Genesis 30

Iqmoeq 30

1Laqkheiqlal neq, Yaqkov nee mail yaq maq jaol lee nail bhaq da nee, aivq nail al-ivq bhai neekhaol maq sil-ai bhiq nail ngel-i mail, Yaqkov bhai ge bhiq-a nail: "Ngaq bhai yaq maq bhi jaol lee lavq haq neq, sil lee-aiq nail ngaol" dai, ge bhiq-a nail ngaol.

2Aq-u phao, Yaqkov neq Laqkheiqlal bhai neema phail lal bhiq khi ge nail: "Ngal Miqyail pevq khi, naoq bhai yaq maq bhi bhao lee-a nail laiq" dai, ge kovq bhiq-a nail ngaol.

3Laqkheiqlal ge nail: "Ngaq nail galduq yaq bhi bhao nail haqbhoil, ngaq nail yaqkav Bhillaqhaq nee mail iq thaiq lai yaoq. Aivq bhaq da nee ngal aqma teevq gaq pevq lal nia nail ngaol" dai, ge bhiq-a nail ngaol.

4A bhai nee Laqkheiqlal neq, Bhillaqhaq bhai Yaqkov nail khaqma bhi pevq lal khi, Yaqkov iqsanl, Bhillaqhaq nee mail iq thaiq-a nail ngaol.

5Al heel ngel-i mail, Bhillaqhaq yaq ceiv lai khi, yaqyov teevq gaq bhao-a nail ngaol.

6Aq-u phao, Laqkheiqlal ge nail: "Miqyail neq, ngaq bhai salkhil moel kivq dai, nl lavq-ao nail ngaol. Ngaq-i mail hal nail geeqlaoq hal daoq bhai nal daiq khi, ngaq bhai yaqyov teevq gaq bivq lavq-ao nail ngaol" dai, ge khi yaqyov al gaq bhai Danq#30.6 Danq Danq dai, ge nail daoqceevq neq, salkhil bhi moel lavq-a nail dai ge movq nail ngaol dai, mil bhiq-a nail ngaol.

7A bhai nee ngal-aq, Bhillaqhaq neq, Yaqkov nee mail yaqyov nvq gaq teevq gaq gaoq ya-a nail ngaol.

8Aq-u phao, Laqkheiqlal ge nail: "Ngal neq, ngaq nail al-ivq nee mail nl gaq nl dav dav-u phao, ngal gaq lai-aoq nail ngaol" dai, ge khi yaqyov al gaq bhai Naqtaqlil #30.8 Naqtaqlil Naqtaqlil dai, ge nail daoqceevq neq, nl gaq nl dav dav nail dai ge movq nail ngaol. dai, mil bhiq-a nail ngaol.

9Leiqaq gail aivq yaq bhao nail ganl naq lai-a nail bhai ya moel-u phao, aivq nail yaqkav Sillaqphal bhai, Yaqkov nail khaqma bhi pevq lal-a nail ngaol.

10Al heel ngel-i mail, Sillaqphal neq, Yaqkov nee mail yaqyov teevq gaq bhao-a nail ngaol.

11Aq-u phao, Leiqaq neq, "Nga-ai geeqlaoq aqmeeq kev lee-aoq naol" dai, ge khi yaqyov al gaq bhai Gavq#30.11 Gavq Gavq dai, ge nail daoqceevq neq, geeqlaoq aqmeeq dai ge movq nail ngaol. dai mil bhiq-a nail ngaol.

12Haoqnao teevq pov Sillaqphal neq, Yaqkov nee mail yaqyov teevq gaq gaoq bhao-a nail ngaol.

13Aq-u phao, Leiqaq neq, "Lavqkhiq al jaiq-ail tsail-il. Tsaol-aq yaq juq neq, ngaq bhai lavqkhiq tsail nail gaq dai khul lal nail ngaol" dai, ge khi yaqyov al gaq bhai Aqseiqlav#30.13 Aqseiqlav Aqseiqlav dai, ge nail daoqceevq neq, lavqkhiq tsail nail dai ge movq nail ngaol. dai mil bhiq-a nail ngaol.

