ẅɛn Ɔwɔ sɛ́

(Nyɛ́n nyan Matie 6:25-34 wrú lɔ mɛ̀n)

22Zɛtɛn Zhezü kɛ dɔ́ n'ɛsɛnkɛn-bɔ̀ le: “Nyàn eci le kruhú léyi mɛ dɔ́ nyɛ̀n le: ɛnkrɛ̀ta ke bɩ́ ku nyɛ̀n ɛci-zî ankà kruhú mán edù-ku-ci léyi nyɛ lɛ ẅɛn edomɛ̀n nɔn yi wú. 23Ɔmuhi, ɛwúvà zrɔ vrán ɛci-zî, kɩ edùwrú mán zrɔ vrán edù-ku-ci nɔn. 24Nyɛ́n crɛ̀ nyan annrɛ́n hɔ̀n: ye sɩ́ tɛ́ ɛci, ye sɩ́ kuɛ ɛci, ye sɩ̀ ẅɛ̀n ɛci-hɛ́n-yri, kɩ Ɔwɔ kɛ tán yɔ ɛci-zî! Nyɛ́n ẅɛn vɔnshɛ́ vrán annrɛ́n hɔ̀n! 25Ny'ɛmɛ̀n lɔ, antɔn de n'ɛnkrɛ̀ta kù kɛ lɛ ku nɛ̀n ɛnvra ɛmɛ̀n nɛ́n? 26Ke dú kɛ, nyɛ́n sɩ̀ ẅɛ̀n eci ẅiɛ lɔ, n'ɛkɔrɛ̀levri, cɛci kruhú kɛ ɛnkrɛ̀ta ke kú nyɛ̀n hɩ léyi wɔrɔ nɔn wúɛ? 27Nyɛ́n crɛ̀ nyan ɔmu le anhyrà ke di ankɛ̀tɛ́ mɛ̀n nɔn: yɔ sɩ́ hán ɔkɔhɔ̀n, yɔ sɩ́ dú edùku-ci mán, ɔmu tɛ̀kɩ mɛ dɔ́ nyɛ̀n le, ɛnnɛ̀ncüì Salomɔn dùku mán n'ɛnnɛ̀ncüì-dì lɔ fɛn, kè sɩ̀ ẅɛ̀n ɛci kè fì kɛ̀ vràn anhyrà zriɛmɛ́n. 28Ɔwɔ kɛ djrɔ́ ɛfi léyi dú ankɛ̀tɛ́ mɛ̀n nɔn ɛnshi, ɛfi zri lɔ dú ɛnyɔncì lɔ, ɛnɛ́n lɔ, ye le frɛ́ nɛ̀n ku ɛnhyà mɛ̀n; anhɔntan kɛ lɛ hán ke cì kɛ̂ nyɛ tɛn Ɔwɔ mumù ke sɩ̀ ku nyɛ̀n ɛci edù nɛ́n? Nyàn ɔmuhi ny'ankàẅì-bùtan cɛcɛ nɔn! 29Nyɛ́n bɩ́ di ny'edomɛ̀n ejüe, nyɛ́n ji ɔmu le nyɛ lɛ hán, ô nyɛ́n cɔ́ ɛci-zî mán ɛnshi-mì nɔn. 30Anwrɔn hɔ̀n léyi kè sɩ̀ nyrì Ɔwɔ nɔn, de ke ji ɛnvra lɔ fɛn eci léyi yɔ lɛ hán ô yɔ cɔ́ ɛci-zî nɔn. Tɛ́n nyɛ́n, nyɛ́n ẅɛn nyɛ́n zi léyi nyri ɛci léyi nye ji nɔn. 31Anhobɩ́ wúvà ankà kè dú ny'ankà shishi, kɩ Ɔwɔ kɛ lɛ tán nyɛ̀n hɩ le wɔrɔ nɔn.”

