Luka 16
16
Bonyafala wa bɔlɔwäne
1Yesu loonga imɔ la baeki bande mbo— Boto wa lifoka ayaläkä la Bonyafala wotinganaka la ndakɔ la bilanga yande la bato lowanjela Bonyafala ende ngɛnɛ wande mbo asomelesa yeka yande. 2Ngɛnɛ lot’inde lioi, inde loonga lande mbo— ¿Loni-lo elosoka’mi loasɔ loaɛ? Faka lokasa loa likuwa liaɛ eoka otikɔkɔlɛ imɔ ndoyala Bonyafala.
3Limɔ Bonyafala loenyela, inde mbo— ¿Itokel’iye, eoka mbo ngɛnɛ wami atosokoela’mi isosha sha bonyafala? Iti la botatulu wosha nyɛlɛ; yende la sɔni ndömba bieka. 4Iluwi nde elotokela’mi mbo akafangolomoko’mi nda bonyafala, limɔ batonyangela’mi nda ndakɔ yau angɛnɛ. 5Inde lota batotina ebaäkä la ngɛnɛ wande belima, ɔmɔi la ɔmɔi; inde loonga l’ewa oso mbo— ¿Wende la ngɛnɛ wami bolima wa loni loketi? 6Inde mbo— Biangola ya baita kama liu. Bonyafala loonga lande mbo— Ɔsɔkɔ lokasa loa bolima, yalaka se mangu la sɔnɔkɔ mbo kama bɔɔmwi. 7Limɔ inde loonga la wasi mbo— ¿Aɛ imɔ, ole la bolima wa loni loketi? Inde mbo— Batanga ba bofonga kama liu. Inde loonga lande mbo— Ɔsɔkɔ lokasa loa bolima, sɔnɔkɔ mbo kama bonanɛi.
8Ngɛnɛ loinela Bonyafala wande oyatienganaka eoka akeliki nde la eläläka; eoka nda fɛtɔ yau, bana ba wenda-bo balongeli nde bana ba löwa la eläläka.
9Imi nd’atoonga lanu mbo— Sɛlɛkɛ ebanu baina ko la bieto ya eba bolimbakeli, litina mbo akasileke yao, limɔ batonyangel’ino nda kumbo ya loiko. 10Boto wolendelomo la loasɔ lɔkɛkɛ, nda loasɔ lofi ale imɔ wolendelomo; boto oyati la liengani nda loasɔ lɔkɛkɛ, nda loasɔ lofi imɔ ati la liengani. 11¿Ango ino oti bolendelomo nda loasɔ loa bieto y’ebatiengane, ndai to atolendelo ino nda njasɔ ya wewe? 12¿Ango botiyaleke bato bolendelomo la eya boto wasi, ndai to atof’ino eyanu angɛnɛ?
13Angwɛnɛ bosali wokɔkɔlɔ oyala bɔkɔwa wa bangɛnɛ bambale, eoka ataiyela ɔmɔi, nde kosamaka oy’ɔmɔi, angoko mbo atawatemaka la ɔmɔi, nde koolya oy’ɔmɔi. Botikɔkɔlɛ ndoyala bɔkɔwa wa Mungu la bieto lisanga.
14BaFalusi baäkä ebasami bieto finɛ, iyo looka baoi-ba batotina, iyo lomuchamuchela Yesu. 15Inde loonga lau mbo— Ino wende ebatangi nde mbo wengani nda baiso ba bato, nde Mungu nd’aluwi betema yanu, eoka ebitoinelomo finɛ la bato, yao Mungu kɔɛnɛ efu.
16Bikela ya Mungu la Batɔndɔli yaäkä konda mbile ya Yoane, limɔ mbisa yande ko kwani, mboli ya Bɔkɔta wa Mungu bisotomo boekï la boto la boto atɔɔtɔ nda wao ko la botatulu. 17Kongo ko ndofanjaka lioi limwitoto lia Bikela ya Mungu lole lowau lolongela elosokola Use la se.
18Eokao boto oyasosokola wali wande, kosɔngɔ wasi, ambo asotwa nyongo, la boto oyatosɔngɔ wali oyasokolomu ende bolome, ambo inde imɔ asotwa ko nyongo.
Ewa lifoka l’ewa shomba
19Aäkä nde boto ɔmɔi wa lifoka lifi oyawatäkä bisinda ya bofɛkɔ la loketi lofi. Inde lolengela lise la lise ko ndolaka bieka ya bonuku. 20La oto wasi wa shomba, lina liande liko Lasalo, loingakala tina la bome wa ewa lifoka, la bindo yande lotuma la bakülü. 21Inde looka yɛmɛ finɛ yolaka bakɔmbɔ ebakwäkä ose ya mɛsa y’ewa lifoka, la ngwa loya oyalɛtɛkɛ bakülü bande.
22Mbisa yamao, ewa shomba lowa, la bakitomo lotol’inde konda bokuku wa Abalayama; la ewa lifoka lowa imɔ kowa, inde loömbomo nda losai. 23Ayaläk’inde nda ewelo la okäk’inde bemusi finɛ, inde loila baiso likolo inde loɛnɛ Abalayama ko esika la Lasalo ani aingaläkä nda bokuku wandë. 24Inde loamama mbo— Fafa Abalayamao, okelaka’mi ngandi, tomaka Lasalo mbo alufieke bɔmbɔ wa isangakala shande nda balia ndɔɔngɛsɛ lolamɛ loami, eoka isooka lobaba nda wambe-bo.
25Nde Abalayama loonga mbo— Wana, enyelaka mbo ayaläk’aɛ nda wenda waɔlɔkɔ eyaɛ bieka bilau, la Lasalo imɔ ko eyande bieka bibe nde kwani inde asɔɔnjɔnjɔmɔ l’ono, nde aɛ wende la lobaba. 26Loaso loasi imɔ, lofundukwela lofi losokɔkɔmɛsɔmɔ atiteni yasu lanu mbo ebale la yɛmɛ yoakala end’ino angokɔkɔlɔ la angwɛnɛ oto wanu wotenana ono end’iso.
27Limɔ inde mbo— Eokao, itosombol’aɛ, Fafa, mbo otomek’inde omolo nda ndakɔ ya sango wami, eoka 28yende la bitungani bɔɔmwi, mbo aluwesek’iyo wewe mbo bataya imɔ koya nd’elela-ye ya bomusi.
29Nde Abalayama loonga mbo— Bende la kasa ya Mɔsɛ la eya Batɔndɔli, bokek’iyo. 30Kongo ko inde mbo— Mbayo, Fafa Abalayama, nde eyambo ɔmɔi ekuswa nda liwa okakɛ end’iyo, limɔ bekalangana. 31Nde Abalayama loonga mbo— Eya ngo mbo batioke Mɔsɛ la Batɔndɔli, ambo ɔmɔi ekuswa nda liwa, iyo batiangoimela.
Currently Selected:
Luka 16: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
