Lükɛ̀n 3

Zhan Batisì Wɔ ankà-dɔ̀

(Nyɛ́n nyan Matie 3:1-12; Markɛ̀n 1:1-8; mán Zhan 1:19-28 wrú lɔ mɛ̀n)

1Rɔmɛ̀n ɛnhiwú nɛ̀ncüì vri léyi ye bi Tibɛrɛ̀n nɔn, n'ɛyri-ẅɛ̀n ɛnnànwàn kru ɛvà-ɛnriemɛ̀n; hɩ vra lɔ, Pɔnsì Pilatɛ̀n dú Zhüde kpɔsɔ wú govran, Herɔdɛ̀n ẅɛn Galile, kɩ nɛ́n muanẅì Filipɛ̀n ẅɛn ɛyri Itüre mán Trakonitɛ̀n kpɔsɔ wú, Lizania ẅɛn Abilɛnɛ̀n, 2Hanɛ̀n mán Kahifɛ̀n dú Ɔwɔ-cice-bɔ̀ cüìcüì hɔ̀n. Zhan, Zakari ẅì léyi dú ɛnnuwì nɔn, yá Ɔwɔ mùan ankà-dɔ̀. 3Zhan bukru ke ci ɔkpɔsɔ lɔ fɛn léyi dú Zhurdɛn shi lɔ tɛsɛ̀n nɔn wú. Ne di bobo nɛ dɔ̀ le: “Nyɛ́n crɔn ny'eci-hán-ci, nyɛ́n hán yɛ wá nyɛ̀n ɛnshi ɛnkru, ô Ɔwɔ ke bɩ́ ny'ɛgbàn hɔ̀n lɔ ke ce nyɛ̀n.”

4Ɔmu lɔ de ankà-dɔ̀ ndɔ léyi Ɔwɔ-mùanwú-ankà-dɔ́-wrɔn Ezahi merɛ́n n'owrú lɔ mɛ̀n nɔn, sá nmù:

“Ɔwrɔn tɔ̀n ke di nkù ɛnnɛ̀nwì:

Nyɛ́n hán Ɛnnɛncüì levri,

nyɛ́n hán nɛ́n levri hɔ̀n lɔ kɛ̀ nyrɔn!

5Ɛnnànmàn totɔtɔ̀n lɔ fɛn kɛ̀ sɛ́n,

ɛnkpò-vri mán ɛnkpò-cɛ hɔ̀n lɔ ye sɩ́ yɔ ɛnhi;

ɛnlevri hɔ̀n lɔ fɛn léyi wɔɛ nɔn, yɛ hán kɛ̀ nyrɔn,

ɛnlevri gbangbàn hɔ̀n lɔ fɛn yɛ hán kè dú sɛsɛ.

6Kɩ anwrɔn lɔ fɛn kɛ lɛ kán ɛnkrukɔrɛ̀ léyi Ɔwɔ tán bɔ̀ nɔn.”

7Fɛcüè kɛ vá cɔ́ Zhan, ô nɛ̀n wá yɔ ɛnshi ɛnkru. Nɛ dɔ́ yɔ le: “Ɛnlɛbri kà léyi dú nyɛ̀n nɔn! Antɔn de dɔ́ nyɛ̀n le, Ɔwɔ mrɛ̀n-cì léyi kɛ́n eburi kɛ và nɔn, kɛ lɛ vɔ́n nyɛ̀n ɛwú nɛ́n? 8Nyɛ́n hán eci ke yé tán le, nyɛ́n crɔn ny'edomɛ̀n, ô nyɛ́n bɩ́ dɔ́ ny'edomɛ̀n le: ‘Abrahamɛ̀n dú bɔ́ nancüì.’ Ɔmuhi mɛ dɔ́ nyɛ̀n le Ɔwɔ ke le bɩ́ ɛbù ndɔ hɔ̀n lɔ kɛ̀ srɔ Abrahamɛ̀n nɛ́n-nán-ẅì hɔ̀n tɛ̀! 9Etù-ẅì dú antɛ̀-nyràn krugbɛ̀n, ô kɛ̀ voyan antɛ̀ hɔ̀n léyi ke sɩ́ shi ɛẅì ankrànkràn nɔn, ô kè ku yɔ ɛnhyà mɛ̀n.”

10Fɛcüè ke yrɛ nɛ̀n le: “Ecitan de ke ji le bɔ̀ hán nɛ́n” 11Nɛ dɔ́ yɔ le: “Ɔwrɔn kɛ ẅɛn ɛceci anhyrɛ̀ hô, ke ji le, nɛ̀n bɩ́ ɔtɔ̀n nɛ̀n tán ɔwrɔn léyi ke sɩ̀ ẅɛ̀n hàn nɔn, ô ɔwrɔn léyi ẅɛn ɛcizî nɔn, nɛ́n nyran mɛhi yɛ dɛ̀.”

