Markɛ̀n 10

Zhezü ankà-yé eyrì-bɔ́ ankà wú

(Nyɛ́n nyan Matie 19:1-12; mán Lükɛ̀n 16:18 wrú lɔ mɛ̀n)

1Zhezü cɔhɔ́ ɛyri léyi nɛ́n dù nɔn zɛtɛn hɔ́n Zhüde Kpɔsɔ wú, bru Zhurdɛn shi mɛẅi; nanvrɛn lɔ fɛcüè bɔrɛkru n'ɛtɛ̀sɛ̀n, kɩ ne yé yɔ ankà, hán ɔmu léyi nɛ hán ɛnvra lɔ fɛn nɔn. 2Ɔwɔ-nyànmàn-sùva-wá-bɔ̀ jan sɔnba nɛ̀n ɛtɛ̀sɛ̀n ô kɛ̀ krɔn nɛ̀n antanwrɔn. Yɔ yrɛ nɛ̀n le: “Bɔ́ ɛnyànmàn lɔ kɛ tán ɛncɔnwrɔn ɛkɔrɛ̀levri kɛ̀ bɔ́ nɛ́n hi eyrìɛ?” 3Zhezü mrɛ́n yɔ ɔmùan kɩ ke yrɛ yɔ le: “Ɛnyànmàn tán de Mohizì tán nyɛ̀n nɛ́n?” 4Yɔ dɔ̀ le: “Mohizì tán ɛkɔrɛ̀levri ɛncɔnwrɔn kè merɛ́n eyrì-bɔ́ wrú kɛ̀ tán nɛ́n hi, yakɛ nɛ̀n wrɔ́ yi.” 5Zɛtɛn Zhezü kɛ dɔ́ yɔ le: “Mohizì merɛ́n ɛnyànmàn ndɔ lɔ ɔmuhi nyɛ́n ẅɛn ɛnbɔrɛ shishi nɔn. 6Tɛ́n ɛnkrubɔmɛ̀n lɔ, ɛnvra léyi Ɔwɔ hán eci lɔ fɛn trɔ nɔn, ‘nɛ̀n hán yɔ ɛncɔnwrɔn mán ɛnnyɔnwrɔn’, kɩ ye merɛ́n le: 7‘Ndɔ lɔ kruhú de ke ji le ɛncɔnwrɔn kè teze nɛ́n zi mán nɛ́n muan ô kɛ̀ hɔ̀n cɔ́ nɛ́n hi yɔ sɔ́n ebɩ́, 8ô yɔ, anwrɔn anhyrɛ̀ lɔ yɔ dú eci zri.’ Ɔmu lɔ, yɔ sɩ̀ vru dú anhyrɛ̀, tɛ́n eci zri. 9Ke sɩ́ ji le anwrɔn anhyrɛ̀ léyi Ɔwɔ bɔsɔ̀ nɔn, ɔwrɔnẅì kɛ̀ gbɛ́ yɔ angranmɛ̀n ɔmùan.” 10Ɛnvra léyi Zhezü mán n'ɛsɛ̀nkɛn-bɔ̀ bru anwɔn mɛ̀n nɔn, n'ɛsɛ̀nkɛn-bɔ̀ vru ke yrɛ nɛ̀n ankà eyrì-bɔ̀ ankà wú. 11Zhezü kɛ dɔ́ yɔ le: “Ke dú kɛ ɛncɔnwrɔn ke teze nɛ́n hi kɩ ke yri ɛnnyɔnwrɔn nyàntɛn, nɛ hán ɛnnyɔnwrɔn-bi-gbàn ku kpàkpà nyɔnwrɔn lɔ ɛwú; 12ɔmu zri lɔ, ke dú kɛ ɛnnyɔnwrɔn ke teze nɛ́n cüì kɩ ke bɩ́ ɛncɔnwrɔn nyàntɛn, nɛ́n mán nɛ hán ɛncɔnwrɔn-bi-gbàn.”

