Luka 22

1Koko elambedya ena mampa enefana nyango, enetangama elambedya en’Etelo, eolamaki. 2Ko nkanga ina toome l’atengi ban’ekanda baofon’etelo lacina baoyake; lacin’oka baangaki bato.

3Koko Satana aotua eneyali Yudasa (onotangama ona Keliota), onoyaaki en’oloi bona jo l’afe. 4Ko aocoa oyesola la nkanga ina toome ko la capitaines ina soldats, bokotua bonongi’nd’olekya Yesu eneyal’iyo. 5Iyo baonyangela, ko bamoteela lisangya oka bangofuta francs. 6Ko aimedya; ko aofon’etelo oleky’ende eneyal’iyo en’esike enefan’ato meho.

7Ko bina bona mampa enefana nyango boya, nko bina bonayak’iyo mpate en’elambedya en’Etelo. 8Ko Yesu aotoma Petelo la Yoane, ate, Bocoaka, botokoedya elambedya en’Etelo, tole. 9Ko bamufola, iy’ate, Olanga tokodya meya? 10Amasumola, ate, Lenda, eneng’in’otua en’onyanga, bongukana l’oto onoyatole ekucu en’asi; bokile en’otumba bonongi’nd’otua. 11Ko bosumola mene’otumba, Mbo Bolaki ate, Etenyi en’efenda eneng’emi l’akili’anami ola elambedya en’Etelo eyali meya? 12Ko ende angokotum’ino etenyi emoi ena nkolo ena liko, emosila litandama; bokodya elambedya nko meho. 13Ko iyo baocoa, ko baosungya nk’eyok’onoki’nd’oasumolaka; ko baokodya elambedya en’Etelo. 14Ko eneki esike oyelaka, aokisase ena mesa, ende l’akili jo l’afe. 15Ko amalokwela, ate, Emi ndangaki la mposa mene lacina nde elambedya ene en’Etelo, emi l’ino, kuma ntene bino binami; 16lacin’oka lakosumol’ino, Mpit’ola eho lakina, yengoko kum’eho eakolana ena lifoka lina Yakomba. 17Ko aotamba ekala, aokanga Yakomba lokango, ko amasumola, ate, Botamba ekal’ene, ko bokafa eneyal’inoamene; 18lacin’oka emi lakosumol’ino, Mpit’omela lakina basi ban’emamo ben’ekoli bena vina, yengoko kuma lifoka lina Yakomba yoya. 19Ko aotamba mampa, ko aokanga Yakomba lokango, aokes’eho, ko amafa, ate, Ene nko yonge linami lineyofama lacin’enino: bilaka yoi line ena liofwa linami. 20Nk’osamb’oho, ena mbusa ena toma ndaka, aotamb’ekala, ate, Ekal’ene nko lisangya lina litoto lin’akil’anami, banutelama lacin’enino. 21Koko lenda, likasa linande ononjangela liyali l’emi ena mesa. 22Koko Bon’on’oto ayacu, solosolo, yok’onoki yoi oangamaka eango; ohonde bino eneyali boto’oho onomoangela. 23Ko baomatsa yufolana boto’oniyo onosokoila yoi line.

24Ko baatana ntango lacin’ena boto’oniyo onongotangama yok’iyome. 25Ko amasumola, ate, Bafoka bana Befenda batumanya bato’aniyo; ko bato’aniyo banayali ena lifoka baotangama Bamene’isei. 26Ohonde ino bofayali yok’oho: ende onoyali yok’iyome eneyali ino ayalamake yok’akune; ko onoyali en’oso, ayalamake yoka bosali. 27Onoleki oka nai, yomb’ende onokisase ena mesa ena toma, yomb’ende onosala mesa? Ef’ende onokisase ena mesa? Ohonde emi njali ena ntoto enino yoka bosali. 28Koko ino boyali nk’anayaaki l’emi ena mmeko inami; 29ko lakof’ino lifoka, nk’eyok’onoki Bafango’onami ompak’emi lifoka, 30lacin’eho bole ko bomele ena mesa enami ena lifoka linami; ko bongokisase ena toeko tona bafoka, ko bongotend’akambo bana beloi bena Yisalaele jo l’efe. 31Koko ate, Simona, Simona, Satana alombaki etelo nko ndomba mene lacina akoate, akofifedya yoka bopunga; 32koko nkoondelaki, otongoyind’imeedyo; ko e, eneng’ohelengwa lakina, kikya bifili bine. 33Ate, Nkolo, nkoli lacina ncu emi l’e l’en’otumba bon’enyolo l’en’ewedi mene. 34Amosumola, ate, Petelo, lakosumol’e, nkoko ena mpame efekaki bon’in’one, yengoko kum’e oangan’oka onjey’emi beangana besaso.

35Ko amaufola, ate, Eneki’m’okotomak’ino, efana bofalusi, efana ntombe ena francs, efana tombwaku, ino bindaki nde iyema imoko? Iy’ate, Efan’iyema. 36Nkwaho amasumola, ate, Nd’esik’ene, ende onoyali la ntombe ena francs aambol’eho, ko la bofalusi nk’osamb’oho; ko onofana lokula lon’ita, atekyake esenda enande, ko asombe lokula. 37Lacin’emi lakosumol’ino, yoi line linalitengi lingilama eneyal’emi, noka, Ende aalamaki l’ato banafunzafunza beeka; lacina baoyi’ane banatengamaki lacin’enami bayali l’esimbelo nk’isanga. 38Iy’ate, Nkolo, ndaka nkula in’ita ife. Ate, Ikoli.

