Yoane 6

Lilesi lia Bato bilefa bɔɔmwi

1Mbisa yaamao, Yesu loleka eliya ya Ngalilai-eko eya Tibelia- 2nde bikuke ya bato lotutak’Inde eoka bɛ̈nɛkɛ̈ tolombo etokelik’Inde ende eba kambo. 3Yesu lolila to nda löngo, Inde loyala se omao amamwito la baeki bande. 4Elambɔ ya BaYuda, eko Lieti, yaaka tina.

5Iläkä Yesu baiso, Inde loɛnɛ bikuke ina ya bato batoya end’Inde, Inde loonga la Filipo mbo— ¿Tosombeke batuma bolesa ebato-ba ko anima? 6Inde loonga la Filipo ongoma ndokɔtɔlɔ inde, eoka Inde angɛnɛ aluwi ani atokel’Inde. 7Filipo lomutola lande mbo— Batuma ba loketi loa falanga mia imbale angoengana l’ebato-ba mbo boto la boto aɔlɛkɛ ko sinyo. 8Ɔmɔi wa baeki bande, ako Andelo, etungani ya Simona Petelo, inde loonga lande mbo— 9Wainɛngɛ ale ono oyasɛli beila bɔɔmwi la swi imbale. ¿Kongo yende iye yokaela ende bato-ba wike? 10Yesu loonga mbo— Yalesak’iyo se. Twingi wike twäkä nda elela ena, iyo loyala to se, batolome benganäkä loketi loa bilɛfu bɔɔmwi. 11Lamao Yesu lɔɔsɔ beila, Inde lofa kelekele, Inde lofaekefa bato ebayalaka se, la swi imɔ ongoma, kwa alɛmbɛk’iyo.

12Okanelöko iyo batotina, Inde loonga la baeki bande mbo— Sɔnjaka twinyo twa bieka ebitikali mbo yeka etalefana. 13Eokao, iyo losɔnja, iyo lotumesa bisaka liu la imbale la twinyo twa beila bɔɔmwi etosotikala ende ebaläkä.

14Lamao ɛnɛkɛ bato ilombo eshakeläk’Inde, iyo mbo— Wewe, Inde ende Bɔtɔndɔli oyakayeke nda wenda. 15Aluwäkä to Yesu mbo basikioyaund’Inde mbo batalieke Inde Bɔkɔta, Inde loinwa mbisa okakɛ nda löngo ko Inde angɛnɛ.

Yesu lotanda likolo lia balia

16Iläkä buse likɔlɔse, baeki bande lɔkɛ ko nda ngɔngɛ ya balia, 17iyo lokwa nda watɔ, iyo loilya owale okaleka eliya fangi ya Kafenauma. Nde akwäkä lilima se, l’ani Yesu akayi kɔni end’iyo; 18eliya lokwelo batutu eoka lomba lofi lofofa. 19Alükak’iyo kilometa bɔɔmwi, iyo lɔɛnɛ Yesu atotandaka olikolo lia balia, tina la watɔ, iyo lowänga. 20Nde Yesu loonga lau mbo— Yende Imi, owangëke! 21Asangäk’iyo ndot’Inde nda watɔ, kwaamao watɔ loiya nda ngɔngɛ olo aɛk’iyo.

22Lɛlɛngɔ, batɔ ba ekuke ebatikaläkä fangi yasi ya eliya, iyo lɔɛnɛ mbo angwɛnɛ watɔ wasi, ko wao ebokwiki la baeki kongo, la mbo Yesu angɛnɛ atikwe lau nda watɔ, la mbo baeki bande basɔkɛ iyo angɛnɛ, 23(Nde bitumbe bimɔi ya Tibelia loya oyaelama tina la elela olo aläkä bato beila mbisa ani Yesu lofa kelekëlë.) 24Limɔ ɛnɛ̈k’iyo to mbo Yesu at’imɔ omao, la baeki bande imɔ ati omao, iyo lokwaka nda bitumbe bina, iyo lɔkɛ nda Kafenauma ndokaluke Yesu. 25La oshak’iyo oosha Yesu fangi yasi ya eliya, iyo loonga lande mbo— ¿Labi, oyi nde eya l’eni to mbile?