Zhezü ke fú ɛẅì hɔ̀n kpòkpò ɛnshi

(Nyɛ́n nyan Matie 19:13-15; mán Lükɛ̀n 18:15-17 wrú lɔ mɛ̀n)

13Anwrɔn bɩ́ ɛẅì hɔ̀n vá sɩ́ Zhezü ô nɛ̀n di yɔ ɛkɔrɛ̀ ɛwú, tɛ́n ɛsɛ̀nkɛn-bɔ̀ kɛ gbá anvɛ̀ wá yɔ. 14Ɛnvra léyi Zhezü kán ndɔ lɔ nɔn kɛ̀ sɩ̀ zrɔ nɛ̀n kɩ nɛ dɔ́ n'ɛsɛ̀nkɛn-bɔ̀ lɔ le: “Nyɛ́n teze ɛẅì hɔ̀n lɔ kɛ̀ vá cɔ́ mɛ̀n! Nyɛ́n bɩ́ kɛ́n yɔ nyɛ́n hɛ́n hán, ɔmuhi Anhobɩ́ nɛ̀ncüì-dúyri dú anwrɔn hɔ̀n léyi kɛ cá yɔ nɔn tɛn. 15Annànwɔrɛ mɛ̀n, mɛ dɔ́ nyɛ̀n le: ɔwrɔn léyi ke sɩ̀ bɩ́ Anhobɩ́ Nɛ̀ncüì-dúyri ankà kɛ̀ hán ɛnẅì cɛ hɔ́ nɔn, nɛ́n sɩ̀ bru nanvrɛn lɔ mrìmrì.” 16Zɛtɛn, Zhezü ẅɛn ɛẅì hɔ̀n lɔ sɔ́n ɔwàn; nɛ̀n bɩ́ ankɔrɛ̀ nɛ̀n ku yɔ ɛwú kɩ nɛ̀n fú yɔ ɛnshi.

Ɔwrɔn léyi di ɛnnɛ̀ncüì nɔn

(Nyɛ́n nyan Matie 19:16-30; mán Lükɛ̀n 18:18-30 wrú lɔ mɛ̀n)

17Ɛnvra léyi Zhezü bru ɛnlevri kɛ hɔ̀n nɔn, ɔwrɔn tɔ̀n srɛ́ hɔ́n shɛ́n nɛ̀n ezìwú annankruemɛ̀n kɩ ke yrɛ nɛ̀n le: “Ankà-yé-wrɔn anvrɛnvrɛn, eci tán de ke ji le mɛ̀n hán ô mɛ̀n cɔ́ ɛwúvà léyi ke sɩ́ trɔ nɛ́n?” 18Zhezü kɛ dɔ́ nɛ̀n le: “Cɛci kruhú kɛ e bi mɛ̀n ɔwrɔn anvrɛnvrɛn hán? Ɔwrɔn zriɛmɛ́n ke sɩ̀ dù ɔwrɔn anvrɛnvrɛn, ke dú kɛ kè sɩ̀ dù Ɔwɔ zri kɩ. 19E nyri ɛnyànmàn hɔ̀n lɔ: ‘E bɩ́ wri ɔwrɔn; e bɩ́ bi ɛncɔnwrɔn hi; e bɩ́ yerɛ ɛci; ɛ bɩ́ di ɛyɔ̀n dalɛfuɛ e ku ɔwrɔn ɛwú; e bɩ́ bɩ́ ɛnyran ci ɛfrɛ́n mɛ̀n; ɛ̀ wá ezi mán ɔmuan.’ ” 20Ɔwrɔn lɔ mrɛ́n nɛ̀n ɔmùan le: “Ankà-yé-wrɔn, mɛ̀n ẅɛn ɛnyànmàn ndɔ hɔ̀n lɔ fɛn mɛ̀n hɛ́n m'ɛcɛmɛ̀n hàn hɛ́n.” 21Zhezü nyan nɛ̀n, cüɛn nɛ̀n kɩ kɛ dɔ̀ le: “Wɔrɔ mɛ́n eci zri: Hɔ̀n, hɛ̀ v'ɛci hɔ̀n lɔ fɛn, è bɩ́ ɔkùa lɔ è tán ɛmian-bɔ̀, zɛtɛn e le di ɛnnɛ̀ncüì anhobɩ́; zɛtɛn và ô kɛ́n mɛ̀n ɛsɛ̀n.” 22Tɛ́n ɛnvra léyi ɔwrɔn lɔ yá ankà ndɔ lɔ nɔn, nɛ̀n bɩ́ ɛnhyɔ̀bɔ̀ nɛ̀n ku edù kɩ nɛ́n hɔ̀n, ɔmuhi nɛ̀n di ɛnnɛ̀ncüì vri nɔn.

