Markɛ̀n 14
14
Ɛcüìcüì-bɔ̀ ke ji Zhezü ɛyri
(Nyɛ́n nyan Matie 26:1-5; Lükɛ̀n 22:1-2; mán Zhan 11:45-53 wrú lɔ mɛ̀n)
1Wɔrɔ ɛbi-anhyrɛ̀ kɛ lɛ cɔ́ Ɛẅɛnwrɔn-bemɛ̀n-cì mán abùtùkumɛ́n-kɔ́ nyànmán-bì lɔ. Ɔwɔ cice-bɔ̀ cüìcüì mán ɛnyànmàn-gbànvri-ankà-yé-bɔ̀ ke ji ɛyri ô kɛ̀ ẅɛn Zhezü ɛbán mɛ̀n ô kè wri nɛ̀n. 2Yɔ dɔ́ y'edomɛ̀n le: “Ke sɩ́ ji le bɔ̀ ẅɛn nɛ̀n ɛnyànmánbì vra lɔ, ke dú kɛ bɔ́ hán ɔmu lɔ hô, fɛcüè ke le sɩ́ n'edomɛ̀n ɛwú.”
Ɛnnyɔnwrɔn tɔ̀n ku Zhezü ɛnshi-bán ɛnkru
(Nyɛ́n nyan Matie 26:6-13; mán Zhan 12:1-8 wrú lɔ mɛ̀n)
3Zhezü dú Betani anmàn, Simɔn, kokove-wrɔn nanvrɛn ɛbemɛ̀n; ɛnvra léyi nɛ̀n yɛ́ nɛ vá ɛci-zî-yri nɔn, ɛnnyɔnwrɔn tɔ̀n bru anwɔn mɛ̀n; anhàn shishi shi-bán dú nɛ̀n antamɛ̀n. Kɩ nɛ̀n vɔ́n ɛnshi-bán lɔ ɔmùan nɛ̀n ku Zhezü ɛnkruemɛ̀n. 4Anwrɔn hɔ̀n léyi dú nanvrɛn nɔn, ke bɩ́ ɛmɛ̀nhyì kɩ kɛ dɔ́ y'edomɛ̀n le: “Ɛnshi-bán jrɛ́ kɛ? 5Ɛnshi-bán ndɔ lɔ yɛ lɛ hɛ́ nɛ̀n koprɛ̀ ɛkoẅi-ɛvà-ɛnrì, ô ye bɩ́ n'ɔkùa lɔ yɛ tán ɛmian-bɔ̀!” Kɩ yɔ lɔ fɛn yɛ dɔ́ ankà gbàngbàn ku ɛnnyɔnwrɔn lɔ ɛwú. 6Tɛ́n Zhezü kɛ dɔ̀ le: “Nyɛ́n teze nɛ̀n. Cɛci kruhú kɛ nye di nɛ̀n ejüɛ? Eci léyi nɛ̀n hán nɛ̀n tán mɛ̀n nɔn zrɔ. 7Ɔmuhi ɛnvra lɔ fɛn nyɛ lɛ cɔ́ ɛmian-bɔ̀, ô nyɛ́n hán yɔ anvrɛn ɛnvra totɔtɔ̀n léyi nye ji nɔn; mɛ tɛn, mɛ́n sɩ̀ dú nyɛ̀n ɛmɛ̀n ɛnvra lɔ fɛn. 8Ɛnnyɔnwrɔn lɔ hán eci léyi n'ɛkɔrɛ̀ ncɔ̀ nɔn; nɛ̀n ku mɛ̀n ɛnshi-bán edomɛ̀n ô m'edùwrú lɔ kè nyrì dɛ́ ezhe-nànmàn mɛ̀n. 9Mɛ dɔ́ nyɛ̀n annànwɔrɛ mɛ̀n le: Ɛyri lɔ fɛn léyi yɛ lɛ dɔ́ Ɛmɛẅi ankà ankrànkràn lɔ ɛnhibù wú nɔn, ɛnnyɔnwrɔn ndɔ lɔ yɛ lɛ dɔ́ eci léyi nɛ̀n hán nɔn hɩ ankà.”
Zhüda ke ji kɛ̀ hɛ́ Zhezü Ɔwɔ-cice-bɔ̀ cüìcüì hɔ̀n yri
(Nyɛ́n nyan Matie 26:14-16; mán Lükɛ̀n 22:3-6 wrú lɔ mɛ̀n)
10Zɛtɛn Zhüda Iskariɔtɛ̀n, nɛ̀n dú Zhezü sɛ̀nkɛn-bɔ̀ ɛvà-anhyrɛ̀ lɔ ɔtɔ̀n; nɛ́n hɔ̀n nɛ́n dɔ́ Ɔwɔ-cice-bɔ̀ cüìcüì hɔ̀n lɔ le: “Mɛ lɛ ẅɛn Zhezü mɛ̀n tán nyɛ̀n.” 11Ɔwɔ-cice-bɔ̀ cüìcüì hɔ̀n yá ankà ndɔ lɔ kɩ kɛ brá pɔ̀püɛ̀; yɔ wá Zhüda ɔmùan le yɔ lɛ tán nɛ̀n ɔkùa. Kɩ Zhüda bukru ke ji ɛyri ô kɛ̀ ẅɛn Zhezü kɛ̀ tán yɔ.
Zhezü mán n'ɛsɛ̀nkɛn-bɔ̀ mɛhi kɛ nyanmán abùtùkumɛ́n-kɔ́ bì lɔ
(Nyɛ́n nyan Matie 26:17-25; Lükɛ̀n 22:7-14; mán Zhan 13:21-30 wrú lɔ mɛ̀n)
12Ɛnbì zri bì léyi yɛ nyanmán abùtùkumɛ́n-kɔ́, hɩ ye wri kɔ̀kɔ̀sɛ̀ ẅì hɔ̀n yɛ gbrɛ́ Ɛẅɛnwrɔn-bemɛ̀n-cì ci-zî nɔn, Zhezü sɛ̀nkɛn-bɔ̀ ke yrɛ nɛ̀n le: “Tɛyri de e ji le bɔ̀ hɔ̀n bɔ̀ gbrɛ́ Ɛẅɛnwrɔn-bemɛ̀n-cì ci-zî lɔ nɛ́n?” 13Zɛtɛn Zhezü wá n'ɛsɛ̀nkɛn-bɔ̀ lɔ anwrɔn anhyrɛ̀ ɔkɔ̀hɔ̀n, kɩ kɛ dɔ́ yɔ le: “Nyɛ́n hɔ́n anmàn, nyɛ́n lɛ srɔ́n ɔwrɔn tɔ̀n ɛsù, nɛ̀n wɔrɔ ɛnshi-sî. Nyɛ́n kɛ́n nɛ̀n ɛsɛ̀n nyɛ́n hɔ̀n, 14nyɛ́n bru ebɩ́ léyi ne bru ɛmɛ̀n nɔn, ô nyɛ́n dɔ́ ebɩ́-nɛ́n-zi le: ‘Ankà-yé-wrɔn ke yrɛ le: M'ɔwɔn towà, ɛyri léyi mɛ̀n mán m'ɛsɛ̀nkɛn-bɔ̀ mɛhi bɔ́ lɛ nyanmán Ɛẅɛnwrɔn-bemɛ̀n-cì ci-zî lɔ nɛ́n?’ 15Kɩ ne le ye nyɛ̀n ɔwɔn léyi dú ɛwú n'ɔwɔndà vri léyi krɔn kpehɛ́n hɩ mán ɛci hɔ̀n lɔ fɛn mɛhi. Nanvrɛn lɔ de nyɛ lɛ gbrɛ́ ɛci-zî lɔ nɔn.” 16Zhezü sɛ̀nkɛn-bɔ̀ lɔ hɔ́n anmàn kɩ yɔ cɔ́ eci lɔ fɛn krɔn kpehɛ́n, hán ɔmu le Zhezü dɔ́ yɔ nɔn; kɩ yɔ gbrɛ́ Ɛẅɛnwrɔn-bemɛ̀n-cì ci-zî.
