Markɛ̀n 8

Zhezü tán anwrɔn tɛ̀bru-kru-anzɔ̀ ɛci-zî

(Nyɛ́n nyan Matie 15:32-39 wrú lɔ mɛ̀n)

1Hɩ vra lɔ, fɛcüè vri tɔ̀n vru bɔrɛkru. Ɔmuhi Ɛci-zî trɔ yɔ nɔn, Zhezü bi n'ɛsɛ̀nkɛn-bɔ̀ kɛ dɔ́ yɔ le: 2“Fɛcüè ndɔ lɔ ankà kɛ hán mɛ̀n ɛnhyɔ̀bɔ̀, ɔmuhi ɛbi anhɔ̀n de yɔ dú mɛ̀n ɛtɛ̀sɛ̀n kɩ ɛci-zî mán trɔ yɔ nɔn. 3Ke dú kɛ mɛ hán yɔ yɔ vru ɛmɛẅi ɔmùanwúemɛ̀n, yɔ lɛ cɔ́ ɛjɛ̀ ɛnlevri wanzi, ɔmuhi anwrɔn ndɔ hɔ̀n dú esù she và nɔn.” 4N'ɛsɛ̀nkɛn-bɔ̀ mrɛ́n nɛ̀n ɔmùan le: “Tɛyri de yɛ lɛ cɔ́ ɛci yɛ tán yɔ yɔ zî, ɛnu ɛyri tramɛ̀n lɔ nɛ́n?” 5Zhezü ke yrɛ yɔ le: “Abùtùkumɛ́n ɛbɛ dú nyɛ̀n hán?” Yɔ mrɛ́n nɛ̀n ɔmùan le: “Abùtùkumɛ́n ɔbɔɛ̀n.” 6Zɛtɛn, Zhezü wá tán fɛcüè lɔ kɛ̀ yɛ́ ɛnhibɩ́. Kɩ nɛ̀n bɩ́ abùtùkumɛ́n ɔbɔɛ̀n lɔ, nɛ̀n tán Ɔwɔ ɔkùɛn, nɛ̀n voyan abùtùkumɛn lɔ nɛ̀n tán n'ɛsɛ̀nkɛn-bɔ̀, kɛ̀ dɛ́ fɛcüè; kɩ n'ɛsɛ̀nkɛn-bɔ̀ lɔ dɛ́ ɛci lɔ. 7Yɔ vru yɔ ẅɛn ɛcàn ẅì hɔ̀n jan mán. Zhezü tán Ɔwɔ ɔkùɛn ancàn lɔ kruhú kɩ dɔ́ n'ɛsɛ̀nkɛn-bɔ̀ kè bɩ́ ɛcàn lɔ kɛ̀ dɛ́ fɛcüè. 8Ɔwrɔn wrɔn zî ɛci kɩ ɛmɛ̀ntɛ̀ yi yɔ. Zhezü sɛ̀nkɛn-bɔ̀, bí ɛci léyi wɔrɔ nɔn ankɛ ɔbɔɛ̀n. 9Tɛ́n nanvrɛn lɔ anwrɔn tɛ̀bru-kru-anzɔ̀ de dù nɔn. Zɛtɛn Zhezü hán yɔ yɔ vru ɛmɛẅi, 10kɩ nɛ́n mán n'ɛsɛ̀nkɛn-bɔ̀ mɛhi yɔ bru anhàka mɛ̀n yɔ hɔ́n Dalmanuta kpɔsɔ wú.