23Zhezü nyan n'ɛsɛ̀nkɛn-bɔ̀ léyi gbrɛnkɛn nɛ̀n ɔmùan nɔn kɩ nɛ dɔ́ yɔ le: “Sɔ́ tán anwrɔn hɔ̀n léyi di ɛnnɛ̀ncüì nɔn kè bru Anhobɩ́ Nɛ̀ncüì-dúyri!” 24Ankà ndɔ léyi Zhezü sɛ̀nkɛn-bɔ̀ lɔ yá nɔn, wá yɔ gbɔ̀gbɔ̀ edù. Tɛ́n Zhezü vru kɛ dɔ́ yɔ le: “M'ɛẅì hɔ̀n, sɔ́ tán ye bru Anhobɩ́ Nɛ̀ncüì-dúyri. 25Nsɔ́ tán frimú kè ci frɛnfrɛn levri, tɛ́n vru sɔ́ tán ɔwrɔnẅì kè bru Anhobɩ́ Nɛ̀ncüì-dúyri.” 26Ankà ndɔ lɔ kɛ sán frɛ́n ɛsɛ̀nkɛn-bɔ̀ lɔ anvɛmɛ̀n, kɩ yɔ yrɛ y'edomɛ̀n le: “Tɛ́n, antɔn de kɛ lɛ cɔ́ ebɩdie nɛ́n?” 27Zhezü nyan yɔ kɩ kɛ dɔ́ yɔ le: “Ankà ndɔ lɔ sɔ́ tán anwrɔnẅì, tɛ́n, Ɔwɔ yri tɛ́n jrɔ́, ɔmuhi Ɔwɔ ẅɛn eci lɔ fɛn kɔrɛ̀levri nɔn.” 28Zɛtɛn Piɛrɛ̀n kɛ dɔ́ nɛ̀n le: “È die nukùɛ, bɔ́ teze eci lɔ fɛn bɔ̀ kɛ́n mɛ́n ɛsɛ̀n.” 29Zhezü mrɛ́n ɔmùan le: “Annànwɔrɛ mɛ̀n mɛ dɔ́ nyɛ̀n le: Ke dú kɛ m'ɛkruhú mán Ɛmɛẅi ankà Ankrànkràn kruhú, ɔwrɔn ke teze n'ɔwɔn, nɛ́n muan-ẅì hɔ̀n, wúcɔ̀ mán wúyɔ̀, nɛ́n muan, nɛ́n zi, n'ɛẅì hɔ̀n, n'ankɛ̀tɛ̀, 30nɛ lɛ cɔ́ anjakpà ke le sevri andɛ̀n ɛkoẅi-ɛnrì ɛnvra ndɔ léyi bɔ́ dú ɛmɛ̀n zɛtɛ̀ lɔ nɔn: anwɔn, anwrɔn-nɛ́n-muan-ẅì hɔ̀n wúcɔ̀ mán wúyɔ̀, ɛẅì-nɛ́n-muan hɔ̀n, ɛẅì hɔ̀n, ankɛ̀tɛ̀ mán ejüedì gbànkàn mɛhi; kɩ ɛnvra léyi dú ezì kɛ và nɔn, ɛwúvà léyi ke sɩ́ trɔ nɔn dú nɛ tɛn. 31Tɛ́n anwrɔn hɔ̀n léyi dú ezì nɔn bobrebe kɛ lɛ trɔ ɛmɛẅi, kɩ ɛmɛẅitrɔ-bɔ̀ lɔ, bobrebe ke le ci ezì.”

Zhezü kɛ dɔ́ andɛ̀n-anhɔnmɛ̀n n'owù mán n'owúemɛ̀n-dù-frɔ́ ankà

(Nyɛ́n nyan Matie 20:17-19; mán Lükɛ̀n 18:31-34 wrú lɔ mɛ̀n)