17Ɛnvra léyi ɔwɔɛmɛ̀n ncɔ̀ nɔn, Zhezü mán n'ɛsɛ̀nkɛn-bɔ̀ ɛvà-anhyrɛ̀ hɔ̀n lɔ nvà. 18Ɛnvra léyi yɔ yɛ́ tɛbrɛ̀ wú yɔ zî ɛci nɔn, Zhezü kɛ dɔ̀ le: “Annànwɔrɛ mɛ̀n mɛ dɔ́ nyɛ̀n le: ny'ɛmɛ̀n lɔ, ɔwrɔn tɔ̀n léyi nɛ́n mɛhi bɔ́ zî ɛci nɔn kɛ lɛ hɛ́ mɛ̀n.” 19Zhezü sɛ̀nkɛn-bɔ̀ lɔ ɛnhyɔ̀bɔ̀ cɔ̀, kɩ ɔwrɔn zri zri ke yrɛ nɛ̀n le: “E nyrì le kè sɩ̀ dù mɛ̀n hàn?” 20Zhezü mrɛ́n yɔ ɔmùan le: “Ny'ɛmɛ̀n lɔ ɔwrɔn tɔ̀n, nyɛ́n, anwrɔn ɛvà-anhyrɛ̀ lɔ, ɔwrɔn léyi nɛ́n mán mɛ̀n mɛhi bɔ́ wá abùtùkumɛ́n ɛyri zri nɔn. 21Ankàẅì, Ɔwrɔnẅì Ẅì ke le wù hán ɔmu le Ɛwrú Prɔnprɔn hɔ̀n merɛ́n n'ɛwú nɔn; tɛ́n muzhie dú tán ɔwrɔn léyi ke lɛ hɛ́ Ɔwrɔnẅì Ẅì nɔn! Zrɔ tán le nɛ́n ɔwrɔn ndɔ lɔ ye bɩ́ bî nɛ̀n!”
Ɛẅɛnwrɔn ci-zî prɔnprɔn
(Nyɛ́n nyan Matie 26:26-30; mán Lükɛ̀n 22:15-20 wrú lɔ mɛ̀n)
22Ɛci-zî vra lɔ, Zhezü bɩ́ abùtùkumɛ́n, kɩ ɛnvra léyi nɛ̀n tán Ɔwɔ ɔkùɛn nɔn, nɛ̀n voyan abùtùkumɛ́n lɔ nɛ̀n tán n'ɛsɛ̀nkɛn-bɔ̀ kɩ nɛ dɔ́ yɔ le: “Nyɛ́n bɩ nyɛ́n rá, ndɔ lɔ dú m'edùwrú.”
23Nɛ̀n vru nɛ̀n bɩ́ ɛntàn grashɛ̀n kɩ ɛnvra léyi nɛ̀n tán Ɔwɔ ɔkuɛn nɔn, nɛ̀n tán n'ɛsɛ̀nkɛn-bɔ̀, kɩ yɔ lɔ fɛn yɔ mì. 24Zhezü kɛ dɔ́ yɔ le: “Ndɔ lɔ dú m'ɛnkrɛ̀, ɛnkrɛ̀ léyi dú mìrɛ̀n wrù krɛ̀, hɩ ke le cüe anwrɔn bobrebe kruhú nɔn. 25Mɛ dɔ́ nyɛ̀n annànwɔrɛ mɛ̀n le: Mɛ́n sɩ̀ vru mi ɛntàn ndɔ lɔ mrìmrì hàn kɩ kɛ lɛ cɔ́ ɛnvra léyi mɛ lɛ vru mɛ̀n mi ɛntàn wrù Anhobɩ́ Nɛ̀ncüì-dúyri nɔn.” 26Yɔ lɔ fɛn yɔ krɛ́ ɔkoran cɔ̀, kɩ yɔ hɔ́n ɛẅì-shi-tɛ̀ kɛ̀tɛ̀ léyi ye bi Olivie hɩ dú ɛnkpò wú nɔn n'ɛkɛ̀tɛ lɔ mɛ̀n.
Zhezü kɛ dɔ̀ le Piɛrɛ̀n kɛ lɛ crɔn ɔmùan n'ɛtɛ̀sɛ̀n
(Nyɛ́n nyan Matie 26:31-35; Lükɛ̀n 22:31-34; mán Zhan 13:36-38 wrú lɔ mɛ̀n)
27Zhezü kɛ dɔ́ n'ɛsɛ̀nkɛn-bɔ̀ le: “Nyɛ lɔ fɛn lɔ nyɛ lɛ srɛ́ nye le teze mɛ̀n; ɔmuhi Ɛwrú Prɔnprɔn hɔ̀n merɛ́n dɔ̀ le: ‘Mɛ lɛ wri kɔ̀kɔ̀sɛ̀ kua-wrɔn lɔ kɩ kɔ̀kɔ̀sɛ̀ hɔ̀n lɔ fɛn kɛ lɛ bonyì.’ 28Tɛ́n Zhezü vru kɛ dɔ̀ le: Ɛnvra léyi me le dú owúemɛ̀n mɛ̀n frɔ́ nɔn, mɛ lɛ hɔ́n Galile kpɔsɔ wú mɛ̀n vrá nyɛ̀n.” 29Piɛrɛ̀n kɛ dɔ́ nɛ̀n le: “Ke dú kɛ anwrɔn lɔ fɛn kɛ srɛ́ ke teze mɛ́n hô, mɛ tɛn mɛ́n sɩ̀ teze mɛ́n.” 30Zɛtɛn Zhezü mrɛ́n Piɛrɛ̀n ɔmùan le: “Mɛ dɔ́ mɛ́n annànwɔrɛ mɛ̀n le: ɛnyɔncì lɔ, ɛnnyran ndɔ lɔ mɛ̀n, ɔkɔ̀sɔ̀ ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le è sɩ̀ nyri mɛ̀n.” 31Tɛ́n Piɛrɛ̀n vru mrɛ́n ɔmùan ecüìemɛ̀n le: “Mɛ́n sɩ̀ crɔn ɔmùan mrìmrì le mɛ̀n sɩ̀ nyrì mɛ́n; ke dú kɛ owù dú ɛmɛ̀n hô, mɛ̀n mán vɛ́n mɛhi bɔ́ le wù.” Kɩ n'ɛsɛ̀nkɛn-bɔ̀ lɔ fɛn kɛ dɔ́ ankà zri lɔ.
