Genesis 19

Iqmoeq 19

Saoldoq meenq khi Gaolmaollav meenq bhai lav cov bhiq-a nail ganl

1Aq-u nqkiv, nqtavq gaqkhoel nvq gaq neq, Saoldoq meenq bhai kev lee-u phao, Laoltavq neq, meenq nail lolgov govkhoiq bhai jaol deel khi mail jaol nail ngaol. Nqtavq gaqkhoel al nvq gaq bhai ya moel-u phao, thul khi mail hav lavq-a nail ngaol. Aivq neq, al nvq gaq nail sivtavq-ai maivphaoq miltsaq bhai gaol beiv khi,

2ge bhiq-a nail: "Ngaq nail heeqphaq-ol, ngaq nail ilkhaol bha lal khi aqkhil tsiq khi mail nqkiv phao neq, niai yavq yaoq. Niaohao nqhao naq mav phao taivq-ail, gailkhaol gaoq dov lai yaoq" dai, khul bhiq-a nail ngaol. Nqtavq gaqkhoel al nvq gaq neq, "Maq aol lal yaoq-aol, nv juq teevq kivq kivq lao meenq nail julgu leivkeiv bhai taivq-ail jaol nail ngaol" dai, ge bhiq-a nail ngaol.

3Thail hai ngaol-aoq, Laoltavq neq, teevq yanq ngal-aq, teevq pov al jaiq-ail khul nail ngel-i mail, ilkhaol bha lal-a nail ngaol. Laoltavq aqyu nvq gaq nail galduq deqtsiq maq aol nail khaqmul lav sav khi jaq nail daol nail aqbhee iqsanl lav sav bhiq-a nail ngaol. Aqyu nvq gaq gail jaq-a nail ngaol.

4Daq-i juq maq iq thaiq lai nail iqmoeq bhai, Saoldoq meenq khe yaqyov-aq juq iqsanl mail yaqyov-aq yaqnoil juq maqkhaiq, joiqmaoq juq maqkhaiq, Laoltavq nail ilkhaol bhai lovq jaoq-ai thaq nail ngaol.

5Aqyu juq Laoltavq bhai niail hai gul-a nail ngaol: "Yanq-nl kiv khe naoq nail ilkhaol bhai lee-a nail yaqyov-aq al nvq gaq khaq bha jaol nail-aiq. Aqyu juq bhai hevq dol leevq yaoq. Nv juq aqyu nvq gaq nee mail jaol tavq movq-il" dai, gul bhiq-a nail ngaol.

6Laoltavq neq, ilkhaol lavqniil phao dov-ail khi, lolgov pheeq thaiq-a nail ngaol.

7Aivq ge nail: "Aqivq jaqbheq juq-ol, thail hai haqeiv nail ganl thaq nl-oq dai, ngal thaoq hal nail ngaol.

8Hel daiq yaoq. Ngaq bhai yaqyov-aq nee mail teevq thal-iq maq jaol tavq daiq haq nail yaqmiq nvq gaq jaol nail ngaol. Yaqmiq al nvq gaq bhai nul juq neema khal tsaq nail khe-ai, nl nail ya nail galduq ngal bivq nail ngaol. Thail hai ngaol-aoq, daq-i niil juq bhai neq, khul gail thaq khi bhiq. Aqyu nvq gaq neq, ngaq nail daq-i pevq nail ngel-i mail, ngaq bhai dal nail ngaol" dai, thaoq hal bhiq-a nail ngaol.

9Thail hai ngaol-aoq, aqyu juq niail hai gul-a nail ngaol: "Tsaoq phail lavq yaoq. Naol neq, yu nail tsaol-aq khe-ai, niai jaol lee khi niil aq-il neq, nv juq bhai yalkhaq dal nail gaq khe-ai, gaoq nl lal-il. Aqyu nvq gaq-i ya daq nail nee maqtsil, naol gaoq ya daq jaiq nail ngaol" dai, gul bhiq khi Laoltavq bhai haoqnaol phao doeq gai-aivq-a nail nee ovqtavq, lolgov deeq pav nail galduq sivtavq phao dav lal-a nail ngaol.

10Aq-u phao, daq-i al nvq gaq neq, lolgov phao khi Laoltavq bhai ilkhaol lavqkhoel bha he bhoel-aivq lavq-a nail nee ovqtavq, lolgov pheeq thaiq-a nail ngaol.

11A bhai nee ngal-aq, lavqniil phao khe jaol nail yaqnoil nee yovkav bha kev dai, maivneev bhi peivq ail-a nail ngel-i mail, aqyu juq lolgov bhai lai jai khi mail hal pov gaoq, maq hal pov moel nia-al.

12A bhai nee ngal-aq, daq-i al nvq gaq Laoltavq bhai ge bhiq-a nail: "Meenq niil meenq bhai naoq-ai nee tavq nail tsaol-aq jaol naol laiq. Naoq nail aqhaoq juq, naoq nail yaqyov juq, yaqmiq juq jaol haq neq, meenq niil meenq nee mail bhi tsaoq dov gil yaoq.

