LUKE 10
10
Jisu nüh Nyiri Rürake Nyi Künyihnyih vünüh Küüze
1Hama sevü Vüwa nüh anyi küpa rürake rüka taji matüvü nyi künyihnyih vünüh ma khiekhiela wa naveh nüh anyu azhie aveh vü küze. 2#Mat 9.37,38.Ma nüh mari vü, mümawie thuoüji provehthuoh, thitü küürori nü zülamü, jükenüh kümawieh Vüwa nüh küürori ma kümawie vü küze na küsa kenüh khuo luo. 3#Mat 10.16. Nohri waluo, halie, hi nüh anyihzhü rezanyihnyih aza vü küüze kümüjie nohri küze veh nüh. 4Nohri pesaku nga, chükhu nga, ajiküükruvüh nga müvütümü luo, thi lekhuji vü nyi küsü nga mükhurütümü. 5Nohri azhe khiela tu naveh nüh, azhe hama kümühiewa saluo, ti phrate khu luo. 6Thi azhe jüla atsa akütsia küvüngüri pelaji nohri kütsia ma vü küüpe luo, thitü jüüta nyuji nohri vü shele teru naveh. 7#1 Kor 9.14; 1 Tim 5.18.Thi azhe jüla pe taji mari nüh kütsaküzhu mowaküchetsü naveh nüh tsa thi zhu luo, küpakenühnyunü küürori tü avo ngu kütsa le kenüh, thi küwa vü azheküsüvü pemüthuoüji kükhaphrüle khaphrüza müsatümü. 8Thi nohri anyu küsüküsü vü nga wa tü nohri sieke thuoüji mari nüh mowa vi nohri tsü naveh nüh tsaluo. 9Nyu jüla akünari sakümühietsü nü mari vü, Saküüwuowa kajipe tü nohri shenyi she pevehthuoh. 10#Krr 13.51.Thitü nohri anyu küsüküsü vü nga pe taji nü nohri müsieke thuoüji, wa taji mari lekhuji vünüh, 11#Mat 10.7-14; Mrk 6.8-11; Luk 9.3-5. nohri anyu zhitho hiri jih vü küüpe nga kükohja nohri lüvü thse leveh, thi Saküüwuowa kajipe nü shenyi vehthuohta küsa thsüluo. 12#Atü 19.24-28; Mat 11.24; Mat 10.15.Hi nüh nohri vü küza naveh, “Ashi küsa rülovü Sodom zhüku nü anyu jüma shih nüh küükho naveh.
Mükütsotü Nyuri
(Mat 11.20-24)
13 #
Isa 23.1-18; Eze 26.1—28.26; Joe 3.4-8; Amo 1.9,10; Zek 9.2-4. “Kümüzüawa no vü waluo, Khorazin, kümüzüawa no vü waluo, Bethsaida küpakenühnyunü küüro küji nosü vü küsa kümüjie Tair thi Sidon masü vü satsü huoüji masü tü atsahkie nüh küzhu thi aweji nüh thse ti sanü khanavünüh luoveh khaphrümüla nathuohnü. 14Thitü ashi küsa rülovü nosü ashi nyia vünüh Tair thi Sidon ashi nüh küürüzi naveh. 15#Isa 14.13-15. Thi Kapernaum, noh mpa no sakümüsie nü thajüwu jo nti savehülo? Noh vituru müküne nyihsuozü lovü thsemü naveh.
16 #
Mat 10.40; Mrk 9.37; Luk 9.48; Jhn 13.20. “Thari nüh nohri zhükünaveh nüh eh zhü nga künawieveh, thi thari nüh nohri kule naveh nüh hi nga kule veh, thi thari nüh hi kule veh nüh hi küüzewa kule küveh wiethuoh,” ti küza.
Nyi Rürake Küüzeri Sheleküru
17Nyi rürake küüzeri tü lozhe she taji ru nü, “Vüwa, mükümtse sietse wie nga noh nyo vünüh hiri zhükünara,” ti küza.
18Thinü ma nüh mari vü, rügi vünüh tsoküürie kümüjie Tsuore küturu hi nüh nguthuoh. 19#Krh 91.13. Halie, hi nüh müre thi shumathu sakükrürana küsa kükhra thi mükünongüra nyia vü khrara na küsa kükhratsümüthuoh, thinü zanyoküsü nga nohri saküümünomünawa nyu. 20Thi sietse kümüsüri nüh nohri kükhu vü ruthuoh ti küsa kenüh alomüzhetümü, thitü rügivü nohri nyorhüke küsa kenüh lozheluo.
Jisu nüh Külozhe
(Mat 11.25-27; 13.16-17)
21Jüma tsotho vü Kümtse Sietse vünüh ma tü lozhe taji, “Eh Pa no münashethuoh, rügi thi azhi Vüwa, noh nüh küthsü kümüsheri vünüh azhü hari küthi sanü kürünyiri küthsükütsü kenüh no müna sheveh, ah eh Pa, küpakenühnyunü hama tü no küümzewa kümüshe küsa thuoh kenüh.”