Zhezü kɛ sɛ́n Ɔwɔ ɛnzhì-brɔrɛ-yri léyi ye bi “Gɛtsemane” nɔn
(Nyɛ́n nyan Matie 26:36-46; mán Lükɛ̀n 22:39-46 wrú lɔ mɛ̀n)
32Zhezü mán n'ɛsɛ̀nkɛn-bɔ̀ cɔ́ ɛyri léyi ye bi “Gɛtsemane”, kɩ Zhezü kɛ dɔ́ n'ɛsɛ̀nkɛn-bɔ̀ le: “Nyɛ́n yɛ́ ɛnu lɔ, mɛ hɔ̀n mɛ̀n sɛ́n Ɔwɔ.” 33Zɛtɛn Zhezü bɩ́ Piɛrɛ̀n, Zhakɛ̀n mán Zhan hɔ́n Ɔwɔ-sɛ́n-yri. Ɛnjansù mán gbɔ̀gbɔ̀ ku nɛ̀n edù, 34kɩ nɛ dɔ́ yɔ le: “M'ɛnbɔrɛ lɔ ɛnhyɔ̀bɔ̀ cɔ̀ hàn mán owúemɛ̀n; nyɛ́n yɛ́ ɛnu lɔ, ô nyɛ́n kpri ɛvɛ̀.” 35Zhezü sɔnba ɔhɔnán esùshe, bore ɛnhibɩ́ kɩ nɛ sɛ̀n, ô ke dú kɛ ɛkɔrɛ̀levri ke le dù hô, wacɛ̀n ndɔ lɔ n'ɛgbànkàn kɛ̀ vɔ́n nɛ̀n ɛwú. 36Kɩ nɛ dɔ̀ le: “Ô mɛ́n Dade, ɛ̀ ẅɛn eci lɔ fɛn kɔrɛ̀levri; ɛ̀ hán ejüezì gbànkàn grashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn kè sɩ̀ dù hɩ le me ji nɔn, tɛ́n hɩ le e ji nɔn.” 37Zhezü vru ɛmɛẅi vá cɔ́ n'ɛsɛ̀nkɛn-bɔ̀ anhɔ̀n lɔ dú ndà dá mɛ̀n. Nɛ dɔ́ Piɛrɛ̀n le: “Simɔn, ndà ɛ dà? È sɩ̀ kprì ɛvɛ̀ rɔa wacɛ̀n zri mán hán? 38Nyɛ́n kpri ɛvɛ̀, nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀nnyan mɛ̀n. Ɔwrɔnẅì hɛ́n ẅɛn biakpá, tɛ́n n'edùwrú ẅɛn ɛjɛ̀.”
39Zhezü vru sɔnba ɔhɔnán kɩ kɛ sɛ́n Ɔwɔ-sɛ̀n zri lɔ. 40Zɛtɛn nɛ̀n vru ɛmɛẅi nɛ́n và cɔ́ n'ɛsɛ̀nkɛn-bɔ̀ cüe kɛ di ndà, yɔ sɩ́ gbɛ́ anvɛ̀ rɔ́a. Kɩ yɔ sɩ́ nyri ankà léyi yɛ lɛ dɔ́ nɛ̀n nɔn. 41Ɛnvra léyi Zhezü vru vá andɛ̀n-anhɔnmɛ̀n nɔn, nɛ dɔ́ yɔ le: “Nyɛ́n vru nyɛ di ndà kɩ nyɛ wrɔncüe hɛ̀? Kɛ hán vrán! Wacɛ̀n cɔ̀a. Nyɛ́n nyan, ye le bɩ́ Ɔwrɔnẅì Ẅì yɛ wá ɛgbàn-hán-bɔ̀ antamɛ̀n. 42Nyɛ́n tɔhú, bɔ̀ hɔ́n nyɛ̀n! Nyɛ́n nyan, ɔwrɔn léyi kɛ hɛ́ mɛ̀n nɔn dú ɛnu lɔ!”
Zhezü ẅɛn vra
(Nyɛ́n nyan Matie 26:47-56; Lükɛ̀n 22:47-53; mán Zhan 18:3-12 wrú lɔ mɛ̀n)
43Zhezü dú ankà-dɔ́ mɛ̀n kɩ Zhüda srɔ; nɛ̀n dú Zhezü sɛ̀nkɛn-bɔ̀ lɔ ɔtɔ̀n. Fɛcüè tɔ̀n dú nɛ̀n ɛtɛ̀sɛ̀n anhà-kɔ́n-nyan mán antɛ̀ dú yɔ antamɛ̀n. Ɔwɔ-cice-bɔ̀ cüìcüì hɔ̀n, ɛnyànmàn-gbànvri-ankà-yé-bɔ̀, mán ɛcüìcüì-bɔ̀ de wá yɔ ɔkɔ̀hɔ̀n nɔn. 44Zhüda léyi kɛ lɛ ẅɛn Zhezü kɛ̀ tán yɔ nɔn, dɔ́ yɔ ɔmu le nɛ lɛ hán nɔn, kɩ nɛ dɔ́ yɔ le: “Ɔwrɔn léyi mɛ lɛ wá angbàmɛ̀n nɔn, nɛ́n de nye ji nɛ̀n nɔn. Nyɛ́n ẅɛn nɛ̀n ô nyɛ́n wá nɛ̀n esùva anvrɛnvrɛn.” 45Ɛnvra léyi Zhüda và nɔn, nɛ́n sɔnba Zhezü ɛtɛ̀sɛ̀n kɩ nɛ dɔ́ yi le: “Ankà-yé-wrɔn!” Zɛtɛn nɛ̀n wá yi angbàmɛ̀n. 46Anwrɔn ndɔ hɔ̀n ku nɛ̀n ankɔrɛ̀ ɛwú kɩ yɔ ẅɛn nɛ̀n. 47Tɛ́n Zhezü sɛ̀nkɛn-bɔ̀ lɔ ɔtɔ̀n bɩ́ anhà-kɔ́n-nyan wí ecice-wrɔn cüìcüì ci-bɩtan-wrɔn lɔ nukù. 48Zhezü kɛ dɔ́ yɔ le: “Anhà-kɔ́n-nyan mán antɛ̀ de nyɛ́n bɩ nyɛ vá mɛ̀n ɛẅɛn-yri, hán le ɛci-gbàngbàn-hán-wrɔn tɔ̀n de dú mɛ̀n nɔn nɛ́n? 49Ɛnbì lɔ fɛn, mɛ̀n dú nyɛ̀n ɛmɛ̀n, me yé nyɛ̀n ankà Ɔwɔ-cice-wɔn lɔ mɛ̀n, kɩ nyɛ́n sɩ̀ ẅɛn mɛ̀n. Tɛ́n eci léyi Ɛwrú Prɔnprɔn hɔ̀n merɛ́n dɔ̀ nɔn, ke ji le kɛ̀ kɛ̀ sá nmù.” 50Zɛtɛn n'ɛsɛ̀nkɛn-bɔ̀ lɔ fɛn srɛ́ teze nɛ̀n. 51Sugban-ẅì tɔ̀n murɛ́n ɛwú-dɛ́-ci dú Zhezü ɛmɛẅi. Kɩ ye ji yɛ ẅɛn nɛ̀n, 52tɛ́n nɛ́n tɛ̀kɛ́n yɔ ɛwú-dɛ́-ci lɔ, nɛ̀n srɛ́ ɛsɛ̀n kora.
