Genesis 22

Iqmoeq 22

Ilcav laol bhiq-a nail ganl

1A bhai nee ngal-aq, Miqyail neq Aqbhaqlaqhaq-i mail neema thaq tsaol nail phaq bhai tsao tsel daiq-a nail ngaol. Miqyail neq, "Aqbhaqlaqhaq-ol" dai, khul-u phao, Aqbhaqlaqhaq gail, "Ngal niai jaol nail ngaol" dai, ge kovq bhiq-a nail ngaol.

2Aq-u phao, Miqyail ge bhiq-a nail: "Naoq-i mail al jaiq-ail gaiq-a nail teevq gaq teevq-eel naoq nail yaqyov Ilcav khul khi, Maolliv nail miltsaq bha dav lai yaoq. Jaolduq al duq khe ngaq-i mail tsiq tsoe nail gaoqjaoq bhai, naoq nail yaqyov bhai miqjaq kheq poiv khi laol bhiq nail jaiqyaq khe-ai, ngaq bhai laol lavq yaoq" dai, ge bhiq-a nail ngaol.

3Haoqnao n-gaol nqhao navq mav-ail Aqbhaqlaqhaq thul-a nail nee ovqtavq, moeqphaq laljieiv nail kovtavq bhai yalkav bavq dav gaq-al nee ngal-aq, Ilcav dai khi, aivq nail yaqkav nvq gaq bhai khul-a nail ngaol. A bhai nee ngal-aq, laol bhiq nail galduq miqjaq cevq pav gaq khi, Miqyail-i mail ge nail gaoqjaoq phao dov lai-a nail ngaol.

4Hail n tsao bhee lavq-u phao, Aqbhaqlaqhaq neq, gaoqjaoq al jaoq bhai eqyal nee mail ya moel-a nail ngaol.

5Aq-u phao, aivq nail yaqkav nvq gaq bhai, "Nul nvq gaq neq, moeqphaq laljieiv nee mail teevq gaq khe-ai, niai jaol-ail ceevq yaoq. Ngal dai khi ngaq nail yaqyov neq, a bha lai khi, Miqyail bhai uqhuq thaoq gaq haq neq, gaoq kovq lee nail ngaol" dai, ge bhiq-a nail ngaol.

6Aqbhaqlaqhaq neq, laol bhiq nail miqjaq Ilcav bhai bhi bavq khi aivq neq, gailbav dai khi miqjaq kheq tovq nail galduq miqjiiv oil khi mail, lai-a nail ngaol. Aqyu nvq gaq teevq gaq khe-ai, lai thail thaiq-u phao,

7Ilcav neq, "Aqbhu-ol" dai, khul-a nail ngaol. Aqbhaqlaqhaq gail "Yaqyov-ol" dai, ge kovq bhiq-a nail ngaol. Ilcav ge nail: "Aqbhu bhai neq, miqjaq miqjiiv gail aol yaoq nail, miqjaq gail aol yaoq nail. Thail hai ngaol-aoq, miqjaq kheq poiv khi laol bhiq nail haqbhoil yaol yaq neq, khaq bha" dai, nal daiq bhiq-a nail ngaol.

8Aqbhaqlaqhaq neq, ge kovq bhiq-a nail: "Miqjaq khe poiv khi laol bhiq nail yaol yaq neq, Miqyail, aivq lainq lavq naol" dai, ge kovq bhiq-a nail ngaol. A bhai nee ngal-aq, aqyu nvq gaq teevq gaq khe-ai, gaoq tsao dal laivq-a nail ngaol.

9Miqyail-i mail tsiq tsoe bhiq-a nail gaoqjaoq bhai kev lai-al nee ngal-aq, Aqbhaqlaqhaq neq, laolduq lav sav khi laolduq nail kovtavq bhai, miqjaq bavq dav-a nail nee ovqtavq, aivq nail yaqyov bhai phee thaiq khi, miqjaq nail kovtavq bhai bavq dav-a nail ngaol.

10A bhai nee ngal-aq, aivq nail yaqyov bhai heivq nail galduq gailbav oil-a nail ngaol.

11Aq-u phao, Miqyail nail nqtavq gaqkhoel teevq gaq neq, "Aqbhaqlaqhaq-ol, Aqbhaqlaqhaq-ol" dai, nqtavq nee mail khul-a nail ngaol. Aqbhaqlaqhaq gail, "Ngal niai jaol nail ngaol" dai, ge kovq bhiq-a nail ngaol.

