Lükɛ̀n 19

Zhezü mán Zàshe

1Zhezü bru Zheriko kɩ nɛ vɔ́n ci anmàn lɔ. 2Nanvrɛn lɔ, ɔwrɔn tɔ̀n ndù ye bi nɛ̀n Zàshe; nɛ̀n dú anmàn-wɔɛ̀n-yrɛ-bɔ̀ wrɔn cüìcüì kɩ nɛ̀n dí ɛnnɛ̀ncüì. 3Ne jí ɛyri ô nɛ̀n kán ɔwrɔn léyi dú Zhezü nɔn, tɛ́n ɔmuhi nɛ̀n hán okpò nɔn, nɛ́n sɩ̀ kán yi rɔ́, fɛcüè kruhú.

4Nɛ̀n srɛ́ nɛ̀n hɔ́n ezì, kɩ nɛ̀n ká ɛtɛ̀ léyi ye bi Sikomɔrɛ̀n nɔn, ô nɛ̀n kán Zhezü léyi ke le ci nanvrɛn lɔ nɔn. 5Ɛnvra léyi Zhezü cɔ́ ɛyri léyi Zàshe ká ɛtɛ̀ hɔ́n ɛwú nɔn, nɛ̀n sɩ́ anvɛ̀ ɛwú kɩ nɛ dɔ́ zàshe le: “Kàkɛ kpràkprà zàshe, ɔmuhi ke ji le mɛ̀n ci mɛ́n nɛ̀nnyanmàn ɛnyɔnci lɔ nɔn.” 6Zàshe kakɛ kpràkprà kɩ hɔ́n bɩ́ nɛ̀n pɔpüɛ mɛ̀n. 7Anwrɔn lɔ fɛn léyi kán yɔ nɔn ke bɩ́ ɛmɛ̀nhyì kɩ kɛ dɔ̀ le: “Ɔwrɔn ndɔ lɔ hɔ́n sɔ́n ebɩ́ ɛgbàn-hán-wrɔn nanvrɛn!” 8Zàshe, nyɔn Ɛẅɛnwrɔn ezìwúɛ, kɩ nɛ dɔ́ yi le: “E die nukùɛ Ankà-yé-wrɔn, m'ɛci léyi mɛ́n ẅɛ̀n nɔn, mɛ lɛ bɩ́ ɛcá mɛ̀n tán ɛmian-bɔ̀, kɩ ke dú kɛ mɛ̀n bɩ́ ɔwrɔn ci ɛfrɛ́n mɛ̀n hô, mɛ lɛ wɔrɔ̀ tán nɛ̀n, andɛ̀n anzɔ̀.” 9Zhezü mrɛ́n nɛ̀n ɔmùan le: “Ɛnyɔncì lɔ, ɛnkrukɔrɛ̀ bru ebɩ́ ndɔ lɔ mɛ̀n, ɔmuhi, ɔwrɔn ndɔ lɔ mán dú Abrahamɛ̀n mɛ̀n mɛ̀n-wrɔn nɔn. 10Ɔmuhi, ɔwrɔnẅì Ẅì, nvà ô kè ji, ô kè bɩ́, yɔ hɔ̀n léyi zrɛ́n nɔn kè die.”

Ansɩ̀kɛ-kùa-ẅì nyandrɛn mɛ̀n ankà-dɔ̀

(Nyɛ́n nyan Matie 25:14-30 wrú lɔ mɛ̀n)

