Matie 17

Zhezü crɔn n'edomɛ̀n

(Nyɛ́n nyan Markɛ̀n 9:2-13; mán Lükɛ̀n 9:28-36 wrú lɔ mɛ̀n)

1Ɛbi-ɔwole vacì, Zhezü bɩ́ Piɛrɛ̀n, Zhakɛ̀n mán Zhan, Zhakɛ̀n nɛ́n muan-ẅì, kɩ sɩ́ yɔ ɛnkpò vri tɔ̀n wú, kɩ nanvrɛn lɔ, yɔ, anwrɔn anzɔ̀ lɔ kɩ yɔ dù. 2Nɛ̀n crɔn n'edomɛ̀n y'ezìwú; n'ezì bukru kɛ gbrɛ́n kɛ hán ɛnbri hɔ́ kɩ n'ɛceci hɔ̀n lɔ srɔ ɛwosu hán ɛyri-kàn hɔ́. 3Kpatakpata lɔ ɛnsɛ̀nkɛn-bɔ̀ anhɔ̀n lɔ kán Mohizì mán Eli cɔ́ Zhezü mɛhi yɔ dɔ́ ankà. 4Zɛtɛn Piɛrɛ̀n kɛ dɔ́ Zhezü le: “Ɛẅɛnwrɔn, zrɔ tán le bɔ̀ dú ɛnu lɔ. Ke dú kɛ e ji hô, me le ku ɛcàsa wɔn anhɔ̀n, vɛ tɛn ɔtɔ̀n, Mohizì tɛn ɔtɔ̀n mán Eli tɛn ɔtɔ̀n.” 5Yɔ dú ankà dɔ́ mɛ̀n, ɛnvra léyi ɛnwì-gbú tɔ̀n gbrɛ́n, kɩ vá murɛn yɔ ɛwú, kɩ ɛnwì-gbú lɔ mɛ̀n esùva tɔ̀n kɛ dɔ̀ le: “Ɔwrɔn ndɔ lɔ dú m'ɛcüɛn Ẅì léyi mɛ̀n bɩ́ mɛ́n pɔ̀püɛ̀ lɔ fɛn mɛ̀n wá ɛwú nɔn. Nyɛ́n die nɛ̀n nukùɛ!” 6Ɛnvra léyi ɛsɛ̀nkɛn-bɔ̀ hɔ̀n lɔ yá esùva ndɔ lɔ nɔn, ɛnjansù vri bru yɔ kɩ yɔ bore, yɔ kɛ́n ezì ɛnhi. 7Zhezü sɔnba yɔ ɛtɛ̀sɛ̀n, tɛ́ yɔ ɛkɔrɛ̀ kɩ kɛ dɔ̀ le: “Nyɛ́n tɔhú, ɛnjansù ke bɩ́ ẅɛn nyɛ̀n.” 8Zɛtɛn yɔ sɩ́ anvɛ̀ ɛwú kɩ yɔ sɩ́ vru kán ɔwrɔn zriɛmɛ́n, ke dú kɛ kè sɩ̀ dù Zhezü zri ki. 9Ɛnkpò wú dù kakɛ mɛ̀n lɔ, Zhezü wá ɛnyànmàn tɔ̀n tán yɔ: “Nyɛ́n bɩ́ dɔ́ ɔwrɔnẅì zriɛmɛ́n eci léyi nyɛ̀n kàn nɔn n'ɛwú ankà, hàn kɩ kɛ̀ krɔn ɛnvra léyi ɔwrɔnẅì Ẅì ke le dú owú-bɔ̀ mɛ̀n kɛ vá ɔkɔrɛ-bɔ̀ mɛ̀n nɔn.”

