LUK 20

Jisuke Ralnamem Íngkí Bengkíname

(Mt 21:23-27; Mk 11:27-33)

1Longekonem ami kídíem Jisu bí kumkeng ekumlo ngiitom luyilbola delokke tatpona ngiitomem pogoola yédungem, ríne kídíelang ukilkídíe, miro kídíem lekope bíkkíng aabosuto. 2“Ingkona ralnamlok no sim atíkídí sim idune?” emla bulu pokai, “Sékodí nom sim ralnam sim bitune?”

3Bí poyansuto, “Ngokom nolum agomko íngkípe. Ngom pobitola, 4‘Joanke baptis inamde teyong telokkía ma, tani kídí lokkía?’ ”

5Bulu buluke aralo luposudola pobosuto, “Ngolu ‘teyong telokke’ emmílo bí, ‘Kapeila nolu bím aro míímane?’ emla tatkíyé. 6Delokke ngolu ‘Tani lokke’ emmílote ami takam si ngolum elínglok geyé, kapeila Joan bí kaaluna miriko emla bulum pobitung.” 7Dekepe ila bulu poyansukai, “De ingkolokdí ikane ngolu kénmang.”

8Jisu bí poto, “Demílo ingkona ralnamlok sim atí kídí sim idudí ngokom pobimayé.”

Aríklo Bara Ina Amikolo Luyiisuname

(Mt 21:33-46; Mk 12:1-12)

9Bí sim luyiisunam agomsim ami kídíem poboto: “Amikone aríkko kato, dem bara ina ami kídílo bipala mootengko amolo oolko yéto. 10Ali gaddíku moodílo amide béérangem bara ina ami kídílo, bulukelok ali ayokonem laadokupe emla melíkto. Idakkom bara ina ami kídíde bím demla delokke arape melíktoku. 11Bí angukon béérangko melíktoku, idola arík ina ami kídíe bímte demla iréé sinyola ipala arape melíktoku. 12Bí lengumnape ako melíkto kukéng, dem bulu modíp geyéla elpakto. 13Delokrongem arík atode pokai, ‘Ngo kape imíloi? Ngo ngokke ayanam uem melíkpe, bulu bím míngge yépe emla míídung.’ 14Idakkom bara ina ami kídíde bím kaayédem bulu agomdem porubosuto. Bulu poto, ‘Simino ruutum doge penade, kaju bím mokalaju, delomin ruutum doge penamde ngolukepe iyéne.’ 15Dekepe iname bulu bím arík ramgomlo gíbola petto.

“Delo arík atode bulum ingkoko ipene? 16Bí aala bara ina ami kídí dem petgeyéla angukonlo arík dem biyé.”

Dem ami kídíde tayyédem bulu “Depe ima rudak langka” emla poto.

17Jisu bí jonnampe bulum kaasudola íngkíto, “Demílo sikepe atbomnam ortode ingkuedi:

“ ‘Ekum mona kídarlokke mepaknam líídude takam lokke míngkepe ikaku.’

18Delo elídelo olíkna mipíde ammín kope iyé,

idakkom líítam delokke ojétnam mipídem lajépyé.”

Kajanang Bigangem Íngkí Bengkíname

(Mt 22:15-22; Mk 12:13-17)

19Ukil kídí elang ríne kídíe bím menarupe umpe emla pongkok mata tatíto, kapeila bulummin sim luyiisunam agom sim pobomdune emla bulu míísuto. Idola ami kídíem bulu pesoto.

20Jisume an gap dope emla bulu aina dengena amipe iruna amieke bulu melíkto. Bulu Jisuke ponam agom kídarlok atíko gakla bím pauar kana ruutum kídílo delokke gobornorlo melíkdope emla mííbomto. 21Dekepe iname miru kídíde bím íngkíto, “Saare, no aina agomem poyil luyilla inamem ngolu kéndung, delokke no lungu pongu agom pomang idakkom aro bedalok Shédíke agom emmin pobodune. 22Kaisarme kajanang binamde bibaadunía ma, bibaamanía?”

