Matayo 26
26
Yenga ya Elambɔ ya BaYuda
1Asiläkä Yesu ndoongana lau ebaoi-ba batotina, limɔ Inde loonga la baeki bande mbo— 2Olüwi nde mbo mbisa ya bacho bambale, Elambɔ ya Lieti etoya la mbo Wana wa Boto ewambomoko mbo aolomoko nda liyeka.
3Lamao kanga ebieti, la biange ya bato losɔngɔmɔkɔ nda lɔmbɔ loa kanga eya wange ako Kayafa, 4la iyo lotwana kuko mbo baundeseke Yesu ko la shɔngɔlɔ mbo bolek’Inde. 5Kongo ko iyo loonga mbo— Inga nda lise lia Elambɔ mbo bato batakelaka etondo efi.
Yesu nda Betania
6Ayaläkä Yesu nda Betania nda ndakɔ ya Simona ewa baɛndi, 7otomali loya end’Inde la isako sha litalɛ sha baningo ba liɛsɛ ba loketi lofi fafo, la botomali losondola bao nda botö wa Yesu ani ayali Inde nda bieka. 8Nde ɛnɛ̈kɛ̈ baeki bande ongoma, iyo loongana la botema wäle, iyo mbo— ¿Koseya baningo-ba eok’iye? 9Bao beungesomo la loketi lofi fafo, yao kofomo ende eba touwe. 10Alüwäkä Yesu lioi-li, Inde loonga lau mbo— ¿Otosomel’inde ako otomali monito? Asokeela’mi likeeli lilau fafo. 11Wende la eba touwe lanu mbile bitotina, nde oti lami amamwito lanu mbile bitotina. 12Eoka asondolik’inde baningo nda bindo yami, akeliki nde ani loasɔ loa loombomo loami. 13Itoonga lanu wewe to, mbo— L’olo l’olo atonangolomo Mboli Ilau nda wenda bototi, elosokela botomali-bo, loao imɔ koongomo kwa loenyelesomo loande.
Yudasi
14Limɔ ɔmɔi wa eba liu la bambale lina liande liko Yudasi wa Keliote, inde lɔkɛ ende kanga ebieti, 15inde loonga mbo— Otokulia ofa’mi iye, eyambo imi nd’atowamb’Inde end’ino? Iyo lokweel’inde bieto yoengana pata kama isatɔ. 16Konda mbile-ao Yudasi lolukä fofe yowamba Yesu.
Elambɔ ya BaYuda
17Nda lise lia oso lia Elambɔ ya lituma, baeki loya ende Yesu oyafel’Inde mbo— ¿Olɛmbi mbo tokomyelek’Aɛ Elambɔ ya Lieti mbo oleke yao anima to? 18Inde mbo— Kɛndɛkɛ nda okenge ende Asisa, ongaka lande mbo, Boekesi mbo— Mbile yami esamboya, itola Elambɔ ya Lieti nda ndakɔ yaɛ amamwito la baeki bami. 19La baeki lokela kwa akambesäkä Yesu iyo la iyo lokomya Elambɔ ya Lieti.
20Iläkä buse litele, Inde loyala se nda bieka amamwito la baeki liu la bambale. 21Aläk’iyo, Yesu mbo— Itoonga lanu wewe mbo ɔmɔi wanu nd’atowamba’mi. 22Iyo looka ikɛnɛnɛ sifi la iyo loakola ɔmɔi la ɔmɔi ndoonga lande mbo— ¿Ngɛnɛ, ende to imi? 23Inde lomutola mbo— Inde oyasotaela bosamba amamwito lami nda lɔfɛfɛ, ambo inde-yo nd’atowamba’mi. 24Wana wa Boto atɔkɛ ndɔkɛ kwa atomökö nda Lokasa eoka yande, kongo ko aeko wale ende oto ona oyatowamba Wana wa Boto. Bolau ende oto-ao ani atiaotomökö angootomo. 25Lamao Yudasi oyawambäk’Inde, inde lomutola mbo— ¿Boekesi, ende to imi? Inde mbo— Aɛ nd’asoonga.
