Luka 21

Lifaefi lia Oyawelu Olome

1Iläk’Inde baiso likolo, Inde lɔɛnɛ bato ani batotaka lifaefi liau nda sanduku ya lifaefi, bamɔi bafoka, 2nde Inde lɔɛnɛ imɔ ko otomali oyawelu olome iuwe ani atota bakute ambale ina. 3Yesu mbo— Wewe itoonga lanu mbo lotika-lo ende iuwe nde asota yao yoeta eya batotina; 4eoka iyo ana batotina, basokusola sinyo sha lilya liau nda lifaefi, kongo ko inde oyale la iuwe asokusola bitotina, ango yao imɔ ebilendeluku inde.

Lambaka la wɛlï-Boimo wa Yesu

5Aongäkä bamɔi loasɔ loa ndakɔ ya Mungu mbo eswomu nde la batalɛ bafi ba bɔfɛkɔ la biengo ebikusolomu nda lifaefi, Yesu mbo— 6Yao ina ebisomwaal’ino, ambo mbile elayaka olo angwɛnɛ litalɛ ango limɔi lilamachomoko likolo lia liasi, batotina belaukolomoko. 7Iyo lofelak’Inde mbo— ¿Boekesi, eni to mbile eyekayeke njasɔ-bi la eni ndembe yolembeela mbo bisamboya? 8Inde loonga to mbo— Lambaka la wɛlï mbo botalimbomo, eoka bato wike batoya nda lina liami, ani batoonga mbo— Imi yende Inde; la mbo— Mbile esamboya. Otutëke to iyo! 9Nde atook’ino mboli ya bita la liyɛyɛ lifi, owëke la iwaesa eoka yao bilayaka nde, kongo ko losilo loitoya lisasaya. 10Limɔ Inde loonga lau mbo— Yese la yese bitowesana, la bɔkɔta la bɔkɔta batowesana; 11lotukeso loa nyɛlɛ lofi la elela la elela, fondo la tɔtɔ̈kɔ twa loo la towaesa la tokesa twa use toyaka.

12Nde oso wa ebitotina-bi batotel’ino njala yau, batokongolak’ino, batokɛs’ino nda bisɔngɔmɛlɔ la nda bɛnyɔlɔlɔ, batosulyak’ino oso wa bɛkɔta la bakomanda eoka ya lina liami. 13Yao nd’atoya la fofe yanu yoongela’mi oso wau. 14Enyelaka to, otakelëke to olenda eoka ya baoi bomutoel’iyo, 15eoka Imi nd’atofaef’ino liasala la wɛlï ebitialonge biyani bitoti lanu ofenyakana ango ofekela.

16Kongo ko otowambomo ko l’ebaot’ino la bitungani yanu l’eba bɛkɔ̈kɔ yanu la baina lanu la bamɔi banu batoolomo lau; 17batotina batoiyana lanu eoka ya lina liami. 18Nde angwɛnɛ loswee ango lɔmɔi loa betö yanu kosɛɛsɛlɛ. 19Ko la boliliya wanu ino bolakɔkɔmɛsɛ balimo banu la liwawi. 20Akɛnɛk’ino wɛnɛ Yelusaleme bolingelomu la bikuke ya bita, limɔ waluwa mbo bɔlɛlɔ wa liömä bosamboya. 21Lamao eba Yudea bakweke mangu konda föngo la ebatoyalaka atiteni ya okenge bakuswakusweke la ebatoyalaka nda lousa nda bilanga bainwëk’imɔ okenge. 22Eoka ebacho-ba bende bacho ba likundeli la likuchi, nda bao bitotina eyatomökö nda Lokasa loa Mungu bilakɔchɔmɔkɔ. 23Aeko wale ende batomali ba lieme la ebatomwesa bana baɛlɛ nda bacho ana! Bifembi bifi nde bilayalaka nda yese etotina-ye la luno lolayalaka ende bato-ba. 24Bato-ao belatindomoko la chaka, belaindomoko kala ndokɛsɔmɔ bɛkɔwa nda biese yasi bitotina; bokengɛ wa Yelusaleme bolamatekelomoko la batindi ba ebati BaYuda kond’akasileke mbile ya ebati BaYuda.

25Bisisho bilɛnɛlɛkɛ nda liso lia use, nda tengai, la nda tolonge la nda wenda-bo toloi la loeyaeyo bilakwaka ende bato ba yese bitotina, eoka ya balundi ba balia la batutu ba eliya eyefi. 26Bato belalɛkwaka la bɔwa woenyelaka njasɔ ebikayeke nda wenda-bo, eoka befoka ya use belatukatuka. 27Limɔ bɛlɛnɛkɛ Wana wa Boto atoya nda bafita la bofoka la bɔfɛkɔ finɛ. 28Nde akaakoleke ebitotina-bi ndoya, limɔ yaimwaka yai la ilaka betö yanu likolo, eoka loendolomo loanu losamboya. 29Limɔ Yesu lotel’iyo bombila, Inde mbo— Tichaka bosau, ango ko isandu shasi imɔ; 30atofɛtɛ wao la kasa, osɔɛnɛ la ino angɛnɛ otolüwa mbo mbile ya eula esamboya. 31Ko ongoma akɛnɛk’ino wɛnɛ enjasɔ-bi bisoya, lüwaka mbo Bɔkɔta wa Mungu bosoya tina. 32Itoonga lanu wewe mbo— E-fɛtɔ-ye eitosila oso ani ebitotina-bi bikayi; 33use la se bilawanjwaka bao, kongo ko baoi bami batilawanjwek’imɔ.

34Lambaka la wɛli mbo betema yanu bitawa kwa afofa yeka la liwa änä la bifembi ya liwawi-li la bocho ona botaundes’ino futuku kwa lisɔngɔ lia ilonga, 35botoosha nde batotina ebatoyala fangi la fangi nda wenda-bo. 36Eokao yalaka la botengu la sombolaka mbile bitotina, mbo bolongeke ndosokwaka bitotina-bi ebisamboya la ndoemesana oso wa Wana wa Boto. 37Lise la lise Yesu loekekesa bato nda ndakɔ ya Mungu, nde la ocho Inde lokuswaka okaingala nda Löngo loa Elaya. 38Bato batotina lokɛsɛnɛ end’Inde la nɔngɔnɔngɔ nda ndakɔ ya Mungu ndokok’Inde.

Currently Selected:

Luka 21: NTKE58

Highlight

Copy