ROMEMAI 3
3
1Chiusai Jehudi mai thiubo pageng degu bamlo? Khatdi chagi rombogu nkiubo degu bamlo? 2Palam hinaga, pachangjiu bamme! Raiboga Tingwang niu pagu kawichamse Jehudimai khuga pikhai bide. 3Chiudi paliu khangsianiu malum makge sai dechiu ralo? Paliugu malumbui makbo siniu Tingwang gu malumbuibo situ waleng makbo thiukhai rama? 4#T.Lui 51.4.Palingjiu sichiu makge! Chamai hinaniu aratjiu bamdi Tingwang ra majibo-e. Masanbo ariakniu dinbo kumme,
“Nangniu chalad dinbo gasu majibose lenkhai siakrabo-e;
natu madiubo gase ngamkhai siakrabo-e.”
5Chiudi aliugu majimakbo tienkam siniu Tingwang gu majibo situ pingao khaisai, aliuniu degu dinralo? Tingwang niu aliutu sajai pikhaibo hai pah maji makge, chiujiu aliuniu dinrama? (Haise chamaina lunlung saisuijiu maniubo-e). 6Sise wadaodi sichiu makge! Tingwang hai majimak bamniu sai, paniu dechiujiu kadihpiri haitu ladjan thiu ralo?
7Chiudi agu majimakbo siniu Tingwang gu majibotu madu padjiu paken pidi khaisai, dekambo lamniu atu tuhoi katangbo nuan phungmai-e chiujiu ladjan thiujiu bamralo? 8Sichiusai haichiu dekam dinmak ralo, “Kawibo padlu raleng kasabo tenkhe?” Sikumjiu khangsia mainiu atu haichiu kamaoboga madam khaijiu bamme. Sikumbo maitu ladjan thiu raleng buibo-e.
Mai khatnadi Majibo Ha-e
9Chiusai Jehudimai aliu hai Nkengmai suang wi-nkiu jiuma? Sichiu makge, palamra Jehudi maidi Nkengmaidi mai hina nuan hangga bambo-e chiubo hai karai gasu Iniu madukhai mibo-e. 10#T.Lui 14.1-3; T.Lui 53.1-3.Masanbo ariakniu dinbo kumjiu,
“Tacheng matipbo mai khatnadi ha-e,
11ningtingmai khatnadi ha-e,
maksai Tingwang tu phiumai khatnadi ha-e,
12Paliu mathiu Tingwang khugasu diu mide;
paliu mathiu kamaoboga tadkhai kam mide;
kamaji kambo mai ha-e, khatnadi ha-e.
13 #
T.Lui 5.9;
T.Lui 140.3. Paliu ladkengdungse aratboniu phui-e.
Paliu leese kasaboniu phui-e;
paliu muntai gase karabo kaniutai siniu phui-e.
14 #
T.Lui 10.7. Paliu ladkengse kakhabo siangniu phui-e.
15 #
Isa 59.7,8. Maitu kamshatra khatdi kam masara majatle;
16paliuniu tadkhaibo hinaga kam masa khaibo nai kam maha khaibo ronna-e.
17Paliura agi-manaibo npui simakge.
18 #
T.Lui 36.1. maksai Tingwang tu pingbodi paliu khuga ha-e.”
19Tuhoira aliuniu si-e chiubora Tacheng-tajai hainiu mai hinatu Tingwang masuangga kammao kam mide chiubo silujiu kadihpiri pakhiangnatu Tingwang gu ladjan-ga puiwang raleng-e. 20#T.Lui 143.2; Gal 2.16.Palamra Tacheng-tajai majaibo donniu mai khattudi Tingwang suangga kam majikhai makge; delosai Tacheng-tajai hainiu nuan tenmide chiubo sira leng-e.
Tingwang Niu Aliutu Kam Majikhaibo
21Chiudi tuhoira Tingwang niu chamainatu kam maji khaibo hai madukhai bide. Haise Mose gu Tacheng-tajai nai phaimiukakungdung siniu jengdin thiukhai bamdi sibogu Tacheng-tajaise wageng hamide. 22#Gal 2.16.Tingwang niu chamainatu kam maji khaibo haise Jesu Khrista tu malumbo gasu-e. Haise Khrista tu malummai hinatu-e, palamra pakhuga katambo wadi ha-e. 23Palamra mai hina nuan kam mide, sichiujiu Tingwang gu kendibo gasu paliu diumide. 24Chiudi Tingwang gu lungsiat sira Khrista Jesu pen ganiu tingtheng karingbo haise matha pikhai-e. 25-26Tingwang niu patu pipad khai bide. Sichiujiu patu malumbo gasu maidung nuanse, paniu shai khaibo gasu kuak khai raleng-e. Tingwang niu haise kambora pase majibo-e chiubo lenkhaibo-e. Karaigara pahai khengsi-e sichiujiu maidung nuanse phui maha khai-e, chiudi tuhoira paniu nuan haitu ladjan thiujiu pase tacheng matipbo-e chiubo lenkhai bide. Haichiujiu Tingwang niu pagu majibose lenkhaijiu Jesu tu malumbo mai hinatu kam maji khai bide.
27Chiusai chaliang rabo bam dega bamlo? Wakhatdi ha-e! Dekumbogu Tacheng tajai niulo? Tacheng-tajai piubo niuma? Makge, chiudi malumbo donniu-e. 28Sijengniu aliuniu lukhaibora, Tacheng-tajai majaibo donniu makjiu malumbo donniu mai khat tuse kam maji khaibo si-e. 29Pahai Jehudimai Rawang ronna jiuma? Nkengmai Rawang-di makma? Yo, Nkengmai Rawang-di thiubo-e. 30#Taj 6.4; Gal 3.20.Tingwang ra khatle, Jehudi mai tudi, Nkengmai tudi malumbo donniu kam majikhai birabo-e. 31Sichiusai malumbo donniu Tacheng-tajai situ aliuniu thonmi jiuma? Chiumakge! Aliuniu Tacheng-tajai situ thin matip khaibo-e.
Currently Selected:
ROMEMAI 3: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
