MITHEW 16
16
Aenelah Kanita Ripi Ow
(Mak. 8:11-13; Luk. 12:54-56)
1Pharisis akha chu Saddusis na Jisu kolla lung ann phao wa thangwan tienga anealah ri pi rang mani na sai ae. 2Chuna Jisu na mani ta sange; “Nataktieng apha wak juija nangei na ril, ‘hachu ae ruh mei sur ang no ae rouram chu thangwan hi sann ae.’ 3Hana nietukka na awoni hi ruh mei sur ange rouram chu thangwan hi runem meh. Nangei na thangwan an weta ejongpa shuk kang mo danga ril nea chau, muh anutienga esuk kang mo tichu ril nea no ae. 4Hana akha chu mee namei lal thing meerol na chu angakpi anealah an na am meh, chuti weta nahi Jonah kolla pek chak no wa chu pe ang ni jo weh.”
Chuna Jisu na mani ta hou phurra thingso weh.
Pharisis Lea Saddusis Achol
(Mak. 8:14-21)
5Mani na tuipi lal su wa thing juija marui ngei budol choi rang makphur so ae. 6Jisu na mani ta ril, “Song jello Pharisis lea Sadusis ngei achol ha.” 7Mani sung nanga mani na hal hlakka rillea, “Nahina rou chu anina budol choi no sarukka ae.”
8Mani ngaitu hlak ha Jisu na dangpha ah rillea, “Ngoiring takno ngei eje ranga nangei sunga budol tol no sharukka trong hlakka chau? 9Atun phao nangei na lunghal thei no chau? Budol ranga na lasing ranga mee ta kabakpi ha angei thei no chau? akha chu tai shihakti eja nangei na shi pi sa? 10Ano lea budol sari na lasing innly ta pek akha chu tai shihakti eja nangei na shi pi chou? 11Keina budol rouramma nangei kolla ril nonge ti ha alo dang no ah chau? chuti halkom Pharisis akha chu Sadusis ngei achol ha chu natak na song jello.”
12Chuna budol akha chu achol roulam ma no ae hana Pharisis akha chu Sadusis ngei chupi takpi ha song jello ta ril na arengpu na trongsan pe ah ae ta mani na dangpha so ae.
Khrista Ae Ta Pitar Rilshuk Na
(Mak. 8:27-30; Luk. 9:18-21)
13Kaisariya Philipi ram tienga Jisu na phao ah marui ngei ta Jisu na sai, “Meesanaopa ta malmashi ngei na alo ta ril meh?”
14Manina sange. “Ahre na chu Johon Baptias ae; adang na ril ae Elija, akha chu adang ahre na chu Jeremiah anoleh rouphu akha ae.”
15“Chuti weta nangei na chu alota rilla chau?” “Keita atu ae hallo chau?” Amo na sai.
16Simeon Pitarna sange, “Aring Chungthieng sanaopa Khrista ha nange.”
17Jisu na sange, “Jonah sanaopa Simon nang chu jaihra ae, rouram chu mee ngei na nakolla nahi dangpi ano ae, thangwan na pathieng na dangpi ae. 18Chuna keina nakolla rillinge nang chu Pitar, nang chu sumlung chunga keina akha ae nokna inn sa ange. Hana sarmei kuum innkal na nahata dap nea ang no ae. 19Keina thangwan rengram ma innkal kalna pe ange chuna ejongpa alei ram ma nahup ha wan ram ma huppange akha chu aleiram ma nahla ha wanram ma hla ange.”
20Chuna marui ngeita amona trongsan pe ae atujong akha kolla kei hi Khrista ae ta ril no oh.
Jisu Na Mathit Rang Rilphur
(Mak. 8:31—9:1; Luk. 9:22-27)
21Apha hana hai thou wa Jisu na marui ngei ta hrabak ta amona hi ril thou so, “Kei Jerushalem ma thing weta rouphu lamkai ngei kut chunga akha chu roukung ocha ngei maikunga aol dong pha ange akha chu amota that tange rungnie nathum su nie ah ring changa ringthou ange.”
22Pitar na amota adanga ruija thing weta lungsa so, “Ano mee ril hajongpa ha ephao shuk kang no ae,” Amona ril, “Ephao shuk kang no ae Arengpu.”
23Jisu na Pitar am na haileh ah ril, “Ka am na hai thou lea oh, saitan! nang hi ka kae mathui rang mee ae; rouram chu nangna Chungthieng ningtienga nadang am no ae chuna nangna malmashi ngei hek ta hal che ae.”
24Jisu na marui ngeita ril, “Atu jongpa na kanutieng jui num lea, matakna matak ta ngei no shu oh akha chu ma Kross ron weta kanutieng jui shu oh. 25Rouram chu atu jongpa na maring chang ring num lea mang ang ae. Chuti weta atu jongna kataranga maring chang mangpi lea amo ha tuksier ange. 26Atujong malmashi akha na simlei ram lim pha weta mamuihla mangpi lea chu echu hoi ah meh? 27Chuna meesanaopa mapa hina mahung majai wanrui hitta jungha ange. Chuna apha ah chu malmashi lim na ma ae, ma ae na tullu anu juija olmant pe ange. 28Keina nangei kolla adiek rou rillinge hina ngirra am ahre chu athee am no lutta meesanaopa na marengram jung ripha ange.”
Currently Selected:
MITHEW 16: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
