Markɛ̀n 3

Ɔwrɔn léyi ɛkɔrɛ̀ wù nɔn

(Nyɛ́n nyan Matie 12:9-14; mán Lükɛ̀n 6:6-11 wrú lɔ mɛ̀n)

1Zɛtɛn, Zhezü vru hɔ́n Ɔwɔ-sɛ́n-wɔn lɔ mɛ̀n. Ɔwrɔn tɔ̀n dú nanvrɛn, ɛkɔrɛ̀ wú nɛ̀n. 2Anwrɔn hɔ̀n léyi dú nanvrɛn nɔn kɛ sɔ́n Zhezü ɛvɛ̀ ô kɛ̀ nyan ke dú kɛ nɛ lɛ kɔrɛ ɔwrɔn lɔ ɛnyànmánbì lɔ, ɔmuhi yɔ ji yɛ vra anẅìɛ yɔ tán nɛ̀n nɔn. 3Zhezü kɛ dɔ́ ɔwrɔn léyi ɛkɔrɛ̀ wù nɔn le: “Tɔhú nyɔn, ɛnu lɔ, anwrɔn lɔ fɛn zìwú.” 4Zɛtɛn, Zhezü ke yrɛ anwrɔn léyi kɛ nyan nɛ̀n nɔn le: “Ecitan de bɔ́ ɛnyànmàn lɔ kɛ wá tán nɛ́n? Zrɔ tán le ɛnyànmánbì lɔ yɛ hán anvrɛn kàle yɛ hán ɛgbàn hàn? Ye bɩ́ ɔwrɔn ye die kàle yɛ jrɛ́ nɛ̀n nɛ́n?” Tɛ́n yɔ sɩ́ ji yɔ mrɛ́n ɔmùan. 5Zhezü kɛ nyan yɔ lɔ fɛn ɛmɛ̀nhyiemɛ̀n; kɩ nɛ̀n vru nɛ̀n dú obòto mɛ̀n y'ankà-tro gbàngbàn ẅɛ̀n kruhú. Zɛtɛn nɛ dɔ́ ɛnlɔẅiɛ-wrɔn lɔ le: “Sɩ̀ v'ɛkɔrɛ̀ lɔ ezì.” Ɔwrɔn lɔ sɩ́ ɛkɔrɛ̀ ezì kɩ ɛkɔrɛ̀ lɔ wore. 6Ɔwɔ-nyànmàn-sùva-wá-bɔ̀ mán Herɔdɛ̀n sɛ̀nkɛn-bɔ̀ dú Ɔwɔ-sɛ́n-wɔn lɔ mɛ̀n srɔ ɛntrɛ kɩ ɛnvra zri lɔ borɛkru, ô yɔ dɔ́ eci léyi yɔ lɛ hán ô yɔ di Zhezü owúemɛ̀n nɔn.

Fɛcüè hɔ̀n kɛ vá cɔ́ Zhezü

7Zhezü mán n'ɛsɛ̀nkɛn-bɔ̀ mɛhi hɔ́n Galile nɛnbà cɛ gbàtà mùan kɩ anwrɔn fɛcüè kɛ kɛ́n nɛ̀n ɛsɛ̀n. Yɔ dú Galile, Zhüde, 8Zherüzalɛmɛ̀n, Idüme ɛnhi wú, Zhurdɛn màncüè mán anmàn ndɔ hɔ̀n léyi dú Tirɛ̀n mán Sidɔn tɛ̀sɛ̀n yɔ và. Fɛcüè vri ndɔ lɔ vá Zhezü ɛtɛ̀sɛ̀n ɔmuhi nɛ yá eci lɔ fɛn léyi Zhezü kɛ hán nɔn. 9Zɛtɛn Zhezü dɔ́ n'ɛsɛ̀nkɛn-bɔ̀ ke ji anhàka tɔ̀n kɛ̀ tán nɛ̀n ô fɛcüè ke bɩ́ ku nɛ̀n ɛwú kɛ bɔyɛ nɛ̀n kɛ wá. 10Ɔmuhi Zhezü kɛ kɔrɛ ɛnlɔẅiɛ-bɔ̀ bobrebe nɔn, anwrɔn hɔ̀n léyi kɛ kán ɛnlɔẅiɛ gbàn nɔn kɛ srɛ́ ku nɛ̀n ɛwú ô kɛ̀ tɛ́ nɛ̀n ɛkɔrɛ̀. 11Kɩ ɛnvra léyi anhɛ́n gbàngbàn kɛ kán nɛ̀n nɔn, yɔ bore nɛ̀n ezìwúɛ kɩ yɔ di nkù yɔ dɔ̀ le: “E dú Ɔwɔ ẅì!” 12Tɛ́n Zhezü ke fé yɔ, kɛ wá tán yɔ ɛshishiemɛ̀n, yɔ bɩ́ dɔ́ ɔwrɔn léyi dú nɛ̀n nɔn.