Lituma lia loiko

26Yesu lomutola lau mbo— Wewe, wewe, itoonga lanu mbo, otiye oyaluka Imi eoka ya ndembe ya tolombo eyɛnɛ̈k’ino, kangä eoka oliki nde batuma la okaneluku. 27Okuwelëke bieka ebitosɛɛsɛlɛ, kangä bieka ebitokata ko nda liwawi lia lokato, yao ebitofaefa Wana wa Boto efaef’ino, eoka Sango ako Mungu asot’Inde ndembe mbo asokuly’Inde. 28Limɔ iyo loonga lande mbo— Tokeleke to moni mbo bekeeli yasu biomaleseke Mungu? 29Yesu lomutoel’iyo mbo— Ebo bole bokeeli ebolɛmbi Mungu, boko mbo bolendeloko Inde oyatomomu la Mungu.

30Iyo loonga to lande, mbo— ¿Eokao, eni ndembe ya ilombo esitokel’Aɛ, mbo twɛnɛkɛ la twimeleke Aɛ; eni ndembe eyetokel’Aɛ? 31Batata basu baläkä Mana nda liɔmbɛlɛ, kwa atomöko nda Lokasa mbo— Afäk’iyo lituma eliasekwäkä nda Use mbo baleke. 32Yesu loonga nde lau mbo— Wewe, wewe, itoonga lanu mbo— Atiäkä Mɔsɛ oyafäk’ino lituma lia Use, kangä Sango wami oyakof’ino lituma lia wewe elisosekwa nda Use. 33Lituma lia wewe liende liao elitosekwaka nde Use la elitofaka liwawi ende eba wenda.

34Iyo loonga to lande mbo— Ngɛnɛ, faefaka’iso litumali lise la lise. 35Yesu loonga lau mbo— Imi yende Lituma lia liwawi. Inde oyatoya ende’mi atilokek’imɔ isiyɛ liasi, la inde oyatolendelo’mi, atilokek’imɔ yɛmɛ yomwa liasi. 36Nde yaongäkä lanu mbo osɔɛnɛ Imi, nde oitoimela.

37Batotina ebatofa Sango ofa’mi, beyaka ende Imi la oyatoya ende Imi, Imi angofeka inde. 38Eoka isokwi nde nda Use, inga ndoyakelaka lisangi liami angɛnɛ, kangä lisangi liande oyatomäkä Imi. 39Lisangi liande oyatomäkä’mi liko mbo itialefeseke angomwito wa batotina ebafäk’Inde ofa’mi, nde yetɛmwɛsɛk’iyo la liwawi nda lise lia liko. 40Eli liende lisangi lia Sango wami, liko mbo batotina ebatɔɛnɛ Wana la ebatolendelo Inde, ambo bɛɔlɔkɔ nde liwawi lia layalaya la mbo Imi yetɛmwɛsɛk’iyo la liwawi nda lise lia liko.

41Limɔ BaYuda loimaimel’Inde eoka aongäkä mbo Imi yende Lituma elisosekwa nda Use. 42Iyo mbo— ?Oyo ati Yesu, wana wa Yosefa, toisoluwa sango la nyango wande? Monito asoonga kwani mbo— Isokwi nde nda Use? 43Okimakimanëke; 44angwɛnɛ oto wokɔkɔlɔ oya ende’mi, sakolo ko Sango oyatomäkä’mi nd’asosuly’inde la Imi nd’atotɛmwɛsɛ inde la liwawi nda lise lia liko. 45Losotomo nda Kasa ya batɔndɔli mbo— Batotina bekesomoko ko la Mungu. Oyasoka limiki lia Mungu la asoekesomo lande, inde atoya ende’mi. 46Eti to mbo boto aɛni nde Sango, sakolo ngo ko Inde oyayali wa Mungu, Inde nd’ɛnɛ̈kɛ̈ Sango.