32Zhezü mán n'ɛsɛ̀nkɛn-bɔ̀ bɩ ɛnlevri léyi kɛ hɔ́n Zherüzalɛmɛ̀n anmàn nɔn. Zhezü dú n'ɛsɛ̀nkɛn-bɔ̀ ezì kɛ nán esù, yɔ tɛn yɔ dú ɛnjansuemɛ̀n, kɩ anwrɔn hɔ̀n léyi kɛ kɛ́n yɔ ɛsɛ̀n nɔn mán ɛnjansu kɛ ẅɛ̀n. Zhezü vru bi n'ɛsɛ̀nkɛn-bɔ̀ ɛvà-anhyrɛ̀ lɔ kɩ kɛ dɔ́ yɔ eci léyi kɛ lɛ hán nɛ̀n ɛnvra bruemɛ̀n nɔn hɩ ankà. 33Zhezü kɛ dɔ́ yɔ le: “Nyɛ́n die nukùɛ: bɔ̀ hɔ́n Zherüzalɛmɛ̀n anmàn; nanvrɛn lɔ ɔwrɔnẅì Ẅì kɛ lɛ kán ɛgbàn Ɔwɔ-cice-bɔ̀ cüìcüì hɔ̀n mán ɛnyànmàn-gbànvri-ankà-yé-bɔ̀ tamɛ̀n. Yɔ le di nɛ̀n owúemɛ̀n, kɩ yɔ le bɩ́ nɛ̀n yɔ tán anwrɔn hɔ̀n léyi kè sɩ̀ nyri Ɔwɔ nɔn. 34Yɔ, anwrɔn ndɔ hɔ̀n lɔ, yɔ lɛ hán nɛ̀n ɛnhyürɛ̀, yɔ lɛ fɛ́ nɛ̀n andà, yɔ lɛ gorɛ nɛ̀n ɛngbele mɛ̀n kɩ yɔ le wri nɛ̀n. Kɩ, ɛbi anhɔnmɛ̀n bì lɔ, ne le dú owúemɛ̀n nɛ̀n frɔ́.”

Zhakɛ̀n mán Zhan mɛhi ci-sán

(Nyɛ́n nyan Matie 20:20-28 wrú lɔ mɛ̀n)

35Zɛtɛn Zhakɛ̀n mán Zhan, Zebede ẅì hɔ̀n, vá Zhezü ɛtɛ̀sɛ̀n. Yɔ dɔ́ nɛ̀n le: “Ankà-yé-wrɔn, bɔ́ ji le eci léyi bɔ́ lɛ sán mɛ́n nɔn ɛ̀ hán ɛ̀ tán bɔ̀.” 36Zhezü ke yrɛ yɔ le: “Eci tán de nye ji mɛ̀n hán mɛ̀n tán nyɛ̀n nɛ́n?” 37Zhakɛ̀n mán Zhan mrɛ́n nɛ̀n ɔmùan le: “Ɛnvra léyi e le dú v'eci-zro yri-ẅɛ̀n lɔ mɛ̀n nɔn, ɛ̀ tán bɔ̀ ɛkɔrɛ̀levri ô bɔ̀ yɛ́ mɛ́n ebrì mán ezì kɔrɛ̀a.” 38Tɛ́n Zhezü kɛ dɔ́ yɔ le: “Nyɛ́n sɩ̀ nyrì eci léyi nyɛ sán nɔn. Nyɛ́n ẅɛn edù nyɛ́n le mi ɛgbànkàn shi grashɛ̀n léyi mɛ vá emi-yri, ô nyɛ́n vru nyɛ́n cɔ́ ejüezì ɛnshi-kru-wá ndɔ lɔ nɛ́n?” 39Kɩ yɔ mrɛ́n nɛ̀n ɔmùan le: “Bɔ́ lɛ hán tɛ̀.” Zhezü kɛ dɔ́ yɔ le: “Mɛ́n nyrì le nyɛ lɛ mi ɛgbànkàn shi grashɛ̀n lɔ kɩ nyɛ lɛ cɔ́ ejüezì shi-kru-wá lɔ. 40Tɛ́n ke sɩ̀ dù mɛ̀n de mɛ̀n ẅɛ̀n ebrì mán ezì-kɔrɛ̀ yɛ́-yri lɔ nɔn; ɛyri ndɔ lɔ dú anwrɔn hɔ̀n léyi Ɔwɔ wá ɔmùan nɔn tɛn.”