Zhezü mrɛ́n ɔkɔ̀hɔ̀n-wá-bɔ̀ ɛvà anhyrɛ̀ nbɩ

(Nyɛ́n nyan Matie 10:1-4; mán Lükɛ̀n 6:12-16 wrú lɔ mɛ̀n)

13Zɛtɛn Zhezü ká ɛnkpò tɔ̀n hɔ́n ɛwú; nɛ́n bi anwrɔn hɔ̀n léyi ne ji nɔn kɩ yɔ vá cɔ́ nɛ̀n. 14Nɛ̀n mrɛ́n anwrɔn ɛvà-anhyrɛ̀ nɛ́n bɩ kɩ nɛ̀n wá yɔ ebɩ́: “Ɔkɔ̀hɔ̀n-wá-bɔ̀”. Nɛ̀n mrɛ́n yɔ nɛ́n bɩ, yɔ dú nɛ̀n ɛtɛ̀sɛ̀n ô nɛ̀n wá yɔ ɔkɔ̀hɔ̀n yɔ dɔ́ anwrɔn Ɔwɔ ankà 15ô nɛ̀n tán yɔ ɛkɔrɛ̀srɔn yɔ wrɔ́ anhɛ́n gbàngbàn. 16Nyàn anwrɔn ɛvà-anhyrɛ̀ hɔ̀n léyi nɛ̀n mrɛ́n nɛ́n bɩ nɔn: Simɔn (Zhezü wá nɛ̀n ebɩ́ Piɛrɛ̀n: obù), 17Zhakɛ̀n mán nɛ́n muan-ẅì Zhan, yɔ anwrɔn anhyrɛ̀ lɔ yɔ dú Zebede ẅì hɔ̀n (Zhezü tán yɔ ebi Boanerzhɛsɛ̀n: “Yɔ dù yɔ hán ɛwú léyi ke di nkù nɔn”), 18Andre, Filipɛ̀n, Bartelemi, Matie, Toma, Zhakɛ̀n Alfe ẅì, Tade, Simɔn Kanan-wrɔn, 19mán Zhüda Iskariɔtɛ̀n, nɛ́n de nɛ̀n hɛ́ Zhezü nɔn.

Zhezü mɛ̀n mɛ̀n-bɔ̀ ke ji kè bɩ́ nɛ̀n kɛ̀ hɔ̀n

20Zɛtɛn Zhezü vru vá ɛbemɛ̀n. Fɛcüè vri tɔ̀n vru borɛkru, hán tán kɩ Zhezü mán n'ɛsɛ̀nkɛn-bɔ̀ ke sɩ́ cɔ́ ɛnvra ká zî ɛci nɔn. 21Ɛnvra léyi, n'ɛmɛ̀n mɛ̀n-bɔ̀ cɔ́ ankà lɔ yá nɔn, yɔ ku ɛnlevri ô yɔ hɔ̀n yɔ bɩ́ nɛ̀n, ɔmuhi anwrɔn kɛ dɔ̀ le: “Ɛnkruemɛ̀n jrɛ́ nɛ̀n nɔn!”

Ankà gbàngbàn léyi yɛ dɔ́ ku nɛ̀n ɛwú nɔn, hɩ wú lɔ Zhezü mrɛ́n ɔmùan

(Nyɛ́n nyan Matie 12:22-32; mán Lükɛ̀n 11:14-23; 12:10 wrú lɔ mɛ̀n)