Anhobɩ́ nɛ̀ncüí-dì

(Nyɛ́n nyan Matie 6:19-21 wrú lɔ mɛ̀n)

32“Ɛnjansù ke bɩ́ ẅɛn nyɛ̀n kɔ̀kɔ̀sɛ̀-kà cɛ! Ɔmuhi nyɛ́n Zi cüɛ̀n nɔn, de tán nyɛ̀n Anhobɩ́ Nɛ̀ncüì-dúyri nɔn. 33Nyɛ́n hɛ́ ny'ɛci hɔ̀n lɔ, ô nyɛ́n bɩ́ ɔkùa lɔ nyɛ́n ce ɛmian-bɔ̀. Nyɛ́n ji angbɛ́n léyi ke sɩ́ kua nɔn, ô nyɛ́n ji anhobɩ́ nɛ̀ncüì-dì léyi ke sɩ́ zrɛ́n mrìmrì: hɩ ɛci yerɛ-bɔ̀, mán anbɔ̀bɔ mɛhi, ke sɩ̀ cɔ́ y'ɛjrɛ́-yri nɔn. 34Ɔmuhi, ɛyri léyi v'ɛnnɛ̀ncüì-dì-ci hɔ̀n lɔ ndù nɔn, nanvrɛn de v'ɛnbɔrɛ mán ndù nɔn.”

Eci-bɩ̀tan-bɔ̀ léyi ke kpri ɛvɛ̀ nɔn

35“Nyɛ́n krɔn Kpéhɛn, nyɛ́n hán eci, nyɛ́n nyɔn pɛtɛ̀n ɛẅìe, o nyɛ́n dɔ́n nyɛ́n kɛniɛn hɔ̀n lɔ. 36Ke ji le, nyɛ́n dù nyɛ́n cá eci-bɩ̀tan-bɔ̀ léyi kɛ vrá y'Ankà-yé-wrɔn ɛnvra léyi ne le dú eyrì kɔranmɛ̀n nɛ lɛ và, nɛ lɛ gɔ́n esù ɛkɔrɛ̀, ô ye srú nɛ̀n esù nɔn. 37Ɛnbɔrɛbru dú eci-bɩ̀tan-bɔ̀ léyi, Ankà-yé-wrɔn vru vá mɛ̀n lɔ, ɛvɛ̀ ke le kprì! Mɛ dɔ́ nyɛ̀n annànwɔrɛ mɛ̀n le: Nɛ lɛ nyɔn nɛ́n pɛtɛ̀n ɛẅìe, nɛ lɛ hán yɔ, yɔ yɛ́, kɩ nɛ lɛ tán yɔ ɛci yɔ zî. 38Ke dú kɛ nɛ vá ɛnnyran wanzi, kɛ nɛ̀n sɩ̀ gɔ̀ và mán, kɛ nɛ cɔ́ yɔ ɛvɛ̀ kpriemɛ̀n hô, ɛnborɛbrù dú yɔ tɛn! 39Nyɛ́n yá ankà ndɔ lɔ: ke dú kɛ ɔwɔn nɛ́n zi nyri ɛnvra léyi ɛci-yerɛ-wrɔn kɛ lɛ và nɔn, nɛ̀n sɩ̀ tán yi ɛkɔrɛ̀-levri kè bru anwɔn mɛ̀n. 40Nyɛ́n krɔn kpéhɛn nyɛ́n nyɔn nyɛ́n mán, ɔmuhi ɔwrɔnẅì Ẅi kɛ lɛ vá wacɛ̀n wú léyi nyɛ́n sɩ̀ troɛ nɔn.”

Eci-bɩ̀tan-wrɔn léyi ke di ɔmùan zri mán eci-bɩ̀tan-wrɔn léyi ke di ɔmùan anhyrɛ̀ nɔn

(Nyɛ́n nyan Matie 24:45-51 wrú lɔ mɛ̀n)

41Zɛtɛn Piɛrɛ̀n ke yrɛ le: “Ɛẅɛnwrɔn, bɔ́ zri bɔ́ kruhú de ɛ dɔ́ nyandrɛn mɛ̀n ankà ndɔ lɔ, kale anwrɔn lɔ fɛn kruhúɛ?”