13Khul khi mail dai ngal-aq, nv nvq gaq neq, meenq niil meenq bhai lav cov-aiq nail ngaol. Heeqphaq Miqyail nail sivtavq bhai, "Aqyu juq oeqbal nl bheeq dee dee nail ngaol" dai, al jaiq-ail gul nail aqthel ya gaiq nail bhaq da nee, meenq niil meenq bhai lav cov nail galduq, nv nvq gaq bhai bhi lee lavq-a nail ngaol" dai, ge bhiq-a nail ngaol.

14Aq-u phao, Laoltavq aivq nail yaqmiq bhai hevq naol dai, ge-ai thaq nail, aivq nail aqhaoq juq jaol nail bha ail khi ge bhiq-a nail: "Meenq nee mail lavqtsail mail tsaoq dov yaoq. Heeqphaq Miqyail neq, meenq niil meenq lav cov-aiq nail ngaol" dai, ge bhiq-a nail ngaol. Thail hai ngaol-aoq, aivq nail aqhaoq juq neq, Laoltavq meel naq ga nail niil dai, dul-a nail ngaol.

15Nqhao lao ma nlma dov lal nail aqyanq bhai, nqtavq gaqkhoel al nvq gaq neq, Laoltavq bhai lavqtsail mail tsaoq dov nail galduq, niail hai ge bhiq-a nail ngaol: "Meenq niil meenq bhai lav cov-u phao, naoq nail khaqma dai khi, yaqmiq nvq gaq maq ya sil dai, aqyu juq bhai khul khi niil aq-il nee mail lavqtsail mail dov-ail yaoq" dai, ge bhiq-a nail ngaol.

16Thail hai ngaol-aoq, Laoltavq neq, mee lee mee lee dai, dao nail ngel-i mail, nqtavq gaqkhoel al nvq neq, aivq nail aqlavq aivq nail khaqma nail aqlavq, aivq nail yaqmiq nvq gaq nail aqlavq bhai nieivq thaiq khi meenq nail lavqniil phao hevq dov bhiq-a nail ngaol. Khul khi mail dai ngal-aq, Heeqphaq Miqyail neq, aqyu phaqyaq bhai gaoq haq nail ngel-i mail ngaol.

17Meenq nail lavqniil phao hevq dol-aivq bhiq gaq-u phao, nqtavq gaqkhoel teevq gaq neq, niail hai ge nail ngaol: "Nul juq nail doevqyeel maq ya sil dai, tsaoq yaoq. Haoqnaol phao thaq hel daiq kovq. Gavqlaovq bhai tsao kel laivq-u phao gail, thaq naq. Nul juq ya jel-ail nail galduq, gaoqjaoq phao tsaoq dav yaoq" dai, ge bhiq-a nail ngaol.

18Laoltavq neq, niail hai hal nail ngaol: "Ngaq nail Heeqphaq-ol, nv juq al hai maq khi kivq-il.

19Naol ngaq bhai gaoq haq lavq khi eeq dee dee nail gaoq haq gaiq-a nail phaq bhi moel lavq-a nail ngaol. Thail hai ngaol-aoq, ngal gaoqjaoq phao maq tsao dal laivq kivq-il. Gaoqjaoq bha maq tsaoq kev dan-u nee mail, lav cov nail phaq bhai ngal ya thaoq phuq khi ya sil nail ngaol.

20Hel daiq yaoq. Niil niai nee mail mao-ail maq eq nail bhai meenq teevq meenq jiav nail ngaol. Meenq gail meenq meenq yaq ngel-i mail, ngal aqdoevq ya doevq dai, meenq al meenq bhai bhi tsaol-aivq lavq yaoq" dai, hal bhiq-a nail ngaol.

21Nqtavq gaqkhoel ge bhiq-a nail: "Meeq-ail nial. Naoq-i mail hal nail khe-ai, nl kivq nail ngaol. Ngal meenq meenq yaq al meenq bhai maq lav cov-ail.

22Thail hai ngaol-aoq, lavqtsail mail tsaoq yaoq. Naol meenq al meenq bhai maq aol lai-u phao kev dai, ngal Saoldoq meenq bhai khul gail maq khi kivq-ail" dai, ge bhiq-a nail ngaol. Laoltavq neq, meenq al meenq bhai meenq meenq yaq dai khul nail ngel-i mail, Saollav#19.22 Saollav Saollav dai, ge nail daoqceevq neq, micil cil deel dai ge movq nail ngaol. nail meenq dai, aqmil pevq lal-a nail ngaol.

23Nl ma dov lal-u phao, Laoltavq Saollav meenq bhai kev lai-a nail ngaol.

24Aq-u phao, Heeqphaq Miqyail neq, Saoldoq meenq dai khi Gaolmaollav meenq bhai miqjaq tovq nail miqjal jalheelmaoq-aol khe-ai, bhi aol lee-a nail ngaol.

25Meenq al nvq meenq maqkhaiq, gavqlaovq lao tsaoq iqsanl mail maqkhaiq, a bhai jaol nail tsaol-aq juq iqsanl mail maqkhaiq, a bhai khal doevq nail heeqlaoq gaoqjal juq iqsanl mail maqkhaiq, bhi sil gil-a nail ngaol.