Elambɔ ya Masiya
26Aläk’iyo, Yesu lɔɔsɔ lituma, Inde lofa kelekëlë, Inde louna liao, Inde lofaefa baeki, Inde mbo— Ɔsɔkɔ, laka liao, lile bindo yami. 27Lamao Inde lɔɔsɔ kɔpɔ, Inde lofa kelekëlë, Inde lofaef’iyo kɔpɔ; Inde mbo— Mwaka yao, ino yaatotina; 28eoka eba bende bakila bami ba Ngɛla Eyai ebasosendolomo bato wike loasɔ loa limɛsɛli lia batwanelo. 29Kongo ko itoonga lanu mbo— Itiamwe imɔ liamɔ-li lia boliki, konda lise lina elikamweke’mi eliyai amamwito lanu nda Bɔkɔta wa Sango wami. 30Limɔ iyo lochwa bɔɛlɛ, iyo lokuswa okakɛ nda löngo loa Elaya.
31Lamao Yesu loonga lau mbo— Ino yaatotina otokwa se eoka yami la ebocho-bo, loatomökö nde nda Lokasa mbo—
Itokuchaka Botingani, limɔ bɛkɔkɔ bitomelesomoko mya.
32Nde mbisa ya litɛmwi liami, itoetel’ino oso konda Ngalilai. 33Nde Petelo lomutola lande mbo— Ango batotina bekwa se loasɔ loaɛ, nde inga to imi, ango sinyo. 34Yesu loonga lande mbo— Wewe, isoonga laɛ mbo, ko la ebocho-bo, oso ani kɔkɔ ekati lɔkɔkɔ̈lɔ̈kɔ, aɛ nd’atoanganya Imi baanganya basatɔ. 35Petelo loonga lande mbo— Ambo yengani ndowa amamwito laɛ; nde imi itiangoangany’Aɛ. Baeki batotina loonga nde ko ongoma.
Elanga ya Ngetesemane
36Iyäkä Yesu amamwito lau nda elela eyetangomu mbo Ngetesemane, Inde loonga la baeki mbo— Yalaka se ono ani Imi itokɛ onamona okasombola. 37Inde lotolana la Petelo la bana bambale ba Sebedai, limɔ Inde loakola ndowa l’ikɛnɛnɛ sifi la lɔtɔtɔngɔ. 38Inde loonga lau mbo— Botema wami bosowa l’ikɛnɛnɛ ambo showa, tatikalaka eya la lambaka lami.
39Limɔ Inde lɔkɛ la oso sinyo, Inde loingala la bɔmbɔ nda nyɛlɛ ani atosombola mbo— Sango wami, eyambo lokɔkɔlɔ ongoma, kɔpɔ-ye eeteeleke’mi, tinga to lisangi liami, kangä eliaɛ likelomoko. 40Inde loinywa ende baeki, Inde loosh’iyo ani basoingala ilɔ, Inde loonga la Petelo mbo— ¿Ongoma, botilongeke olamba lami ango saa ɛmwito? 41Lambaka la sombolaka mbo otaɔtɔ nda lisoshela; botema nde bosokimela kongo ko bindo bile la bɔlɛmbu.
42Inde lɔkɛ likɛ lia ambale, okasombola mbo— Sango wami, eyambo kɔpɔ-ye angokɔkɔlɔ oeteela’mi sakolo ko imweke yao, ambo lisangi liaɛ likelomoko. 43Limɔ Inde loinywa liasi ende baeki, Inde loosh’iyo basoingala tɔlɔ liasi, eoka baiso bau baaka la bolengelenge. 44Inde lomach’iyo, Inde lɔkɛ lokasombola lisombola lia asatɔ ko la baoi-ao.
45Limɔ Inde loinywa liasi ende baeki, Inde loonga lau mbo— Ingalaka to, eumaka.… Tɛnɛngɔ, saa esamboya, Wana wa Boto akowambomo nda besamba ya bato abe. 46Emalaka, tɔɛkɛ. Tɛnɛ, inde oyatowamba’mi ale oko tina.