Ɔwɔ-nyànmàn-sùva-wá-bɔ̀ ke ji anvɛmɛ̀n-frɛ́n-ci tɔ̀n kɛ̀ kàn

(Nyɛ́n nyan Matie 16:1-4 wrú lɔ mɛ̀n)

11Ɔwɔ-nyànmàn-sùva-wá-bɔ̀, vá cɔ́ Zhezü mɛhi yɔ dɔ́ ecüìwrɔn-ankà. Yɔ ji yɔ krɔn nɛ̀n antanwrɔn, kɩ yɔ dɔ́ nɛ̀n nɛ hán anvɛmɛ̀n-frɛ́n-ci tɔ̀n nɛ̀n yé yɔ ô yɔ nyrì le n'ɛkɔrɛ̀srɔn lɔ dú Ɔwɔ yri nvà. 12Zhezü wrɔn esheshemɛ̀n kɩ kɛ dɔ̀ le: “Cɛci kruhú kɛ ɛnvra ndɔ lɔ mɛ̀n bɔ̀ ke ji anvɛmɛ̀n-frɛ́n-ci tɔ̀n kɛ̀ kàn hàn? Mɛ dɔ́ nyɛ̀n annànwɔrɛ mɛ̀n le, anvɛmɛ̀n-frɛ́n-ci zriɛmɛ́n ke sɩ̀ hán kɛ̀ tán yɔ!” 13Zɛtɛn Zhezü teze yɔ kɩ bru anhàka mɛ̀n hɔ́n nɛnbà cɛ mɛẅi.

Ɔwɔ-nyànmàn-sùva-wá-bɔ̀ mán Herɔdɛ̀n “ci-fɔ́-ci”

(Nyɛ́n nyan Matie 16:5-12 wrú lɔ mɛ̀n)

14Zhezü sɛ̀nkɛn-bɔ̀ esùva yürì kɩ ke sɩ̀ bɩ ɛci-zî, abùtùkumɛ́n zri kɩ dú yɔ anhɛmɛ̀n. 15Zɛtɛn Zhezü kɛ dɔ́ yɔ esùva wá ankà ndɔ lɔ: “Nyɛ́n wá ny'edomɛ̀n esùva, Ɔwɔ-nyànmàn-sùva-wá-bɔ̀ mán Herɔdɛ̀n ‘ci-fɔ́-ci’ tɛ̀sɛ̀n.” 16Zhezü sɛ̀nkɛn-bɔ̀ lɔ kɛ dɔ́ y'edomɛ̀n le: “Ɔmuhi bɔ̀ sɩ̀ ẅɛ̀n abùtùkumɛ́n nɔn, hɩ le kruhú de nɛ dɔ́ ɔmu lɔ nɔn.” 17Zhezü yá y'ankà-dɔ̀ lɔ kɩ ke yrɛ yɔ le: “Ecitan kruhú kɛ nyɛ dɔ̀ le: Ɔmuhi bɔ̀ sɩ̀ ẅɛ̀n abùtùkumɛ́n nɛ́n? Ɔmu tɛ̀kɩ nyɛ vá cɔ̀ nyɛ́n yá hà? Ke sɩ́ bru nyɛ̀n hàn? Ɛnkruemɛ̀n trɔ nyɛ̀n hàn? 18Nyɛ́n ẅɛn anvɛ̀, nyɛ́n sɩ́ kán ɛyriɛ? Nyɛ́n ẅɛn nukù, nyɛ́n sɩ́ yá ankà? Ke sɩ́ bru nyɛ̀n hàn: 19ɛnvra léyi mɛ̀n voyan abùtùkumɛ́n ɛnrì lɔ, mɛ̀n tán anwrɔn tɛ̀bru-kru-ɛnrì lɔ nɔn, ɛci léyi wɔrɔ nɔn ankɛ ɛbɛ nyɛ́n biɛ?” Yɔ mrɛ́n nɛ̀n ɔmùan le: “Ankɛ ɛvà-anhyrɛ̀.” 20Zɛtɛn Zhezü kɛ dɔ́ yɔ le “Kɩ ɛnvra léyi mɛ̀n voyan abùtùkumɛ́n ɛbɔɛ̀n lɔ nɔn, hɩ mɛ̀n tán anwrɔn tɛ̀bru-kru-anzɔ̀ nɔn, hɩ lɔ mán ankɛ ɛbɛ nyɛ́n biɛ?” Yɔ mrɛ́n nɛ̀n ɔmùan le: “Ankɛ ɔbɔɛ̀n.” 21Zɛtɛn Zhezü kɛ dɔ́ yɔ le: “Kɩ hɩ mán, nyɛ́n sɩ́ yá n'ɛmɛ̀n hàn?”

