wandījo 40
40
Batūmami babīlī kūloota
1Hanuma y'ikanza ū mu shikū jenījo, batūmami ba ntemi wa Misili, ng'winhīlīja wa shakūng'wa na nzugi wa migatī, būnsaayīcha ū saabo būgonzo, ū ntemi wa Misili. 2Ū Falao ūbapelanīla no a batūmami bakwe benabo; ū ntaale wa binhīlīja ba shakūng'wa, nū ntaale wa bazugi ba migatī. 3Ūbaponya mu jeela, ū mu numba ya ntaale wa balang'hani; ū mu jeela īyo walī afungilwe nū Yosefu. 4Ū ntaale wa balang'hani ūbatūūla mu makono ga ng'wa Yosefu; ūbiza nang'hani wabo; bikala mo ikanza ilebe ū mu jeela yenīyo. 5A banhū benabo aho balī ū mu jeela, lūshikū lūmò aho balaalile ī būjikū būloota shilooti; būlī ng'wene shilooti shakwe, ū ng'winhi wa shakūng'wa nū nzugi wa migatī, nīyo būlī shilooti shaalī na makūlū gasho. 6A ha ntondo yaho ī dilū ū Yosefu wiza ū kūbalola, ūbabona bazongaga no. 7Ūbabūja a batūmami ba ng'wa Falao benabo, abo baalī baafungwa hamò nang'hwe ū mu numba ya ng'wa ise būgonzo, ūhaya, “Bing'we nibūlī lelo būzongile gīko ū būshū wing'we?” 8Būng'wīla, “Twalootaga shilooti, alīyo tūtī na munhū wa kūtūshomelegeja.” Ū Yosefu ūbawīla, “Ū nīmo gwa kūshomeleja gūtī gwa ng'wa Mulungu? Aliniwīlagi ī shilooti shing'we.”
9Ū ntaale wa binhīlīja ba shakūng'wa ūnootoolela ū Yosefu ī shilooti shakwe. Ūng'wīla, “Ū mu shilooti shane, naalī nabona nzabibu ū kū būtongi wane. 10Ū nzabibu gwenūyo gwalī na matambī adatū; kwimanīla gwandya kūfuluma, hūna gūlaba, gūtwaja na matwajo; haho na haho a matwajo gūpya. 11Ī shikombe sha ng'wa Falao shalī ū mu nkono gwane, nūsola matwajo nūbeeja divai nītūūla ū mu shikombe sha ng'wa Falao, nūng'winha mu nkono gakwe.” 12Ū Yosefu ūng'wīla, “A makūlū gaho galī gīkī, a matambī ay'adatū jene shikū idatū. 13Ūlū jilabīte shikū idatū, ū Falao akūkwīnja ū mu jeela akūshoshe a ha nīmo gwako, wandye hangī ū kūng'winhīlīja ū Falao ī shikombe gīt'umo wītīlaga ī kwandya, aho walī ng'winhīlīja wa shakūng'wa. 14Ali lūūlū, ī mihayo yako ūlū īlabeele, nizūkagwe nane ūnīītīle yawiza; ūng'wīle ū Falao ī mihayo yane ūnīnje ū mu jeela yenīyī. 15Nguno ū nene nenhwa ū kūūnū bo nguzu kūfuma kū sī ya Bahebulania; nūūlū ī haha natīītile mhayo gose gose gwa kwigeleelwa kūnenheleja kūponyiwa mu jeela.”
16Ū ntaale wa bazugi ba migatī aho wabona gīkī a makūlū ga shilooti gabeela, ūng'wīla ū Yosefu, “Ū nene nane nalootaga gīkī, naalī na malangahe adatū ga migatī nagidīīkile kū ntwe. 17Ū ng'wilangahe ī lya higūlya shalīmo shilīwa sha ng'wa Falao, sha būlī mbika shikalangilwe chiza chiza, alīyo ī noni jalūshilyaga, ū ng'wilangahe aho līl'ū kū ntwe gwane.” 18Ū Yosefu ūng'wīla, “A makūlū gaho galī gīkī, a malangahe ay'adatū, jilī shikū idatū. 19Ūlū jilabīte shikū idatū, ū Falao akūkwīnja ū mu jeela, akwīngīje ū ntwe gwako, ūningelejiwe mu līntī, hūna ī nyama ya mīlī gwako īkūgombagūlwa noni.”
20Ū lūshikū lwa kadatū lwaho lwalī lwa kwizūkwa kūbyalwa kwakwe ū Falao; ūbabeegeja shigukulu pye a batūmami bakwe a bataale. Abo walī wabaponya mu jeela ūbafunya mo, ū ntaale wa binhīlīja ba shakūng'wa, nū ntaale wa bazugi ba migatī. 21Ū ntaale wa binhīlīja ba shakūng'wa ūnshosha a ha nīmo gwakwe, wandya hangī ū kūng'winhīlīja ū Falao ī shikombe. 22Alīyo ū ntaale wa bazugi ba migatī, ūmūlaga gīt'umo walī wabashomelegeja dūhū ū Yosefu. 23Gwike ū ntaale wa binhīlīja ba shakūng'wa atang'wizūkilwe ū Yosefu, akang'wība gete.