22Ɛnyànmàn-gbànvri-ankà-yé-bɔ̀ léyi dú Zherüzalɛmɛ̀n nvá nanvrɛn lɔ nɔn kɛ dɔ̀ le: “Anwa-bɔ̀ wrɔn cüìcüì dú nɛ̀n edomɛ̀n!” Nɛ̀n ẅɛn Belzebülɛ̀n, anwa-wrɔn dú nɛ̀n edomɛ̀n! Anwrɔn janbɔ̀ kɛ dɔ̀ le: “Anhɛ́n gbàngbàn wrɔn cüìcüì de kɛ tán nɛ̀n ɛkɔrɛ̀srɔn nɛ wrɔ́ anhɛ́n ndɔ hɔ̀n lɔ nɔn!” 23Zɛtɛn Zhezü bi yɔ kɛ dɔ́ yɔ ankà nyandrɛn mɛ̀n: “Anhɔntan de anwa-wrɔn kɛ lɛ hán kɛ̀ wrɔ́ n'edomɛ̀n nɛ́n? 24Ke dú kɛ ɛnhi wú anmàn zri bɔ̀ kɛ kɔ́n y'edomɛ̀n anhà, ɛnhi wú anmàn ndɔ lɔ ke sɩ̀ vru dùɛ; 25ke dú kɛ ɛmɛ̀n zri bɔ̀, kɛ kɔ́n y'edomɛ̀n anhà, ɛmɛ̀n ndɔ lɔ ke sɩ̀ vru dùɛ. 26Zɛtɛn Ke dú kɛ anwa-wrɔn kɛ kɔ́n n'edomɛ̀n anhà, kɩ ɛsɔ̀nvɔyan ke dú nɛ̀n ɛmɛ̀n, n'ɛkɔrɛ̀srɔn lɔ ke sɩ̀ vru dùɛ, tɛ́n kɛ lɛ trɔ.”

27“Ɔwrɔnẅì zriɛmɛ́n ke sɩ̀ bru ecüì-wrɔn ɛbemɛ̀n ô kè bɩ́ n'ɛci-hɔ̀n lɔ, ke dú kɛ nɛ̀n sɩ̀ kɔra ecüì-wrɔn lɔ; tɛ́n ɛnvra léyi nɛ kɔra yi nɔn, ne le bɩ́ yi ci lɔ fɛn nɛ̀n sɔhɔ́ anwɔn mɛ̀n. 28Mɛ dɔ́ nyɛ̀n annànwɔrɛ mɛ̀n le: Anwrɔn lɔ fɛn kɛ lɛ cɔ́ ɛgbàn-bɩce y'ɛgbàn hɔ̀n mán y'ɔwra hɔ̀n lɔ fɛn wú. 29Tɛ́n ɔwrɔn léyi kɛ lɛ wɔra Ɛnhɛ́n Prɔnprɔn nɔn, nɛ́n sɩ̀ cɔ́ ɛgbàn-bɩce mrìmrì, ɔmuhi n'ɛgbàn lɔ ke le dú ɛnvra lɔ fɛn nɔn.”

30Zhezü kɛ dɔ́ yɔ ɔmu lɔ ɔmuhi yɔ dɔ̀ le: “Ɛnhɛ́n gbàngbàn dú nɛ̀n edomɛ̀n nɔn.”

Zhezü nɛ́n muan mán nɛ́n muan-ẅì hɔ̀n

(Nyɛ́n nyan Matie 12:46-50; mán Lükɛ̀n 8:19-21 wrú lɔ mɛ̀n)

31Zɛtɛn Zhezü nɛ́n muan mán nɛ́n muan-ẅì hɔ̀n nvà; yɔ nyɔn ɛntrɛ, ɔwɔn tɛ̀sɛ̀n, ɔhɔnan kɩ yɔ wá ɔwrɔn ɔkɔ̀hɔ̀n kè bi nɛ̀n. 32Anwrɔn bobrebe yɛ́ gbrɛnkɛn Zhezü ɔmùan kɩ yɔ dɔ́ nɛ̀n le: “E die nukùɛ, ɔmuan mán ɔmuan-ẅì hɔ̀n nyɔn ɛntrɛ ke ji mɛ́n.” 33Zhezü mrɛ́n ɔmùan le: “Antɔn dú nmàn, kɩ antɔn hɔ̀n de dú nmàn-ẅì hɔ̀n nɛ́n?” 34Zhezü nyan anwrɔn hɔ̀n léyi yɛ́ gbrɛnkɛn nɛ̀n ɔmùan kɩ nɛ dɔ̀ le: “Nyɛ́n nyan nmàn mán nmàn-ẅì hɔ̀n dú ɛnu lɔ. Ɔmuhi 35ɔwrɔn totɔtɔ̀n léyi kɛ hán eci léyi Ɔwɔ ke ji nɔn dú nmàn cɔnwrɔn-ẅì, nmàn nyɔnwrɔn-ẅì ɛnvra tɔ̀n hô nmàn.”

Currently Selected:

Markɛ̀n 3: ƐAA03

Highlight

Copy