Lükɛ̀n 14

Zhezü kɔrɛ ɛnlɔẅiɛ-wrɔn tɔ̀n

1Ɛnyanmán-bɩ̀ tɔ̀n de Zhezü hɔ́n Ɔwɔ-nyanmàn-sùva-wá-wrɔn tɔ̀n yri ɛbemɛ̀n, ɛci-zî yri. Anwrɔn hɔ̀n léyi dú nanvrɛn nɔn, kɛ sɔ́n zhezü ɛvɛ̀ esùva-wá mɛ̀n. 2Ɔwrɔn tɔ̀n léyi cɔ́ ɔfɔ́-lɔwiɛ nɔn, nyɔn nɛ̀n eziwúɛ. 3Zhezü bɩ́ ankà-dɔ̀ kɩ ke yrɛ ɛnyanmàn-gbanvri-ankà-yé-bɔ̀ mán, ɔwɔ-nyanmàn-sùva-wá-bɔ̀ le: “Bɔ́ ɛnyanmàn lɔ, kɛ wá tán, kale ke sɩ́ wá tán, yɛ kɔrɛ ɔwrɔn ɛnyanmán-bì lɔa?” 4Tɛ́n yɔ sɩ́ ji yɔ mrɛ́n nɛ̀n ɔmuàn. Zɛtɛn Zhezü tɛ́ ɛnloẅiɛ-wrɔn lɔ ɛkɔrɛ̀, kɔrɛ nɛ̀n kɩ hán nɛ̀n nɛ́n nan hɔ̀n. 5Zɛtɛn nɛ dɔ́ yɔ le: “Ke dú kɛ ny'ɛmɛ̀n lɔ, ɔwrɔn tɔ̀n, nɛ́n ẅì hô, n'ɔnɔn hô, ke bru ɛnshi-vruemɛ̀n, nɛ́n sɩ̀ mrɛ́n yi nɛ̀n sɔhɔ́ ɛvruemɛ̀n ɛnyanmán-bì lɔa?” 6Yɔ lɔ fɛn, yɔ sɩ́ cɔ́ ankà-dɔ́-yri hɩ wú lɔ.

Ɛyri-mrɛ́n-bɩ ci-hán mán anwrɔn-bɩ ci-hán

7Zhezü kán ɔmu le anwrɔn hɔ̀n léyi ye bi ɛci nɔn ke ji ɛyri ankrànkràn kɛ̀ yɛ́. Kɩ nɛ dɔ́ yɔ lɔ fɛn nyandrɛn ndɔ lɔ mɛ̀n ankà, kɩ nɛ dɔ̀ le: 8“Ɛnvra léyi ɔwrɔn ke bi mɛ́n eyrí-koran ci-zîemɛ̀n nɔn, e bɩ́ hɔ́n yɛ́ ɛyri ankrànkràn lɔ. Ɔmuhi, annànwɔrɛ mɛ̀n lɔ ɛnvra tɔ̀n hô, ɔwrɔn tɔ̀n kɛ lɛ và, kɛ lɛ ẅɛn vɔ̀nshɛ́ vrán mɛ́n, 9kɩ ɔwrɔn léyi bi nyɛ̀n ɛci nɔn, kɛ lɛ và dɔ́ mɛ́n le: ‘Tàn ɔwrɔn ndɔ lɔ ɛyri lɔ.’ Zɛtɛn ke ji le anvɛvrà mán ɛzìwú, ɛ̀ hɔ̀n yɛ́ ɛmɛẅi-trɔ yri lɔ. 10Zrɔ tán le, ɛnvra léyi ye bi mɛ́n ɛci nɔn, ɛ̀ hɔ́n ɛmɛẅi-trɔ yri lɔ ɛ̀ yɛ́, ô ɔwrɔn léyi bi mɛ́n ɛci nɔn kɛ̀ và, kɛ̀ dɔ́ mɛ́n le: ‘M'anyrán, tɔhú hɔ̀n ɛyri ankrànkràn ɛ̀ yɛ́.’ Ɔmu lɔ, ɛ lɛ cɔ́ ezìwú-gbà anwrɔn lɔ fɛn léyi yɛ́ tɛbrɛ̀ wúɛ nɔn zìwú. 11Ɔmuhi ɔwrɔn léyi ke sɩ́ n'edomɛ̀n ɛwú nɔn, ye le sɩ̀ nɛ̀n ɛnhi, kɩ nɛ́n léyi ne sɩ́ n'edomɛ̀n ɛnhi nɔn, ye le sɩ̀ nɛ̀n ɛwú.”