11Zhezü vru kɛ dɔ́ nyandrɛn mɛ̀n ankà tɔ̀n tán anwrɔn hɔ̀n léyi kɛ yá ankà-dɔ̀ ndɔ hɔ̀n lɔ nɔn. Nɛ̀n dú Zherüzalɛmɛ̀n tɛsɛ̀n, kɩ ye bútan le Anhobɩ́ Nɛ̀ncüì-dúyri kɛ lɛ srɔ kpatakpata lɔ. 12Nyàn ankà léyi nɛ dɔ̀ nɔn: “Ɔwrɔn tɔ̀n, nɛ̀n dú ɛmɛ̀n anvrɛnvrɛn mɛ̀n wrɔn, kɩ nɛ̀n hɔ́n anmàn nyàntɛn, ɛyri she, ô yɛ srɔ nɛ̀n ɛnnɛ̀ncüì; ô nɛ̀n vru nɛ̀n và. 13Ɛnvra léyi nɛ vá ɛhɔ̀n-yri nɔn, nɛ̀n bi n'eci-bɩtan-bɔ̀ ɛvà lɔ, kɩ nɛ̀n tán ɔwrɔnwrɔn ansɩ̀kɛ-kùa-ẅì zri kɩ nɛ̀n dɔ́ yɔ le: ‘Nyɛ́n bɩ́ ɔkùa lɔ nyɛ́n zhrɛ́ anhàn, hàn kɩ kɛ cɔ́ ɛnvra léyi me le vru ɛmɛẅi mɛ̀n và nɔn.’ 14Ɔwrɔn ndɔ lɔ, n'anmàn-bɔ̀ ke sɩ́ cüɛ́n nɛ̀n; kɩ yɔ wá anwrɔn ɔkɔ̀hɔ̀n, kɛ̀ hɔ̀n kɛ̀ dɔ́ yɔ anmàn léyi nɛ hɔ̀n nɔn le: ‘Bɔ́ sɩ́ ji ɔwrɔn ndɔ lɔ kè dú bɔ́ ɛnnɛ̀ncüì.’ 15Ɔwrɔn lɔ srɔ ɛnnɛ̀ncüí kɩ vru vá n'anmàn. Nɛ̀n hán yɔ ye bi n'eci-bɩ̀tan-bɔ̀ léyi nɛ̀n tán ɔkùa nɔn, ô nɛ̀n nyri eci léyi yɔ cɔ́ y'anhàn-zhrɛ̀ lɔ mɛ̀n nɔn. 16Ɛnvrakpà-wrɔn lɔ nvà kɩ kɛ dɔ̀ le: ‘Ankà-yé-wrɔn, mɛ̀n cɔ́ ansɩ̀kɛ-kùa-ẅì ɛvà mɛ̀n kɛ́n ndɔ léyi ɛ̀ tán mɛ́n nɔn ɛwú.’ 17Ɛnnɛ̀ncüì lɔ kɛ dɔ́ nɛ̀n le: ‘Kɛ zrɔ, ɛci-bɩtan-wrɔn ankrànkràn, ɔmuhi, è di ɔmùan-zri ecicɛ mɛ̀n nɔn, mɛ wá mɛ́n anmàn ɛvà govran.’ 18Anhyrɛmɛ̀n ci-bɩtan-wrɔn nvà kɩ kɛ dɔ̀ le: ‘Ankà-yé-wrɔn, mɛ̀n cɔ́ ansɩ̀kɛ-kùa-ẅì ɛnrì mɛ̀n kɛ́n ndɔ léyi ɛ̀ tán mɛ̀n nɔn ɛwú.’ 19Ɛnnɛ̀ncüì lɔ kɛ dɔ́ ɔwrɔn ndɔ lɔ le: ‘Vɛ tɛn, mɛ wá mɛ́n anmàn ɛnri govran.’ 20Eci-bɩtan-wrɔn nyàntɛn tɔ̀n nvà kɩ kɛ dɔ̀ le: ‘Ankà-yé-wrɔn, nyàn v'ansɩ̀kɛ-kùa-ẅì lɔ; mɛ̀n bɩ́ nɛ̀n mɛ̀n bán, mɛ̀n kɔra nɛ̀n angsɛ̀n mùan mɛ́n hɛ́n. 21Me sú mɛ́n, ɔmuhi è dú ɔwrɔn léyi ẅɛn ɛnkru shishi nɔn: e bɩ́ eci léyi è sɩ̀ hɛ́n hán nɔn, kɩ ɛ küɛ ɛci léyi è sɩ̀ tɛ̀a nɔn.’ 22Ɛnnɛncüì lɔ kɛ dɔ́ nɛ̀n le: ‘Eci-bɩ̀tan-wrɔn gbangbàn, me le ci mɛ̀n ɛmrɛ̀n v'ɔmùan ankà-dɔ̀ wú. È nyri ɔmu le mɛ̀n dú ɛnkru-shishi-wrɔn, me bɩ́ ɛci ɛyri léyi mɛ̀n sɩ̀ hɛ́n hán nɔn, mɛ küɛ ɛci ɛyri léyi mɛ̀n sɩ̀ tɛ̀a nɔn. 23Zɛtɛn, ecitan kruhú kɛ e sɩ́ bɩ́ m'ɔkùa lɔ ɛ hɛ́n ɔwɔn léyi ɔkùa ke bî ɛẅì ɛmɛ̀n nɛ́n? M'evru-vá mɛ̀n lɔ, me le bɩ́ m'ɔkùa mán nɛ́n vɔ̀nshɛ́ mɛhi.’ 24Zɛtɛn nɛ dɔ́ anwrɔn hɔ̀n léyi nyɔn nanvrɛn lɔ nɔn le: ‘Nyɛ́n bɩ́ n'ɔkùa ndɔ lɔ nyɛ́n sɔhɔ́ nɛ̀n antamɛ̀n, ô nyɛ́n bɩ nyɛ́n tán ɔwrɔn léyi yɛ tán ɛvà nɔn.’ 25Yɛ dɔ́ ɛnnɛ̀ncüì lɔ le: ‘Ankà-yé-wrɔn, nɛ́n gɔ̀ ẅɛn ɔkùa-ẅì-ɛvà!’ 26Ɛnnɛ̀ncüì lɔ mrɛ́n ɔmùan le: ‘Mɛ dɔ́ nyɛ̀n annànwɔrɛ mɛ̀n le ɔwrɔn léyi ẅɛ̀n nɔn, ye le vru yɛ tán nɛ̀n kè fɛ ɛwú; tɛ́n ɔwrɔn léyi kè sɩ̀ ẅɛ̀n hàn nɔn, ye le bɩ́ ɛẅiɛ léyi nɛ́n ẅɛ̀n nɔn mán yɛ sɔhɔ́. 27Tɛ́n m'egbri-bɔ̀ hɔ̀n léyi ke sɩ́ ji le mɛ̀n srɔ y'ɛnnɛ̀ncüì nɔn, nyɛ́n sɩ́ yɔ ɛnu, ô nyɛ́n wri yɔ m'ezìwú.’ ”