42Ɛẅɛnwrɔn mrɛ́n ɔmùan le: “Antɔn de dú ankà-nyrì mán ɔmùan-zri-dì ci-bɩtan-wrɔn nɛ́n? Nɛ̀n dú ɔwrɔn tɔ̀n léyi n'ankà-yé-wrɔn kɛ wá nɛ̀n n'ebɩ́ lɔ antamɛ̀n, kɩ kɛ lɛ tán eci-bɩ̀tan-bɔ̀ ndɔ hɔ̀n lɔ ɛci-zî ɛnvra krɔn muàn mɛ̀n lɔ nɔn. 43Ɛnbɔrɛ-bru dú tán eci-bɩ̀tan-wrɔn ndɔ lɔ, ke dú kɛ n'evru-vá mɛ̀n lɔ, Ankà-yé-wrɔn kɛ cɔ́ nɛ̀n ɔkɔhɔ̀n ndɔ lɔ n'ɛhán mɛ̀n. 44Mɛ dɔ́ nyɛ̀n ankàẅì annànwɔrɛ mɛ̀n le: Ankà-yé-wrɔn kɛ lɛ wá nɛ̀n n'ɛci lɔ fɛn antamɛ̀n. 45Tɛ́n, ke dú kɛ eci-bɩ̀tan-wrɔn ndɔ lɔ kɛ dɔ́ n'edomɛ̀n le: ‘M'Ankà-yé-wrɔn kɛ mɔ̀ɛn ke sɩ́ vá’, kɩ ke gorɛ ɛci-bɩ̀tan-bɔ̀ wúcɔ̀ mán wúyɔ̀, ne zî ɛci, ne mi shi, kɩ nɛ kɔ́n ɛntàn, 46zɛtɛn Ankà-yé-wrɔn kɛ lɛ vá ɛnbɩ̀ tɔ̀n léyi, eci-bɩ̀tan-wrɔn lɔ ke sɩ́ vrá nɛ̀n, hɩ kè sɩ̀ nyrì wacɛ̀n wú léyi nɛ lɛ và nɔn; nɛ lɛ hán eci-bɩ̀tan-wrɔn lɔ ɛgbàn vri, nɛ lɛ wrɔ́ eci-bɩtan-wrɔn ndɔ lɔ, kɩ nɛ lɛ hán yi ke le di anmùan-anhyrɛ̀-di-bɔ̀ gbàn wɔɛ̀n. 47Eci-bɩ̀tan-wrɔn léyi nyri eci léyi n'Ankà-yé-wrɔn ke ji, hɩ ke sɩ̀ bɔ́sɔ́ n'edomɛ̀n, ke sɩ̀ hán eci léyi Ankà-yé-wrɔn ke ji nɔn, ye le gorɛ nɛ̀n ogorɛ bobrebe. 48Tɛ́n, eci-bɩ̀tan-wrɔn léyi kè sɩ̀ nyrì eci léyi n'Ankà-yé-wrɔn ke ji, hɩ kɛ hán anta-mɛẅi ci nɔn, hɩ zrɔ tán le ye gorɛ nɛ̀n nɔn, ogorɛ ẅíɛ kɩ ke le dú nɛ tɛn. Ɔwrɔn léyi yɛ tán bobrebe nɔn, ye le ji bobrebe n'antamɛ̀n, kɩ ɔwrɔn léyi yɛ wá bobrebe antamɛ̀n hɛ́n nɔn, ye le vru ye ji bobrebe n'eyri.”

Zhezü, Ɛsɔ̀nvoyan-wrɔn

(Nyɛ́n nyan Matie 10:34-36 wrú lɔ mɛ̀n)