23Idokom Jisu bí buluke budii aapíem kéndola bulum poto, 24“Ngom nokdiko lengkantola. Sékoke mimang elang amíne delo kadune?”

“Kaisarke” emla bulu pobito.

25Bí bulum poto, “Demílo Kaisarke atíem Kaisarme bitola, delokke Shédíke atíem Shédíme bitola.”

26Bulu bím bíkke ami kídí keralo políknam agomlok mokit latomang. Delokke bíkke pobinam agomem tatla, bulu asoope dungkai.

Sikolokke Gerepkunam Legangem Íngkí Bengkíname

(Mt 22:23-33; Mk 12:18-27)

27Gerep kunamem aro míímana, Sadduki eke ayoko aala Jisume íngkíto. 28“Saare” emdola bulu ííto, “Mosi bí ngolum sikepe atbitung, ami akonlokke bírokone méngem ome-oo kamape sinyola imílo amide meyédem laalangkula bíkke nyokna bíro delok legape ome-oo obiladoku. 29Supak bíro kumsu kínítko katuai.Kerangkede méngko laato de ome-oo kamape sinyokai. 30Annyinape nadete depe ikai 31delo angum nape nadete depe mime dem laala akamope ikai delokke kínít nape nadete ome-oo kamape sinyokai. 32Méélamdem mimedete singum kai. 33Supak demílo, kínít dekai méépe bím iname, gerepdíku longelo, sékoke méépe bí iyékun?”

34Jisu bí poyansuto, “Silo meloke ami kídíe mime laala delokke milo ila idung. 35Idakkom mime dekom milo dokom angkupena gerepdíku longelo gerep kupenade milo méng imayé, 36delo bulu siyimayé; kapeila bulu teyong kotoki kídí kísape iyé. Bulu gerepkuna tanipe iname, bulu Shédíke ome-oo kísape iyéku. 37Sinam lokke gerep kunam legangem Mosi bíte berokrupe lengkan bitung. ‘Payémlo eme dorna’ emkolo bí Ruutumme, ‘Abrahamke, Isaakke delokke Jakobke Shédí’#Gílen 3:6 emla mantung. 38Bí sina kídíke Shédímang, idakla turna kídíke Shédí emin, kapeila bíkke lokmin takame turdune.”

39Ukil ayokone dem tolíkdola pokai, “Saare, de arodung!” 40Delokke sékote bím íngkí bengkítope emla míílana kaimang.

Messiahke Legangem Íngkí Bengkíname

(Mt 22:41-46; Mk 12:35-37)

41Delokrongem Jisu bí bulum poto, “Bulu kape kísa Kristo bí Dabidke Ue emkane? 42Dabid bí agíe Mirilunggu Kitablo sikepe posutung:

‘Ruutum bí ngokke Ruutumme pokai;

43ngokke lakbíklo duulangka noluke miru kídíem ngokke ale rumkílo tujémmang tetengem.’ ”#Miri 110:1

44Dabid bí “Ruutum” emla gokto. “Demílo Jisu bí Dabidke oope iyénía?”

Ukil Kídíem Jisuke Luname

(Mt 23:1-36; Mk 12:38-40)

45Takam amie tatla duudungem Jisu bí bíkkelo luyilsuna kídíem poto, 46“Ukil kídíem ansu langka. Bulu galuk edorna gela gígoolídung, dukan bojarlo kaarík irík kosulídung, kumkeng ekum kídarlo aiyalumna dungkuem matadung delokke dokul tíngkullo mínggepeko dungkolem mííbomdung. 47Bulu meyéng ekum kídíem rotkamdung delokke kaayé tayyépe emla bodo dora kumdung!”

Currently Selected:

LUK 20: adiBSI

Highlight

Copy