12Zɛtɛn Zhezü kɛ dɔ́ ɔwrɔn léyi bi nɛ̀n ɛci nɔn le: “Ɛnvra léyi e bi anwrɔn ɛci, e bɩ́ bi, ɛnyrán hɔ̀n mán ɔmuan-ẅì hɔ̀n, mán v'ɛmɛ̀n bɔ̀, mán anwrɔn hɔ̀n léyi dú mɛ́n ɛtɛsɛ̀n, hɩ di ɛnnɛ̀ncüì nɔn; ɔmuhi, yɔ mán ye le bi mɛ́n ɛci, kɩ ɛci léyi è bi yɔ nɔn, ye le di mɛ́n yi wɔɛ̀n. 13Tɛ́n ɛnvra léyi e bi anwrɔn ɔkɔran ci-zîemɛ̀n nɔn, è bi ɛmian-bɔ̀, annan-kpò-bɔ̀, ɛsɔ̀nze-bɔ̀ mán anvɛ̀-bɔyɛ-bɔ̀. 14E le dú ɛnbɔrɛ-bruemɛ̀n, ɔmuhi yɔ sɩ̀ wɔrɛ̀ tán mɛ́n rɔ́ nɔn. Ɔwɔ kɛ lɛ wɔrɛ̀ tán mɛ́n ɛnvra léyi yɔ hɔ̀n léyi hán anvrɛn nɔn, ke le dú owúemɛ̀n kɛ̀ wɔrɛ̀ vá ɔkɔrɛ-bɔ̀ mɛ̀n nɔn.”

Ɛci-zî vri nyandrɛn mɛ̀n ankà-dɔ̀

(Nyɛ́n nyan Matie 22:1-10 wrú lɔ mɛ̀n)

15Ɛnvra léyi Zhezü dɔ́ ankà ndɔ hɔ̀n lɔ trɔ nɔn, anwrɔn hɔ̀n léyi ye bi ɛci nɔn, ɔtɔ̀n kɛ dɔ́ Zhezü le: “Ɛnbɔrɛbru dú ɔwrɔn léyi ke le dú ɛci-zîemɛ̀n Anhobɩ́ Nɛ̀ncüì-dùyri nɔn tɛn!” 16Zhezü kɛ dɔ́ nɛ̀n nyandrɛn ndɔ lɔ mɛ̀n ankà: “Ɔwrɔn tɔ̀n bi anwrɔn bobrebe ɛci-zîemɛ̀n. 17Ɛnvra léyi ɛci-zî vra cɔ̀ nɔn, nɛ̀n wá n'eci-bɩtan-wrɔn ɔkɔhɔ̀n kɛ̀ hɔ̀n kɛ̀ dɔ́ anwrɔn hɔ̀n léyi ye bi ɛci nɔn le: ‘Nyɛ́n và, ɔmuhi ɛci-zî krɔn kpehɛ́n zɛtɛ̀ lɔ nɔn.’ 18Tɛ́n yɔ lɔ fɛn, ɔwrɔn wrɔn kɛ sán ɛkɔrɛ̀levri. Ɛnvrakpà wrɔn lɔ kɛ dɔ́ eci-bɩtan-wrɔn lɔ le: ‘Mɛ̀n wɔ́ ɛkɛtɛ̀ tɔ̀n, ke ji le mɛ́n hɔ̀n mɛ́n nyan: mɛ sán ɛkɔrɛ̀levri.’ 19Ɔwrɔn tɔ̀n vru kɛ dɔ́ nɛ̀n le: ‘Mɛ̀n wɔ́ ɛnnanmán ɛvà, ke ji le mɛ̀n hɔ̀n nyan y'ɔkɔhɔ̀n-hán, mɛ sán mɛ́n ɛkɔrɛ̀levri.’ 20Ɔwrɔn nyàntɛn tɔ̀n vru kɛ dɔ̀ le: ‘Ɛnnyɔnwrɔn de mɛ̀n yri zɛtɛ̀ lɔ nɔn, hɩ le kruhú de mɛ́n sɩ̀ cɔ́ ɛvá-yri nɔn.’ 21Eci-bɩtan-wrɔn lɔ vru ɛmɛẅi hɔ́n cɔ́ n'ankà-yé-wrɔn kɩ dɔ́ nɛ̀n ɛmɛẅi ankà. Ɔwɔn-nɛ́n-zi bɩ́ ɛmɛ̀nhyì kɩ kɛ dɔ́ n'eci-bɩtan-wrɔn lɔ le: ‘Kpramàn, hɔ̀n dúgbetrɛ mán anmàn levri, è bi ɛmian-bɔ̀, anvɛ̀-bɔyɛ-bɔ̀ mán ɛsɔ̀n-ze-bɔ̀.’ 22Ɛnvra cá mɛ̀n eci-bɩtan-wrɔn lɔ vru và kɛ dɔ̀ le: ‘Ankà-yé-wrɔn eci léyi ɛ̀ wá tán mɛ̀n nɔn, mɛ̀n hán trɔ, tɛ́n ɛyɛ́-yri vru dù.’ 23Ɔwɔn-nɛ́n-zi zɛtɛn vru kɛ dɔ́ n'eci-bɩtan-wrɔn le: ‘Ɛ̀ hɔ́n ovomɛ̀n levri, ovú mùan, ɛ̀ hán kèkrèmɛ̀n anwrɔn kɛ̀ và, ô m'ɔwɔn lɔ kè yɩ̀. 24Mɛ dɔ́ nyɛ̀n le: anwrɔn hɔ̀n léyi mɛ́n gɔ̀ bi ɛci nɔn, nzriɛmɛ́n ke sɩ̀ zî m'ɛci lɔ!’ ”