12Nqtavq gaqkhoel ge nail: "Yaqyov thoil gaq bhai khal hai gail thaq bhi nal lai. Naoq nail yaqyov teevq gaq teevq-eel ngaol-aoq, Miqyail bhai laol bhiq nail galduq, naol maq jil ha-a nail ngel-i mail, naol aivq bhai gee sil nail lavqkhoel nee ev ail nial dai, niil aq-il ngal heeq kivq-ao naol" dai, ge bhiq-a nail ngaol.

13A bhai nee ngal-aq, Aqbhaqlaqhaq-i mail hel daiq gai-aivq-u phao, jiavbuv bhai uqkheel thaoq tsel laivq khi mail jaol nail, yaol yaol bhuq teevq maol bhai ya moel-a nail ngaol. Aivq ail khi yaol al maol nieivq khi mail aivq nail yaqyov nail jiq dan laol bhiq-a nail ngaol.

14Aqbhaqlaqhaq jaolduq al duq bhai Yawei Yilleiq#22.14 Yawei Yilleiq Yawei Yilleiq dai, ge nail daoqceevq neq, Heeqphaq Miqyail lainq lavq naol dai, ge movq nail ngaol dai, mil bhiq-a nail ngaol. Yaq n n-gaol kev dai, tsaol-aq juq neq "Heeqphaq Miqyail aivq nail gaoqjaoq bha lainq lavq naol" dai, aqmil al mil bhai daoq daq khe-ai, yuq nail ngaol.

15Heeqphaq Miqyail nail nqtavq gaqkhoel al gaq neq, nqtavq nee mail, Aqbhaqlaqhaq bhai nvq pov teevq pov khul khi ge nail:

16"Heeqphaq Miqyail ge nail: 'Ngal yovqgavq bhai yovqgavq yuq khi, niail hai khanq nail ngaol. Naoq nail yaqyov teevq gaq teevq-eel ngaol-aoq, ngal hal-u phao, naol maq jil ha-a nail ngel-i mail,

17ngal naoq bhai geeqlaoq teevq bhee teevq lovq bivq nail ngaol. Naoq-ai nee mail yavq kha lee thaq nail yaq juq bhai nqtavq khe aqgil khe-ai maqkhaiq, iqyaq iq ma daolbhaq khe jiav nail tsalhail khe-ai maqkhaiq, bhi mao lal nail ngaol. Naoq-ai nee mail yavq kha lee thaq nail yaq juq neq, aqyu juq bhai neejiav jiav nail juq bhai genl dev gaq khi aqyu juq nail meenq bhai, ya uv thaq nail ngaol.

18Naol neq, ngaq nail daoq bhai nal daiq nail ngel-i mail, miltsaq kovtavq khe jaol nail tsaol jeq-e juq iqsanl mail naoq-ai nee yavq kha lee thaq nail yaq juq bhaq da nee, geeqlaoq ya nail ngaol" dai, ge bhiq-a nail ngaol.

19A bhai nee ngal-aq, Aqbhaqlaqhaq dai khi Ilcav neq, aivq nail yaqkav jaol nail bha kovq kha lee khi, aqyu juq nee mail teevq gaq khe-ai, Bhaqlaqseiqbhal nail meenq bhai kovq lee khi jaol-a nail ngaol.

Naqhaoq nee mail yavq kha lee thaq nail yaqyov juq

20A bhai nee ngal-aq, Aqbhaqlaqhaq neq, aivq nail jaqbheq Naqhaoq nail khaqma Millaqkhaq bhai yaqyov eivq gaq jaol nail ganl ya gaiq-a nail ngaol.

21Yaqyov al juq nail lavqkhoel aqivq ivq aq gaq neq, Ulsav ngaol. Jaqbheq juq neq, Bhulsav, Aqlanq nail aqbhu Keiqmuqlav,

22Kheiqsail, Haqsoq, Pildaqsal, Yildaqlaqphal dai khi Bheiqthuqlav, niil juq ngaol.

23Bheiqthuqlav neq, Leiqbhailkavq nail aqbhu ngaol. Aqbhaqlaqhaq nail jaqbheq Naqhaoq nail khaqma Millaqkhaq neq, yaqyov niil eivq gaq bhao-a nail ngaol.

24Naqkhaoq bhai Lulmaq dai khul nail khaqma maniil iqsanl, jaol nail ngaol. Lulmaq neq, Teiqbhal, Taqhaqsal dai khi Maqkhaq dai khul nail yaqyov juq bhao-a nail ngaol.

Currently Selected:

Genesis 22: aeu

Highlight

Copy