Liwambomu la liundomu lia Yesu
47Aaka Inde atoonga, kwaamao Yudasi loya, ɔmɔi wa eba liu la ambale, la amamwito lande ekuke ya bato la chaka la totumbe, ebasokwäkä ende kanga ebieti la biange ya bato. 48Inde oyawambi to Yesu nd’afäk’iyo ndembe oso, mbo— Boto oyatota’mi et’inde ichou, ambo inde-yo; undesaka’Inde ngwi. 49Ongoma Yudasi loya kwaamao ende Yesu, inde mbo— Liseeli end’Aɛ, Boekesi; la inde lot’inde ichou. 50La Yesu loonga lande mbo— Wina, oyeli nd’iye? Lamao iyo loyela Yesu otel’Inde besamba, iyo loundes’Inde ndɔkɛ lande. 51Futuku, ɔmɔi wa ebayäkä la Yesu lonanola bosamba wɔɔmɔlɔ ambɔtɛ, inde loswa bɔkɔwa wa kanga eyeti, inde lotinya inde litoi. 52Lamao Yesu loonga lande mbo— Ɔtɛsɛkɛ ambɔtɛ waɛ nda ekoko, eoka batotina ebatounda ambɔtɛ, batosɛɛsɛlɛ ngo ko la ambɔtɛ. 53¿Otangi nde mbo itikɔkɔlɛ ndota Sango wami lioi la mbo Inde kotomela’mi ngo ko kwani basilikani bolongela bikuke liu la imbale? 54¿Nde eya to ongoma, baoi ba Kasa kokɔchɔmɔ moni, ani Kasa yaongäkä mbo loyaka ngo ko ongoma?
55Limɔ Yesu ko la mbil’ao, loonga l’eba bikuke mbo— Oyeli oyaundesa’mi la chaka la totumbe, kwa mbo yende booni? Lise la lise ayaläkä’mi lanu, nda Ndakɔ ya Mungu, aekesiki’mi ino, otiundese’mi. 56Nde bitotina-bi bisokelomo mbo Kasa ya Batɔndɔli bikɔchɔmɔkɔ. Lamao baeki batotina lomach’Inde, iyo lolɔmwaka.
Yesu oso wa Ikumbɛ sha BaYuda
57Limɔ ebaundesäkä Yesu lɔkɛsɛ Inde ende Kayafa, ako kanga ya wange, omao olo asɔngɔmɔ̈kɔ̈ batikasa la biange. 58Nde Petelo lotut’Inde esika konda lɔ̈mbɔ loa kanga eyeti, la inde lɔɔtɔ hɔu; inde loyala se omao amamwito la betingani mbo ɛnɛkɛ tuu ya loasɔ.
59Kanga ebieti la eba ikumbɛ batotina loluka itɔmbɔ mbo boleke Yesu nde batiɛnɛkɛ, 60ango bato wike lowanjel’Inde la nanga. Nde ko liili, bambale loyawanjel’Inde, 61iyo mbo— Oyo ango’yo loonga mbo— Isokɔkɔlɔ ndoukola Ndako ya Mungu la ndoswa yao liasi nda becho isatɔ. 62Limɔ kanga eyeti loemala, inde loonga la Yesu mbo— Otiamutole ango lioi? ¿Tɔtɔmbɔ etosoya l’ebato-ba twende moni? 63Nde Yesu loyalaka tau. Lamao kanga eyeti loonga lande mbo— Itotel’Aɛ ekanɔ ko la lina lia Mungu wa lokato mbo oluwesek’iso kwa mbo Aɛ wende ngo Masiya, ako Wana wa Mungu. 64Yesu loonga lande mbo— Kwa asoong’aɛ ongoma; itoonga imɔ ko mbo wɛnɛkɛ nde Wana wa Boto elayalaka se nda bosamba w’olome wa Bofoka ani eyaka nda bafita ba use. 65Limɔ kanga eyeti losalaka bisinda yande, inde mbo— Asosɛɔlɔ Mungu, ¿Tolukeke tɔtɔmbɔ twasi eok’iye? Tɛnɛngɔ, okooka ko kwani asosɛɔlɔ Mungu; 66Likomyi lianu liende moni? Iyo lomutola mbo— Engani nde ndoolomo. 67Limɔ iyo lotwɛlɛ Inde sɔi nda bɔmbɔ, iyo loomak’Inde toku, iyo losekel’Inde mbaka, 68iyo mbo— Tatɔndɔɛlɛk’iso, Aɛ ako Masiya, ¿Oyo ndai oyasokuch’Aɛ?