Ye sɩ́ Zhezü ankà-dɔ̀-trɔ-bɔ̀ zìwú
(Nyɛ́n nyan Matie 26:57-68; Lükɛ̀n 22:54-55,63-71; mán Zhan 18:13-14,19-24 wrú lɔ mɛ̀n)
53Ye bɩ́ Zhezü yɔ hɔ́n ecice-bɔ̀ wrɔn cüìcüì yri; nanvrɛn lɔ ɛcice-bɔ̀ cüìcüì, ɛcüìcüì-bɔ̀ mán ɛnyànmàn-gbànvri-ankà-yé-bɔ̀ bɔrɛkru. 54Piɛrɛ̀n dú Zhezü ɛmɛẅi esù she mɛ̀n, kɩ nɛ̀n bru ecice-wrɔn cüìcüì yri ɛbemɛ̀n. Nanvrɛn lɔ nɛ̀n yɛ́ gɔliɛ-bɔ̀ ɛtɛ̀sɛ̀n nɛ yɩ́ ɛnhyà.
55Ɛcice-bɔ̀ cüìcüì mán ankà-dɔ̀-trɔ-bɔ̀ ke ji ɛyri ô ye di Zhezü owúemɛ̀n, tɛ́n yɔ sɩ́ cɔ́ ɛgbàn léyi nɛ̀n hán nɔn. 56Anwrɔn bobrebe kɛ ẅɛn ɔyɔ̀n ke ku Zhezü ɛwú, tɛ́n yɔ lɔ fɛn ɔmùan ke sɩ́ krɔn yɔ. 57Ndɔ hɔ̀n tɔhú kɛ ẅɛn ɔyɔ̀n vri tɔ̀n kɩ kɛ dɔ̀ le: 58“Bɔ̀ yá nɛ̀n ɔmùan nɛ dɔ̀ le: ‘Me le gbé ɔwɔ-cice-wɔn léyi anwrɔnẅì nkù nɔn, kɩ ɛbi-anhɔ̀n granmɛ̀n me le ku ɛnyàntɛn léyi ke sɩ̀ dú ɔwrɔnẅì kɔrɛ̀-ci nɔn.’ ” 59Tɛ́n ɔyɔ̀n ankà-dɔ̀ ndɔ lɔ wú, hɩ mán ɔmùan ke sɩ́ krɔn yɔ. 60Ɔwɔ-cice-bɔ̀ wrɔn cüìcüì lɔ tɔhú anwrɔn lɔ fɛn zìwú kɩ ke yrɛ Zhezü ankà: “E sɩ́ dɔ́ ankà zriɛmɛ́n? Ankà léyi anwrɔn kɛ dɔ́ ku mɛ́n ɛwú nɛ́n?” 61Tɛ́n Zhezü kɛ́n ɔmùan hɛ́n kɩ ke sɩ́ mrɛ́n ankà zriɛmɛ́n ɔmùan. Ecice-bɔ̀ wrɔn cüìcüì lɔ vru ke yrɛ nɛ̀n ankà: “Vɛ́n de e dú Ebɩdie-wrɔn, Ɔwɔ Ẅì, Ɔwɔ léyi bɔ́ mrɛ́n nɛ́n?” 62Zhezü mrɛ́n ɔmùan le: “Hɛ̀ɛ̀, mɛ̀n dú Ɔwɔ ẅì, kɩ nyɛ́n lɔ fɛn nyɛ lɛ kán ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ ezì-kɔrɛ̀a; nyɛ́n le vru nyɛ́n kán nɛ̀n anhobɩ́ wì-gbuemɛ̀n nɛ̀n và.” 63Zɛtɛn Ɔwɔ-cice-bɔ̀ wrɔn cüìcüì lɔ shá n'ɛceci hɔ̀n lɔ kɩ kɛ dɔ̀ le: “Bɔ́ sɩ́ vru ji dalɛfuɛ-di-wrɔn zriɛmɛ́n. 64Nyɛ́n yá ankà gbàngbàn léyi nɛ́n dɔ̀ nɛ̀n ku Ɔwɔ ɛwú nɔn. Anhɔntan nyɛ hán nye tro hɛ̀?” Anwrɔn lɔ fɛn kɛ dɔ̀ le, nɛ̀n hán ɛgbàn; ke ji le ye wri nɛ̀n. 65Y'ɛmɛ̀n lɔ ndɔ hɔ̀n bukru ke fɛ́ Zhezü andà anvɛmɛ̀n, yɔ bɩ́ ɛcasa yɛ vá nɛ̀n ezì kɩ yɔ sroan nɛ̀n ɛnsúgru, yɔ dɔ́ nɛ̀n le: “Dɔ́ bɔ̀, antɔn de gɔ́n mɛ́n nɛ́n?” Gɔliɛ-bɔ̀ ẅɛn Zhezü kɩ kɛ cüran nɛ̀n ansa anvɛmɛ̀n.
Piɛrɛ̀n crɔn ɔmùan Zhezü tɛ̀sɛ̀n
(Nyɛ́n nyan Matie 26:69-75; Lükɛ̀n 22:56-62; mán Zhan 18:15-18,25-27 wrú lɔ mɛ̀n)
66Piɛrɛ̀n dú ebɩ́ vriemɛ̀n, kɩ Ɔwɔ-cice-bɔ̀ wrɔn cüìcüì ci-bɩtan-hi tɔ̀n nvà. 67Nɛ̀n kán Piɛrɛ̀n yɛ́ kɛ yɩ́ ɛnhyà, nɛ́n nyan yi anvrɛnvrɛn kɩ nɛ dɔ́ yi le: “Vɛ́n mán, è dú Nazarɛtɛ̀n Zhezü sɛ̀nkɛn-wrɔn.” 68Piɛrɛ̀n kɛ wrɔn-anmanta kɩ kɛ dɔ̀ le: “Mɛ́n sɩ́ nyriɛn; mɛ́n sɩ́ yá ankà léyi e ji ɛ̀ dɔ̀ nɔn.” Zɛtɛn Piɛrɛ̀n dú ebɩ́ vriemɛ̀n srɔ, hɔ́n angbàtà mùan. [Kɩ, ɛkɔ̀sɔ̀ cüì tɔ̀n di ɛnkù.] 69Tɛ́n eci-bɩtan-hi lɔ kán nɛ̀n kɩ vru kɛ dɔ́ anwrɔn hɔ̀n léyi nyɔn nɔn le: “Ɔwrɔn ndɔ lɔ dú Zhezü tɛ̀sɛ̀n wrɔn tɔ̀n.” 70Kɩ Piɛrɛ̀n, vru kɛ wrɔn-anmanta. Ɛnvra cá vacì, anwrɔn hɔ̀n léyi nyɔn nanvrɛn lɔ nɔn vru kɛ dɔ́ Piɛrɛ̀n le: “Vɛ́n mán è dú yɔ ɛmɛ̀n, ɔmuhi ɛ dɔ́ ankà kɛ cá Galile wrɔn hɔ́ nɔn.” 71Zɛtɛn Piɛrɛ̀n bukru kɛ dɔ̀ le: “Ɔwɔ kɛ hán mɛ̀n ɛgbàn ke dú kɛ mɛ ẅɛn ɔyɔ̀n. Mɛ tán ndayi le mɛ̀n sɩ̀ nyrì ɔwrɔn ndɔ léyi nyɛ dɔ́ n'ankà nɔn.” 72Ɛnvra zri lɔ mɛ̀n ɔkɔ̀sɔ̀ cüì tɔ̀n di ɛnkù andɛ̀n-anhyrɛmɛ̀n, kɩ ankà léyi Zhezü dɔ́ Piɛrɛ̀n nɔn, bru nɛ̀n: “Ɔkɔ̀sɔ̀ cüì ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.” Zɛtɛn Piɛrɛ̀n bukru ke wú eyú.
