Lucas 4

Diabo Satanásã parãpaia Jesusũ nĩkama inikiaki, na hãtxarã

(Mt 4.1-11; Mc 1.12-13)

1-2Hanua Joãonẽ Jesus naximaya Deusũ hawẽ Yushĩ Pepawẽ kuxipahaira wa hene Jordão anua Jesus kai hanu tsua hiweabumanu Deusũ Yushĩ Pepatũ Jesus iyuxina kawanaya yushĩ txakabu shanẽ ibu diabõ parãkĩ kanemanũ ikaya hanua 40 dia hanu hiweshũ hawa piama binukainaya haskakainaya Jesus bunihairai 3uĩkĩ unãti wanũ, iwanã, yushĩ txakabu diabõ Jesus yunukĩ:

—Haska mĩ Deusũ bakemẽkaĩ? Na mixki damiwakĩ misi wawe, mĩ buniai ha pishunã— aka

4hanushũ Jesusũ nemakĩ:

—Haskakiri Deusũ hãtxa keneniburã, nĩkawe. “Piti besti xinaĩ yurabu hawẽs hiwetirubumaki. Hakia Deusũ hãtxa yuini nĩkakĩ txibaĩ yurabu pei hiwetirubuki”, aniki— iwanã —Haskawẽ taeshũ ha mĩ ea yunuairã, ẽ akamaki— akaya

5haska nĩkatã hanushũ mati keyatapahaira anu yushĩ txakabu diabõ Jesus iyushũ mai hirabi anu mai pakea hawẽrua tibi inũ hawẽ damiwati kuxipawẽ hawaira shabakabi uĩmakĩ 6yuikĩ:

—Na mai hirabi mai pakea tibi anu inũ hawẽ shanẽ ibubu dasibi mebinishũ ẽ mekeawẽ taeshũ tsuara ẽ kuxipa inãkatsi ẽ haska wamiswẽ taeshũ hau mia kẽwãshanũbũ ẽ mia hatu shanẽ ibu wamatiruki. 7Haskawẽ taeshũ eki mesei dãti ishũ ea kẽwãkĩ mĩ ea shanẽ ibu waya dasibi mia inãtã ẽ mia hatu mekemakubaĩshanaii— aka 8Jesusũ ana nemakĩ:

—Na Deusũ hãtxa kenenirã, ana nĩkawe. ‘Matũ merabenã Yavé Deus ha besti duawakĩ kẽwãkubaĩkãwẽ, yushĩ betsa nĩkamarã’, aniki. Haska keneniwẽ taeshũ ha mĩ haska yuiairã, ẽ mia akamaki— aka

9-11hanushũ Jerusalém anuri iyushũ Templo keyatapa mamaki nitxĩshũ diabõ ana yuikĩ:

—Na Deusũ hãtxa kenenirã, miãri nĩkawe.

‘Hau mia mekekubainũbũ hawẽ nai tsumabu Deusũ yunushanikiki.

Mixkiki mĩ hutekepanã mĩ kawanai mia mekesushãkanikiki’,

aniwẽ taea haska mĩ Deusũ bake kayamẽkaĩ ea uĩmai nenua ixtxuwe— aka

12ana nemakĩ Jesusũ yuikĩ:

—Haska kenenibu mĩ dama yuiai ikũbiakẽ ana betsa ẽtseri mia yuinũ nĩkawe. ‘Matũ Yavé Deus unãti wayamakãwẽ’, akĩ kenekĩ yusĩrianiki. Haskawẽ taeshũ mĩ ea ana yunuairã, ẽ ikamaki— aka

13ana hawawẽ parãkĩ unãti watima hanu tsua hiweabumanu ana iyushũ txipu ana parãkatsi Jesus diabõ heneyubainaya

Galiléia anushũ Jesusũ yusĩkĩ taewanikiaki, na hãtxarã

(Mt 4.12-17; 13.53-58; Mc 1.14-15; 6.1-6)

14-15hanua Galiléia anu kashũ mae tibi anu hatũ itxati hiwe anu hikiakeakekĩ Deusũ Yushĩ Pepatũ kuxipa hayawẽ taeshũ Jesusũ hatu yusĩaĩ nĩkai hakiri hãtxakĩ dasibibũ kẽwãkubaunibukiaki.

