Lukas 2

Yug Yexus

1Lub sijhawm ntawd Huabtais Aunkuxatus tau hais kom yuavtsum muaj kev sau npe txog tej pejxeem uas nyob thoobplaws txhua lub tebchaws uas yog nomtswv Loos kav. 2No yog thawjzaug uas muaj kev sau npe li no. Lub sijhawm ntawd yog Kulinius tabtom ua tus tswvxeev kav Xilias. 3Yogli ntawd, txhua tus nyias thiaj mus sau npe rau hauv nyias lub qub zos.

4Yauxej txawm tawm hauv lub nroog Naxalev xeev Kalilais mus rau hauv Daviv lub nroog Npelehees uas nyob nram lub xeev Yudas, rauqhov nws yog Daviv li cajces. 5Yauxej coj Malis uas nws twb qhaib lawm nrog nws mus sau npe; thaum ntawd Malis suab ib plab menyuam. 6Thaum nkawd tseem nyob hauv lub nroog Npelehees, txawm txog caij uas Malis yug menyuam lawm. 7Malis thiaj yug nws tus tub, nws muab khaubncaws qhwv tus menyuam thiab muab tso pw rau hauv ib lub dab zaub, vim tej tsevso tsis muaj chaw seem rau nkawd mus so lawm.

Cov Yug Yaj Thiab Cov Timtswv Ceebtsheej

8Nyob thajtsam ntawd muaj ib cov neeg yug yaj tseem tabtom zov lawv cov yaj tom tej tiajnrag thaum hmontuj. 9Tus Tswv ib tug timtswv los cuag lawv, thiab tus Tswv lub tshwjchim tau ci ntsa-iab tuaj rau ntawm lawv, ua rau lawv ntshai kawg li, 10tiamsis tus timtswv ntawd hais rau lawv tias, “Nej tsis txhob ntshai! Kuv los ntawm no yog kuv coj txoj xov zoo los qhia rau nej, uas yuav ua rau txhua haivneeg muaj kev zoosiab kawg nkaus. 11Hnubno tus Cawmseej twb yug los rau hauv Daviv lub nroog lawm, Nws yog tus Mexiyas, uas yog tus Tswv! 12Nej yuav pom ib tug menyuam mos qhwv khaubncaws pw hauv lub dab zaub, qhov ntawd yog lub cim uas qhia rau nej hais tias muaj tseeb li uas kuv hais.”

13Tamsim ntawd txawm muaj ib pab timtswv ceebtsheej coob-coob los nrog tus timtswv ntawd hunkauj qhuas Vajtswv li no:

14“Thov kom Vajtswv tus uas nyob saum ntuj ceebtsheej tau koobmeej,

thiab thov kom txhua tus neeg ntiajteb uas Vajtswv txaussiab rau, tau nyob kajsiab lug!”

15Thaum cov timtswv ncaim lawv rovqab mus rau saum ntuj ceebtsheej lawm, cov neeg yug yaj txawm sibtham hais tias, “Peb ciali mus rau hauv lub nroog Npelehees thiab mus saib tej xwmtxheej uas tshwmsim los no, rawsli tus Tswv tau qhia rau peb lawm.”

16Yogli ntawd, lawv txawm ceevnrooj mus; lawv mus pom Malis thiab Yauxej, thiab pom tus menyuam pw hauv lub dab zaub. 17Thaum cov yug yaj pom tus menyuam lawm, lawv thiaj qhia zaj uas tus timtswv ceebtsheej qhia rau lawv hais txog tus menyuam ntawd rau Malis thiab Yauxej mloog. 18Txhua tus uas hnov zaj uas cov neeg yug yaj hais ntawd, sawvdaws xav tsis thoob li. 19Malis khaws tej lus ntawd thiab xav ntsujntsoov rau hauv nruabsiab. 20Thaum cov yug yaj rovqab mus, lawv hunkauj qhuas Vajtswv, vim lawv hnov thiab pom raws nraim li tus timtswv tau qhia rau lawv lawm.

Tis Yexus Lub Npe

21Thaum tus menyuam ntawd muaj yim hnub, txog caij uas muab Nws ua kevcai txiav tawv, thiaj muab Nws tis npe hu ua Yexus, rawsli tus timtswv ceebtsheej tau qhia tseg uantej thaum tseem tsis tau xeeb tus metub ntawd. #Levi 12:3; Lukas 1:31

Fij Yexus Hauv Lub Tuamtsev

22Thaum txog lub sijhawm uas Yauxej thiab Malis mus ua kevcai ntxuav rawsli Mauxes txoj Kevcai tau xaaj tseg, nkawd txawm coj tus Metub mus nram lub nroog Yeluxalees thiab muab Nws fij rau Vajtswv, #Levi 12:6-8 23rawsli twb muaj lus sau tseg rau hauv tus Tswv txoj kevcai lawm hais tias, “Yuavtsum muab txhua tus tub hlob fij rau tus Tswv.” #Khiav 13:2, 12 24Thiab nkawd nqa ib nkawm nquab taug lossis ob tug rhaws nquab nyeg mus fij rawsli twb muaj lus sau tseg rau hauv tus Tswv txoj kevcai lawm.