Currently Selected:
Markɛ̀n 14: ƐAA03
Highlight
Share
Copy
Want to have your highlights saved across all your devices? Sign up or sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
Markɛ̀n 14
14
Ɛcüìcüì-bɔ̀ ke ji Zhezü ɛyri
(Nyɛ́n nyan Matie 26:1-5; Lükɛ̀n 22:1-2; mán Zhan 11:45-53 wrú lɔ mɛ̀n)
1Wɔrɔ ɛbi-anhyrɛ̀ kɛ lɛ cɔ́ Ɛẅɛnwrɔn-bemɛ̀n-cì mán abùtùkumɛ́n-kɔ́ nyànmán-bì lɔ. Ɔwɔ cice-bɔ̀ cüìcüì mán ɛnyànmàn-gbànvri-ankà-yé-bɔ̀ ke ji ɛyri ô kɛ̀ ẅɛn Zhezü ɛbán mɛ̀n ô kè wri nɛ̀n. 2Yɔ dɔ́ y'edomɛ̀n le: “Ke sɩ́ ji le bɔ̀ ẅɛn nɛ̀n ɛnyànmánbì vra lɔ, ke dú kɛ bɔ́ hán ɔmu lɔ hô, fɛcüè ke le sɩ́ n'edomɛ̀n ɛwú.”
Ɛnnyɔnwrɔn tɔ̀n ku Zhezü ɛnshi-bán ɛnkru
(Nyɛ́n nyan Matie 26:6-13; mán Zhan 12:1-8 wrú lɔ mɛ̀n)
3Zhezü dú Betani anmàn, Simɔn, kokove-wrɔn nanvrɛn ɛbemɛ̀n; ɛnvra léyi nɛ̀n yɛ́ nɛ vá ɛci-zî-yri nɔn, ɛnnyɔnwrɔn tɔ̀n bru anwɔn mɛ̀n; anhàn shishi shi-bán dú nɛ̀n antamɛ̀n. Kɩ nɛ̀n vɔ́n ɛnshi-bán lɔ ɔmùan nɛ̀n ku Zhezü ɛnkruemɛ̀n. 4Anwrɔn hɔ̀n léyi dú nanvrɛn nɔn, ke bɩ́ ɛmɛ̀nhyì kɩ kɛ dɔ́ y'edomɛ̀n le: “Ɛnshi-bán jrɛ́ kɛ? 5Ɛnshi-bán ndɔ lɔ yɛ lɛ hɛ́ nɛ̀n koprɛ̀ ɛkoẅi-ɛvà-ɛnrì, ô ye bɩ́ n'ɔkùa lɔ yɛ tán ɛmian-bɔ̀!” Kɩ yɔ lɔ fɛn yɛ dɔ́ ankà gbàngbàn ku ɛnnyɔnwrɔn lɔ ɛwú. 6Tɛ́n Zhezü kɛ dɔ̀ le: “Nyɛ́n teze nɛ̀n. Cɛci kruhú kɛ nye di nɛ̀n ejüɛ? Eci léyi nɛ̀n hán nɛ̀n tán mɛ̀n nɔn zrɔ. 7Ɔmuhi ɛnvra lɔ fɛn nyɛ lɛ cɔ́ ɛmian-bɔ̀, ô nyɛ́n hán yɔ anvrɛn ɛnvra totɔtɔ̀n léyi nye ji nɔn; mɛ tɛn, mɛ́n sɩ̀ dú nyɛ̀n ɛmɛ̀n ɛnvra lɔ fɛn. 8Ɛnnyɔnwrɔn lɔ hán eci léyi n'ɛkɔrɛ̀ ncɔ̀ nɔn; nɛ̀n ku mɛ̀n ɛnshi-bán edomɛ̀n ô m'edùwrú lɔ kè nyrì dɛ́ ezhe-nànmàn mɛ̀n. 9Mɛ dɔ́ nyɛ̀n annànwɔrɛ mɛ̀n le: Ɛyri lɔ fɛn léyi yɛ lɛ dɔ́ Ɛmɛẅi ankà ankrànkràn lɔ ɛnhibù wú nɔn, ɛnnyɔnwrɔn ndɔ lɔ yɛ lɛ dɔ́ eci léyi nɛ̀n hán nɔn hɩ ankà.”
Zhüda ke ji kɛ̀ hɛ́ Zhezü Ɔwɔ-cice-bɔ̀ cüìcüì hɔ̀n yri
(Nyɛ́n nyan Matie 26:14-16; mán Lükɛ̀n 22:3-6 wrú lɔ mɛ̀n)
10Zɛtɛn Zhüda Iskariɔtɛ̀n, nɛ̀n dú Zhezü sɛ̀nkɛn-bɔ̀ ɛvà-anhyrɛ̀ lɔ ɔtɔ̀n; nɛ́n hɔ̀n nɛ́n dɔ́ Ɔwɔ-cice-bɔ̀ cüìcüì hɔ̀n lɔ le: “Mɛ lɛ ẅɛn Zhezü mɛ̀n tán nyɛ̀n.” 11Ɔwɔ-cice-bɔ̀ cüìcüì hɔ̀n yá ankà ndɔ lɔ kɩ kɛ brá pɔ̀püɛ̀; yɔ wá Zhüda ɔmùan le yɔ lɛ tán nɛ̀n ɔkùa. Kɩ Zhüda bukru ke ji ɛyri ô kɛ̀ ẅɛn Zhezü kɛ̀ tán yɔ.
Zhezü mán n'ɛsɛ̀nkɛn-bɔ̀ mɛhi kɛ nyanmán abùtùkumɛ́n-kɔ́ bì lɔ
(Nyɛ́n nyan Matie 26:17-25; Lükɛ̀n 22:7-14; mán Zhan 13:21-30 wrú lɔ mɛ̀n)
12Ɛnbì zri bì léyi yɛ nyanmán abùtùkumɛ́n-kɔ́, hɩ ye wri kɔ̀kɔ̀sɛ̀ ẅì hɔ̀n yɛ gbrɛ́ Ɛẅɛnwrɔn-bemɛ̀n-cì ci-zî nɔn, Zhezü sɛ̀nkɛn-bɔ̀ ke yrɛ nɛ̀n le: “Tɛyri de e ji le bɔ̀ hɔ̀n bɔ̀ gbrɛ́ Ɛẅɛnwrɔn-bemɛ̀n-cì ci-zî lɔ nɛ́n?” 13Zɛtɛn Zhezü wá n'ɛsɛ̀nkɛn-bɔ̀ lɔ anwrɔn anhyrɛ̀ ɔkɔ̀hɔ̀n, kɩ kɛ dɔ́ yɔ le: “Nyɛ́n hɔ́n anmàn, nyɛ́n lɛ srɔ́n ɔwrɔn tɔ̀n ɛsù, nɛ̀n wɔrɔ ɛnshi-sî. Nyɛ́n kɛ́n nɛ̀n ɛsɛ̀n nyɛ́n hɔ̀n, 14nyɛ́n bru ebɩ́ léyi ne bru ɛmɛ̀n nɔn, ô nyɛ́n dɔ́ ebɩ́-nɛ́n-zi le: ‘Ankà-yé-wrɔn ke yrɛ le: M'ɔwɔn towà, ɛyri léyi mɛ̀n mán m'ɛsɛ̀nkɛn-bɔ̀ mɛhi bɔ́ lɛ nyanmán Ɛẅɛnwrɔn-bemɛ̀n-cì ci-zî lɔ nɛ́n?’ 15Kɩ ne le ye nyɛ̀n ɔwɔn léyi dú ɛwú n'ɔwɔndà vri léyi krɔn kpehɛ́n hɩ mán ɛci hɔ̀n lɔ fɛn mɛhi. Nanvrɛn lɔ de nyɛ lɛ gbrɛ́ ɛci-zî lɔ nɔn.” 16Zhezü sɛ̀nkɛn-bɔ̀ lɔ hɔ́n anmàn kɩ yɔ cɔ́ eci lɔ fɛn krɔn kpehɛ́n, hán ɔmu le Zhezü dɔ́ yɔ nɔn; kɩ yɔ gbrɛ́ Ɛẅɛnwrɔn-bemɛ̀n-cì ci-zî.