39Ko aofola, ko aocoa, yok’onoki bokotu’onande oyalaka, ena lingonji lina Bilaya; ko bakili’anande bamokiela. 40Ko eneki’nd’oyelaka en’esang’eho, amasumola, ate, Boondaka, botoyatua ena lomeko. 41Ko ende aalana l’iyo isisali, yoka bofusa bona lufe bomoko, ko aun’aongo, ko aoonda, 42ate, Bafango, nk’osokoimedya, umola ekal’ene eneyal’emi; ohonde efa eango enami: eango ene eilamake. 43Ko ekima ena loola eenya eneyal’ende, amokikya. 44Ko ayaaki la bino bin’efafo mene, ko aonda nko mbonda mene; ko elungu enande eoyalama nk’eyoka bapopo ban’akolo ban’akila banakwa ena loko. 45Koko eneki’nd’okadyaka yonda, ko aemala, aoya eneyali bakili, ko amasungya kuma baeci la lokeseli, 46ko amasumola, ate, Betama lacina nai? Bemalaka, boondaka, botongoyatua ena lomeko.

47Nk’enem’end’otenda, lenda, bik’ike bon’ato baoya, ko ende onotangama Yudasa, omoi ona ba-jo l’afe, ayete en’oso’oniyo; ko aolamela Yesu oyoleya bolumba. 48Koko Yesu amosumola, ate, Yudasa, oangela nde Bon’on’oto nko la bolumba? 49Ko enek’iyo banoli l’ende oenaka yoi linalingilama, baila, iy’ate, Nkolo, tokake bamoi la lokula? 50Ko omoi’oniyo aoka boombo’ona nkanga iyome, ko aokesa litoi linande y’ome nko pa. 51Koko Yesu aamba, ate, Boacike. Ko aosuka litoi linande, ko amiikya. 52Ko Yesu aosumola iy’anayaki eneyal’ende oyuunda, nko nkanga ina toome, la chefs ina botumba bona Yakomba, la bingambe, ate, Ino bomofola nde la nkula in’ita ko l’embele yoka bato banangund’oto’ona liya? 53Eneki’m’oyalaka l’ino bina l’ina en’otumba bona Yakomba, botambunda l’akasa; ohonde heure ene eyali nk’enino, ko la locili lona liucu.

54Koko bamuunda, ko bamotola en’otumba bona nkanga iyome. Koko Petelo amokila en’osana. 55Eneki bato’amoi ofetsaka nkoi ena mbalasai, ko baokisase meho, Petelo aokisase ena ntoto eniyo. 56Ko enem’end’okisase ena fololo ena nkoi, bosali’omoi on’oyoto ameena, ko amolenda ta, ko aila, ate, Boto’one ayaaki l’ende nkoho. 57Koko ende aangana, ate, Boyoto, mpeey’ende. 58Ko efan’olingolingo boto’okina ameena, ko aila, Mbo e nkoho ond’omoi’oniyo. Koko Petelo, ate, Boto, efana: mpayali’oko. 59Ko eneki heure emoko osilaka, boto’omoi aokikya yoi liho la locili, ate, Solosolo, boto’one ayaaki nko l’ende, lacin’oka and’ise Ngalilaya. 60Ko Petelo aila, ate, Boto, mpeya yoi linatend’e. Nkwaho, nk’enem’end’otenda, nkoko ena mpame eeka. 61Ko Nkolo aohelengwa, ko aolenda Petelo. Ko Petelo aokanedya yoi lina Nkolo, bokotua bonoki’nd’osumolaka, ate, Kuma nkoko ena mpame eteke bon’in’one, ongonjangana beangana besaso. 62Ko aofola, ko aolela lilelo mene lina mposoli.

63Koko bato banasukaki Yesu bamonyeela, ko bamofoma mpomi; 64bamokundela baiso’anande, ko bamofoma en’elongi ko bamufola, Mbo otosumole: onokofomaka? 65Ko bamotendela baoyi bamoi bike bana nsoi mene.

66Eneki bina okyaka, likita lina bingambe bin’ato la nkanga ina toome l’atengi ban’ekanda baosolongana; ko baoya l’ende en’osolongano’oniyo, bamufola, 67iy’ate, Nk’oyali Masiya, otosumole. Ohonde amasumola, ate, Kang’emi lakosumol’ino, bofimedyaki; 68ko yombo lakufol’ino, bofaambaki. 69Koko isanga Bon’on’oto angokisase en’ili bona likasa y’ome lina mpamba lina Yakomba. 70Ko iyatu baila, Mbo e, onde Bon’ona Yakomba? Ende amakutwela, ate, Nk’oko bonatend’ino, njali nk’ende. 71Ko baila, iy’ate, Tokemb’ekina temoin lacina nai? isoamene tomoka nk’en’onyua bonandamene.

Currently Selected:

Luka 22: BBY62

Highlight

Copy