22 #
Jhn 3.35; Jhn 10.15. Zanyo aveh nga eh Pa nüh hi vü tsümüthuoh, thi Pawa wieküchie nüh Tsawa tü thawa nüh nyi küsü nga müthsü, thi Pawa tü thawa nüh Tsawa thi ma nüh küthsü rüka küsari küchie nüh müthsü.
23Jütisanü ma tü sühle ma sehnyiri no nü küüzhe vünüh, “Nohri nüh mowa ngu nüh jüma küngura notha nü kümüngari! 24Küpakenühnyunü hi nüh küza naveh, setsaküthsüri thi kajiri hozake nga nohri nüh künguwa ngungü, thitü müngu nüh samü, nohri nüh küünarawa künangü thitü mükünara nüh samü,” ti küza.
Samariari Kümühiewa vi Küüzhühie
25 #
Mat 22.35-40; Mrk 12.28-34. Thinü halie, Khonyo küsosieri küsü tü ma müte nti süra tsie tajinü, “Küsosiewa, küsuokürho vi eh zhi sanaküsa kenüh mowa müsaji mümühie lo?” ti küna.
26Jisu nüh ma vü, “Khonyo vü mokümjie rhü saveh lo? Thi noh tü mokümjie chie lo?” ti küna.
27 #
Kho 6.5; Lev 19.18. Jisu nüh, “Noh luoveh aveh vi, no kürholi aveh vi, nokümüzho aveh vi, nokümüshe aveh vi Vüwa noh Saküüwuowa kümüze luo, thi noh mpa no küümze kümüjie no zhephruri kümüze luo,” ti rületsü.
28 #
Lev 18.5. Thinü Jisu nüh ma vü, “Noh nüh khe ta rületsüthuoh, tinü hari saluo, jüta thuoüji no rhora naveh,” ti rületsü.
29Thitü ma tü ma mpa ma kümüsho phahwie nti sanü Jisu vü, ehzhephru tü thari lo? ti küna.
30Jisu nüh shele ma vü, nyi küsü tü Jerusalem vünüh Jeriko vü tsetsuo, thinü rühukütsari siemütu nü ma thsümünyi phrevikheh thi ma fe taji sünti küsa jamü taji tewa. 31Jütiküsavü mükümüshe vünüh levüri küsü levü tse turu, thitü ma tü jüma ngu ünü aleh wuochuwuo vünüh tsekari tewa. 32Jükümjie Leviri küsü nga ale jüwuovü tse turu, thitü ma azhie jüma ruju taji ma ngu ünü ale küpa vünüh mürhü tewa. 33#2 Kkz 28.15.Thitü Samariari küsü aküze tsetse ünü anyi jüma feküze küsa pe vü ru nü ma ngu ünü ma luoveh natewa. 34Thi ma tü ma shenyi wa taji feküsa thsopori vü avüju thi rheliviju thsetü taji rietü, thi ma rawu rügivü küüshupe taji siewa küzeri küpepe vünüh ma roza. 35Jütisanü rülo künyiawa duli künyi vi küzeri zhekühuowa vü tsü nü ma vü, “Ma roza luo, thi noh nüh hama nyia vünüh küzake küzemü naveh nüh hi nüh sheleküru vünüh no thuoh le naveh nüh,” ti küza.
36Thinü mari küche azhie vü khiemawa nüh kürühuri nüh fekümüwa zhephru ta noh tü müshe veh lo? ti küna.
37Thinü ma nüh Jisu vü, “Thawa nüh ma kümüze tsünüh jüma wiethuoh,” ti küza. Jisu nüh shele ma vü, “Nohnga wa nü jükümjie saluo,” ti küza.
Jisu nüh Martha thi Maria Masü Zhe vü Küwa
38 #
Jhn 11.1. Jüsevü mari tü tse anyu küsü vü tewa ünü Martha ti küsa nyimzari küsü nüh ma zheh vü sieke. 39Thi ma tü ma nü Maria ti küsavüh küsü peh, thinü matü ru nü Vüwa jih vü shupe taji ma nüh küsosie zhüküna peh. 40Thitü Martha thuoüji küüro aveh müshe nü luoveh kütsaza sa peh, thinü ma tü ma vü wa taji, “Vüwa, eh nü tü hi mpa küüro noh tü no kütsaza münyie wiethuoh lo? Ma vü küza taji hi küükraluo,” ti küza.
41Thitü Vüwa nüh ma vü, “Martha, noh tü zanyomüküzüküzü vünüh noluoveh tsaza veh, 42thitü müviji mükümhie zanyo küsü peveh, Maria thuoüji suope kümühie nyi küsü nga nüh prütemüküwara rükamüthuoh,” ti küza.
Currently Selected:
LUKE 10: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