10Zɛtɛn ɛsɛ̀nkɛn-bɔ̀ lɔ ke yrɛ Zhezü le: “Cɛci kruhú kɛ Ɛnyànmàn-gbànvri-ankà-yé-bɔ̀ kɛ dɔ̀ le ke ji le Eli kɛ và yakɛa?” 11Zhezü mrɛ́n yɔ ɔmùan le: “Ke ji le Eli kɛ và kɛ̀ wá ɛci hɔ̀n lɔ fɛn esùva. 12Zɛtɛn mɛ dɔ́ nyɛ̀n le: Eli và, kɩ anwrɔn kè sɩ̀ nyri nɛ̀n, tɛ́n yɔ hán nɛ̀n eci léyi yɔ cüɛ̀n nɔn. Ɔmu lɔ de Ɔwrɔnẅì Ẅì mumù mán kɛ lɛ kán ɛgbàn y'antamɛ̀n nɔn.” 13Zɛtɛn ɛsɛ̀nkɛn-bɔ̀ lɔ nyri ɔmu le Zhan-Batisì ankà de Zhezü kɛ dɔ́ yɔ nɔn.

Zhezü kɔrɛ ɛnẅì tɔ̀n léyi eci-gɔ́n-lɔẅiɛ dú edomɛ̀n nɔn

(Nyɛ́n nyan Markɛ̀n 9:14-29; mán Lükɛ̀n 9:37-43a wrú lɔ mɛ̀n)

14Ɛnvra léyi yɔ cɔ́ ɛyri léyi fɛcüè nyɔn nɔn, ɔwrɔn tɔ̀n sɔnba Zhezü ɛtɛ̀sɛ̀n, shɛ́n nɛ̀n ezìwú annankruemɛ̀n, 15kɩ kɛ dɔ̀ le: “Ankà-yé-wrɔn, è nyri m'ɛnẅì lɔ ɛnhyɔ̀bɔ̀. Nɛ̀n ẅɛn eci-gɔ́n-lɔẅiɛ dú nɛ̀n edomɛ̀n kɩ ɛnvra léyi ɛnlɔẅiɛ lɔ kɛ ẅɛn nɛ̀n nɔn, kɛ hán nɛ̀n ne bru ɛnhyà mɛ̀n, ɛnvra tɔ̀n hô, ɛnshiemɛ̀n. 16Mɛ̀n sɩ́ nɛ̀n v'ɛsɛ̀nkɛn-bɔ̀ yri, tɛ́n yɔ sɩ̀ cɔ́ nɛ̀n ɔkɔrɛ-yri.” 17Zhezü sɩ́ ɔmùan ɛwú kɛ dɔ̀ le: “Anwrɔn gbàngbàn, ankàẅì-bùtan woro bɔ̀ léyi dú nyɛ̀n nɔn! Ɛnvra ɛ̀bɛ de ke ji le mɛ̀n cɔ́ nyɛ̀n mɛhi bɔ̀ yɛ́ nɛ́n? Ɛnvra ɛ̀bɛ de ke ji le mɛ̀n shrì mɛ̀n bɩ́ nyɛ̀n nɛ́n? Nyɛ́n bɩ́ ɛnẅì lɔ nyɛ́n và sɩ́ mɛ̀n ɛnu lɔ.” 18Zhezü fé ɛnhɛ́n gbàngbàn lɔ; ɛnhɛ́n ndɔ lɔ dú ɛnẅì lɔ edomɛ̀n srɔ ɛntrɛ, kɩ ɛnvra zri lɔ mɛ̀n ɛnẅì lɔ kɔrɛ̀. 19Ɛsɛ̀nkɛn-bɔ̀ lɔ sɔnba Zhezü ɛtɛ̀sɛ̀n ɔhɔnán kɩ zɛtɛn yɔ yrɛ nɛ̀n le: “Cɛci kruhú kɛ bɔ̀ sɩ̀ cɔ̀ ɛnhɛ́n ndɔ lɔ n'ɛwrɔ́-yri rɔa?” 20Zhezü mrɛ́n yɔ ɔmùan le: “Ɔmuhi ankàẅì-bùtan kè sɩ̀ sɛ́n nyɛ̀n nmù nɔn. Mɛ dɔ́ nyɛ̀n annànwɔrɛ mɛ̀n le: ke dú kɛ nyɛ́n ẅɛn ankàẅì-bùtan sevri hán anjrakràn-ẅì hɔ́, nyɛ lɛ dɔ́ ɛnkpò cɛ ndɔ lɔ le: ‘Cɔ̀hɔ́ ɛnu lɔ, hɔ̀n ɛyri nyàntɛn’ kɩ nɛ lɛ cɔhɔ́. Eci zriɛmɛ́n ke sɩ̀ wá nyɛ̀n ejüe. [21Tɛ́n Ɔwɔ sɛ́n mɛ̀n mán kìshe bɩ́ mɛ̀n de yɛ lɛ hán ɛnhɛ́n ndɔ lɔ kɛ̀ srɔ ɛntrɛ nɔn.]”

