Genesis 11
11
Iqmoeq 11
Bhaqbhulloq ilkhaol daqmoe
1Miltsaq kovtavq khe jaol nail tsaol-aq juq iqsanl mail neq, daoq teevq phaq taivq-ail ge nail ngaol.
2Aqyu juq nlma dov khoeq phao dov lal khi, Silnaqlaq miltsaq bhai jiav nail, daiga ga ma bhai kev lal-u phao, jaolduq al duq bhai jaol-a nail ngaol.
3Aq-u phao, aqyu juq teevq gaq nee teevq gaq ge nail: "Lal yaoq. Ngadao juq maqov aqheeq aqgaol gaol dai poiv bhel" dai, ge nail ngaol. Al heel ngel-i mail, aqyu juq cov nail haqbhoil lovmav nail galduq, maqov bhai maqkhaiq, maqov bhai bhi he thaiq nail galduq, teivqnav bhai maqkhaiq, yuq-a nail ngaol.
4Aqyu juq ge nail: "Lal yaoq. Ngadao juq nqtavq bha thaoq tu nail ilkhaol daqmoe nee mail teevq gaq khe-ai, meenq meenq ma teevq meenq cov bhel. Al hai nl nail bhaq da nee, ngadao juq aqmil dov lal khi, miltsaq bhai maq jaol pav maq jaol sav dai, jaol kivq nail ngaol" dai, ge nail ngaol.
5Thail hai ngaol-aoq, Heeqphaq Miqyail neq, aqyu juq-i mail cov-a nail meenq dai khi, ilkhaol daqmoe bhai hel daiq nail dai khi, yavq kha lee-a nail ngaol.
6Aq-u phao, aivq ge nail: "Niil aq-il, aqyu juq neq, jeq-e teevq jeq-e taivq-ail pevq khi, daoq teevq phaq taivq-ail ge nail bhaq da nee, aqyu juq cov nail daq-n aoq nail ngaol. Al heel ngel-i mail, aqyu juq-i mail lainq nail khe-ai, teevq gaq iqsanl lav tsoiq nail maq jiav-ail.
7Lal yaoq. Yavq kha-ail khi, aqyu juq teevq gaq nee teevq gaq daoq maq gov heeq nia dai, aqyu juq nail daoq bhai lav pav bhiq bhel" dai, ge bhiq-a nail ngaol.
8Al heel ngel-i mail, Heeqphaq Miqyail neq, aqyu juq bhai miltsaq doi dai, bhi pav bhi sav ail-a nail ngaol. Aqyu juq-i mail meenq cov nail gail, naq lai-a nail ngaol.
9Heeqphaq Miqyail neq, tsaol-aq yaq juq nail daoq bhai lav pav bhiq khi miltsaq doi dai, bhi pav bhi sav ail-a nail ngel-i mail, meenq al meenq bhai neq, Bhaqbhulloq#11.9 Bhaqbhulloq Bhaqbhulloq dai, ge nail daoqceevq neq, bhi pav bhi sal-ai nail dai, ge movq nail ngaol dai khul nail ngaol.
Seiqmav nee mail yavq kha lee thaq nail juq
10Niil neq, Seiqmav nee mail yavq kha lee thaq nail juq nail ganl gevq-ai thaq nail ngaol. Ulcuvq deq pheeq gaq khi mail pultavq, nvq kovq bhee lal khi, Seiqmav nail aqkovq 100 kovq bhee lal-u phao, Aqphaqsav dai khul nail yaqyov teevq gaq ya-a nail ngaol.
11A bhai nee mail pultavq aivq neq, 500 kovq bhee dai, gaoq doevq khi, yaqmiq yaqyov juq, gaoq ya-a nail ngaol.
12Aq phaq sal neq, aivq nail aqkovq 35 kovq bhee lal-u phao, Seiqlav dai khul nail yaqyov teevq gaq ya-a nail ngaol.
13A bhai nee mail pultavq aivq neq, 403 kovq bhee dai gaoq doevq khi, yaqmiq yaqyov juq gaoq ya-a nail ngaol.
14Seiq lav neq, aivq nail aqkovq 30 kovq bhee lal-u phao, Eiqbheiq dai khul nail yaqyov teevq gaq ya-a nail ngaol.
