Matie 19

Ankà-yé léyi Zhezü kɛ tán eyrì-bɔ́-ankà wú nɔn

(Nyɛ́n nyan Markɛ̀n 10:1-12 wrú lɔ mɛ̀n)

1Ɛnvra léyi Zhezü trɔ n'ankà-yé lɔ nɔn, nɛ̀n cɔhɔ́ Galile kpɔsɔ wú kɩ nɛ̀n hɔ́n Zhüde kpɔsɔ wú, Zhurdɛn shi mɛẅi. 2Anwrɔn fɛcüè kɛ kɛ́n nɛ̀n ɛsɛ̀n kɩ nɛ kɔrɛ y'ɛnlɔẅiɛ hɔ̀n lɔ. 3Ɔwɔ-nyànmàn-sùva-wá-bɔ̀ zrizri sɔnba nɛ̀n ɛtɛ̀sɛ̀n, ô kɛ̀ krɔn nɛ̀n antanwrɔn. Yɔ yrɛ nɛ̀n le: “Bɔ́ ɛnyànmàn lɔ kɛ tán ɛncɔnwrɔn ɛkɔrɛ̀levri kɛ̀ wrɔ́ nɛ́n hi eci lɔ fɛn mɛ̀n hàn?” 4Zhezü mrɛ́n ɔmùan le: “Nyɛ́n sɩ̀ krɛ̀ ankà léyi Owrú Prɔnprɔn merɛ́n nɛ́n? ‘Ɛnkrubɔmɛ̀n lɔ, Eci-lɔ-fɛn-hán-wrɔn hán yɔ, ɛncɔnwrɔn mán ɛnnyɔnwrɔn’, 5zɛtɛn nɛ́n dɔ̀ le: hɩ le kruhú de, ɛncɔnwrɔn ke le teze nɛ́n zi mán nɛ́n muan, ô kɛ̀ hɔ̀n sɔ́n ebɩ́ nɛ́n mán nɛ́n hi mɛhi, kɩ yɔ, anwrɔn anhyrɛ̀ lɔ, yɔ le dú eci zri. 6Ɔmu lɔ, yɔ sɩ̀ vru dú eci anhyrɛ̀, tɛ́n eci zri. Ke sɩ́ ji le ɔwrɔnẅì kɛ̀ gbɔrɔ eci léyi Ɔwɔ mú hɛ́n nɔn.” 7Ɔwɔ-nyànmàn-sùva-wá-bɔ̀ ke yrɛ Zhezü le: “Cɛci kruhú kɛ Mohizì wá tán le ye merɛ́n eyrì-bɔ́ wrú yɛ tán ɛnnyɔnwrɔn yakɛ yɛ wrɔ́ nɛ̀n hàn?” 8Zhezü mrɛ́n ɔmùan le: “Mohizì tán nyɛ̀n ɛkɔrɛ̀levri nyɛ́n wrɔ́ nyɛ́n hi hɔ̀n, ɔmuhi nyɛ́n ẅɛn ɛnbɔrɛ shishi nɔn. Tɛ́n ɛnkrubɔmɛ̀n lɔ, kè sɩ̀ dù ɔmu lɔ. 9Mɛ dɔ́ nyɛ̀n le: ke dú kɛ ɛncɔnwrɔn kɛ wrɔ́ nɛ́n hi, kɩ ke nyri ɔmu le, ɛnnyɔnwrɔn lɔ ke sɩ̀ fɔ̀ndɔ̀n ɛnyànmàn, nɛ̀n dú ɔmùan-zri-diemɛ̀n, kɩ ne yri ɛnnyɔnwrɔn nyàntɛn, nɛ́n, ɛncɔnwrɔn ndɔ lɔ nɛ hán ɛnnyɔnwrɔn-bi-gbàn.”

