Bakaanelabu 5

Ananiyaas buko Safiila li kúmal kusen Buyinumabu Banabaabu

1Muñeˈe ánayine akee an koone Ananiyaas, li kujamoo li aseekool Safiila, min kunoom etaam yan kukile. 2Ananiyaas li aŋa’ bugeb bakee bata sídalamasu, ban li aŋa’ saasu sasaŋomuu ajow asen kufootalaku. Aseekool Safiila lahaase aan mo lakaane. 3Bale Fiyeel li aanool:

— Ananiyaas, kama wáa újiye Sayitaane li anokeni li buyinum, min úmal usen Buyinumabu Banabaabu? Luŋaŋŋa’ bugeb bakee bata sídalamasu sata etaamayi yan újulamuu. 4Kama etaamayi inti awu ukil yo tówum újula yó? Ban nan újula yómuu uban, inti sídalamasu sooli? Kama wáa újiye li ujok li buyinumi min ukaan bakaanelabu umbu? Awu inti bukan lúmale usen, bale Ateemit lúmalumuu usen.

5Nan Ananiyaas ajamumuu kulimaku unku, li ayaan alo to li aket. Ekole yáamak li ejok bukanabuku feh kajamumuu wahawu wabajumuu Ananiyaas. 6Muñeˈe báfu’ li bubil bul̥iim Ananiyaas, ban li butebool bujow buhok.

7Nan kuhokumuu Ananiyaas jow lehen siwaatu síhaaji, aseekool Safiila li ánokenul dán kufootalaku kulakomuu, bahaasut mabaje. 8Fiyeel li agel̥l̥enool aanool:

— Safiila ulobom mantee sídalamasu unse bale, sommuu bunoomabu bata etaamayi yooluul?

Safiila li aanool:

— Eéhe’, so unsu bale.

9Muñeˈe Fiyeel li aan Safiila:

— Kama buu kaane li jijamoo awu li áyini, min jibuntoo Buyinumabu bata Amaaŋenawu? Ujanten, bukanabuku katebumuu áyini kujow kuhok, kumbuka li yaan kámbiilaka, ban awu humumi foof fan kutebi kújowetum kujow kuhok.

10Safiila li ayaan alo to li kootaku kata Fiyeel, li aket. Nan báfulabu búnokenulumuu kúliiŋul, li butook to Safiila makete. Li butebool bujow buhok kooj tan buhokumuu áyinool. 11Ekole yáamak li ejok ejanguwayi feh, li bukanabuku feh kajamumuu wahawu wabajumuu.

Kufootalaku li kunaak kukaan wah wájaahaleniye wameeŋe

12Muñeˈe kufootalaku. 13Bajut an li káyinenutumuu li Yéesu, akaañene ajow ágiiwoo li káyinenumuu. Bale ésukayi li enaak esaliil ŋáa’. 14Búsuk báamak bata kánayine li kanaale, banaake buhaŋ mameeŋ buyinno bo, li búyinen li Amaaŋenawu min bubil bufamen huwoogahu hata káyinenumuu. 15Bukanabuku li kunaak kútebul kásomutumuu boot li útinawu. Kúliiŋul li kukaaniil kuhinto li ukal̥ li ufeek, bájum Fiyeel ájowum tómuu, élingaayi yoola bale li eyili ego kukee li buko. 16Muñeˈe búsuk bameeŋe li bubilumul foof li sísukasu sakoojumuu Yeelusalem. Li kútebul kúsontaaku kooliil, li bukanabuku kan uyinumawu wajakutumuu újufomuu. Buko foofiil feh li kufak.

Li kujok kufootalaku kukul̥

17Muñeˈe álambaawu áamakawu li kanabumuu li akila, kammuu li hujojahu hata Kusaduusiyeŋaku, li kutiga kufootalaku. Li kujamoo min kúlaamen kufootalaku. 18Li kujok kufootalaku kujow kukul̥ li hukul̥ahu hata ésukayi. 19Bale li líiŋ li hukahu, amalaka ata Amaaŋenawu li ábabul wámbiilawu wata hukul̥ahu, min akaan kufootalaku kúfu’, ban li aaniil:

20— Jijow boot li Eluufayi yata Ateemit, jijow jilob bukanabuku kulimaku feh kata buloŋabu umbe buwunkulabu.

21Kufootalaku li kukaan loon amalakaawu alobiilumuu. Li líiŋ yaan li bújom bíb, li kujow boot li Eluufayi yata Ateemit kujow kuliiken dó bukanabuku mata buloŋabu buwunkulabu.

Muñeˈe álambaawu áamakawu li kanabumuu li akila, li kuhooñ kuhaanaku boot bajoj, bata hujojahu háamakahu hata Kusuwifaku. Li kuboñ bukan boot min kujow kúŋalul kufootalaku li hukul̥ahu. 22Bale nan kufooyaaku kata hukul̥ahu kúliiŋumuu, kutookut kufootalaku li hukul̥ahu. Li kúlaañul boot bata hujojahu kúŋejul, li kooniil:

23— Jílilliiŋ, li jitook wámbiilawu wata hukul̥ahu makul̥i jak, ban kufooyaaku kata hukul̥ahu buko to tin wámbiilawu. Bale nan jíbabulumuu wámbiilawu wata hukul̥ahu, jijukut ló an.