Zhezü kɔrɛ anvɛ̀-bɔyɛ-wrɔn tɔ̀n Bɛtsahida anmàn

22Zhezü mán n'ɛsɛ̀nkɛn-bɔ̀, cɔ́ Bɛtsahida; nanvrɛn lɔ, ye bɩ́ anvɛ̀-bɔyɛ-wrɔn tɔ̀n yɛ vá sɩ́ Zhezü kɩ yɛ sɛ́n nɛ̀n ô nɛ̀n tɛ́ yi ɛkɔrɛ̀. 23Zɛtɛn Zhezü ẅɛn anvɛ̀-bɔyɛ-wrɔn lɔ ɛkɔrɛ̀ kɩ yɔ cɔhɔ́ anmàn. Zhezü bɩ́ andà wá anvɛ̀-bɔyɛ-wrɔn lɔ anvɛ̀ kɩ nɛ̀n bɩ́ ankɔrɛ̀ nɛ̀n di yi ɛwú kɩ ne yrɛ yi: “Ɛ kán ecitɔ̀n hàn?” 24Anvɛ̀-bɔyɛ-wrɔn lɔ sɩ́ anvɛ̀ ɛwú kɩ kɛ dɔ̀ le: “Mɛ kán anwrɔn, mɛ kán yɔ kɛ hán antɛ̀ hɔ́, tɛ́n yɔ nán esù.” 25Zhezü vru bɩ́ ankɔrɛ̀ di ɔwrɔn lɔ anvɛ̀ wú; ɛnlɔẅiɛ-wrɔn lɔ kɛ nyan n'ezìwú: nɛ́n kɔrɛ̀, nɛ kán ɛyri anvrɛnvrɛn. 26Zɛtɛn, Zhezü hán nɛ̀n nɛ̀n hɔ́n ɛbemɛ̀n kɩ kɛ dɔ̀ le: “E bɩ́ hɔ́n anmàn lɔ.”

Piɛrɛ̀n kɛ dɔ̀ le, Zhezü dú Ebɩdie-wrɔn

(Nyɛ́n nyan Matie 16:13-20; mán Lükɛ̀n 9:18-21 wrú lɔ mɛ̀n)

27Zhezü mán n'ɛsɛ̀nkɛn-bɔ̀ hɔ́n anmàn hɔ̀n léyi dú Sezare Filipɛ̀n anmàn tɛ̀sɛ̀n nɔn. Y'ɛhɔ́n mɛ̀n lɔ ne yrɛ yɔ le: “Ankà tán de anwrɔn kɛ dɔ́ m'ɛwú nɛ́n?” 28Yɔ mrɛ́n nɛ̀n ɔmùan le: “Anwrɔn kɛ dɔ̀ le è dú Zhan Batisì, ndɔ hɔ̀n kɛ dɔ̀ le è dú Eli, kɩ anwrɔn janbɔ̀ le è dú Ɔwɔ-mùanwú-ankà-dɔ́-bɔ̀ lɔ ɔtɔ̀n.” 29Zhezü ke yrɛ yɔ le: “Nyɛ tɛ́n nyɛ dɔ̀ le mɛ̀n dú antɔnwrɔn hàn?” Piɛrɛ̀n mrɛ́n ɔmùan le: “È dú Ebɩdie-wrɔn.” 30Zɛtɛn Zhezü sɩ́ tán yɔ, yɔ bɩ́ dɔ́ ɔwrɔn zriɛmɛ́n ankà ndɔ lɔ.