14A bhai nee ngal-aq, gov gaiq nail aqyanq kev lal khi Lulbheiq neq, daiyal bha ail-u phao, yaq bhi jaol lee nail aqbhaol bhai moel-a nail nee ovqtavq, gaol bov khi, aivq nail aqma Leiqaq jaol nail bha daoq tsail oil lavq bhiq-a nail ngaol. Aq-u phao, Laqkheiqlal, Leiqaq bhai ge bhiq-a nail: "Naoq nail yaqyov-i mail gaol lavq-a nail aqbhaol nail daoqtsail thoil ngaq bhai gail teevq pav ga nav bivq lavq-o" dai, hal bhiq-a nail ngaol.

15Thail hai ngaol-aoq, Leiqaq neq, "Naol neq, ngaq nail yovjil oil nail taivq-ail maq gaq dai, ngaq nail yaqyov-i mail gaol lavq-a nail daoqtsail bhai gail gaoq oil movq-ai haq nail laiq" dai, ge bhiq-a nail ngaol. Laqkheiqlal ge nail: "Naol ngaq bhai daoqtsail thoil bivq lavq haq neq, yanq-nl kiv Yaqkov nee mail iq thaiq nail ya nail ngaol" dai, ge bhiq-a nail ngaol.

16Kivqhail lailma phao, Yaqkov neq, daiyal nee kovq lal nail bhai Leiqaq hav lavq-ail khi ge bhiq-a nail: "Ngaq nail yaqyov-i mail gaol lavq-a nail yaq jaol lee nail aqbhaol nail daoqtsail Laqkheiqlal bhai bivq-a nail ngel-i mail, al nail aqphoiq naol yanq-nl kiv ngaq-ai nee, ya iq thaiq lee nail ngaol" dai, ge bhiq khi, aq-u nqkiv Yaqkov neq, Leiqaq nee mail iq thaiq-a nail ngaol.

17Miqyail neq, Leiqaq nail geeqlaoq hal daoq bhai nal daiq khi, aivq yaq ceiv lai-a nail nee ovqtavq, yaqyov ngaq gaq teevq gaq bhao-a nail ngaol.

18Aq-u phao, Leiqaq neq, "Ngal ngaq nail yovjil bhai ngaq nail yaqkav av bhiq-a nail ngel-i mail, Miqyail neq, ngaq bhai aqphoiq bivq kovq lavq thaq nail niil" dai, ge khi, yaqyov al gaq bhai Ilsaqkhaq#30.18 Ilsaqkhaq Ilsaqkhaq dai, ge nail daoqceevq neq, aqphoiq dai ge movq nail ngaol. dai, mil bhiq-a nail ngaol.

19Haoqnao teevq pov Leiqaq neq, yaq gaoq ceiv lai khi, yaqyov kovq gaq teevq gaq gaoq bhao-a nail ngaol.

20Aq-u phao, aivq ge nail: "Miqyail neq, ngaq bhai kovpavq aqmeeq bivq lavq-ao nail ngaol. Ngal neq, yaqyov kovq gaq bhao bhiq-a nail ngel-i mail, niil aq-il, ngaq nail yovjil neq, ngaq bhai ev lavq nail ngaol" dai, ge khi yaqyov al gaq bhai Seiqbhullonq#30.20 Seiqbhullonq Seiqbhullonq dai, ge nail daoqceevq neq, ev lavq nail dai ge movq nail ngaol. dai, mil bhiq-a nail ngaol.

21A bhai nee ngal-aq, aivq neq, yaqmiq teevq gaq gaoq bhao khi Dilnav dai mil bhiq-a nail ngaol.

22Aq-u phao, Miqyail neq, Laqkheiqlal bhai noeq moel nail lavqkhoel, aivq nail geeqlaoq hal daoq bhai nal daiq khi, yaq bhi bhao-a nail ngaol.