Lianganyi lia Petelo
69Ayaläkä Petelo lousa nda lɔ̈mbɔ boseka ɔmɔi bosali loya end’inde, inde loonga la Petelo mbo— Aɛ imɔ oyaliki amamwito la Yesu wa Ngalilai. 70Nde Petelo loanganya oso wau batotina mbo— Itiluwe elotoong’aɛ. 71Akuswäk’inde nda lilɛlɛ lia bome boseka wasi lɔɛnɛ inde, la inde loonga la bato ebayali omao, mbo— Oyo imɔ ayaliki amamwito la Yesu wa Nasalete. 72Nde Petelo loanganya imɔ liasi oko la ekanɔ mbo— Itiluwe boto ona, fufo. 73Mbisa ya mbile sinyo ebaemali omao loya oyaonga la Petelo mbo— Wewe, l’aɛ imɔ wende ɔmɔi wau, eoka ngɔlu yaɛ imɔ esotombol’aɛ. 74Lamao Petelo loakola ndosenda bieo la ndotinyaka ekanɔ mbo— Itiluwe boto ona. Kwaamao kɔkɔ lota lɔkɔ̈kɔ̈lɔ̈kɔ̈, 75la Petelo loenyela lioi eliaongäkä Yesu lande mbo— Oso ani kɔkɔ ekati lɔkɔ̈kɔ̈lɔ̈kɔ̈, otoanganya’mi banganya basatɔ. Lamao inde lokuswa lousa, inde lolela kɛlɛlikɛlɛli.
Currently Selected:
Matayo 26: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
Matayo 26
26
Yenga ya Elambɔ ya BaYuda
1Asiläkä Yesu ndoongana lau ebaoi-ba batotina, limɔ Inde loonga la baeki bande mbo— 2Olüwi nde mbo mbisa ya bacho bambale, Elambɔ ya Lieti etoya la mbo Wana wa Boto ewambomoko mbo aolomoko nda liyeka.
3Lamao kanga ebieti, la biange ya bato losɔngɔmɔkɔ nda lɔmbɔ loa kanga eya wange ako Kayafa, 4la iyo lotwana kuko mbo baundeseke Yesu ko la shɔngɔlɔ mbo bolek’Inde. 5Kongo ko iyo loonga mbo— Inga nda lise lia Elambɔ mbo bato batakelaka etondo efi.
Yesu nda Betania
6Ayaläkä Yesu nda Betania nda ndakɔ ya Simona ewa baɛndi, 7otomali loya end’Inde la isako sha litalɛ sha baningo ba liɛsɛ ba loketi lofi fafo, la botomali losondola bao nda botö wa Yesu ani ayali Inde nda bieka. 8Nde ɛnɛ̈kɛ̈ baeki bande ongoma, iyo loongana la botema wäle, iyo mbo— ¿Koseya baningo-ba eok’iye? 9Bao beungesomo la loketi lofi fafo, yao kofomo ende eba touwe. 10Alüwäkä Yesu lioi-li, Inde loonga lau mbo— ¿Otosomel’inde ako otomali monito? Asokeela’mi likeeli lilau fafo. 11Wende la eba touwe lanu mbile bitotina, nde oti lami amamwito lanu mbile bitotina. 12Eoka asondolik’inde baningo nda bindo yami, akeliki nde ani loasɔ loa loombomo loami. 13Itoonga lanu wewe to, mbo— L’olo l’olo atonangolomo Mboli Ilau nda wenda bototi, elosokela botomali-bo, loao imɔ koongomo kwa loenyelesomo loande.