24Nan anahaanawu ata kufooyaabuku kata Eluufayi yata Ateemit li kunahaanaku kata élambaayi, kujamumuu kulimaku unku, kuhaasut buu kóomi li kuyinoo eeno mata kufootalaku. Li kunaak kugel̥l̥enoo waa ubaje. 25Bale akee li abil aaniil:

— Jijanten! Kánayinaabuku kan jijokumuu jibab li hukul̥ahu, kumbuku li Eluufayi yata Ateemit li kaliiken ésukayi.

26Muñeˈe anahaanawu ata kufooyaabuku kata Eluufayi yata Ateemit, li aŋa’ bukanabuku koola min kujow kúlaañenul kufootalaku. Bale kúlaañenulootiil li sembe, mata kúkolikoli min ésukayi etekiil kuyitik. 27Nan kúlaañenulumuu kufootalaku kúliiŋul, li kújowetumiil kujow kukaan hákil huhaanaahu háamakahu hata Kusuwifaku. Alámbaawu áamakawu li agel̥l̥eniil aaniil:

28— Jíhileenuuhi li kabane min jiliiken ésukayi wah li kajawaku kata ánayinaawu ummu. Bale muñeˈe jíjiye kata Yeelusalem feh li kujam wahawu wan jiliikenemuu li wo ésukayi. Ban jifañe min joon áloli jíjiye li aket.

29Fiyeel li kufootal kaabuku li kooniil:

— Alóli jihaŋ mafañ min jikaan wahawu wan Ateemit alobumuu, wan bukanabuku kulobumuu. 30Ateemit ata situubawolaal sihaan, layitenuuyitenul li eketayi Yéesu, an jimukumuu li ekuluwaayi dán jibaaŋoolumuu. 31Ateemit li ateben Yéesu, ban li aŋalool akaan kaŋen kúli. Li akaanool alako Anahaan áamak li Afakena, bájum kata Isilayeel li kuyili kútiiwo kuŋa’ buloŋ bawunkul, min uhoofoolawu wooliil ubonketi. 32Alóli húmumoli, li Buyinumabu Banabaabu ban Ateemit asenumuu bukanabuku kátuuloomuu, jimaate wahawu unwu feh wabajumuu.

33Nan kata hujojahu háamakahu kujamumuu kulimaku unku, kuuñiil li kulit. Li kufañ min kumuk kufootalaku. 34Bale li baj akee li buko alakowe Afaaliisiyeŋ, an koone Gamaliyel. Gamaliyel anahaan ata kaliikenemuu bukanabuku eluwaayi yata Móyiis, an ésukayi feh eluukene ŋáa’. Li alob min kukaan kufootalaku kúfu’ kujow kulako tíyaŋ jatit. 35Nan kufootalaku kúfu’muu, Gamaliyel li aan huhaanaahu:

— Isilayeel, ban li jíkaanum wahawu wan jiyinoomuu min jikaan kánayinaabuku umbuku. 36Fiyowolut ŋáa’, nan Tewodaas áfululumuu, min anaak aan akila an áamak. Kánayine kayilo kúliiŋ síteemeel sibakii li kunab li akila. Bale nan kumukoolumuu, bukanabuku kanaake kunabumuu li akila li kuyiisoo, ban an alaañenut ajam mooliil. 37Nan fú’ tómuu, Sudaas abilimulomuu Gálile, li áfulul káyiilaku nan ésukayi ecobimuu. Li áji bukan kameeŋe li kunab li akila. Bale akila foof nan kumukoomuu, bukanabuku feh kanaake kunabumuu li akila li kuyiisoo. 38Muñeˈe boot min ilobuul eenuul: jikat kánayinaabuku umbuku min kujow, ban jakum jikaaniil wahoowah. Mata nokoomuu loon wahawu wan kufañumuu li wan kukaanemuu li wo, li kayinoo kata bukan ubilumulo, fan ubil uban. 39Bale nokoomuu loon wahawu wan kukaanemuu li wo, li Ateemit ubilumulo, let jiyili jikajen wo. Ban li jíkaanum jakum jibil jitiik li Ateemit!

Bukanabuku kata hujojahu li koon hulimahu han Gamaliyel alobiilumuu hujaajak. 40Muñeˈe li kúhooñul kufootalaku min kutekiil kuban, li kooniil jakum kulaañen kúlobum li kajawaku kata Yéesu, ban li kukateniil. 41Kufootalaku li kúfu’ li hojojahu li ésuumahukow ló, mata min Ateemit ajokiilumuu bukan katooke min kucoociil mata kajawaku kata Yéesu kúji. 42Muñeˈe hunakoohunak, kufootalaku li kunaak kuliiken bukanabuku, ban li kuwaaleyiil Hulimahu Hásuumaahu, li Eluufayi yata Ateemit li siluufasu, kaanaku Yéesu ammuu Afakenaawu.

Currently Selected:

Bakaanelabu 5: cskDBL

Highlight

Copy