47Wewe, wewe itoonga lanu mbo— Oyasoimela asɔɔlɔ liwawi lia lokato. 48Imi yende Lituma lia Liwawi; 49batata banu baläkä Mana nda liɔmbɛlɛ la bawäkä. 50Eli liende lituma lia Use elisulwi nde se mbo boto oyatola liao, angow’imɔ. 51Imi yende Lituma lia liwawi elisosokwa nda Use; eyambo boto elaka e-lituma-li, eyalaka nde la liwawi konda layalaya; la lituma elitofa’mi of’inde, liende bindo yami ebitofa’mi loasɔ loa loiko loa wenda.

52Eoka ya loao, BaYuda lowesakana, iyo mbo— ¿Botoyo atokɔkɔlɔ ndof’iso bindo yande yola ko moni? 53Yesu loonga to lau mbo— Wewe, wewe, itoonga lanu mbo, sakolo ko bola bindo ya Wana wa Boto la bomwa bakila bande, ani ot’imɔ la liwawi nd’atiteni yanu. 54Oyatolaka bindo yami la oyatomwaka bakila bami, inde asɛli nde liwawi lia loiko la yetɛmwɛsɛk’inde nda lise lia liko. 55Eoka bindo yami yende bieka ya wewe, la bakila bami bende limwi lia wewe. 56Oyatolaka bindo yami la oyatomwaka bakila bami, atoyalaka lami la Imi nd’atoyalaka lande. 57Kwa atomäkä Sango, oyale la liwawi, otoma Imi, la iyali nde la liwawi ko l’eoka yande, ko ongoma oyatolaka’mi, eyalaka nde la liwawi ko l’eoka yami. 58Eli liende lituma eliasekwaka nda Use, inga kwa elialäkä batata banu ebawäkä; oyatolaka lituma-li, eyalaka nde la liwawi konda layalaya.

59Aongäkä baoi-ba ani atoekekesa bato nda ɛsɔngɔmɛlɔ nda Kafenauma.

Baeki bamɔi loɛnɛ tale nda liekesi

60Ongoma baeki bande bamɔi, okakä’iyo elioi-li lia Yesu, iyo mbo— Elioi-li lile la tale finɛ. ¿Ndai to atɔkɔkɔlɔ ndokulya liao? 61Aluwäkä to Yesu mbo baeki bande basoimaimela elioi-li, Inde loonga lau mbo— ¿Mbo elioi-li lisokes’ino botema wale? 62¿Eya to mbo wɛnɛ Wana wa Boto ani atoilama likolo olo ayaläk’Inde oso, ino moni? 63Bolimo nd’atosɛlɛ boto la liwawi, bindo kongo angosung’iso; baoi bami ebaongäkä’mi lanu, bao bende bolimo la liwawi end’ino. 64Nde bende bamɔi banu ebaitoimela. Nde Yesu loluwa konda liako ebatiimeleke la oyakawambek’Inde; 65la Inde loonga mbo— Ko l’eokao yakambesak’ino mbo angwɛnɛ boto wokɔkɔlɔ ndoya ende’mi sakolo ko efomo isosha sha Sango. 66Laamao baeki bamɔi wike loinwainwa la batikɛndɛ-kɛndɛk’imɔ lande.

67Limɔ Yesu loonga la eba liu la ambale mbo— ¿La ino imɔ olɛmbi ko ndosokwa? 68Simona Petelo lomutoel’Inde mbo— Ngɛnɛ, tɔɛkɛ to ende ndai? Aɛ wende la baoi boluwesa loiko loa layalaya, 69la iso nd’asoimela la toluwi nde kwani mbo Aɛ wende Ebotanu wa Mungu. 70Yesu lomutola lau mbo— ¿Iisoaa ino, eba liu la ambale? Nde ɔmɔi wanu ende bolimo obe. 71Inde loonga loasɔ loa Yudasi wana wa Simona wa Keliota, eoka inde, ako ɔmɔi wa eba liu la ambale, akawambek’Inde ende BaYuda.

Currently Selected:

Yoane 6: NTKE58

Highlight

Copy