10Zhezü sɛ̀nkɛn-bɔ̀ lɔ kɛ dɔ́ nɛ̀n le: “Ke dú kɛ, ɔmu de ɛncɔnwrɔn mán ɛnnyɔnwrɔn granmɛ̀n ankà lɔ dù nɔn hô, zrɔ tán le ye bɩ́ yri ɛnnyɔnwrɔn.” 11Zhezü mrɛ́n yɔ ɔmùan le: “Ke sɩ̀ dù anwrɔn lɔ fɛn de kɛ lɛ ẅɛn ɛnbɔrɛ kɛ̀ hɛ́n kè shri ankà-yé ndɔ lɔ kè bɩ nɔn, tɛ́n anwrɔn hɔ̀n léyi Ɔwɔ kɛ tán hɩ ci-hán lɔ nɔn. 12Ankà-zrɔ-ankà bobrebe de kɛ wá tán wúcɔ̀ ke bɩ́ yri wúyɔ̀: ndɔ hɔ̀n tɛn, ɛcɛmɛ̀n hán hɛ́n yɔ sɩ̀ dù wúcɔ̀, ɛnlɔẅiɛ kruhú, ɛnjanbɔ̀ tɛn, y'anwrɔn hɔ̀n léyi ẅɛn yɔ nɔn, kɛ bó yɔ ke die; zɛtɛn ɔtrɔmɛ̀n lɔ ndɔ hɔ̀n ke sɩ́ ji ke yri wúyɔ̀, Anhobɩ́ Nɛ̀ncüì-dúyri kruhú. Ke dú kɛ ɔwrɔn kɛ lɛ ẅɛn ankà-yé ndɔ lɔ kɛ hɛ́n tɛ̀ hô, nɛ̀n shrì nɛ̀n bɩ!”

Zhezü ke fú ɛẅì hɔ̀n kpòkpò ɛnshi

(Nyɛ́n nyan Markɛ̀n 10:13-16; mán Lükɛ̀n 18:15-17 wrú lɔ mɛ̀n)

13Anwrɔn bɩ́ ɛẅì hɔ̀n vá sɩ́ Zhezü ô nɛ̀n di yɔ ankɔ̀rɛ̀ ɛwú, nɛ̀n sɛ̀n nɛ̀n tán yɔ, tɛ́n ɛsɛ̀nkɛn-bɔ̀ lɔ kɛ gbá anvɛ̀ wá anwrɔn hɔ̀n lɔ. 14Zɛtɛn Zhezü kɛ dɔ̀ le: “Nyɛ́n teze ɛẅì hɔ̀n kɛ̀ và cɔ́ mɛ̀n, kɩ nyɛ́n bɩ́ kɛ́n yɔ nyɛ́n hɛ́n hán, ɔmuhi Anhobɩ́ nɛ̀ncüì-dúyri dú anwrɔn hɔ̀n léyi ndù hán yɔ hɔ́ nɔn tɛn.” 15Nɛ̀n di yɔ ankɔ̀rɛ̀ ɛwú kɩ nɛ̀n cɔhɔ́ ɛyri léyi nɛ́n dù nɔn.

Sùgban-wrɔn léyi di ɛnnɛ̀ncüì nɔn

(Nyɛ́n nyan Markɛ̀n 10:17-31; mán Lükɛ̀n 18:18-30 wrú lɔ mɛ̀n)