12Anmàn-wɔɛ̀n-yrɛ-bɔ̀ mán nvà, ô yɛ wá yɔ ɛnshi ɛnkru kɩ, yɔ yrɛ Zhan le: “Ankà-yé-wrɔn, ecitan de ke ji le bɔ̀ hán nɛ́n?” 13Zhan kɛ dɔ́ yɔ le: “Nyɛ́n bɩ́ bɩ́ ɔkuà kɛ vrán hɩ le Ɛnyanmàn wá nɔn.”

14Gɔliɛ-bɔ̀ ke yrɛ nɛ̀n le: “Bɔ́ tɛn, ecitan de ke ji le bɔ̀ hán nɛ́n?” Zhan kɛ dɔ́ yɔ le: “Nyɛ́n bɩ́ bɩ́ anwrɔn ɔkuà ecüiemɛ̀n mán ɛfrɛ́n mɛ̀n, tɛ́n ke ji le, ny'okù wɔɛ̀n-dì lɔ kɩ kè dú ny'ɔkùa.”

15Fɛcüè ẅɛn esɛ́, kɩ dú ɛvrámɛ̀n: ɔwrɔn wrɔn ke tro le, Zhan de dú Ebɩdie-wrɔn lɔ nɔn. 16Kɩ Zhan kɛ dɔ́ anwrɔn lɔ fɛn le: “Mɛ tɛn ɛnshi de me bɩ mɛ wá nyɛ̀n ɛnkru nɔn, tɛ́n ɔwrɔn tɔ̀n ɛkɔrɛ̀ srɔn vrán mɛ̀n, nɛ lɛ và: mɛ̀n sɩ̀ zeze mɛ̀n zrɔa hɩ m'a gbrɔ n'annanru hɛ́ lɔ nɔn. Nɛ lɛ wá nyɛ̀n ɛnshi ɛnkru Ɛnhɛ́n Prɔnprɔn mɛ̀n, mán ɛnhyà mɛ̀n mɛhi. 17Ɛfá dú nɛ̀n antamɛ̀n, ô nɛ̀n kua antɛ̀-ẅì mán n'anwrɔ̀n mɛhi. Ne le ku antɛ̀-ẅì lɔ bagɛ̀n mɛ̀n, kɩ antɛ̀-wrɔ̀n lɔ kɛ lɛ hɔ́n ɛnhyà léyi ke sɩ́ zɛ́n hán mrìmrì nɔn mɛ̀n.”

18N'ankà bobrebe dɔ́ mɛ̀n de Zhan ke yé fɛcüè Ɛmɛẅi ankà Ankrànkràn lɔ nɔn. 19Tɛ́n, Zhan gbá anvɛ̀ wá Herɔdɛ̀n léyi dú Govran nɔn, ɔmuhi nɛ̀n bɩ́ Hérodiadɛ̀n, nɛ́n muan-ẅì hi, nɛ́n yrì kɩ nɛ hán ɛci gbangbàn bobrebe ndɔ hɔ̀n mán. 20Zɛtɛn, Herɔdɛ̀n vru hán eci gbangbàn fɔn tɔ̀n kɛ́n ɛwú: nɛ̀n hán yɛ wá Zhan anwɔn mɛ̀n.

Zhezü ɛnshi-kru-wá

(Nyɛ́n nyan Matie 3:13-17; mán Markɛ̀n 1:9-11 wrú lɔ mɛ̀n)

21Ɛnvra léyi yɔ wá fɛcüè lɔ fɛn ɛnshi ɛnkru trɔ nɔn, Zhezü mán yɛ wá ɛnshi ɛnkru. Ɛnvra léyi Zhezü dú Ɔwɔ-sɛ́n mɛ̀n nɔn, anhobɩ́ gbɛ́ ɔmùan, 22kɩ Ɛnhɛ́n Prɔnprɔn bɩ́ brɛndre dùwru kakɛ nɛ̀n ɛwúɛ. Esùva tɔ̀n dú anhobɩ́ kɛ dɔ̀ le: “È dú m'ɛcüɛ́n ẅì, me bɩ́ mɛ́n pɔ̀püɛ̀ lɔ fɛn mɛ wá mɛ́n ɛmɛ̀n.”

