JOAN 14
14
Jisumin Abukelo Gínana Bedange
1“Noluke aapíe míídír sumapeka. Shédíkíng míída sulangka; ngokkíng míída sulangka.#14:1: Demangkom no Shédíkíng míída sulangka. 2Ngokke Yayike ekumlo duupeko mílí idung. Ngo noluke dungkuem delo iruu bikape gídak. Depe imangamílo, ngo nolum pomayai. 3Delokke ngo gíla noluke dungkuem irung bimílo, ngo aalat langkula nolute ngokke dungkolo duudope nolum ngokkíng langaayéku. 4Ngokke gípeko among bedangem nolu kéndung.”
5Thoma bí Jisume pokai, “Ruutume, no ingkolo gídakdí ngolu kénmang, depeila kape kísa bedangem kényéne?”
6Jisu bí pobito, “Ngomino bedange, arue delokke turname. Séko kelokte Abu kelo aalamang, ngokke petom lokmin aaladune. 7Nolu ngom aropakpe kéntuamílo ngokke Abuemkom kényai.#14:7: Ayokon kerangke agome “Nolu aropakpe ngom kéntuamílo nolu kényé!” emdung. Supak kelokke nolu bím kéndung delokke bím kaatobong.”
8Philip bí pokai, “Ruutume, Abuem ngolum lengkantola de ngolu kepe aidung.”
9Jisu bí poto, “Philip, nolum ngo deddíko yébosulate ngom no kénmanía? Séko ngom kaatodí bí Abuemkom kaato. Kapeila no ‘Abuem ngolum lengkantoi’ emkane. 10Ngo abulo dung delokke Abude ngokkíng dung emnamdem no kénmanía? Ngokke nolum ponam agom kídarde ngokke míídu sulokmang. De ngokkíng duuna agí agérem gérna, Abu suemin podune. 11Ngo Abulo dung delokke Abue ngokkíng dung ngokke emnam agomdem ngom arope míítoka; demangkom hakiipe duusuna irisinyo kídíem arope míítoka. 12Ngo nolum aruem pobidung, séko ngom míngke sududí de ngokke inam atí kídíem iyé. Bí simpenem botteyana atí siriemkom ilayé, kapeila ngo Abu kelo gídakku. 13Nolu ngokke amínlok ingko ingkuem koyédí, dekedem ngo ibiyé. 14Nolu ingkona atíko ngokke amínlok koyédídem ngo biyé.
Deena Aidem Bipe Emla Jisuke Pébisuname
15“Nolu ngom ayadumílo, nolu ngokke polígem tatyé. 16Delokke ngo Abuem kobiyé delo nolum bí Igulpena konko nolukíng yéyar bosudope biyé 17de Shédíke aruem lengkanna Aide. Tani amonge bím torík sulamang, kapeila de bím kaapete kaamang delokke kénpete kénmang. Idola nolu bím kéndung, legade bí nolukíng duudung delokke nolukíng duuyé.
18“Ngo nolum opanpe memayé; ngo nolukíng aayéku. 19Tani amonge ngom kaayi pomayé, idola nolu ngom kaayé. Kapeila ngo turla dung delokke nolukom turla duuyé. 20Delo longedelo ngo ngokke Yayi kíng dung, nolu ngokkíng dung, delokke ngo nolukíng dung emla nolu kénsuyéku.
21“Séko bulu ngokke ngiitomem bomla delokke dekedem igedudi, bímin ngom ayane. Séko ngom ayadudí bím ngokke Yayi bí ayayé, delokke ngote bím ayayé delokke agíem lengkan subiyé.”
22Delokrongem Judas Iskariot me emmape, Juda bí pokai, “Idakkom, Ruutume, no kapeila agíem ngolum lengkan sudola tani amongem lengkan sulímane?”
23Jisu bí Poto, “Séko ngom ayadudi, bí ngokke luyilem igeyé. Ngokke Abue bím ayayé, delokke ngolu bíkkíng aala lekope duubosuyé. 24Séko ngom aya madudí bí ngokke luyilem igemang. Si noluke tatnam agom kídí si ngokke sumang, idola ngom melíkna Abukemin.
25“Sim takam sim ngo nolukíng yébo sudungem poto. 26Idakkom Abue ngokke amínlok melík penam igulna, Deena Aide takam atíem nolum poyilla delokke ngokke nolum potonam takamem kénsu moyéku.
27“Yéponamem nolukíng ngo mebidung; ngokke dengomem nolum ngo bidung. Ngo nolum tani among sokke amie binam kísape bimang. Noluke aapí aange míídír sumapeka delokke pesomapeka. 28Nolum ngokke ‘Ngo gínyo dakku delokke nolukíng aalat dakku’ emnamem tatto. Nolu ngom ayadumílo, ngokke Abulo gíku namdem ashépe mííyé, kapeila Abude ngom penem botteyane. 29Ngo nolum supak atíe píímang adape pobi tobong, delomin atíde pííyém nolu arope mííyéne. 30Ngo nolum deddíko luposudí kaimang; kapeila tani amosokke ruutume píídak. Ngokke teyolo bí atí ilamang, 31idokom ngo Abuem ayadung delokke ngo Abuke ngom ponam pakpe ibidung emla tani amonge kénperung aido.
“Aatola supak kaju gílape.”
Currently Selected:
JOAN 14: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
