Luka 24

1Koko en’ina bon’oso bon’eyenga, nko la mbia, baoya ena nketa, baoya la toumba tatok’iy’okodyaka.

2Ko baosungy’oka lufe limuma ena nketa nko la nkilimodya. 3Baotua, koko batasungya boduo bona Nkolo Yesu. 4Koko enek’iy’okandakandaka la yoi line, lenda, mpame ife baemala mbolimboli l’iyo la bisenda bina teele. 5Bayato baoka losomo mene, ko baosunya bete’eniyo ena loko, koko mpame ih’ife bamalokwela, iy’ate, Bofon’ende onoyaike ena ntoto eniy’anawaki lacina nai? 6Afayali mendo: amoletwa en’ewedi; bofwaka bokotua bonoki’nd’okosumolak’ino kum’ayali ena Ngalilaya, 7ate, Akoli eneyali Bon’on’oto lacina alekyame en’akasa ban’ato’owe, ko ayakame en’ekulusu, ko aetwa en’ewedi en’ina bon’esaso.

8Ko baofwa baoyi’anande, 9baocika nketa, bauta la mbusa, ko baosumola ba-jo l’omoko ko l’ato bahatu banayaaki meho baoyi’ane bahatu. 10Banasumolaki bikima baoyi’ane nko Malia Mangandala, la Yoana, la Malia nyango ena Yakobo, l’ayato’amoi banayaaki l’iyo. 11Koko baoyi banak’iy’otendaka baokana eneyali bikima yoka botendatenda kei, ko iyo batimedya tu. 12Koko Petelo aemala, ko aocoa la laango ena nketa; ko eneki’nd’osunamaka, aena bisenda bina mbenza biambi meho nko biho kei; ko aocoa en’ol’onande, ko aofefa la yoi linilamaki.

13Ko lenda, bamoi’aniyo bafe baocoa bin’oho en’onyanga bonotangama Emao, bonoyaaki bosana la Yelusalema yoka kilometres jo l’ife. 14Ko baesola lacin’en’aoyi bahatu banilamaki. 15Koko enem’iy’oesola ko baotendana baoyi, Yesu mene aolama, ko aambana l’iyo. 16Koko baiso’aniyo baosukama, batongoyey’ende. 17Ko amaufola, ate, Baoyi’ane banesol’ino eneyakend’ino ko boyoke lokeseli baka nai? 18Ko omoi’oniyo, lina linande Keleopa, amokutwela, ate, E kei kongokisase yok ofenda ena Yelusalema, ko ofeya baoyi banilamaka meho en’ina bene? 19Ate, Baoyi baka nai? Ko ende aila, ate, Baoyi bana Yesu bise Nazaleta, onoyalamaki bosumoli ona locili l’en’i’kambwa l’ena yoi en’oso bona Yakomba l’en’oso bo’n’ato bahatu; 20ko l’okotua bonoki nkanga ina toome la bafok’aniso olekyak’ende lacina atomame en’ewedi ko baoyakaki en’ekulusu. 21Koko iso tolengedyaki’oka angoyala nk’ende onongotungola Yisalaele. O koko bin’one nko bina bon’esaso ena mbusa enek baoyi’ane oilamaka. 22Koko yoi limoi, noka, bayato’amoi ban’oloi’oniso baotokaimodya: 23baocoa ens nketa l’ikulukulu mene, koko batena boduo’onande, ko baoy’otosumol’oka bamen’enelo ena bikima bina loola banasumolaki, iy’ate, Ende ayaike. 24Ko bamo: banayaaki l’iso baocoa ena nketa, ko baosungya nk’eyok’onoki bayato otendaka; ohonde bateen’endamene 25Ko amasumola, ate, O bato baninda lokanyi, la betema beneseki lokuta ena likambo lina njimedya en’aoyi bahatu banaki basumoli otendaka! 26Iya etakolana nde la Masiya aene bino l’aoyi’ane ko atua ena bokonde bonande? 27Ko aomatsa la Mose ke l’asumoli bahatu, ko amasakitwela baoyi banatengamaki ena bitengelo bina Yakomba bihitu lacin’enande 28Ko baolama l’onyanga bonok’iy’ocoaka; ko ende aila yoka angofolanya. 29Koko iyo bamosimbya, iy’ate, Yala l’iso, lacina esike ena likolo emoyela, ko bin’omila. Ko aotua okisase l’iyo. 30Koko enem’end’okisase l’iyo ena mesa ena toma, aotamba mampa ko aosak’osako, ko aokesa eho ko amafa. 31Ko baiso’aniyo baolifwa ko bameeya; koko auma eneyal’iyo nko nsiela. 32Ko baotendana, iy’ate, Betem’eniso betafeta nde ena ntundulu eniso yoka nkoi, eneki’nd’otendaka l’iso ena mboka, ko eneki’nd’otoumbwelaka bitengelo bina Yakomba? 33Ko baemala nkwaho ena heure eho, ko bautwa la mbusa ena Yelusalema, ko baosungya ba-jo l’omoko l’amoi banayaaki l’iyo basolonganyi; 34iy’ate, Nkolo amoletwa nko solosolo, ko amenya eneyali Simona. 35Koko iyo bamasumol’aoyi banilamaki ena mboka, ko l’okotua bonoki’nd’oeyanaka l’iyo en’ekeselo ena mampa.