26Laoltavq nail khaqma iqsanl, haoqnaol phao hel daiq kovq-a nail ngel-i mail, cavqdevq nail ilkhel pevq ail-a nail ngaol.

27Haoqnao n-gaol, Aqbhaqlaqhaq neq, nqhao navq mav-ail thul khi, gaq-u phao, Heeqphaq Miqyail nail sivtavq bhai thul phaol-a nail aqduq bhai lavqtsail mail lai-a nail ngaol.

28Aivq-i mail Saoldoq meenq, Gaolmaollav meenq dai khi, gavqlaovq teevq lao tsaoq hel daiq gai-aivq-u phao, miqjaq khaoltsil tsil ma teevq laiq nee mail, moiqkhoiq dov nail khe-ai, miltsaq nee mail moiqkhoiq dav nail ya moel-a nail ngaol.

29Thail hai ngaol-aoq, Miqyail neq, Laoltavq-i mail jaol nail gavqlaovq phao khe meenq juq bhai lav cov-u phao, Aqbhaqlaqhaq bhai noeq moel-a nail ngel-i mail, Laoltavq bhai lav cov nail lavqkhoel nee bhi jel ail-a nail ngaol.

Maolbav dai khi Aqmonq nail jeq-e jaq-a nail daoqthaoq

30Laoltavq neq, Saollav nail meenq bhai maq jaol tseq nail ngel-i mail, aivq nail yaqmiq nvq gaq nee mail gaoqjaoq bha jiav nail lovphail khaoqbhaoq lavqkhoel bhai jaol lai-a nail ngaol.

31Teevq n neq, aivq nail yaqmiq aqivq gaq aivq nail jaqbheq gaq bhai ge bhiq-a nail: "Ngadao nail aqbhu gail joiqmaoq maoq lai-aoq nail ngaol. Ngadao nvq gaq miltsaq kovtavq khe hevq pheel maol pheel jaq nail khe-ai, maol-ail nail haqbhoil, aqjail aqthao bhai yaqyov-aq teevq gaq iqsanl mail maq jaol-ail.

32Al heel ngel-i mail, jeq-e aqiq maq bhi ceiv lai nail galduq, aivq bhai aqheeq tsilju nail ullul bhi daol bov khi aivq nee mail teevq gaq khe-ai iq thaiq lai bhel" dai, ge bhiq-a nail ngaol.

33Aq-u nqkiv, aqyu nvq gaq nail aqbhu bhai aqheeq tsilju nail ullul bhi daol bov gaq-al nee ngal-aq, yaqmiq aqivq gaq neq, aol lai khi iq thaiq lai-a nail ngaol. Aivq nail aqbhu neq, daol mavq-ai thaq nail ngel-i mail, aivq nail yaqmiq khaqmao iq thaiq lal khi thul dov-ail thaq nail bhai maq heeq nia-ail.

34Haoqnao n-gaol yaqmiq aqivq gaq neq, jaqbheq gaq bhai ge bhiq-a nail: "Mil kiv neq, ngal aqbhu nee mail iq thaiq-ao nail ngaol. Ngadao nail jeq-e aqiq maq bhi ceiv lai dai, yanq-nl kiv neq, aivq bhai aqheeq tsilju nail ullul bhi daol bov khi naol iqsanl, iq thaiq lai yaoq" dai, ge bhiq-a nail ngaol.

35Aq-u nqkiv phao gail, aqyu nvq gaq, aqbhu bhai bhi daol bov khi yaqmiq jaqbheq gaq neq, aivq nail aqbhu nee mail bhi iq thaiq lai-a nail ngaol. Aivq nail aqbhu neq, daol mavq-ai thaq nail ngel-i mail aivq nail yaqmiq khaqmao iq thaiq lal khi thul dov-ail thaq nail bhai maq heeq nia-ail.

36Al hai nl-a nail bhaq da nee, yaqmiq nvq mail nvq mail-ail aivq nail aqbhu nee yaq ceiv lai bhiq-a nail ngaol.

37Yaqmiq aqivq gaq yaqyov teevq gaq bhao khi Maolbav#19.37 Maolbav Maolbav dai, ge nail daoqceevq neq, aqbhu nee doevq lee-a nail gaq dai, ge movq nail ngaol dai mil bhiq-a nail ngaol. Yaqyov al gaq neq, niil aq-il khe Maolbav nail jeq-e jaq-a nail aqbhu pevq nail ngaol.

38Yaqmiq jaqbheq gaq gail yaqyov teevq gaq bhao khi Bheinqaqmiq#19.38 Bheinqaqmiq Bheinqaqmiq dai, ge nail daoqceevq neq, ngaq nail milkhaoq yaq nail yaqyov dai, ge movq nail ngaol. dai mil bhiq-a nail ngaol. Yaqyov al gaq neq, niil aq-il khe Aqmonq nail jeq-e jaq-a nail aqbhu pevq nail ngaol.

Currently Selected:

Genesis 19: aeu

Highlight

Copy