17Ɛnvra léyi ɔwɔɛmɛ̀n ncɔ̀ nɔn, Zhezü mán n'ɛsɛ̀nkɛn-bɔ̀ ɛvà-anhyrɛ̀ hɔ̀n lɔ nvà. 18Ɛnvra léyi yɔ yɛ́ tɛbrɛ̀ wú yɔ zî ɛci nɔn, Zhezü kɛ dɔ̀ le: “Annànwɔrɛ mɛ̀n mɛ dɔ́ nyɛ̀n le: ny'ɛmɛ̀n lɔ, ɔwrɔn tɔ̀n léyi nɛ́n mɛhi bɔ́ zî ɛci nɔn kɛ lɛ hɛ́ mɛ̀n.” 19Zhezü sɛ̀nkɛn-bɔ̀ lɔ ɛnhyɔ̀bɔ̀ cɔ̀, kɩ ɔwrɔn zri zri ke yrɛ nɛ̀n le: “E nyrì le kè sɩ̀ dù mɛ̀n hàn?” 20Zhezü mrɛ́n yɔ ɔmùan le: “Ny'ɛmɛ̀n lɔ ɔwrɔn tɔ̀n, nyɛ́n, anwrɔn ɛvà-anhyrɛ̀ lɔ, ɔwrɔn léyi nɛ́n mán mɛ̀n mɛhi bɔ́ wá abùtùkumɛ́n ɛyri zri nɔn. 21Ankàẅì, Ɔwrɔnẅì Ẅì ke le wù hán ɔmu le Ɛwrú Prɔnprɔn hɔ̀n merɛ́n n'ɛwú nɔn; tɛ́n muzhie dú tán ɔwrɔn léyi ke lɛ hɛ́ Ɔwrɔnẅì Ẅì nɔn! Zrɔ tán le nɛ́n ɔwrɔn ndɔ lɔ ye bɩ́ bî nɛ̀n!”
Ɛẅɛnwrɔn ci-zî prɔnprɔn
(Nyɛ́n nyan Matie 26:26-30; mán Lükɛ̀n 22:15-20 wrú lɔ mɛ̀n)
22Ɛci-zî vra lɔ, Zhezü bɩ́ abùtùkumɛ́n, kɩ ɛnvra léyi nɛ̀n tán Ɔwɔ ɔkùɛn nɔn, nɛ̀n voyan abùtùkumɛ́n lɔ nɛ̀n tán n'ɛsɛ̀nkɛn-bɔ̀ kɩ nɛ dɔ́ yɔ le: “Nyɛ́n bɩ nyɛ́n rá, ndɔ lɔ dú m'edùwrú.”
23Nɛ̀n vru nɛ̀n bɩ́ ɛntàn grashɛ̀n kɩ ɛnvra léyi nɛ̀n tán Ɔwɔ ɔkuɛn nɔn, nɛ̀n tán n'ɛsɛ̀nkɛn-bɔ̀, kɩ yɔ lɔ fɛn yɔ mì. 24Zhezü kɛ dɔ́ yɔ le: “Ndɔ lɔ dú m'ɛnkrɛ̀, ɛnkrɛ̀ léyi dú mìrɛ̀n wrù krɛ̀, hɩ ke le cüe anwrɔn bobrebe kruhú nɔn. 25Mɛ dɔ́ nyɛ̀n annànwɔrɛ mɛ̀n le: Mɛ́n sɩ̀ vru mi ɛntàn ndɔ lɔ mrìmrì hàn kɩ kɛ lɛ cɔ́ ɛnvra léyi mɛ lɛ vru mɛ̀n mi ɛntàn wrù Anhobɩ́ Nɛ̀ncüì-dúyri nɔn.” 26Yɔ lɔ fɛn yɔ krɛ́ ɔkoran cɔ̀, kɩ yɔ hɔ́n ɛẅì-shi-tɛ̀ kɛ̀tɛ̀ léyi ye bi Olivie hɩ dú ɛnkpò wú nɔn n'ɛkɛ̀tɛ lɔ mɛ̀n.
Zhezü kɛ dɔ̀ le Piɛrɛ̀n kɛ lɛ crɔn ɔmùan n'ɛtɛ̀sɛ̀n
(Nyɛ́n nyan Matie 26:31-35; Lükɛ̀n 22:31-34; mán Zhan 13:36-38 wrú lɔ mɛ̀n)
27Zhezü kɛ dɔ́ n'ɛsɛ̀nkɛn-bɔ̀ le: “Nyɛ lɔ fɛn lɔ nyɛ lɛ srɛ́ nye le teze mɛ̀n; ɔmuhi Ɛwrú Prɔnprɔn hɔ̀n merɛ́n dɔ̀ le: ‘Mɛ lɛ wri kɔ̀kɔ̀sɛ̀ kua-wrɔn lɔ kɩ kɔ̀kɔ̀sɛ̀ hɔ̀n lɔ fɛn kɛ lɛ bonyì.’ 28Tɛ́n Zhezü vru kɛ dɔ̀ le: Ɛnvra léyi me le dú owúemɛ̀n mɛ̀n frɔ́ nɔn, mɛ lɛ hɔ́n Galile kpɔsɔ wú mɛ̀n vrá nyɛ̀n.” 29Piɛrɛ̀n kɛ dɔ́ nɛ̀n le: “Ke dú kɛ anwrɔn lɔ fɛn kɛ srɛ́ ke teze mɛ́n hô, mɛ tɛn mɛ́n sɩ̀ teze mɛ́n.” 30Zɛtɛn Zhezü mrɛ́n Piɛrɛ̀n ɔmùan le: “Mɛ dɔ́ mɛ́n annànwɔrɛ mɛ̀n le: ɛnyɔncì lɔ, ɛnnyran ndɔ lɔ mɛ̀n, ɔkɔ̀sɔ̀ ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le è sɩ̀ nyri mɛ̀n.” 31Tɛ́n Piɛrɛ̀n vru mrɛ́n ɔmùan ecüìemɛ̀n le: “Mɛ́n sɩ̀ crɔn ɔmùan mrìmrì le mɛ̀n sɩ̀ nyrì mɛ́n; ke dú kɛ owù dú ɛmɛ̀n hô, mɛ̀n mán vɛ́n mɛhi bɔ́ le wù.” Kɩ n'ɛsɛ̀nkɛn-bɔ̀ lɔ fɛn kɛ dɔ́ ankà zri lɔ.