36Nk’enem’iy’otenda baoyi’ane, Yesu mene aemala ena ntoto eniyo, amasumola, ate, Mwi eneyal’ino. 37Koko iyo baokaimwa, ko baoka losomo, ko baokanel’oka bamena lifoi. 38Ko amasumola, ate, Ino bokandakanda, ko betem’enino beyali la bekalokalo lacina nai? 39Benaka bakas’anami l’akak’anami, one nk’emamene; bommete, ko bena, lacin’oka lifoi afana bonufo la biuha, yoka bosamb’on’en’ino oka emi laata. 40Ko eneki’nd’otendaka yoi line, amatuma bakasa l’akaka. 41Ko enetimedy’iyo isanga lacin’en’ekiko, ko baofefa, amaufola, ate, Boyali nde l’iyema ina ndaka mendo? 42Ko bamofa etenyi ena nse enokangamaka. 43Aotamba, ko aola en’oso’oniyo.

44Ko amasumola, ate, Bane nko baoyi’anami banaki’m’okosumolak’ino kuma njali l’ino, eneki’m’oilak’oka ekoli lacina baoyi bahatu banatengi en’asangya bana Mose, l’en’asumoli, l’ena Njembo, lacin’enami, bailame. 45Nkwaho aofoladya lokanyi loniyo lacina banonganya bitengelo bina Yakomba; 46ko amasumola, ate, Yoi litengamaki yok’one, noka, Masiya angen’ino, ko angetwa lakina en’ewedi en’ina bon’esaso; 47ko bosimo bona njosuma la ntungola en’ato en’aoyi’owe bosekodyamake ena lina linande ena benyanga behetu, mmatsa nk’ena Yelusalema. 48Ino boyali temoins ina baoyi’ane. 49Ko lenda, nongokotomel’ino esemba ena Bafango’onami; ohonde ino boyalamaka en’onyanga bona Yelusalema, yengoko eneng’in’olotsama la mpamba enengoya ena liko.

50Ko amatola ena mbiolo, nk’ena mbolimboli la Betania; ko ailedya bakas’anande ko amasakela bosako. 51Koko, enem’end’oasakel’osako, aalana l’iyo, ko aotolama ena loola. 52Iyo bamokumya, ko bauta la mbusa ena Yelusalema l’ekiko mene. 53Ko baoyalama en’otumba bona Yakomba bina l’ina, bayakumya nko Yakomba.

Currently Selected:

Luka 24: BBY62

Highlight

Copy