49“Mɛ́n và, mɛ̀n sɩ́ ɛnhyà tɔ̀n ɛnhibù wú, kɩ me ji le ɛnhyà ndɔ lɔ kè bukru kè wrì. 50Mɛ̀n ẅɛn ɛnshikruwá tɔ̀n, kɩ̀ mɛ̀n dú n'ɛvrá mɛ̀n ɛnkrɛ̀ta-kuemɛ̀n, hàn kɩ nɛ lɛ sá nmù. 51Nye tro le, anwɔwɔ de mɛ̀n vá ɛnhibù esɩ́-yri nɛ́n? Hɔ̂, mɛ dɔ́ nyɛ̀n, tɛ́n ɛsɔ̀nvoyan. 52Zɛtɛ̀ lɔ bukru nɔn, anwrɔn ɛnrì ɛmɛ̀n zriemɛ̀n-bɔ̀ kɛ lɛ sɔ̀nvoyan y'edomɛ̀n; anwrɔn anhɔ̀n ɔmùan kɛ lɛ krɔn, kɛ lɛ kɛ́n anwrɔn anhyrɛ̀ ezì, kɩ anhyrɛ̀ kɛ lɛ kɛ́n anhɔ̀n ezì. 53Ɛnẅì-nɛ́n-zi, kɛ lɛ kɛ́n n'ɛnẅì ezì, kɩ, ɛnẅì mán kɛ lɛ kɛ́n nɛ́n zi ezì, ɛnẅì-nɛ́n-muan kɛ lɛ kɛ́n nɛ́n ẅì ɛnnyɔnwrɔn-ẅì ezì, kɩ ɛnnyɔnwrɔn-ẅì mán kɛ lɛ kɛ́n nɛ́n muan ezì, ɛnnyɔnwrɔn nɛ́n cüì-nɛ́n-muan, mán nɛ́n ẅì-hi kɛ kɛ́n y'edomɛ̀n ezì.”

Yɛ yá ɛnvra hɔ̀n léyi kɛ và nɔn y'ɛmɛ̀n ankà

(Nyɛ́n nyan Matie 16:2-3 wrú lɔ mɛ̀n)

54Zhezü vru kɛ dɔ́ fɛcüè le: “Ɛnvra léyi nyɛ kán ɛnwì-gbú yɔwɔ kɛ wá ɛmɛẅiemɛ̀n nɔn, ɛnvra zri lɔ nyɛ dɔ̀ le: ‘Ɛnshi kɛ lɛ nàn’, kɩ ɛnshi kɛ nàn. 55Kɩ ɛnvra léyi, ecüemɛ̀n dɔ̀nwrɔ̀n kɛ cüɛ̀n ke ku nyɛn edomɛ̀n nɔn, nyɛ dɔ̀ le: ‘Ɛyri ke le yì’, kɩ, eyri ke yì. 56Anmùan-anhyrɛ̀-bɔ̀! Nye nyri eci hɔ̀n lɔ fɛn léyi dú ɛnhi mán ɛwú nɔn; zɛtɛn, ecitan kruhú kɛ nyɛ́n sɩ́ nyri, zɛtɛ̀ vra léyi nyɛ́n dú ɛmɛ̀n nɛ́n?”

Ɛ̀ ji ɔmùankrɔn tɔ̀n vɛ́n mán v'egbri-wrɔn mɛhi

(Nyɛ́n nyan Matie 5:25-26 wrú lɔ mɛ̀n)

57“Cɛci kruhú kɛ nyɛ́n sɩ́ ci ny'edomɛ̀n ɛmrɛ̀n, ô nyɛ́n nyri hɩ le zrɔ nɛ́n? 58Ke dú kɛ ɔwrɔn kɛ dɔ́ ankà gbangbàn ku mɛ́n ɛwú, kɩ nyɛ hɔ́n ɛmrɛ̀n-ci-bɔ̀ zìwú, ɛ̀ hán kekremɛ̀n ô ɔmùan kɛ̀ krɔn nyɛ̀n ɛnlevri wanzi léyi nyɛ́n dù nyɛ hɔ̀n nɔn, ô ke bɩ́ hán tán, ye sɩ́ mɛ́n ɛmrɛ̀nci-wrɔn zìwú, ke bɩ́ mɛ́n kɛ tán gɔliɛ-bɔ̀ ke di mɛ́n anwɔn-mɛ̀n-wá-wɔn mɛ̀n. 59E sɩ̀ dú nanvrɛ́n ɛ̀ srɔ ɛntrɛ zɛtɛ̀, mɛ dɔ́ mɛ́n, ke dú kɛ è sɩ̀ dì v'ɛwɔɛ̀n lɔ fɛn kɛ̀ trɔà.”

Currently Selected:

Lükɛ̀n 12: ƐAA03

Highlight

Copy