TIENKAM 10
10
Peter Nai Cornelius
1Caesarea ga pazanniu Cornelius kubo, Rome riphenmai, “Italy Rimaiga” charipi khat bamme. 2Pahai tacheng matipbo mai-e; sichiujiu pah khatdi pakikhunmai mai mathiu Tingwang tu kahumme. Pahai Jehudi mai kaleksa maidung wajiukha tudi nkhajiu khatdi Tingwang khuga kakheng thiu saomakjiu bambo-e. 3Sichiujiu naikhat chawan wanchak sum ningga paniu madungao khatga Rapiu gu maza khatniu wangjiu patu “Cornelius,” chiu kubo masan siakjiu ngaode. 4Paniu pingboniu phuilujiu maza situ phui-e khatdi din-e, “Paohubo, nde chiulo?”
Maza siniu paokakge, “Nangniu kakhengthiu bambo khatdi maidungtu lungsajiu nkha bambo hai Tingwang pachun kiude, sichiujiu natu paokak khai bide. 5Sichiujiu tuhoira Joppa lam maidung khangsiatu Simon Peter kubo piutu phiura langkhailo. 6Pahai duipui mungga chamigi ngam kambo Simon kyga riukhai bamme.” 7Sichiujiu mazase tadmide, khatdi Cornelius niu pavang khangnia khatdi riphenmai ruanggasu tacheng matipbo piu khattu kukhaide. 8Degu padmilo chiubo paniu paliu khuga dinkhaide khatdi Joppa lam paliutu langkhaide.
9Pasaibo naise, paliuniu Joppa wang mana subo tingga, Peter niu niending wan gase chaky rilam khanglujiu kakheng thiu bamme. 10Pawon mariujiu wa tiuni mide; sichiujiu pamasuang ga katiu kaden khaibo madungao khat paniu ngaode. 11Siga tinggen akhamse lepadjiu warek kadibo khat pake madai gasu kadihga khin maju kiubo paniu ngaode. 12Sibo lung gase chakhao jat hina, paganiu buangbo wakhaodung khatdi thingnadung bamme. 13Siga chakhuan khatniu pakhuga din-e, “Peter yo, sulo, kamshat lujiu tiusulo!”
14Chiudi Peter niu din-e, “Sichiu makge, Rapiu yo! Tacheng saisuijiu masan makbo maksai taniabo wakhatnadi I tiumakge.”
15Chakhuan siniu pakhuga dinlan-e, “Tingwang niu masanne chiujiu madukhai mibotu, wadaodi masan makge chiujiu lukhai tulo.” 16Haise padlon summe, sibosai maniase tinggen lam lukhanglan mide.
17Madungao ramba hai detulo chiujiu Peter niu pasuang hajiu bamboga, Cornelius niu langkhaibo maidungse Simon ky se maniujiu rengmun gase chapjiu bamme. 18Paliuniu kujiu maniu-e, “Haiga sangmai pazanniu Simon Peter kubo mai bamma?” 19Peter se madungao rambatu makumjiu bamboga, Hiupuina niu din-e, “Kinglo, mai khang sumniu natu phiu bamme. 20Sijengniu kadenlujiu tadkiu sulo, paliutu maluang tadra manang mane, palamra Iniu paliutu nakhuga langkhaibo-e.” 21Sijengniu Peter niu nkum lujiu paliu khuga din-e, “Naliuniu phiukinbose I-ye. Dechiura naliu wangkin jiulo?”
22Paliuniu paokakge, “Charipi Cornelius niu aliutu langkhaibo-e. Pahai Tingwang tu kahumbo khatdi kawibo mai-e, khatdi patu hai Jehudi mai hinaniu chakhuang thiubo mai-e. Tingwang gu maza khatniu natu pakyga kuwangra khatdi nangniu kadinbo nkingra pakhuga dinkhai bibo-e.” 23Peter niu sibo nai nchunse paliutu manai khaira hiamlude.
Pasaibo naise paniu paliutu maluang lujiu tadsude; khatdi Joppa gasu malum maidung khangsiadi pasai suitad kinne. 24Pasaibo naise Cornelius niu pasingna maidung khatdi paka kakung maidungtu maluang lujiu patu khuanbambo Caesarea gase paliu wangtangde. 25Peter niu sichiujiu wangboga, Cornelius niu patu adaojiu pamasuangga makhum kiude. 26Chiudi Peter niu patu jusu lujiu din-e, “Suchap milo, Idi chamai khatle,” 27Sichiujiu kalunglamse Peter nai Cornelius npaojiu ngutboga, maidung kengkha bamniubo paniu daode. 28Paniu paliu khuga din-e, “Naliu pumsiakniu, Jehudimai khatniu Nkengmaitu phuira maksai majang khat thiura suimakge chiubo sibamme. Chiudi mai khatnadi tacheng matip makge, maksai tania-e, chiubo Iniu maningbo suilakge chiujiu Tingwang niu akhuga lenkhai bide. 29Sijengniu, naliuniu atu kumengboga, Iniu wadi karaobo thiumakjiu wangkinbo-e. Sijengniu naliu khuga Iniu maniubo-e, dechiura naliuniu atu kujiulo?”