16Ɔwrɔn tɔ̀n sɔnba Zhezü ɛtɛ̀sɛ̀n kɩ ke yrɛ nɛ̀n le: “Ankà-yé-wrɔn, eci ankrànkràn tán de ke ji le mɛ́n hán ô mɛ̀n cɔ́ ɛwúvà léyi ke sɩ́ trɔa nɛ́n?” 17Zhezü kɛ dɔ́ nɛ̀n le: “Cɛci kruhú kɛ e yrɛ mɛ̀n ankà, eci léyi zrɔ nɔn hɩ wúɛ? Eci zri kɩ zrɔ. Ke dú kɛ e ji è bru ɛwúvà mɛ̀n, ɛ̀ ẅɛn ɛnyànmàn hɔ̀n lɔ ɛ̀ hɛ́n.” 18Ne yrɛ Zhezü le: “Tɛtán hɔ̀n lɔa?” Zhezü mrɛ́n ɔmùan le: “E bɩ́ wri ɔwrɔn, e bɩ́ hán ɛncɔnwrɔn-hi-bi-gbàn; e bɩ́ yerɛ ɛci; e bɩ́ di ɛyɔ̀n dalɛfuɛ ɔwrɔn tɛ̀sɛ̀n; 19ɛ̀ wá ezi mán ɔmuan; ɛ̀ cüɛn ɛnyran kɛ̀ hán vɛ́n mumù hɔ́.” 20Sùgban-wrɔn lɔ kɛ dɔ́ nɛ̀n le: “Mɛ̀n ẅɛn ɛnyànmàn ndɔ hɔ̀n lɔ fɛn mɛ̀n hɛ́n. Ecitan de ke ji le mɛ̀n vru mɛ̀n hán nɛ́n?” 21Zhezü kɛ dɔ́ nɛ̀n le: “Ke dú kɛ e ji è krɔn kpehɛ́n hô, ɛ̀ hɔ̀n hɛ́ v'ɛci hɔ̀n lɔ fɛn, è bɩ́ ɔkùa lɔ ɛ̀ tán ɛmian-bɔ̀, zɛtɛn ɛ lɛ cɔ́ ɛnnɛ̀ncüì-di-ci anhobɩ́; zɛtɛn è vru ɛ̀ và, ô ɛ̀ kɛ́n mɛ̀n ɛsɛ̀n.” 22Tɛ́n ɛnvra léyi sùgbán-wrɔn lɔ yá ankà ndɔ lɔ nɔn, nɛ́n hɔ̀n kɩ nɛ̀n bɩ́ ɛnhyɔ̀bɔ̀ nɛ̀n ku edù, ɔmuhi nɛ̀n ẅɛn ɛci bobrebe nɔn. 23Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Mɛ dɔ́ nyɛ̀n annànwɔrɛ mɛ̀n le: sɔ́ tán ɔwrɔn léyi di ɛnnɛ̀ncüì nɔn ke bru Anhobɩ́ nɛ̀ncüì-dúyri. 24Kɩ me vru mɛ dɔ́ nyɛ̀n le: sɔ́ tán frimú kè ci frɛnfrɛn levri, tɛ́n vru sɔ́ tán ɛnnɛ̀ncüì ke bru Anhobɩ́ nɛ̀ncüì-dúyri.” 25Ɛnvra léyi ɛsɛ̀nkɛn-bɔ̀ hɔ̀n lɔ yá ankà ndɔ hɔ̀n lɔ nɔn, yɔ dú anvɛmɛ̀n-frɛ́n mɛ̀n kɩ yɔ dɔ̀ le: “Zɛtɛn antɔn de kɛ lɛ cɔ́ ebɩdie nɛ́n?” 26Zhezü nyan yɔ kɩ kɛ dɔ́ yɔ le: “Sɔ́ tán anwrɔnẅì, tɛ́n Ɔwɔ yri tɛn kè sɩ̀ sɔ̀a.” 27Zɛtɛn Piɛrɛ̀n bɩ́ ankà-dɔ̀ kɩ kɛ dɔ̀ le: “E die nukùɛ, bɔ́ tecüe ɛci lɔ fɛn bɔ̀ kɛ́n mɛ́n ɛsɛ̀n. Ecitan de bɔ́ lɛ cɔ̀ nɛ́n?” 28Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: ɛnvra léyi ɔwrɔnẅì Ẅì kɛ lɛ yɛ́ n'ecizrɔ gbú-tobù lɔ wú, ɛwúvà wrù lɔ mɛ̀n nɔn, nyɛ́n anwrɔn ɛvà-anhyrɛ̀ hɔ̀n léyi nyɛ́n kɛ́n mɛ̀n ɛsɛ̀n nɔn, nyɛ lɛ yɛ́ ɔmu zri lɔ ɛgbú-tobù wú, nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n. 29Kɩ anwrɔn hɔ̀n léyi m'ɛkruhú tecüe y'ɔwrɔn, yɔ muan-ẅì hɔ́n wúyɔ̀ mán wúcɔ̀, yɔ zi mán yɔ muan, y'ɛẅì hɔ̀n, y'ankɛ̀tɛ̀, kɛ lɛ cɔ́ anjakpà ke le wí ɛkoẅi-ɛnrì kɩ kɛ lɛ cɔ́ ɛwúvà léyi ke sɩ́ trɔa nɔn. 30Tɛ́n bobrebe ndɔ hɔ̀n léyi dú kpàkpà-bɔ̀ nɔn, kɛ lɛ trɔ ɛmɛẅi, kɩ ɛmɛẅi-trɔ-bɔ̀ lɔ bobrebe ke le dú kpàkpà-bɔ̀.”

Currently Selected:

Matie 19: ƐAA03

Highlight

Copy