16Haskakũkaũtani hanua yumei ewaima Nazaré anuri ka haskai hatube itxai beyamis huĩrukũtitiã hanu itxamisbu hiwe anu hatube hikia Deusũ hãtxa kenenibu yuishunũ ika Jesus benia nikẽ 17Deusũ hãtxa yuishunika Isaíasĩ keneni hãtxa una inãbu txuretã hakiri hãtxa kenenibu betxitã hatu yuikĩ:

18-19“Nuitapaibu kakape ẽ hatu yusĩnũ Deusũ ea katuniwẽ taea

hawẽ Yushĩ Pepa ẽ hayaki.

Hanushũ huĩti nixmabu hatu benimawakĩ

yura betsã hatu tsuma wa henemakĩ

bekũ keskabu bepesha keska wakĩ

hatu yusĩ pewakĩ hatu itxakawaibu nemakĩ

Deus benimawatikiri dasibibu ẽ hatu unãmakubaĩshanũ Deusũ ea yununiki”,

hatu watã keneni hãtxa yuikĩ keyushũ 20ana sebitã una mekenika inã mebĩtã aruaya ana hatukiri besua tsauwa manibaũshũ beistxakayamaibũ 21Jesusũ hatu yusĩkĩ taewakĩ:

—Haskakiri Isaíasĩ keneni ẽ matu yuishunai mã nĩkashurã, nukunabu merabewakĩ na habiatiã Deusũ ma meneikiki— iwanã, 22unãnepakĩ hãtxa pewẽ hatu yusĩaĩ nĩkai e itã hawẽ hãtxa abubiakĩ xinaĩ: “Narã, nukunabuki, Josẽ bakeki. Hanishũ haska tapĩtãxĩshũ nuku yuimẽkaĩ?” iki yuinamebaunaibu

23Jesusũ ana hatu yuikĩ:

—Mã ea itimaska kaya wai ẽ uĩaiĩ. Unanepa hãtxawẽ mã ea yuikĩ: “Mĩ huni dauyakiaki. Mimebi shushakĩ mĩ kuxipa nuku uĩmawe”, ea akĩ, “Cafarnaum anushũ hawẽ unãmati dami kuxipa mĩ hatu uĩmaxinakiaki. Mĩ axiã keska wakĩ na mĩ mae anushũri nuku ashũriawe, nũ uĩnunã”, akĩ mã ea yuitirubuki— iwanã, 24ana hatu yusĩkĩ:

—Txanima Deusũ hãtxa yuishunikarã, hawenabũ hawẽ mae anushũ nĩkakatsi ikama danãmisbuki. 25Haska inũ, Deusũ hãtxa yuishunika Elias hiwekẽ bari dabe inũ besti namakis ui ikamakẽ pitiuma nukũ shenipabu nuitapahairaibũ aĩbu hawẽ bene ma mawayama mirimaburi yumãkubainibu mã nĩkamiski. 26Haskabiaibũ nukũ shenipabu Israelbu beneuma nuitapaibu hau Eliasĩ dasibi hatu merabewanũ Deusũ yunuama iniki. Hakia mae ewapa Sidom dapi mae betsa Sarepta anu nawa aĩbu beneuma nuitapai hiwea besti hau merabewanũ Deusũ Elias yunukĩ nitxĩniki. 27Haska inũ, Deusũ hãtxa yuishunika Eliseu hiweatiãri hatiri nukunabũ txami buisma teneaibũ nukũ shenipabu hatuki dakekĩ danaĩbu Eliseũ hatu shushawamari iniki. Hakia Síria anua nawa betsa hawẽ kena Naamã Eliseu anu Deusũ yunua ha besti shushawaniki— akĩ

28nawabukiri hatu yuiai nĩkai dasibi itxati hiwe anu itxabu hatu haska wai nĩkatã haki sinatahairakĩ 29kaĩmabaĩkĩ Jesus tsumashũ ninikubaĩkĩ hatũ mae mawa keyatapa mamakishũ hanushũ shutunũ, iwanã, iyuaibũ 30hanua Deusũ kuxipawẽ itxabu namakisa kakĩ hatu mepãmabaini hawẽ mae henebainikiaki.