Zhezü kɛ dɔ́ n'owù mán n'owúemɛ̀n-dù-frɔ́ ankà

(Nyɛ́n nyan Matie 16:21-28; mán Lükɛ̀n 9:22-27 wrú lɔ mɛ̀n)

31Zhezü vru ke yé n'ɛsɛ̀nkɛn-bɔ̀ ankà, kɩ kɛ dɔ̀ le: “Ke ji le Ɔwrɔnẅì ẅì kɛ kán ɛgbàn bobrebe; ɛcüìcüì-bɔ̀, ecice-bɔ̀-wrɔn-cüìcüì mán ɛnyànmàn-gbànvri-ankà-yé-bɔ̀ tamɛ̀n; yɔ lɛ wrɔ́ nɛ̀n ze; yɔ le wri nɛ̀n, kɩ ɛbi anhɔ̀n mɛ̀n bì lɔ ne le dú owúemɛ̀n nɛ̀n frɔ́.” 32Nɛ dɔ́ yɔ ankà ndɔ lɔ kpetemɛ̀n. Zɛtɛn Piɛrɛ̀n bi nɛ̀n ɔhɔnán kɩ ke di nɛ̀n ebrè. 33Tɛ́n Zhezü crɛ̀, kɛ nyan n'ɛsɛ̀nkɛn-bɔ̀ kɩ kɛ dɔ́ Piɛrɛ̀n ankà ɛshishiemɛ̀n: “Cɔhɔ́ mɛ̀n ɛtɛ̀sɛ̀n esùshe, anwa-wrɔn, ɔmuhi v'ankà-tro ke sɩ̀ dù kɛ̀ hán Ɔwɔ ankà-tro, tɛ́n anwrɔnẅì ankà-tro de ɛ ẅɛ̀n nɔn.”

34Zɛtɛn Zhezü bi fɛcüè mán n'ɛsɛ̀nkɛn-bɔ̀ kɛ dɔ́ yɔ le: “Ke dú kɛ ɔwrɔn ke ji kɛ kɛ́n mɛ̀n ɛsɛ̀n, nɛ̀n teze n'ɔwrɔnẅì ankà-tro, nɛ̀n shri n'ɛgbànkàn nɛ̀n bɩ ô nɛ̀n kɛ́n mɛ̀n ɛsɛ̀n. 35Ɔmuhi ɔwrɔn léyi ke ji kè bɩ́ n'ɛwúvà kè die nɔn kɛ lɛ zrɛ́n nɛ̀n; tɛ́n ɔwrɔn léyi kɛ lɛ zrɛ́n n'ɛwúvà lɔ mɛ kruhú mán Ɔwɔ mɛẅi ankà ankrànkràn kruhú nɔn, ke le bɩ́ n'ɛwúvà lɔ kè die. 36Vɔ̀nshɛ́ tán de ke le dú tán ɔwrɔn léyi kɛ lɛ zrɛ́n n'ɛwúvà, ɛnhibù wú ci lɔ fɛn ẅɛn mɛ̀n nɛ́n? 37Ecitan de dú ɛnhibù wú hɩ ɔwrɔnẅì kɛ le bɩ kɛ̀ wɔ́ n'ɛnhɛ́n wúvà lɔ nɛ́n? 38Ke dú kɛ mɛ kruhú mán m'ankà-dɔ̀ kruhú ɔwrɔn anvɛvrà kɛ ẅɛ̀n, ɛgbàn-hán-bɔ̀ wanzi, ke ji le nɛ̀n nyrì le Ɔwrɔnẅì ẅì mán anvɛvrà kɛ lɛ ẅɛn n'ɛkruhú, ɛnvra léyi nɛ lɛ vá nɛ́n Zi ci-zrɔ lɔ mɛ̀n nɛ́n mán Ɔwɔ-kùyüre-bɔ̀ prɔnprɔn hɔ̀n mɛhi.”

Currently Selected:

Markɛ̀n 8: ƐAA03

Highlight

Copy