Zhezü kɛ sɛ́n Ɔwɔ ɛnzhì-brɔrɛ-yri léyi ye bi “Gɛtsemane” nɔn
(Nyɛ́n nyan Matie 26:36-46; mán Lükɛ̀n 22:39-46 wrú lɔ mɛ̀n)
32Zhezü mán n'ɛsɛ̀nkɛn-bɔ̀ cɔ́ ɛyri léyi ye bi “Gɛtsemane”, kɩ Zhezü kɛ dɔ́ n'ɛsɛ̀nkɛn-bɔ̀ le: “Nyɛ́n yɛ́ ɛnu lɔ, mɛ hɔ̀n mɛ̀n sɛ́n Ɔwɔ.” 33Zɛtɛn Zhezü bɩ́ Piɛrɛ̀n, Zhakɛ̀n mán Zhan hɔ́n Ɔwɔ-sɛ́n-yri. Ɛnjansù mán gbɔ̀gbɔ̀ ku nɛ̀n edù, 34kɩ nɛ dɔ́ yɔ le: “M'ɛnbɔrɛ lɔ ɛnhyɔ̀bɔ̀ cɔ̀ hàn mán owúemɛ̀n; nyɛ́n yɛ́ ɛnu lɔ, ô nyɛ́n kpri ɛvɛ̀.” 35Zhezü sɔnba ɔhɔnán esùshe, bore ɛnhibɩ́ kɩ nɛ sɛ̀n, ô ke dú kɛ ɛkɔrɛ̀levri ke le dù hô, wacɛ̀n ndɔ lɔ n'ɛgbànkàn kɛ̀ vɔ́n nɛ̀n ɛwú. 36Kɩ nɛ dɔ̀ le: “Ô mɛ́n Dade, ɛ̀ ẅɛn eci lɔ fɛn kɔrɛ̀levri; ɛ̀ hán ejüezì gbànkàn grashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn kè sɩ̀ dù hɩ le me ji nɔn, tɛ́n hɩ le e ji nɔn.” 37Zhezü vru ɛmɛẅi vá cɔ́ n'ɛsɛ̀nkɛn-bɔ̀ anhɔ̀n lɔ dú ndà dá mɛ̀n. Nɛ dɔ́ Piɛrɛ̀n le: “Simɔn, ndà ɛ dà? È sɩ̀ kprì ɛvɛ̀ rɔa wacɛ̀n zri mán hán? 38Nyɛ́n kpri ɛvɛ̀, nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀nnyan mɛ̀n. Ɔwrɔnẅì hɛ́n ẅɛn biakpá, tɛ́n n'edùwrú ẅɛn ɛjɛ̀.”
39Zhezü vru sɔnba ɔhɔnán kɩ kɛ sɛ́n Ɔwɔ-sɛ̀n zri lɔ. 40Zɛtɛn nɛ̀n vru ɛmɛẅi nɛ́n và cɔ́ n'ɛsɛ̀nkɛn-bɔ̀ cüe kɛ di ndà, yɔ sɩ́ gbɛ́ anvɛ̀ rɔ́a. Kɩ yɔ sɩ́ nyri ankà léyi yɛ lɛ dɔ́ nɛ̀n nɔn. 41Ɛnvra léyi Zhezü vru vá andɛ̀n-anhɔnmɛ̀n nɔn, nɛ dɔ́ yɔ le: “Nyɛ́n vru nyɛ di ndà kɩ nyɛ wrɔncüe hɛ̀? Kɛ hán vrán! Wacɛ̀n cɔ̀a. Nyɛ́n nyan, ye le bɩ́ Ɔwrɔnẅì Ẅì yɛ wá ɛgbàn-hán-bɔ̀ antamɛ̀n. 42Nyɛ́n tɔhú, bɔ̀ hɔ́n nyɛ̀n! Nyɛ́n nyan, ɔwrɔn léyi kɛ hɛ́ mɛ̀n nɔn dú ɛnu lɔ!”
Zhezü ẅɛn vra
(Nyɛ́n nyan Matie 26:47-56; Lükɛ̀n 22:47-53; mán Zhan 18:3-12 wrú lɔ mɛ̀n)
43Zhezü dú ankà-dɔ́ mɛ̀n kɩ Zhüda srɔ; nɛ̀n dú Zhezü sɛ̀nkɛn-bɔ̀ lɔ ɔtɔ̀n. Fɛcüè tɔ̀n dú nɛ̀n ɛtɛ̀sɛ̀n anhà-kɔ́n-nyan mán antɛ̀ dú yɔ antamɛ̀n. Ɔwɔ-cice-bɔ̀ cüìcüì hɔ̀n, ɛnyànmàn-gbànvri-ankà-yé-bɔ̀, mán ɛcüìcüì-bɔ̀ de wá yɔ ɔkɔ̀hɔ̀n nɔn. 44Zhüda léyi kɛ lɛ ẅɛn Zhezü kɛ̀ tán yɔ nɔn, dɔ́ yɔ ɔmu le nɛ lɛ hán nɔn, kɩ nɛ dɔ́ yɔ le: “Ɔwrɔn léyi mɛ lɛ wá angbàmɛ̀n nɔn, nɛ́n de nye ji nɛ̀n nɔn. Nyɛ́n ẅɛn nɛ̀n ô nyɛ́n wá nɛ̀n esùva anvrɛnvrɛn.” 45Ɛnvra léyi Zhüda và nɔn, nɛ́n sɔnba Zhezü ɛtɛ̀sɛ̀n kɩ nɛ dɔ́ yi le: “Ankà-yé-wrɔn!” Zɛtɛn nɛ̀n wá yi angbàmɛ̀n. 46Anwrɔn ndɔ hɔ̀n ku nɛ̀n ankɔrɛ̀ ɛwú kɩ yɔ ẅɛn nɛ̀n. 47Tɛ́n Zhezü sɛ̀nkɛn-bɔ̀ lɔ ɔtɔ̀n bɩ́ anhà-kɔ́n-nyan wí ecice-wrɔn cüìcüì ci-bɩtan-wrɔn lɔ nukù. 48Zhezü kɛ dɔ́ yɔ le: “Anhà-kɔ́n-nyan mán antɛ̀ de nyɛ́n bɩ nyɛ vá mɛ̀n ɛẅɛn-yri, hán le ɛci-gbàngbàn-hán-wrɔn tɔ̀n de dú mɛ̀n nɔn nɛ́n? 49Ɛnbì lɔ fɛn, mɛ̀n dú nyɛ̀n ɛmɛ̀n, me yé nyɛ̀n ankà Ɔwɔ-cice-wɔn lɔ mɛ̀n, kɩ nyɛ́n sɩ̀ ẅɛn mɛ̀n. Tɛ́n eci léyi Ɛwrú Prɔnprɔn hɔ̀n merɛ́n dɔ̀ nɔn, ke ji le kɛ̀ kɛ̀ sá nmù.” 50Zɛtɛn n'ɛsɛ̀nkɛn-bɔ̀ lɔ fɛn srɛ́ teze nɛ̀n. 51Sugban-ẅì tɔ̀n murɛ́n ɛwú-dɛ́-ci dú Zhezü ɛmɛẅi. Kɩ ye ji yɛ ẅɛn nɛ̀n, 52tɛ́n nɛ́n tɛ̀kɛ́n yɔ ɛwú-dɛ́-ci lɔ, nɛ̀n srɛ́ ɛsɛ̀n kora.