41Ɛnvra léyi Zhezü sɛ̀nkɛn-bɔ̀ ɛvà ndɔ hɔ̀n lɔ yá ankà ndɔ lɔ nɔn, yɔ bɩ́ ɛmɛ̀nhyì ku Zhakɛ̀n mán Zhan ɛwú. 42Zɛtɛn Zhezü bi yɔ lɔ fɛn kɩ dɔ́ yɔ le: “Nyɛ́n nyri ɔmu le anwrɔn hɔ̀n léyi dú fɛcüè cüìcüì-bɔ̀ nɔn kɛ ẅɛn yɔ, ɛkɔrɛ̀levriemɛ̀n, kɩ anwrɔn ɛvrivri hɔ̀n lɔ kɛ hán yɔ yɛ kán ɛkɔrɛ̀srɔn léyi yɔ ẅɛ̀n nɔn. 43Tɛ́n ny'ɛmɛ̀n lɔ eci-hán ndɔ lɔ bàdà. Ke dú kɛ ny'ɛmɛ̀n lɔ ɔwrɔn tɔ̀n ke ji kɛ̀ srɔ ecüìcüì, ke ji le nɛ̀n dú ny'eci-bɩtan-wrɔn, 44kɩ ke dú kɛ ny'ɛmɛ̀n lɔ ɔwrɔn tɔ̀n ke ji ke dú kpàkpà-wrɔn, ke ji le nɛ̀n srɔ nyɛ lɛ fɛn ny'ɔwɔ̀n-wrɔn. 45Ɔmuhi ɔwrɔnẅì Ẅì dùku mán, ke sɩ̀ và ô nɛ̀n ẅɛ̀n eci-bɩtan-bɔ̀, tɛ́n nɛ́n và ô nɛ̀n srɔ eci-bɩtan-wrɔn, ô nɛ̀n bɩ́ n'ɛwúvà lɔ nɛ̀n wá anhɔ̀ba ô nɛ̀n srú anwrɔn bobrebe ɛgbàn mɛ̀n nɛ̀n sɔhɔ́.”

Zhezü kɔrɛ anvɛ̀-bɔyɛ-wrɔn Bartime

(Nyɛ́n nyan Matie 20:29-34; mán Lükɛ̀n 18:35-43 wrú lɔ mɛ̀n)

46Zhezü mán n'ɛsɛ̀nkɛn-bɔ̀ cɔ́ Zheriko. Ɛnvra léyi Zhezü dú Zheriko anmàn nɛ́n mán n'ɛsɛ̀nkɛn-bɔ̀ mán fɛcüè vri tɔ̀n mɛhi yɔ srɔ nɔn, anvɛ̀-bɔyɛ-wrɔn tɔ̀n ye bi Bartime, Time ẅì, yɛ́ ɛnlevri mùan kɩ kɛ sán ɛci. 47Ɛnvra léyi nɛ̀n yá le Nazàrɛtɛ̀n-wrɔn Zhezü de ke cì nɔn, nɛ̀n bukru ne di bobo: “Zhezü, Davidɛ̀n ẅì, è nyri mɛ̀n ɛnhyɔ̀bɔ̀.” 48Anwrɔn bobrebe ke fé nɛ̀n kɩ kɛ dɔ́ nɛ̀n nɛ̀n kɛ́n ɔmùan nɛ̀n hɛ́n; tɛ́n nɛ sán di bobo ecüìemɛ̀n: “Zhezü, Davidɛ̀n ẅì, è nyri mɛ̀n ɛnhyɔ̀bɔ̀!” 49Zhezü sannyɔn kɩ kɛ dɔ̀ le: “Nyɛ́n bi nɛ̀n.” Yɔ bi anvɛ̀-bɔyɛ-wrɔn lɔ kɩ yɔ dɔ́ nɛ̀n le: “Bɩ edùyì, tɔhú, ne bi mɛ́n.” 50Zɛtɛn anvɛ̀-bɔyɛ-wrɔn lɔ kɔ́n n'ɛwú ceci lɔ ze, trɛ́nshɛ́n kɩ hɔ́n cɔ́ Zhezü. 51Zhezü ke yrɛ nɛ̀n le: “Ecitan de e ji le mɛ̀n hán mɛ̀n tán mɛ́n nɛ́n?” Anvɛ̀-bɔyɛ-wrɔn mrɛ́n nɛ̀n ɔmùan le: “Ankà-yé-wrɔn, ɛ̀ hán mɛ̀n, mɛ̀n vru mɛ̀n kán ɛyri.” 52Kɩ Zhezü kɛ dɔ́ nɛ̀n le: “Hɔ̀n, v'ankàẅì-bùtan lɔ kɔrɛ mɛ́n.” Ɛnvra zri lɔ, nɛ kán ɛyri tɛ̀, kɩ nɛ̀n kɛ́n Zhezü ɛsɛ̀n.

Currently Selected:

Markɛ̀n 10: ƐAA03

Highlight

Copy