Juan 3

So Jesús qataq so Nicodemo

1Huo'o so ÿale ÿalectaigui na fariseopi, l'enaxat da Nicodemo. Somayi lataxala' na judiopi. 2Se'eso Nicodemo huo'o so pe nachi somayi nqo'ona so Jesús. Nachi 'enapega, 'eeta':

–'Am mayi 'auapaxaguenataxaatac, qomi' saÿajnaq da 'am namaq ñi Dios da qomi' 'auapaxague'n. Cha'ayi qaica ca ishit da i'ot na 'au'ottac n'anecpi mayi ÿachaxan da 'ad'añaxac. Chaqcata cam hueta'aguet ñi Dios.

3Nachi so Jesús 'enapega somayi, 'eeta':

–Aja', ÿataqta 'eesa de'eda 'am sa'axatem, da ca shiÿaxaua da sa ishit da ÿi'iguelaxalec da qaltaq ñiguiñi, qaq sa ishit da ila'a da l'onataxanaxac ñi Dios da ilo'ogue 'enauacna.

4Nachi so Nicodemo denataxan, 'eeta':

–Qaq ¿huá'ago' ca 'eetec ca shiÿaxaua, da huo'otaq mashi ÿi, nachi qaltaq ÿi'iguelaxalec da ñiguiñi? ¿Peta'a ishito' da ÿi'iguelaxaigui na lauel aca late'e, ime, qaltaq ñiguiñi?

5Nachi so Jesús 'enapeco':

–Aja', ÿataqta 'eesa de'eda 'am sa'axatem, da ca sa ishit da nañan da qanachilaxan qataq da nañanot so Espíritu da nadalaxat, nachi camayi sa ishit da inoxoneu'a da l'onataxanaxac ñi Dios da ilo'ogue 'enauacna. 6Ca chigoqchigui da lañoxoc ca yi'oqchigui shiÿaxaua, camayi ipacchigui da chochi shiÿaxaua. Qalaxayi ca chigoqchigui da lañoxoc so Espíritu, camayi ÿaatañi da achaalataxac mayi chigoqo'ot somayi. 7Sa ishit qome da 'ad'elaqchit de'eda 'am sa'axattapeguem, da 'enauac na shiÿaxauapi iuen da taigui da dalaxaic nañoxoc. 8Na l'at da nashiiyishiguem, qalaq maichi ÿoiqueetac ca dataigue. Qaq 'am 'au'aqtega na l-lamaxa, qalaxayi sa ishit da 'auaÿaten cam chigoqchiguiña qataq cam taÿa'ague. Qaq nachi 'eetec nataq'en 'enauac na chigoqo'ot da lañoxoc so Espíritu.

9Nachi so Nicodemo qaltaq ÿi'iguelaxalec da denataxan, 'eeta':

–¿Chaq huá'ago' ca 'eetec ca lataxac de'eda?

10Nachi so Jesús 'enapeco':

–'Am mayi 'auapaxagueetac na llalaqpi so Israel, qalaq ¿tá'ainco' yi sa 'auaÿaten de'eda? 11Aja', qalaxayi ÿataqta 'eesa de'eda 'am sa'axatem, da qomi' sa'axataqtac cam saÿajnaq qataq cam sauanaqchigui, qalaxayi qami' sa ishit da qomi' qau'amaqchiñi'. 12Cha'ayi qami' da sa ishit da aÿim qau'amaqchiñi da huo'otaq qami' sa'axattapeguema nam huetalec ana 'alhua, nachi ¿huá'aguectoxo' da ishit da aÿim qau'amaqchiñi da qami' sa'axatema cam hueta'ague da piguem?

13Cha'ayi sa ishit da huo'o ca taigue da piguem, chaqcata cam chigaqa'ague da piguem, mayi nachina nam shiÿaxaua llalec, mayi nachi 'eetai' da neta'ague da piguem. 14Qaq de'eda 'eetec co'ollaxa so Moisés da nauaxaÿaxaashiguem so l'enaqtac n'adaxanaq co'ollaq hualec so tojlec 'alhua, qaq nachida da 'eetec nataq'en na shiÿaxaua llalec da namayi taÿa'a da qanauaxaÿaxaashiguem, 15yaqto' 'enauac nam i'amaqten namayi, nachi sa ishit da ileu, chaqdata da huo'o da lca'alaxa mayi chochaq tateec.

Da lauotaxanaqtaic ñi Dios nam huetalec ana 'alhua

16Cha'ayi ñi Dios ÿataqta lta'adaic da lauotaxanaqtaic na shiÿaxauapi, ÿoqo'oyi ÿan na 'oonolec llalec, yaqto' 'enauac nam i'amaqten namayi, nachi sa ishit da ileu. Chaqdata da huo'o da lca'alaxa mayi chochaq tateec. 17Ñi Dios sa ishit da namaxa na llalec ana 'alhua, da yaqto' ÿauo'o ca nhuaxanaguec na shiÿaxauapi. Chaqdata da anaga da nca'alaxateec namayipi.