30Cornelius niu din-e, “Haise ndanai jeng madaibo nai suang haikumbo katang Iniu aky lungga chawan, wanchak sum tingga kalum rijiu kakheng thiujiu bambo tingga-e. Siga kabenbo fai-ni piubo mai khatniu simak dakjiu akhuga chapbam niu-e. 31Khatdi paniu din-e, ‘Cornelius, nangniu kakheng thiubo khatdi maidungtu lungsa khaibo nagu tienkamdungse Tingwang niu suikhaide. 32Joppa lam pazanniu Simon Peter kubo piutu tadlujiu kura maidungtu langkhailo. Pase duipui mungga lungbambo chamigi ngam kambo Simon kyga sangmai thiujiu bamme.’ 33Sijengniu, natu kura Iniu langkhainuang mibo-e, sichiujiu nang wangkhaibo hai wichang wide. Tuhoira aliu mathiu Tingwang masuangga bamme, sichiujiu Rapiu niu natu dinra katikhai bibose nkingra khuan bamme.”
Peter Niu Tacham Dinbo
34 #
Taj 10.17. Siga Peter niu haichiu dinsude: “Tuhoira I maningtaode chiubora Tingwang haira mai khattudi chamiu mareng thiu makge. 35Patu kahummai hinatu khatdi majibo kammai hinatu khatdi jat hinatu lukhaibi-e. 36Paniu Israel maidung khuga mathiu Rapiu Jesu Khrista pen gasu agi-manaibogu Kawicham paokhaira langkhaibose naliuniu sibamme. 37John niu tadui nphum khaibo lamga, Galilee gasu dinron subo gasu Israel mai kadihga padmibo pakhiangnase naliuniu sibamme. 38Nazareth Jesu riga dechiujiu Tingwang niu Masanbo Hiupuina nai pumtan runkiu khai milo chiubo naliu sibamme. Tingwang niu patu maluang khaibo jengniu paniu pabam machang kawibo ngam kamjiu khatdi Satan hangga bammai hinatu wikhaijiu rontad khai mide. 39Paniu Israel mai kadihga khatdi Jerusalem ga kamkhai mibo hinagu aliuniu jengdin thiubo-e. Sichiujiu paliuniu patu singchai riga natri gianjiu kamshat mibo-e. 40Chiudi Tingwang niu patu jengsum saiga kashaibo gasu juringkhai bijiu ngaolen khaide, 41chiudi mai hina khuga makjiu Tingwang niu kadalumai, chiubora paniu kashaibo gasu ringsu lanbo saiga, tiu-macham sak macham khaimibo aliu hainiu pagu lamchap si-e. 42Sichiujiu paniu aliutu maidung khuga Kawicham dinronjiu khatdi patuse ringbammai khatdi kashai maitu ladjan thiura Tingwang niu kadalubo-e chiujiu din madura chamtan pikhai-e. 43Phaimiukakung hinaniu palamga dinmibo-e chiubora patu malummai hina nuanse pazan pen gasu kuakhai bine.”
Nkeng maidungniu Masanbo Hiupuina Daobo
44Peter niu haichiu dinbamboga, palad nkingjiu bammai mathiu riga Masanbo Hiupuinase kiukhai bide. 45Jehudi mai malum maidung Joppa lamsu Peter tu maluang lujiu wangmaise Tingwang niu pagu Masanbo Hiupuina kalense Nkengmai riga kiukhai biboga paliu suang hamide. 46Palamra paliuniu katambo lad gasu dinbambo khatdi Tingwang kendi situ thuonjiu bamme. Siga Peter niu din-e: 47“Haibo maidungdi aliu kumgapjiu Masanbo Hiupuinase daolude. Sichiusai, paliuniu tadui gasu nphumra mai khatniu kham ngamma?” 48Sichiujiu Jesu Khrista zan gasu paliutu tadui nphum khaira paniu chamtan pikhaide. Sichiujiu paliu khuga manaikhai sanra pakhuga kheng-e.
Currently Selected:
TIENKAM 10: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