Currently Selected:
wandījo 40: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
wandījo 40
40
Batūmami babīlī kūloota
1Hanuma y'ikanza ū mu shikū jenījo, batūmami ba ntemi wa Misili, ng'winhīlīja wa shakūng'wa na nzugi wa migatī, būnsaayīcha ū saabo būgonzo, ū ntemi wa Misili. 2Ū Falao ūbapelanīla no a batūmami bakwe benabo; ū ntaale wa binhīlīja ba shakūng'wa, nū ntaale wa bazugi ba migatī. 3Ūbaponya mu jeela, ū mu numba ya ntaale wa balang'hani; ū mu jeela īyo walī afungilwe nū Yosefu. 4Ū ntaale wa balang'hani ūbatūūla mu makono ga ng'wa Yosefu; ūbiza nang'hani wabo; bikala mo ikanza ilebe ū mu jeela yenīyo. 5A banhū benabo aho balī ū mu jeela, lūshikū lūmò aho balaalile ī būjikū būloota shilooti; būlī ng'wene shilooti shakwe, ū ng'winhi wa shakūng'wa nū nzugi wa migatī, nīyo būlī shilooti shaalī na makūlū gasho. 6A ha ntondo yaho ī dilū ū Yosefu wiza ū kūbalola, ūbabona bazongaga no. 7Ūbabūja a batūmami ba ng'wa Falao benabo, abo baalī baafungwa hamò nang'hwe ū mu numba ya ng'wa ise būgonzo, ūhaya, “Bing'we nibūlī lelo būzongile gīko ū būshū wing'we?” 8Būng'wīla, “Twalootaga shilooti, alīyo tūtī na munhū wa kūtūshomelegeja.” Ū Yosefu ūbawīla, “Ū nīmo gwa kūshomeleja gūtī gwa ng'wa Mulungu? Aliniwīlagi ī shilooti shing'we.”
9Ū ntaale wa binhīlīja ba shakūng'wa ūnootoolela ū Yosefu ī shilooti shakwe. Ūng'wīla, “Ū mu shilooti shane, naalī nabona nzabibu ū kū būtongi wane. 10Ū nzabibu gwenūyo gwalī na matambī adatū; kwimanīla gwandya kūfuluma, hūna gūlaba, gūtwaja na matwajo; haho na haho a matwajo gūpya. 11Ī shikombe sha ng'wa Falao shalī ū mu nkono gwane, nūsola matwajo nūbeeja divai nītūūla ū mu shikombe sha ng'wa Falao, nūng'winha mu nkono gakwe.” 12Ū Yosefu ūng'wīla, “A makūlū gaho galī gīkī, a matambī ay'adatū jene shikū idatū. 13Ūlū jilabīte shikū idatū, ū Falao akūkwīnja ū mu jeela akūshoshe a ha nīmo gwako, wandye hangī ū kūng'winhīlīja ū Falao ī shikombe gīt'umo wītīlaga ī kwandya, aho walī ng'winhīlīja wa shakūng'wa. 14Ali lūūlū, ī mihayo yako ūlū īlabeele, nizūkagwe nane ūnīītīle yawiza; ūng'wīle ū Falao ī mihayo yane ūnīnje ū mu jeela yenīyī. 15Nguno ū nene nenhwa ū kūūnū bo nguzu kūfuma kū sī ya Bahebulania; nūūlū ī haha natīītile mhayo gose gose gwa kwigeleelwa kūnenheleja kūponyiwa mu jeela.”
16Ū ntaale wa bazugi ba migatī aho wabona gīkī a makūlū ga shilooti gabeela, ūng'wīla ū Yosefu, “Ū nene nane nalootaga gīkī, naalī na malangahe adatū ga migatī nagidīīkile kū ntwe. 17Ū ng'wilangahe ī lya higūlya shalīmo shilīwa sha ng'wa Falao, sha būlī mbika shikalangilwe chiza chiza, alīyo ī noni jalūshilyaga, ū ng'wilangahe aho līl'ū kū ntwe gwane.” 18Ū Yosefu ūng'wīla, “A makūlū gaho galī gīkī, a malangahe ay'adatū, jilī shikū idatū. 19Ūlū jilabīte shikū idatū, ū Falao akūkwīnja ū mu jeela, akwīngīje ū ntwe gwako, ūningelejiwe mu līntī, hūna ī nyama ya mīlī gwako īkūgombagūlwa noni.”
20Ū lūshikū lwa kadatū lwaho lwalī lwa kwizūkwa kūbyalwa kwakwe ū Falao; ūbabeegeja shigukulu pye a batūmami bakwe a bataale. Abo walī wabaponya mu jeela ūbafunya mo, ū ntaale wa binhīlīja ba shakūng'wa, nū ntaale wa bazugi ba migatī. 21Ū ntaale wa binhīlīja ba shakūng'wa ūnshosha a ha nīmo gwakwe, wandya hangī ū kūng'winhīlīja ū Falao ī shikombe. 22Alīyo ū ntaale wa bazugi ba migatī, ūmūlaga gīt'umo walī wabashomelegeja dūhū ū Yosefu. 23Gwike ū ntaale wa binhīlīja ba shakūng'wa atang'wizūkilwe ū Yosefu, akang'wība gete.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.