18Ca i'amaqten na llalec ñi Dios, nachi camayi sa ishit da huo'o ca nhuaxanaguec. Qalaxayi cam sa i'amaqten namayi, nachi sogote da huetalec da huo'o da nhuaxanaguec qanqoÿin, souaxat da sa ishit da i'amaqten na 'oonolec llalec ñi Dios. 19Nam sa ishit da da'amqajnataxan, nachi qaÿauo'o ca nhuaxanaguec. Cha'ayi co'ollaq anac som yi'oqchiguiñi da anaÿa ana 'alhua, qalaq namayipi ÿagaqnauec da lqopichi na napalaxa, cha'ayi namayipi i'otta'pe naua qauema. 20Qaq 'enauac nam i'otta'pe naua qauema, namayipi ÿataqta nquiÿa so yi'oqchiguiñi, qataq sa ishit da nqo'oneu'a somayi, cha'ayi nshitaique da sa ishit da yi'aqleguete naua i'otta'pe qauema. 21Qalaxayi nam nateeteguet da lataxac de'eda 'eesa lataxac, nachi namayipi nqo'oneu'a de'eda yi'oqchiguiñi, yaqto' ishit da qaila'a da 'enauac nam i'ottacpi ÿataqta chigoqto'ot ñi Dios.

So Juan mayi nachilaxanataxanaq qaltaq ÿi'iguelaxalec da i'axattac so Jesús

22Qaq co'ollaq ime de'eda, nachi so Jesús jec, nnaicapegueto soua lapaxaguenataqa da nqo'ooda yi 'alhua Judea. Nachi ÿataqta huo'oi soua na'axa'te da hueta'aguet somayipi da dachilaxanataxaatac. 23So Juan nataq'en dachilaxanataxaatac, hueta'a yi Enón yim sa qaÿapeque yi Salim, cha'ayi ÿataqta qalota na 'etaxat. Nachi na shiÿaxauapi anac, nachi qanachilaxaatac. 24Qaq 'eda da 'eetec co'ollaq saxanaxa da qoÿanaigui aso ncoñitaxanaxaqui so Juan.

25Nachi huo'o na nallippi so Juan na ncotatac, ncotatague' na judiopi, qancotatapigui da lataxac da 'onataxac da nqui'itaxatta ca shiÿaxaua. 26Nachi se'esoua nale't nqo'oodeu'a so Juan da qai'aqtaxanem, qoÿiita':

–'Am mayi 'auapaxaguenataxaatac, ña 'aumeten da 'am hueta'aguet so lÿa na'a'q mayi hueta'ague da nala' lliguishiguem yim tala Jordán, dam qomi' 'au'axattapeguema co'ollaxa, damayi nagui dachilaxanataxaatac. Nachi 'enauac na shiÿaxauapi quetague'.

27Nachi so Juan 'enapegalo soomayi, 'eeta':

–Qaica ca shiÿaxaua maichi nalligoxottela't da huo'o ca i'ot, da huo'otaq sa ishit da ÿanem ñi Dios camayi cam i'ot. 28Qaq qami' maichi qau'aqaichigui aÿim co'ollaq sa'axatta da aÿim sa ishit da nachaÿim que'eca nta'a nca'alaxaqui, chaqdata da aÿim qan'auaxaata'ague na llic camayi. 29Da huo'otaq huo'o ca nadonaxac, qaq cam ÿataqta huadonguet aca auonaxaua, nachica cam nauonaxaua. Qaq cam nhuataxaua que'eca auonaxaua, camayi qanayiuta'aguet, nachi ishit da n'axaÿaxaatac, nachi camayi ÿataqta machiguiñi da hua'aqtac. Qaq nachi 'eetec nataq'en nagui aÿim ÿataqta aÿim nlaqchigui da ñitonaxac. 30Qaq camayi mayi taÿa'a da nquictashiguem da l'amaqchic, qaq aÿim qalaxayi nquictañi da i'amaqchic.

Cam chigoqo'ot na piguem

31Cam chigaqa'ague da piguem, camayi napacalec 'enauacna. Qaq cam chigaqalec ana 'alhua, camayi ipacchigui ca chochi 'alhua l'ec. Nachi da detaqa, qalaq i'axattac na huetalec ana 'alhua. Qalaxayi cam chigaqa'ague da piguem, camayi napacalec 'enauacna. 32Qaq camayi da detaqa, qalaq i'axat nam ÿauaachigui qataq nam hua'aqchigui. Qalaxayi sa ishit da huo'o ca i'amaqten cam 'enapec camayi. 33Qalaxayi da huo'o ca i'amaqten camayi, nachi que'eca da'amqajnataxan ÿataqta 'eesa naq'en cam 'enapec ñi Dios. 34Cha'ayi cam namaq ñi Dios, camayi i'axa't naua l'aqtaqa ñi Dios, cha'ayi ñimayi ÿataqta imato'ot naq'en so n'Espíritu da ÿami' camayi. 35Cha'ayi ñi lta'a Dios ÿataqta ÿauotec so llalec, ÿoqo'oyi ÿataqta imato'ot 'enauac nam lalamaxatpi. 36Qaq cam i'amaqten se'eso ñalec, nachi camayi huo'o da lca'alaxa chochaq tateec. Qaq cam sa ishit da i'amaqten, nachi camayi sa ishit da taÿot de'eda nca'alaxa, chaqdata da huetalec camayi dam qaica ca 'en'am da lchic lhuaxanaxanaxac ñi Dios.

Currently Selected:

Juan 3: TBSNT

Highlight

Copy