Zhezü vru kɛ dɔ́ n'owù mán n'owúemɛ̀n-dù-frɔ́ ankà

(Nyɛ́n nyan Markɛ̀n 9:30-32; mán Lükɛ̀n 9:43b-45 wrú lɔ mɛ̀n)

22Ɛnbí tɔ̀n léyi ɛsɛ̀nkɛn-bɔ̀ lɔ borɛ y'edomɛ̀n ɛkru Galile kpɔsɔ wú nɔn, Zhezü kɛ dɔ́ yɔ le: “Ye le bɩ́ ɔwrɔnẅì Ẅì yɛ wá anwrɔnẅì antamɛ̀n, 23kɩ yɔ lɛ di nɛ̀n owúemɛ̀n; tɛ́n ɛbi-anhɔ́n bì lɔ, ne le vru nɛ̀n vá ɔkɔrɛ-bɔ̀ mɛ̀n.” Zhezü sɛ̀nkɛn-bɔ̀ lɔ dú obòto vriemɛ̀n.

Ɔwɔ-cice-wɔn wɔɛ̀n-dì

24Ɛnvra léyi Zhezü mán n'ɛsɛ̀nkɛn-bɔ̀ cɔ́ Kapɛrnahümɛ̀n anmàn nɔn, anwrɔn hɔ̀n léyi ke yrɛ Ɔwɔ-cice-wɔn wɔɛ̀n nɔn sɔnba Piɛrɛ̀n ɛtɛ̀sɛ̀n kɩ ke yrɛ nɛ̀n le: “Ny'ankà-yé-wrɔn mán ke sɩ́ di Ɔwɔ-cice-wɔn wɔɛ̀n hàn?” 25Piɛrɛ̀n mrɛ́n nɛ̀n ɔmùan le: “Hɛ̀ɛ̀, ne dì.” Ɛnvra léyi Piɛrɛ̀n kɛ vá anwɔn mɛ̀n bru-yri nɔn, Zhezü gɔ́ bɩ́ ankà-dɔ̀ kɩ kɛ dɔ̀ le: “Simɔn anhɔntan ɛ hán tro hɛ̀? Antɔn de ke ji le ke di anwɔɛ̀n hɔ̀n léyi ye dì tán ɛnhibù ndɔ lɔ wú nɛ̀ncüì hɔ̀n nɛ́n? Anmàn-bɔ̀ kàle nɛ̀nnyàn-bɔ̀ hà?” 26Piɛrɛ̀n mrɛ́n ɔmùan le: “Nɛ̀nnyàn-bɔ̀”, Zhezü kɛ dɔ́ nɛ̀n le: “Ke dú ɔmu lɔ hô, anmàn-bɔ̀ kè sɩ̀ ẅɛ̀n ɔwɔɛ̀n ká dì nɔn. 27Tɛ́n, bɔ́ sɩ́ ji bɔ̀ wá anwrɔn ejüe. Hɩ le kruhú, ɛ̀ hɔ́n nɛnbà cɛ mùan, ɛ̀ kɔ́n ɛcüè è di ɛnshi, è bɩ́ kpàkpà càn léyi ɛ lɛ jüɛ̀ nɔn, è vru nɛ̀n ɔmùan: ɛ lɛ cɔ́ dɔlà kùa-ẅì zri léyi ke le di vɛ́n mán mɛ̀n mɛhi Ɔwɔ-cice-wɔn wɔɛ̀n nɔn; è bɩ́ ɔkùa lɔ è di b'ɔwɔɛ̀n lɔ.”

Currently Selected:

Matie 17: ƐAA03

Highlight

Copy