Yudasi
14Limɔ ɔmɔi wa eba liu la bambale lina liande liko Yudasi wa Keliote, inde lɔkɛ ende kanga ebieti, 15inde loonga mbo— Otokulia ofa’mi iye, eyambo imi nd’atowamb’Inde end’ino? Iyo lokweel’inde bieto yoengana pata kama isatɔ. 16Konda mbile-ao Yudasi lolukä fofe yowamba Yesu.
Elambɔ ya BaYuda
17Nda lise lia oso lia Elambɔ ya lituma, baeki loya ende Yesu oyafel’Inde mbo— ¿Olɛmbi mbo tokomyelek’Aɛ Elambɔ ya Lieti mbo oleke yao anima to? 18Inde mbo— Kɛndɛkɛ nda okenge ende Asisa, ongaka lande mbo, Boekesi mbo— Mbile yami esamboya, itola Elambɔ ya Lieti nda ndakɔ yaɛ amamwito la baeki bami. 19La baeki lokela kwa akambesäkä Yesu iyo la iyo lokomya Elambɔ ya Lieti.
20Iläkä buse litele, Inde loyala se nda bieka amamwito la baeki liu la bambale. 21Aläk’iyo, Yesu mbo— Itoonga lanu wewe mbo ɔmɔi wanu nd’atowamba’mi. 22Iyo looka ikɛnɛnɛ sifi la iyo loakola ɔmɔi la ɔmɔi ndoonga lande mbo— ¿Ngɛnɛ, ende to imi? 23Inde lomutola mbo— Inde oyasotaela bosamba amamwito lami nda lɔfɛfɛ, ambo inde-yo nd’atowamba’mi. 24Wana wa Boto atɔkɛ ndɔkɛ kwa atomökö nda Lokasa eoka yande, kongo ko aeko wale ende oto ona oyatowamba Wana wa Boto. Bolau ende oto-ao ani atiaotomökö angootomo. 25Lamao Yudasi oyawambäk’Inde, inde lomutola mbo— ¿Boekesi, ende to imi? Inde mbo— Aɛ nd’asoonga.
Elambɔ ya Masiya
26Aläk’iyo, Yesu lɔɔsɔ lituma, Inde lofa kelekëlë, Inde louna liao, Inde lofaefa baeki, Inde mbo— Ɔsɔkɔ, laka liao, lile bindo yami. 27Lamao Inde lɔɔsɔ kɔpɔ, Inde lofa kelekëlë, Inde lofaef’iyo kɔpɔ; Inde mbo— Mwaka yao, ino yaatotina; 28eoka eba bende bakila bami ba Ngɛla Eyai ebasosendolomo bato wike loasɔ loa limɛsɛli lia batwanelo. 29Kongo ko itoonga lanu mbo— Itiamwe imɔ liamɔ-li lia boliki, konda lise lina elikamweke’mi eliyai amamwito lanu nda Bɔkɔta wa Sango wami. 30Limɔ iyo lochwa bɔɛlɛ, iyo lokuswa okakɛ nda löngo loa Elaya.
31Lamao Yesu loonga lau mbo— Ino yaatotina otokwa se eoka yami la ebocho-bo, loatomökö nde nda Lokasa mbo—
Itokuchaka Botingani, limɔ bɛkɔkɔ bitomelesomoko mya.
32Nde mbisa ya litɛmwi liami, itoetel’ino oso konda Ngalilai. 33Nde Petelo lomutola lande mbo— Ango batotina bekwa se loasɔ loaɛ, nde inga to imi, ango sinyo. 34Yesu loonga lande mbo— Wewe, isoonga laɛ mbo, ko la ebocho-bo, oso ani kɔkɔ ekati lɔkɔkɔ̈lɔ̈kɔ, aɛ nd’atoanganya Imi baanganya basatɔ. 35Petelo loonga lande mbo— Ambo yengani ndowa amamwito laɛ; nde imi itiangoangany’Aɛ. Baeki batotina loonga nde ko ongoma.