Zhezü kɛ hɔ́n Zherüzalɛmɛ̀n anmàn

(Nyɛ́n nyan Matie 21:1-11; Markɛ̀n 11:1-11; mán Zhan 12:12-19 wrú lɔ mɛ̀n)

28Ɛnvra léyi Zhezü dɔ́ ankà ɔmu lɔ trɔ nɔn, nɛ̀n dú fɛcüè ezì yɔ hɔ́n Zherüzalɛmɛ̀n anmàn. 29Ɛnvra léyi nɛ̀n bá Bɛtfazhe mán Betani tɛsɛ̀n, ɛyri léyi ye bi “Olivie kpò” nɔn n'ɛtɛ̀sɛ̀n, nɛ̀n wá n'ɛsɛnkɛn-bɔ̀ anhyrɛ̀ ɔkɔhɔ̀n hɛ́ ezì: 30Nɛ dɔ́ yɔ le: “Nyɛ́n hɔ́n anmàn léyi kɛ́n nyɛ̀n ezì nɔn. Ɛnvra léyi nyɛ lɛ bru nanvrɛn lɔ nɔn, nyɛ lɛ cɔ́ frimú-ẅì cɛ tɔ̀n, yɛ mɔɛn nɛ̀n, ɔwrɔn zriɛmɛ́n kɛ vá yɛ́ nɛ̀n ɛwúɛ. Nyɛ́n srú nɛ̀n, ô nyɛ́n bɩ́ nɛ̀n nyɛ́n vá ɛnu lɔ. 31Kɩ ke dú kɛ ɔwrɔn tɔ̀n ke yrɛ nyɛ̀n le: ‘Cɛci kruhú kɛ nye srú nɛ̀n hàn?’ nyɛ́n dɔ́ nɛ̀n le: ‘Ɛẅɛnwrɔn ke ji frimu lɔ.’ ”

32Ɔkɔhɔ̀n-wá-bɔ̀ lɔ hɔ̀n kɩ cɔ́ eci lɔ hán ɔmu le Zhezü dɔ́ yɔ nɔn. 33Ɛnvra léyi yɔ dù yɔ srú frimu lɔ ɛhɛ́ nɔn, annɔ̀n-nɛ́n-zi hɔ̀n ke yrɛ yɔ le: “Cɛci kruhú kɛ nyɛ srú frimu-ẅì lɔa?” 34Yɔ mrɛ́n ɔmùan le: “Ɛẅɛnwrɔn ke ji frimu lɔ.” 35Kɩ yɔ bɩ́ frimu-ẅì lɔ yɔ hɔ́n sɩ́ Zhezü; yɔ bɩ́ y'ɛceci yɔ ku frimu lɔ ɛwú kɩ yɔ hán Zhezü yɛ́ frimu-ẅì lɔ ɛwúɛ. 36Ɛnvra léyi yɔ nán esù hɔ̀n nɔn, anwrɔn ke bɩ́ y'ɛceci ke cüe ɛnlevriɛ̀. 37Ɛnvra léyi nɛ bá Zherüzalɛmɛ̀n tɛsɛ̀n, hɩ nɛ̀n bɩ́ ɛnlevri léyi dú “OLivie kpò” wú kɛ kakɛ nɔn, Zhezü sɛnkɛn-bɔ̀ mán fɛcüè lɔ fɛn dú pɔ̀püɛ̀mɛ̀n kɛ mrɛ́n Ɔwɔ esùvá cüìcüìemɛ̀n, ɔmuhi yɔ kán anvɛmɛ̀n-frɛ́n-ci hɔ̀n lɔ fɛn léyi nɛ̀n hán nɔn. 38Kɩ yɔ dɔ̀ le: “Ɔwɔ kè fú Ɛnnɛ̀ncüì léyi kɛ và nɔn ɛnshi, Ɛẅɛnwrɔn bɩ́mɛ̀n! Anwɔwɔ kè dú anhobɩ́, ô ecizrɔ kè dú Ɔwɔ tɛn!”