Ɛci-krugbɔ́ hɔ̀n léyi ke ji le yɛ hán, ô ye dú ɛsɛ̀nkɛn-wrɔn nɔn

(Nyɛ́n nyan Matie 10:37-38 wrú lɔ mɛ̀n)

25Fɛcüè vri hɔ̀n mán Zhezü mɛhi kɛ nán esù ɛnlevri hɔ̀n. Nɛ́n crɛ̀ kɩ nɛ dɔ́ yɔ lɔ fɛn lɔ le: 26“Ɔwrɔn léyi kɛ vá m'eyri nɔn, ke ji le nɛ̀n cüɛn mɛ̀n kɛ̀ vrán nɛ́n zi, nɛ́n muan, nɛ́n muan-ẅì hɔ̀n wúcɔ̀ mán wúyɔ̀ mán nɛ́n mumù. Ke sɩ̀ dù ɔmu lɔ hô, nɛ́n sɩ̀ dú m'ɛsɛnkɛn-wrɔn rɔ́. 27Ɔwrɔn léyi ke sɩ̀ shri n'ɛgbànkàn kè bɩ, hi ke sɩ̀ kɛ̀n mɛ̀n ɛsɛ̀n nɔn, nɛ́n sɩ̀ dú m'ɛsɛnkɛn-wrɔn rɔ́. 28Ny'ɛmɛ̀n lɔ, ke dú kɛ ɔwrɔn tɔ̀n ke ji kè ku ɔwɔn vri, nɛ yɛ́, ne bú ɔkùa muàn léyi ke ji nɔn, ô nɛ̀n nyan ke dú nɛ̀n ẅɛn ɔkùa ne le ku ɔwɔn lɔ tɛ̀. 29Ke dú kɛ nɛ̀n sɩ̀ bɔ̀sɔ̀ n'edomɛ̀n, kɩ nɛ wá ɛbù ɛnhibɩ, kɩ ɔwɔn lɔ kè sɩ̀ trɔ̀a, anwrɔn hɔ̀n léyi kɛ lɛ kán ɔwɔn lɔ nɔn kɛ lɛ hán nɛ̀n ɛnhyürɛ̀, 30kɩ yɔ lɛ dɔ̀ le: ‘Ɔwrɔn ndɔ lɔ bukru ke ku ɔwɔn, tɛ́n nɛ̀n sɩ̀ kù ɔwɔn lɔ kɛ̀ trɔa!’ 31Ɔmu zri lɔ, ke dú kɛ ɛnnɛ̀ncüì tɔ̀n ke ji kɛ̀ hɔ̀n kɛ̀ kɔ́n nɛ́n nyrán ɛnnɛ̀ncüì anhà, ke ji le nɛ̀n yɛ́, ô nɛ́n nyan, ke dú kɛ ne le bɩ́ anwrɔn tɛ̀bru kru ɛvà, nɛ́n kɛ́n nɛ́n nyrán nɛ̀ncüì léyi ẅɛn anwrɔn tɛ̀bru kru ɛẅia nɔn, ezì tɛ̀. 32Ke dú kɛ nɛ́n sɩ̀ kɛ́n yi ezì rɔ́ hô, nɛ lɛ wá anwrɔn ɔkɔhɔ̀n, kɛ̀ hɔ̀n kán nɛ́n nyrán nɛ̀ncüì léyi dú esù she nɔn, ô angranmɛ̀n kɛ̀ wɔ́ yɔ. 33Ɔmu lɔ, Zhezü kɛ dɔ́ yɔ le, ny'ɛmɛ̀n lɔ ɔwrɔn zriɛmɛ́n ke sɩ̀ dú m'ɛsɛ̀nkɛn-wrɔn, ke dú kɛ nɛ̀n sɩ̀ teze n'ɛci lɔ fɛn léyi nɛ́n ẅɛ̀n nɔn.”

Ɛnjüɛ̀ léyi kè sɩ̀ zrɔ̀ eci-hán nɔn

(Nyɛ́n nyan Matie 5:13; mán Markɛ̀n 9:50 wrú lɔ mɛ̀n)

34“Ɛnjüɛ̀ dú eci ankrànkràn. Tɛ́n, ke dú kɛ n'ɛzrɔ lɔ kɛ trɔ nɛ̀n ɛmɛ̀n hô, anhɔntan de yɛ lɛ hán ô nɛ̀n cɔ́ n'ɛzrɔ lɔ nɛ́n? 35Nɛ́n sɩ̀ vru zrɔà eci ẅì zriɛmɛ́n hán mɛ̀n; ke ji le yɛ kɔ́n nɛ̀n cue ɛntrɛa. Nyɛ́n die nukù anvrɛnvrɛn, ke dú kɛ nyɛ́n ẅɛn nukù nyɛ yá ankà!”

Currently Selected:

Lükɛ̀n 14: ƐAA03

Highlight

Copy