Huni betsa yushĩ txakabu haya Jesusũ kaĩmanikiaki, na hãtxarã

(Mc 1.21-28)

31Hanua Galiléia mai pakea anu Nazaré henebaini mae betsa Cafarnaum anu hikixĩshũ sábado tibi hatũ itxati hiwe anushũ hatu yusĩkubaĩkĩ 32shanẽ ibu kayabi kuxipakĩ hatu yuiai yurabũ nĩkai e itã: “Haskamẽ?” iki benimakubainaibũ 33habianuri huni yushĩ txakabuya tsauwa yushinẽ bis imakĩ unãshubima yuimakĩ:

34—Jesus Nazaré anuaã, haskai nuku anu mĩ hushumẽ? Nũ yushĩ txakabu nuku yamawanũ ika mĩ huaraka? Ẽ mia unaiĩ, mĩ Deusũ bake pepa meribirã— ikaya 35yushĩ txakabu Jesusũ nemakĩ yuikĩ:

—Hanua haskama nesetã ha huni anua kaĩrikaĩtãwẽ— aka yushĩ txakabu huni meranua kaĩkaĩkĩ hawa wama mai pusamabainai uĩ dasibibu 36datei:

—Habaa!— ike ikei yuinamekĩ yuikĩ: —Narã, yusĩa betsa hayaki. Shanẽ ibu keska kuxipahairaki. Hawẽ hãtxa paepaki, yushĩ txakabu shũska yunua nĩkai hawẽ datei kaĩkanikikirã— itã 37hanua bui hakiri txaniakeakeaibu dasibi hanu hiweakeakeabũ Jesusũ haska wai nĩkanibukiaki.

Simãonẽ dais aĩbu inũ isĩ betsa betsapa teneaibu Jesusũ hatu shushawanikiaki, na hãtxarã

(Mt 8.14-17; Mc 1.29-34)

38Ha huni meranua yushĩ txakabu nitxĩtã hatũ itxati hiwe anua kaya Simão Pedrõ hawẽ hiwe anu Jesus iyua Simão Pedrõ dais aĩbu yunatxakayama daka nĩkatuxitã hawẽ isĩ hau maĩwanũ hakiri Jesus yuiabu 39hanu dakanu Jesus kashũ hawẽ yuna nemashuna damaĩtã benikaĩ habiatiãri hatu duawakĩ bawashũ hatu pimaya

40haska washu nĩkabaikĩ hanua ma bari kai mexuaya dasibi ha mae anu hiweakeakeabũ dasibi isĩ betsa betsapa teneaibu Jesus anu iweabu Jesusũ habu tibi mekĩ shushawakĩ kaya wapakekĩ 41ha isĩ betsa betsapa teneaibu anua yushĩ txakabu nitxiã kaĩkaĩkĩ unãshubima hãtxa kuxipawẽ yuikĩ:

—Miarã, mĩ Deusũ bakeki— akĩ yuikĩ Deusũ Messias Cristo unaĩbuwẽ taeshũ hau hariri hãtxakĩ ana yuiyamanũbũ Jesusũ hatu hãtxamamakĩ nemapakekĩ yushĩ txakabu kaĩmapakenikiaki.

Judeubũ itxati tibi anushũ Jesusũ hatu yusĩkubaunikiaki, na hãtxarã

(Mc 1.35-39)

42Hanua ushaxini ma pena kemaya Jesus butukaina mae dapi benãta ha mesti ka benabaũkĩ hawẽ haibuaibũ betxitã haki nukushũ yuikĩ:

—Dasibitũ mia benakanikiki. Nenua ana kayamawe— akabu 43Jesusũ hatu nemakĩ yuikĩ:

—Ẽ Epa shanẽ ibuaikiri ẽ hatu yusĩkubaunũ ea yununiki. Haskakenã, mae betsa betsapa anu ẽ yusĩriai katiruki— hatu wabaini 44Israelbũ mae tibi anu Jesus kakũkaũkĩ hanu Deusũ hãtxa nĩkakatsis iki hanu judeubu itxamisbu tibi anushũ hatu yusĩakeakenikiaki.

Currently Selected:

Lucas 4: cbsBR

Highlight

Copy