23Aivq yaq ceiv lai khi, yaqyov teevq gaq bhao-a nail ngaol. Aq-u phao, aivq ge nail: "Miqyail neq, ngaq bhai yaqyov teevq gaq bivq lavq khi yu-i mail ceivq leivq kha nail nee bhi jel-ail lavq-ao nail ngaol.

24Heeqphaq Miqyail neq, ngaq bhai yaqyov gaoq bivq lavq dei-eiq" dai, ge khi yaqyov al gaq bhai neq, Yaolsai#30.24 Yaolsai Yaolsai dai, ge nail daoqceevq neq, gaoq bivq lavq nail dai ge movq nail ngaol. dai, mil bhiq-a nail ngaol.

Yaqkov nail ildaoq maoqgaiq juq

25Laqkheiqlal Yaolsai bhai bhao gaq khi maq maoq lal mail, Yaqkov neq, Laqbhanq bhai ge bhiq-a nail: "Ngaq bhai ngaq nail milkhaoq bha bhi kovq lai lavq yaoq.

26Ngal naoq bhai ganl nl bhiq khi ya-a nail ngaq nail khaqma juq dai khi, yaqmiq yaqyov juq khul khi, bhi dov-ail lavq yaoq. Ngal naoq nail galduq ganl kha dai lai jai-a nail dai, naol heeq nia nail ngaol" dai, ge bhiq-a nail ngaol.

27Aq-u phao Laqbhanq ge nail: "Naol ngaq bhai gaoq haq ha neq, niai gaoq jaol lavq yaoq. Heeqphaq Miqyail neq, naol bhaq da nee, ngaq bhai geeqlaoq bivq lavq ail nial dai, ngal yaqhao khe pevq lal nail ganl bhai tsao tse daiq khi, heeq kivq lal-a nail ngaol.

28Naoq nail ganl nl phoiq kha dai dai khi, ge lavq yaoq. Ganl nl phoiq al, ngal bivq nail ngaol" dai, ge bhiq-a nail ngaol.

29Yaqkov ge nail: "Ngal naoq nail galduq ganl khal hai nl bhiq-a nail bhai maqkhaiq, ngaq-i mail lovqphail nail bhaq da nee naoq nail jaiqyaq juq kha dai jeq lal mao lal-a nail bhai maqkhaiq, naol heeq nia nail ngaol.

30Ngaq-i mail maq kev lee-u phao, naoq bhai jaiqyaq juq micil jaol-ail teevq-eel ngaol-aoq, niil aq-il, mao dai mao lal-aoq nail ngaol. Ngal bhaq da nee Heeqphaq Miqyail neq, naoq bhai geeqlaoq bivq-a nail ngaol. Niil aq-il ngal neq, yovqgav yovqgavq nail ganl nl nail aqyanq kev lal-aoq nail ngaol" dai, ge bhiq-a nail ngaol.

31Thail hai ngaol-aoq, Laqbhanq ge nail: "Naoq nail galduq ganl nl phoiq kha dai ya bivq nail-aiq" dai, nal daiq bhiq-a nail ngaol. Yaqkov ge nail: "Ganl nl phoiq maq oil movq ail, ngaq-i mail ge nail bhai naol nal daiq lavq haq neq, naoq nail jaiqyaq juq bhai gaoq tsu movq-ail nial.

32Yaq n n-gaol ngal naoq nail jaiqyaq juq bhai tsao tsao-ail hel daiq nail ngaol. Al juq nail lavqkhoel khe yaol aqnav juq dai khi, aqgevq aqyaov juq bhai maqkhaiq, civqmeiv aqgevq aqyaov juq bhai maqkhaiq, ngal oil nail ngaol. Jaiqyaq al juq neq, ngaq nail galduq ganl nl phoiq pevq nail ngaol.