25Lub sijhawm ntawd muaj ib tug txivneej hu ua Xime-oos nyob hauv lub nroog Yeluxalees. Nws yog ib tug neeg ncajncees, nws hwm Vajtswv thiab niajhnub tos tus uas yuav los cawm cov neeg Yixalayees. Vaj Ntsujplig tus Dawbhuv yeej nrognraim Xime-oos, 26thiab qhia rau nws hais tias nws yuav tsis tuag uantej uas nws pom tus Mexiyas uas Vajtswv tau coglus tseg lawm. 27Vaj Ntsujplig txawm coj Xime-oos mus rau hauv lub Tuamtsev. Thaum ntawd Yauxej thiab Malis coj nkawd tus Metub Yexus tuaj ua kevcai hauv lub Tuamtsev rawsli txoj Kevcai qhia tseg, 28Xime-oos txawm muab tus Metub los puag thiab ua Vajtswv tsaug hais tias:

29“Tus Tswv, nimno Koj twb ua rawsli Koj coglus tseg lawm,

thov Koj coj Koj tus tubqhe mus ntawm txoj kev kajsiab lug,

30rauqhov kuv lub qhovmuag twb pom Koj txoj kev cawmdim

31uas Koj npaj tabmeeg txhua haivneeg lawm.

32Yog lub teeb uas yuav ci mus rau Lwm Haivneeg,

thiab yuav ua rau Koj haivneeg Yixalayees tau ntsejmuag.” #Yaxaya 42:6; 49:6; 52:10

33Thaum tus Metub niam thiab txiv hnov Xime-oos hais txog tus Metub li ntawd, nkawd xav tsis thoob li. 34Xime-oos foom koobhmoov rau lawv thiab hais rau Malis uas yog tus Metub ntawd niam hais tias, “Vajtswv xaiv tus Metub no los ua kom cov Yixalayees ntau leej ntog thiab ntau leej sawv. Nws yog ib lub cim los ntawm Vajtswv los, tiamsis ntau leej yuav tawmtsam Nws, 35vim Nws yuav muab tej uas neeg xav hauv nruabsiab nthuav tawm. Thiab yuav mob koj siab cuag li ib rab ntaj chob.”

36-37Muaj ib tug pojntsuam hu ua Anas, uas yog ib tug xibhwb cev Vajtswv lus, nws yog Fanuees uas yog xeem Asaws tus ntxhais. Nws laus heev lawm; tomqab uas nws yuav txiv tau xya xyoo xwb, ces nws tus txiv tuag lawm. Nimno nws muaj hnubnyoog yimcaum-plaub xyoos.#2:36-37 Nimno nws muaj hnubnyoog yimcaum-plaub xyoos, lossis nws ua pojntsuam tau yimcaum-plaub xyoos lawm. Nws yeej tsis tawm mus qhovtwg li, nws tsuas niajhnub niajhmo mus pehawm Vajtswv hauv lub Tuamtsev, ua kevcai yoo mov, thiab thov Vajtswv xwb. 38Tamsim ntawd Anas txawm tuaj txog, nws ua Vajtswv tsaug thiab hais txog tus Metub ntawd rau txhua tus uas tabtom tos Vajtswv los cawm cov neeg hauv lub nroog Yeluxalees kom dim mloog.

Kev Rovqab Mus Pem Naxalev

39Thaum Yauxej thiab Malis ua txhua yam tiav rawsli tus Tswv txoj kevcai lawm, nkawd txawm rovqab mus tsev rau pem lub zos Naxalev uas nyob hauv lub xeev Kalilais. #Math 2:23 40Tus Metub ntawd tau lojhlob zoo thiab muajzog, Nws puvnpo lajlim tswvyim thiab Vajtswv txaussiab rau Nws.

Tus Metub Yexus Nyob Hauv Lub Tuamtsev

41Yexus niam thiab txiv niaj xyoo mus ua kevcai Hla Dhau nram lub nroog Yeluxalees. #Khiav 12:1-27; 2Kev 16:1-8 42Thaum Yexus hnubnyoog muaj kaum-ob xyoos, lawv txawm rov mus ua kevcai rawsli ibtxwm ua los. 43Thaum dhau lub sijhawm ua kevcai Hla Dhau lawm, nkawd rovqab mus tsev, tiamsis tus Metub Yexus tseem nyob rau hauv lub nroog Yeluxalees. Nws niam thiab Nws txiv tsis paub. 44Nkawd xav tias Yexus yuav nrog pab neeg uas nrog lawv tuaj ntawd los uake lawm; nkawd twb mus tau ib hnub ke, nkawd mamli pib nrhiav seb puas pom Nws nrog nkawd cov kwvtij thiab cov phoojywg uake. 45Thaum nkawd nrhiav tsis pom, nkawd thiaj rovqab mus nrhiav Nws rau nram nroog Yeluxalees.

46Hnub thib peb nkawd thiajli mam nrhiav tau Nws nyob hauv lub Tuamtsev, tabtom nrog cov xibhwb nyob uake, mloog lawv qhia thiab nug lawv ntau yam. 47Txhua tus uas hnov Nws tej lus, yeej xav tsis thoob txog Nws tej kev txawjntse thiab tej lus teb ntawd li. 48Thaum Yexus niam thiab txiv pom Nws, nkawd kuj xav tsis thoob li thiab. Nws niam txawm hais rau Nws tias, “Metub 'e, uacas Koj yuav ua li no rau wb? Koj txiv wb nrhiav Koj thiab txhawjxeeb txog Koj kawg li.”

49Nws teb nkawd hais tias, “Neb yuav nrhiav Kuv ua dabtsi? Neb tsis paub tias Kuv yuavtsum nyob hauv Kuv Txiv lub tsev no lov?” 50Tiamsis nkawd tsis totaub tej lus uas Nws hais ntawd.

51Yexus txawm nrog nkawd rovqab mus rau pem lub zos Naxalev, thiab Nws mloog nkawd lus. Nws niam khaws tej lus ntawd rau nruabsiab. 52Yexus lojhlob zoo ntawm sab nqaijtawv thiab sab lajlim tswvyim, ua rau Vajtswv thiab neeg puavleej txaussiab rau Nws. #1Xamu 2:26; Paj 3:4

Currently Selected:

Lukas 2: MWW2022

Highlight

Copy