Zhezü mɛ̀n mɛ̀n-bɔ̀

23Zhezü ẅɛn ɛnnanwàn kru ɛẅìa-ɛvà, ɛnvra léyi nɛ̀n bɔ́ n'ɔkɔhɔ̀n nkru nɔn. Nɛ́n dù hán ɔmu le ye tro nɔn, Zhozɛfɛ̀n ẅì, kɩ Zhozɛfɛ̀n nɛ́n zi dú Heli, 24Heli nɛ́n zi dú Matatɛ̀n, Matatɛ̀n nɛ́n zi dú Levi, Levi nɛ́n zi dú Mɛlki, Mɛlki nɛ́n zi dú Zhannahi, Zhannahi nɛ́n zi dú Zhozɛfɛ̀n, 25Zhozɛfɛ̀n nɛ́n zi dú Matatiasɛ̀n, Matatiasɛ̀n nɛ́n zi dú Amosɛ̀n, Amosɛ̀n nɛ́n zi dú Nahumɛ̀n, Nahumɛ̀n nɛ́n zi dú Ɛsli, Ɛsli nɛ́n zi dú Nagahi, 26Nagahi nɛ́n zi dú Maatɛ̀n, Maatɛ̀n nɛ́n zi dú Matatiasɛ̀n, Matatiasɛ̀n nɛ́n zi dú Semehin, Semehin nɛ́n zi dú Zhozɛkɛ̀n, Zhozɛkɛ̀n nɛ́n zi dú Zhoda, 27Zhoda nɛ́n zi dú Zhoanan, Zhoanan nɛ́n zi dú Reza, Reza nɛ́n zi dú Zorobabɛlɛ̀n, Zorobabɛlɛ̀n nɛ́n zi dú Salatiɛlɛ̀n, Salatiɛlɛ̀n nɛ́n zi dú Neri, 28Neri nɛ́n zi dú Mɛlki, Mɛlki nɛ́n zi dú Adi, Adi nɛ́n zi dú Kosamɛ̀n, Kosamɛ̀n nɛ́n zi dú Ɛlmadamɛ̀n, Ɛlmadamɛ̀n nɛ̀n zi dú Ɛrɛ̀n, 29Ɛrɛ̀n nɛ́n zi dú Zhezü, Zhezü nɛ́n zi dú Eliezɛrɛ̀n, Eliezɛrɛ̀n nɛ́n zi dú Zhorimɛ̀n, Zhorimɛ̀n nɛ́n zi dú Matatɛ̀n, Matatɛ̀n nɛ́n zi dú Levi, 30Levi nɛ́n zi dú Simeɔn, Simeɔn nɛ́n zi dú Zhüda, Zhüda nɛ́n dú Zhozɛfɛn, Zhozɛfɛn nɛ́n zi dú Zhonan, Zhonan nɛ́n zi dú Eliakimɛ̀n, 31Eliakimɛ̀n nɛ́n zi dú Melea, Melea nɛ́n zi dú Menan, Menan nɛ́n zi dú Matata, Matata nɛ́n zi dú Natan, Natan nɛ́n zi dú Davidɛ̀n, 32Davidɛ̀n nɛ́n zi dú Zhese, Zhese nɛ́n zi dú Zhobɛdɛ̀n, Zhobɛdɛ̀n nɛ́n zi dú Boozɛ̀n, Boozɛ̀n nɛ́n zi dú Sala, Sala nɛ́n zi dú Naasɔn, 33Naasɔn nɛ́n zi dú Aminadabɛ̀n, Aminadabɛ̀n nɛ́n zi dú Admɛ̀n, Admɛ̀n nɛ́n zi du Arni, Arni nɛ́n zi dú Esrɔm, Esrɔm nɛ́n zi dú Farɛsɛ̀n, Farɛsɛ̀n nɛ́n zi du Zhüda, 34Zhüda nɛ́n zi dú Zhakɔbɛ̀n, Zhakɔbɛ̀n nɛ́n zi dú Izaakɛ̀n, Izaakɛ̀n nɛ́n zi dú Abrahamɛ̀n, Abrahamɛ̀n nɛ́n zi dú Tara, Tara nɛ́n zi dú Nashɔrɛ̀n, 35Nashɔrɛ̀n nɛ́n zi dú Serüshɛ̀n, Serüshɛ̀n nɛ́n zi dú Rago, Rago nɛ́n zi dú Falɛkɛ̀n, Falɛkɛ̀n nɛ́n zi dú Ebɛrɛ̀n, Ebɛrɛ̀n nɛ́n zi dú Sala, 36Sala nɛ́n zi dú Kahinamɛ̀n, Kahinamɛ̀n nɛ́n zi dú Arfazadɛ̀n, Arfazadɛ̀n nɛ́n zi dú Sɛmɛ̀n, Sɛmɛ̀n nɛ́n zi dú Noe, Noe nɛ́n zi dú Lamɛkɛ̀n, 37Lamɛkɛ̀n nɛ́n zi dú Matüzala, Matüzala nɛ́n zi dú Henɔkɛ̀n, Henɔkɛ̀n nɛ́n zi dú Zharɛdɛ̀n, Zharɛdɛ̀n nɛ́n zi dú Maleleɛlɛ̀n, Maleleɛlɛ̀n nɛ́n zi dú Kahinan, 38Kahinan nɛ́n zi dú Enɔsɛ̀n, Enɔsɛ̀n nɛ́n zi dú Sɛtɛ̀n, Sɛtɛ̀n nɛ́n zi dú Adamɛ̀n, Adamɛ̀n nɛ́n zi dú Ɔwɔ.

Currently Selected:

Lükɛ̀n 3: ƐAA03

Highlight

Copy