Elanga ya Ngetesemane
36Iyäkä Yesu amamwito lau nda elela eyetangomu mbo Ngetesemane, Inde loonga la baeki mbo— Yalaka se ono ani Imi itokɛ onamona okasombola. 37Inde lotolana la Petelo la bana bambale ba Sebedai, limɔ Inde loakola ndowa l’ikɛnɛnɛ sifi la lɔtɔtɔngɔ. 38Inde loonga lau mbo— Botema wami bosowa l’ikɛnɛnɛ ambo showa, tatikalaka eya la lambaka lami.
39Limɔ Inde lɔkɛ la oso sinyo, Inde loingala la bɔmbɔ nda nyɛlɛ ani atosombola mbo— Sango wami, eyambo lokɔkɔlɔ ongoma, kɔpɔ-ye eeteeleke’mi, tinga to lisangi liami, kangä eliaɛ likelomoko. 40Inde loinywa ende baeki, Inde loosh’iyo ani basoingala ilɔ, Inde loonga la Petelo mbo— ¿Ongoma, botilongeke olamba lami ango saa ɛmwito? 41Lambaka la sombolaka mbo otaɔtɔ nda lisoshela; botema nde bosokimela kongo ko bindo bile la bɔlɛmbu.
42Inde lɔkɛ likɛ lia ambale, okasombola mbo— Sango wami, eyambo kɔpɔ-ye angokɔkɔlɔ oeteela’mi sakolo ko imweke yao, ambo lisangi liaɛ likelomoko. 43Limɔ Inde loinywa liasi ende baeki, Inde loosh’iyo basoingala tɔlɔ liasi, eoka baiso bau baaka la bolengelenge. 44Inde lomach’iyo, Inde lɔkɛ lokasombola lisombola lia asatɔ ko la baoi-ao.
45Limɔ Inde loinywa liasi ende baeki, Inde loonga lau mbo— Ingalaka to, eumaka.… Tɛnɛngɔ, saa esamboya, Wana wa Boto akowambomo nda besamba ya bato abe. 46Emalaka, tɔɛkɛ. Tɛnɛ, inde oyatowamba’mi ale oko tina.
Liwambomu la liundomu lia Yesu
47Aaka Inde atoonga, kwaamao Yudasi loya, ɔmɔi wa eba liu la ambale, la amamwito lande ekuke ya bato la chaka la totumbe, ebasokwäkä ende kanga ebieti la biange ya bato. 48Inde oyawambi to Yesu nd’afäk’iyo ndembe oso, mbo— Boto oyatota’mi et’inde ichou, ambo inde-yo; undesaka’Inde ngwi. 49Ongoma Yudasi loya kwaamao ende Yesu, inde mbo— Liseeli end’Aɛ, Boekesi; la inde lot’inde ichou. 50La Yesu loonga lande mbo— Wina, oyeli nd’iye? Lamao iyo loyela Yesu otel’Inde besamba, iyo loundes’Inde ndɔkɛ lande. 51Futuku, ɔmɔi wa ebayäkä la Yesu lonanola bosamba wɔɔmɔlɔ ambɔtɛ, inde loswa bɔkɔwa wa kanga eyeti, inde lotinya inde litoi. 52Lamao Yesu loonga lande mbo— Ɔtɛsɛkɛ ambɔtɛ waɛ nda ekoko, eoka batotina ebatounda ambɔtɛ, batosɛɛsɛlɛ ngo ko la ambɔtɛ. 53¿Otangi nde mbo itikɔkɔlɛ ndota Sango wami lioi la mbo Inde kotomela’mi ngo ko kwani basilikani bolongela bikuke liu la imbale? 54¿Nde eya to ongoma, baoi ba Kasa kokɔchɔmɔ moni, ani Kasa yaongäkä mbo loyaka ngo ko ongoma?
55Limɔ Yesu ko la mbil’ao, loonga l’eba bikuke mbo— Oyeli oyaundesa’mi la chaka la totumbe, kwa mbo yende booni? Lise la lise ayaläkä’mi lanu, nda Ndakɔ ya Mungu, aekesiki’mi ino, otiundese’mi. 56Nde bitotina-bi bisokelomo mbo Kasa ya Batɔndɔli bikɔchɔmɔkɔ. Lamao baeki batotina lomach’Inde, iyo lolɔmwaka.