33Yaqhao ngaq nail neema daol nail maq daol nail naol aqmeeq dai, ya heeq kivq nail ngaol. Naoq-i mail ngaq bhai bivq lavq-a nail yaol dai khi civqmeiv juq bhai, naol tsao tsel-u phao civqmeiv aqgevq aqyaov dai khi yaol aqnav juq nee mail jaiq-ail khi yaol dai khi civqmeiv yaoq maol yaoq jaol lao haq neq, al juq bhai khoiq thaq nail niil dai, ge kivq nail ngaol" dai, ge bhiq-a nail ngaol.

34Laqbhanq iqsanl, "Ngal neema tsaq nail ngaol. Naoq-i mail ge nail khe-ai, bhi pevq naol" dai, ge bhiq-a nail ngaol.

35Thail hai ngaol-aoq, aq-u n-gaol, Laqbhanq neq, civqmeiv civq bhuq aqgevq, civqmeiv civq ma aqgevq dai khi civqmeiv civq ma aqphul gevq khal-ai thaq nail, khal jaol nail iqsanl mail maqkhaiq, yaol aqnav iqsanl mail maqkhaiq, tsel dov khi, aivq nail yaqyov juq nail aqlavq bhai av bhiq-a nail ngaol.

36A bhai nee ngal-aq, yaol dai khi civqmeiv al juq bhai, Yaqkov nee mail hail n yaoq yal bha bhi the ha-ai lai-a nail ngaol. Yaqkov neq, jaol-ail ceevq-a nail Laqbhanq nail jaiqyaq juq bhai, lovq lovq-ail jaol-a nail ngaol.

37Aq-u phao, Yaqkov neq, miqhuq aqbhaol, bhaqdanq nail aqbhaol dai khi bhoiqjal aqbhaol nail lavqmeiv aqsivq juq oil khi, phulleq dai, bavkov he levq-a nail ngaol.

38A bhai nee ngal-aq, civqmeiv juq-i mail ulcuvq daol lee nail laoqkhaiq nail lavqkhoel bhai, bavq thaq gai bhiq-a nail ngaol. Civqmeiv juq neq, ulcuvq daol lee-u phao, al nail sivtavq-ai niaoq yaq tsao nia nail ngel-i mail, thail hai bavq thaq-ai thaq nail ngaol.

39Civqmeiv juq neq, lavqmeiv bavq thaq-ai thaq nail sivtavq bhai niaoq yaq tsao nail ngel-i mail, jaiqyaq aqgevq aqyaov juq phaoq dol leevq bhiq thaq nail ngaol.

40Al ovqtavq, Yaqkov neq, yaol juq iqsanl mail tsel dov khi, aqyaq tsao nail aqyanq bhai, Laqbhanq nail yaol munl nail lavqkhoel khe, aqgevq dai khi aqnav jaol nail phao, maivphaoq bhi tsiq phaol-a nail ngaol. Thail hai nl-a nail bhaq da nee, aivq nail yaol juq jeq lal mao lal khi, Laqbhanq nail yaol juq nee mail maq bhi tavq dai, the pav gai-a nail ngaol.

41A bhai nee ngal-aq, gaq kav nail jaiqyaq aqma juq niaoq yaq tsao-u phao, ulcuvq laoqkhaiq nail lavqkhoel bhai lavqmeiv al bavq thaq gai-a nail ngaol.

42Thail hai ngaol-aoq, gaq maq aol nail jaiqyaq aqma juq nail sivtavq bhai neq, lavqmeiv al maq bavq thaq bhiq-al. Al heel ngel-i mail, phaoq-a nail Laqbhanq nail yaol dai khi civqmeiv juq neq, gaq maq aol-ail pevq lal bhiq khi, Yaqkov nail yaol dai khi civqmeiv juq neq, gaq aol nail jaiqyaq juq pevq lal-a nail ngaol.

43Thail hai nl-a nail bhaq da nee, Yaqkov neq, ildaoq maoqgaiq ya lal khi hulmeeq meeq lal-a nail ngaol. Aivq bhai yaol nail munl, civqmeiv nail munl, yaqkav, laolthao dai khi moeqphaq laljieiv juq mao dai jeq lal mao lal-a nail ngaol.

Currently Selected:

Genesis 30: aeu

Highlight

Copy