15A bhai nee pultavq aivq neq, 403 kovq bhee dai doevq khi yaqmiq yaqyov juq gaoq ya-a nail ngaol.
16Eiq bheiq neq aivq nail aqkovq 34 kovq bhee lal-u phao, Phaiqlail dai, khul nail yaqyov teevq gaq ya-a nail ngaol.
17A bhai nee pultavq aivq neq, 430 kovq bhee dai gaoq doevq khi yaqmiq yaqyov juq gaoq ya-a nail ngaol.
18Phaiqlail neq, aivq nail aqkovq 30 bhee lal-u phao, Leiq-ul dai khul nail yaqyov teevq gaq ya-a nail ngaol.
19A bhai nee pultavq aivq neq, 209 kovq bhee dai gaoq doevq khi yaqmiq yaqyov juq gaoq ya-a nail ngaol.
20Leiq-ul neq, aivq nail aqkovq 32 kovq bhee lal-u phao, Selu dai khul nail yaqyov teevq gaq ya-a nail ngaol.
21A bhai nee pultavq aivq neq, 207 kovq bhee dai gaoq doevq khi, yaqmiq yaqyov juq gaoq ya-a nail ngaol.
22Se lu neq aivq nail aqkovq 30 bhee lal-u phao, Naqhaoq dai khul nail yaqyov teevq gaq ya-a nail ngaol.
23A bhai nee pultavq aivq neq, 200 kovq bhee dai gaoq doevq khi yaqmiq yaqyov juq gaoq ya-a nail gaol.
24Naqhaoq neq, aivq nail aqkovq 29 kovq bhee lal-u phao, Teiqlav dai khul nail yaqyov teevq gaq ya-a nail ngaol.
25A bhai nee pultavq aivq neq, 119 kovq bhee dai, gaoq doevq khi yaqmiq yaqyov juq gaoq ya-a nail ngaol.
26Teiqlav neq, aivq nail aqkovq 70 bhee lal-u phao, Aqbhaqlaq, Naqhaoq dai khi Haqlanq bhai ya-a nail ngaol.
Teiqlav nee mail yavq kha lee thaq nail juq
27Niil neq, Teiqlav nee mail yavq kha lee thaq nail juq ngaol.
Teiqlav neq, Aqbhaqlaq, Naqhaoq dai khi Haqlanq nail aqbhu pevq nail ngaol. Haqlanq neq, Laoltavq nail aqbhu pevq nail ngaol.
28Haqlanq neq, aivq nail aqbhu jaol-ai haq-u nee mail, aqyu juq nail jaol kaoq jaol laoq pevq nail Khaqlaqdail nail tsaol-aq jaol nail Ullav meenq bhai sil-a nail ngaol.
29Aqbhaqlaq khi mail Naqhaoq khaqma hevq-a nail ngaol. Aqbhaqlaq nail khaqma neq, Saqlaqiq dai khul khi Naqhaoq nail khaqma neq, Haqlanq nail yaqmiq Millaqkhaq dai khul nail ngaol. Haqlanq neq, Millaqkhaq dai khi Ilsaqkha nail aqbhu pevq nail ngaol.
30Thail hai ngaol-aoq, Saqlaqiq neq, maq bhao aqma pevq nail ngel-i mail, yaq maq jaol lee nia-ail.
31Teiqlav neq, aivq nail yaqyov Aqbhaqlaq, aqjievq Laoltavq dai khi khiqma pevq nail Aqbhaqlaq nail khaqma Saqlaqiq bhai iqsanl khul khi, Khaqnanq milkhaoq bha ail nail galduq, Khaqlaqdail nail tsaol-aq jaol nail Ullav nail meenq nee mail dov lal-a nail nee ovqtavq, Haqlanq meenq bha lai nail dai khi, lai-u phao, Haqlanq meenq bhai lai kev khi, a bhai jaol-a nail ngaol.
32Teiqlav neq, meenq al meenq bhai jaol-u phao, aivq nail aqkovq 205 kovq bhai sil-a nail ngaol.
Currently Selected:
Genesis 11: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