Yesu oso wa Ikumbɛ sha BaYuda
57Limɔ ebaundesäkä Yesu lɔkɛsɛ Inde ende Kayafa, ako kanga ya wange, omao olo asɔngɔmɔ̈kɔ̈ batikasa la biange. 58Nde Petelo lotut’Inde esika konda lɔ̈mbɔ loa kanga eyeti, la inde lɔɔtɔ hɔu; inde loyala se omao amamwito la betingani mbo ɛnɛkɛ tuu ya loasɔ.
59Kanga ebieti la eba ikumbɛ batotina loluka itɔmbɔ mbo boleke Yesu nde batiɛnɛkɛ, 60ango bato wike lowanjel’Inde la nanga. Nde ko liili, bambale loyawanjel’Inde, 61iyo mbo— Oyo ango’yo loonga mbo— Isokɔkɔlɔ ndoukola Ndako ya Mungu la ndoswa yao liasi nda becho isatɔ. 62Limɔ kanga eyeti loemala, inde loonga la Yesu mbo— Otiamutole ango lioi? ¿Tɔtɔmbɔ etosoya l’ebato-ba twende moni? 63Nde Yesu loyalaka tau. Lamao kanga eyeti loonga lande mbo— Itotel’Aɛ ekanɔ ko la lina lia Mungu wa lokato mbo oluwesek’iso kwa mbo Aɛ wende ngo Masiya, ako Wana wa Mungu. 64Yesu loonga lande mbo— Kwa asoong’aɛ ongoma; itoonga imɔ ko mbo wɛnɛkɛ nde Wana wa Boto elayalaka se nda bosamba w’olome wa Bofoka ani eyaka nda bafita ba use. 65Limɔ kanga eyeti losalaka bisinda yande, inde mbo— Asosɛɔlɔ Mungu, ¿Tolukeke tɔtɔmbɔ twasi eok’iye? Tɛnɛngɔ, okooka ko kwani asosɛɔlɔ Mungu; 66Likomyi lianu liende moni? Iyo lomutola mbo— Engani nde ndoolomo. 67Limɔ iyo lotwɛlɛ Inde sɔi nda bɔmbɔ, iyo loomak’Inde toku, iyo losekel’Inde mbaka, 68iyo mbo— Tatɔndɔɛlɛk’iso, Aɛ ako Masiya, ¿Oyo ndai oyasokuch’Aɛ?
Lianganyi lia Petelo
69Ayaläkä Petelo lousa nda lɔ̈mbɔ boseka ɔmɔi bosali loya end’inde, inde loonga la Petelo mbo— Aɛ imɔ oyaliki amamwito la Yesu wa Ngalilai. 70Nde Petelo loanganya oso wau batotina mbo— Itiluwe elotoong’aɛ. 71Akuswäk’inde nda lilɛlɛ lia bome boseka wasi lɔɛnɛ inde, la inde loonga la bato ebayali omao, mbo— Oyo imɔ ayaliki amamwito la Yesu wa Nasalete. 72Nde Petelo loanganya imɔ liasi oko la ekanɔ mbo— Itiluwe boto ona, fufo. 73Mbisa ya mbile sinyo ebaemali omao loya oyaonga la Petelo mbo— Wewe, l’aɛ imɔ wende ɔmɔi wau, eoka ngɔlu yaɛ imɔ esotombol’aɛ. 74Lamao Petelo loakola ndosenda bieo la ndotinyaka ekanɔ mbo— Itiluwe boto ona. Kwaamao kɔkɔ lota lɔkɔ̈kɔ̈lɔ̈kɔ̈, 75la Petelo loenyela lioi eliaongäkä Yesu lande mbo— Oso ani kɔkɔ ekati lɔkɔ̈kɔ̈lɔ̈kɔ̈, otoanganya’mi banganya basatɔ. Lamao inde lokuswa lousa, inde lolela kɛlɛlikɛlɛli.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.