39Ɔwɔ-nyanmàn-sùva-wá-bɔ̀ zrizri léyi dú fɛcüè lɔ ɛmɛ̀n nɔn, kɛ dɔ́ Zhezü le: “Ankà-yé-wrɔn, ɛ̀ wá tán v'ɛsɛ̀nkɛn-bɔ̀ lɔ kɛ kɛ́n ɔmùan kɛ̀ hɛ́n.” 40Zhezü mrɛ́n ɔmùan le: “Mɛ dɔ́ nyɛ̀n le, ke dú kɛ yɔ kɛ́n ɔmùan yɛ hɛ́n hô, ɛbù hɔ̀n ke le di bobo.”

Zhezü ke wú eyú ku Zherüzalɛmɛ̀n anmàn ɛwú

41Ɛnvra léyi Zhezü cɔ́ Zherüzalɛmɛ̀n anmàn tɛsɛ̀n nɔn, hɩ nɛ̀n kán anmàn lɔ nɔn, ne wú eyú ku yi ɛwú, kɩ nɛ dɔ̀ le: 42“Ke dú kɛ, ɛnyɔncì lɔ, vɛ́n mán e nyri eci léyi kɛ lɛ tán mɛ́n anwɔwɔ! Tɛ́n zɛtɛ̀ lɔ dú ankà-bán-ankà tán mɛ́n, e sɩ̀ kàn rɔ́! 43Ɔmuhi, ɛnbì hɔ̀n kɛ lɛ vá v'ɛkruhú, kɩ v'egbri-bɔ̀ ke le bɩ́ anhà-kɔ́n-ci kɛ̀ gbrɛnkɛn mɛ́n ɔmùan, kɛ lɛ wá mɛ́n angán kɩ yɔ lɛ bɔrɛ mɛ́n ɛyri lɔ fɛn. 44Yɛ lɛ gbɔ̀ngbɔ mɛ́n brɛzri, vɛ́n mán v'anwrɔn hɔ̀n mɛhi; yɔ sɩ̀ teze mɛ́n obù zriɛmɛ́n kɛ̀ hɛ́n nɛ́n nyran obù wúɛ, ɔmuhi è sɩ̀ nyrì ɛnvra léyi Ɔwɔ vá sɩ́ mɛ́n n'ɛkɔrɛ̀-wá lɔ nɔn.”

Zhezü dú Ɔwɔ-cice-wɔn mɛ̀n

(Nyɛ́n nyan Matie 21:12-17; mán Markɛ̀n 11:15-19 wrú lɔ mɛ̀n)

45Zhezü bru ɛci-ce-wɔn lɔ mɛ̀n kɩ bukru kɛ wrɔ́ ɛci-hɛ́-bɔ̀, nɛ dɔ́ yɔ le: 46“Ɛwrú Prɔnprɔn hɔ̀n kɛ dɔ̀ le: ‘M'ɔwɔn lɔ ke le dú Ɔwɔ-sɛ́n-wɔn.’ Nyɛ tɛn, nyɛ́n bɩ́ nɛ̀n nyɛ́n srɔ ɛci-yerɛ-bɔ̀ kpò-nànmàn.”

47Zhezü ke yé yɔ ankà ɛnbì lɔ fɛn ɛcice-wɔn lɔ mɛ̀n. Ɛcice-bɔ̀ cüìcüì, ɛnyanmàn-gbànvri-ankà-yé-bɔ̀ mán anwrɔn hɔ̀n léyi dú anmàn fɛcüè cüìcüì-bɔ̀ nɔn, ke ji ɛyri kɛ̀ hán nɛ̀n, nɛ̀n wù. 48Tɛ́n yɔ sɩ́ nyri eci léyi yɔ lɛ hán nɔn, ɔmuhi fɛcüè ke die nɛ̀n nukù anvrɛnvrɛn nɔn.

Currently Selected:

Lükɛ̀n 19: ƐAA03

Highlight

Copy