Ye sɩ́ Zhezü ankà-dɔ̀-trɔ-bɔ̀ zìwú
(Nyɛ́n nyan Matie 26:57-68; Lükɛ̀n 22:54-55,63-71; mán Zhan 18:13-14,19-24 wrú lɔ mɛ̀n)
53Ye bɩ́ Zhezü yɔ hɔ́n ecice-bɔ̀ wrɔn cüìcüì yri; nanvrɛn lɔ ɛcice-bɔ̀ cüìcüì, ɛcüìcüì-bɔ̀ mán ɛnyànmàn-gbànvri-ankà-yé-bɔ̀ bɔrɛkru. 54Piɛrɛ̀n dú Zhezü ɛmɛẅi esù she mɛ̀n, kɩ nɛ̀n bru ecice-wrɔn cüìcüì yri ɛbemɛ̀n. Nanvrɛn lɔ nɛ̀n yɛ́ gɔliɛ-bɔ̀ ɛtɛ̀sɛ̀n nɛ yɩ́ ɛnhyà.
55Ɛcice-bɔ̀ cüìcüì mán ankà-dɔ̀-trɔ-bɔ̀ ke ji ɛyri ô ye di Zhezü owúemɛ̀n, tɛ́n yɔ sɩ́ cɔ́ ɛgbàn léyi nɛ̀n hán nɔn. 56Anwrɔn bobrebe kɛ ẅɛn ɔyɔ̀n ke ku Zhezü ɛwú, tɛ́n yɔ lɔ fɛn ɔmùan ke sɩ́ krɔn yɔ. 57Ndɔ hɔ̀n tɔhú kɛ ẅɛn ɔyɔ̀n vri tɔ̀n kɩ kɛ dɔ̀ le: 58“Bɔ̀ yá nɛ̀n ɔmùan nɛ dɔ̀ le: ‘Me le gbé ɔwɔ-cice-wɔn léyi anwrɔnẅì nkù nɔn, kɩ ɛbi-anhɔ̀n granmɛ̀n me le ku ɛnyàntɛn léyi ke sɩ̀ dú ɔwrɔnẅì kɔrɛ̀-ci nɔn.’ ” 59Tɛ́n ɔyɔ̀n ankà-dɔ̀ ndɔ lɔ wú, hɩ mán ɔmùan ke sɩ́ krɔn yɔ. 60Ɔwɔ-cice-bɔ̀ wrɔn cüìcüì lɔ tɔhú anwrɔn lɔ fɛn zìwú kɩ ke yrɛ Zhezü ankà: “E sɩ́ dɔ́ ankà zriɛmɛ́n? Ankà léyi anwrɔn kɛ dɔ́ ku mɛ́n ɛwú nɛ́n?” 61Tɛ́n Zhezü kɛ́n ɔmùan hɛ́n kɩ ke sɩ́ mrɛ́n ankà zriɛmɛ́n ɔmùan. Ecice-bɔ̀ wrɔn cüìcüì lɔ vru ke yrɛ nɛ̀n ankà: “Vɛ́n de e dú Ebɩdie-wrɔn, Ɔwɔ Ẅì, Ɔwɔ léyi bɔ́ mrɛ́n nɛ́n?” 62Zhezü mrɛ́n ɔmùan le: “Hɛ̀ɛ̀, mɛ̀n dú Ɔwɔ ẅì, kɩ nyɛ́n lɔ fɛn nyɛ lɛ kán ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ ezì-kɔrɛ̀a; nyɛ́n le vru nyɛ́n kán nɛ̀n anhobɩ́ wì-gbuemɛ̀n nɛ̀n và.” 63Zɛtɛn Ɔwɔ-cice-bɔ̀ wrɔn cüìcüì lɔ shá n'ɛceci hɔ̀n lɔ kɩ kɛ dɔ̀ le: “Bɔ́ sɩ́ vru ji dalɛfuɛ-di-wrɔn zriɛmɛ́n. 64Nyɛ́n yá ankà gbàngbàn léyi nɛ́n dɔ̀ nɛ̀n ku Ɔwɔ ɛwú nɔn. Anhɔntan nyɛ hán nye tro hɛ̀?” Anwrɔn lɔ fɛn kɛ dɔ̀ le, nɛ̀n hán ɛgbàn; ke ji le ye wri nɛ̀n. 65Y'ɛmɛ̀n lɔ ndɔ hɔ̀n bukru ke fɛ́ Zhezü andà anvɛmɛ̀n, yɔ bɩ́ ɛcasa yɛ vá nɛ̀n ezì kɩ yɔ sroan nɛ̀n ɛnsúgru, yɔ dɔ́ nɛ̀n le: “Dɔ́ bɔ̀, antɔn de gɔ́n mɛ́n nɛ́n?” Gɔliɛ-bɔ̀ ẅɛn Zhezü kɩ kɛ cüran nɛ̀n ansa anvɛmɛ̀n.
Piɛrɛ̀n crɔn ɔmùan Zhezü tɛ̀sɛ̀n
(Nyɛ́n nyan Matie 26:69-75; Lükɛ̀n 22:56-62; mán Zhan 18:15-18,25-27 wrú lɔ mɛ̀n)
66Piɛrɛ̀n dú ebɩ́ vriemɛ̀n, kɩ Ɔwɔ-cice-bɔ̀ wrɔn cüìcüì ci-bɩtan-hi tɔ̀n nvà. 67Nɛ̀n kán Piɛrɛ̀n yɛ́ kɛ yɩ́ ɛnhyà, nɛ́n nyan yi anvrɛnvrɛn kɩ nɛ dɔ́ yi le: “Vɛ́n mán, è dú Nazarɛtɛ̀n Zhezü sɛ̀nkɛn-wrɔn.” 68Piɛrɛ̀n kɛ wrɔn-anmanta kɩ kɛ dɔ̀ le: “Mɛ́n sɩ́ nyriɛn; mɛ́n sɩ́ yá ankà léyi e ji ɛ̀ dɔ̀ nɔn.” Zɛtɛn Piɛrɛ̀n dú ebɩ́ vriemɛ̀n srɔ, hɔ́n angbàtà mùan. [Kɩ, ɛkɔ̀sɔ̀ cüì tɔ̀n di ɛnkù.] 69Tɛ́n eci-bɩtan-hi lɔ kán nɛ̀n kɩ vru kɛ dɔ́ anwrɔn hɔ̀n léyi nyɔn nɔn le: “Ɔwrɔn ndɔ lɔ dú Zhezü tɛ̀sɛ̀n wrɔn tɔ̀n.” 70Kɩ Piɛrɛ̀n, vru kɛ wrɔn-anmanta. Ɛnvra cá vacì, anwrɔn hɔ̀n léyi nyɔn nanvrɛn lɔ nɔn vru kɛ dɔ́ Piɛrɛ̀n le: “Vɛ́n mán è dú yɔ ɛmɛ̀n, ɔmuhi ɛ dɔ́ ankà kɛ cá Galile wrɔn hɔ́ nɔn.” 71Zɛtɛn Piɛrɛ̀n bukru kɛ dɔ̀ le: “Ɔwɔ kɛ hán mɛ̀n ɛgbàn ke dú kɛ mɛ ẅɛn ɔyɔ̀n. Mɛ tán ndayi le mɛ̀n sɩ̀ nyrì ɔwrɔn ndɔ léyi nyɛ dɔ́ n'ankà nɔn.” 72Ɛnvra zri lɔ mɛ̀n ɔkɔ̀sɔ̀ cüì tɔ̀n di ɛnkù andɛ̀n-anhyrɛmɛ̀n, kɩ ankà léyi Zhezü dɔ́ Piɛrɛ̀n nɔn, bru nɛ̀n: “Ɔkɔ̀sɔ̀ cüì ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.” Zɛtɛn Piɛrɛ̀n bukru ke wú eyú.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.