Lík 10

Yéesu li aboñ kúgoom koono kúyii kúhaaji li kuŋen li kúl̥uba

1Nan fú’ tómuu, Amaaŋenawu li al̥us kúgoom kukee koono kúyii kúhaaji li kuŋen li kúl̥uba. Ban li aboñiil kúl̥ubal̥uba kujow ló boot li sísukasu feh, li tinootin tin akila humumool áami li ajow.

2Yéesu li aaniil:

— Emaanaayi yaalumuu boot ecac emeeŋe ŋáa’, bale kucacaabuku kufamut. Mó mújimuu, jil̥aw akilumuu ecacayi min afamen aboñ kucaca kahaŋ mameeŋ, kujow kúcacul emaanaayi kúŋalul. 3Jijow! Boot min iboñuul loon bágalalaan boot li tut sijangibujal. 4Jakum jiŋa’ sídalam, mantee kaboote, mantee foof sidalla. Ban jakum jiyiten li bútin min jisaaf an. 5Nan jinokene li eluuf, jijand joon: «Kásuumaay kulako li eluufayi inye.» 6Nokoomuu loon babbaj li eluufayi an ata kásuumaay, kásuumaayaku kooluul kujow kulako li okila. Li nokoo loon bajut, kásuumaayaku li kúlaañul kulako li bukuluul. 7Jilako li eluufayi inyu, min jitiñ li jihob wahawu wan kommu li kusenuul ló, mata aloka laate ayab bacaamool. Jakum jiwalen li eluuf ban li jiteb boot li yakee li ésukayi yanolayi. 8Li jibil jinoken li ésuk ban li kuyabuul, jitiñ wahawu wan kommuu kusenuul. 9Jifaken kásomutumuu li ésukayi inyu, ban li joon bukanabuku kakin dómuu: «Jáyiiyaju jata Ateemit jíkoojuluul.» 10Bale jinokenumuu li ésuk, bukanabuku kata ló li kuhoy kuyabuul, jijow li útinawu wata ésukayi ban li joon: 11«Jihanhankumee kafolaku kata ésukayi yooluul, kakotumee li kóotoli kúlaañul booluul. Bale, joote jihaas joon Jáyiiyaju jata Ateemit jíkoojulo.» 12Fan eenuul, li Hunakahu hata Batiibabu, katekaku kata ésukayi inyu fan kuhaŋ másengi kata Sodom#10:12 Kata Sodom: Búl̥afutabu bata kata ésukayi yata Sodom buluuluuk ŋáa’ naanaŋ. Wahawu unwu újimuu Ateemit li ábuj ésukayi inyu li sambun.

Sísukasu sahoyimuu báyinen

(Máciya 11:20-24)

13— Iyéno, awu Koolasin! Iyéno, awu Betisayida! Mata nokooleenumuu loon wahawu wájaahalenimuu wakaanimuu booluul, ukaaneenikaan li ésukayi yata Tiil li yata Sidoŋ, timbeen bukanabuku kakinumuu li sísukasu unsu, buko bakaanowe kusaaku min kúkannoolum búbunfa nan fiyowe. Muñowu kooteenumuu kukaan min kúhiis kaanaku kubeebet búsol buloŋabu booliil buhaanabu min kuloŋ loon Ateemit afañumuu. 14Mó mújimuu, li Hunakahu hata Batiibabu, katekaku kooluul fan kuhaŋ mátaañi kata Tiil li Sidoŋ. 15Awu Káfeenawum, lonsoon fíle boot min utebeni boot haatiya emitayi? Maayeet! Ateemit fan áwalenuli boot yok teetaam dín kaketumuu kommuu.

16Yéesu li afamen aan kúgoomaku koola:

— An ajantenuulumuu, ínje humumom lajantene. An li ahoyuul, ínje humumom lahoye. Ban an ahoyommuu, anawu áboñulommuu lahoye.

Kúgoomaku kúyii kúhaaji li kuŋen li kúl̥uba li kúlaañul

17Muñeˈe kúgoomaku kúyii kúhaaji li kúŋen li kúl̥ubaaku kan Yéesu aboñumuu, li kúlaañul li ésuumahukow ló. Li kunaak koon:

— Anahaan, maayeet uyinumawu wajakutumuu útuulolituul, nan jinaake joon womuu úfu’ li bukanabuku li kajawaku kooli.

18Yéesu li aaniil:

— Lijuujuk Sayitaane li álowumul haatiya emitayi loon kawiwijen kata hufalajaj. 19Jijanten, lisenuusen sembe sata min jíjowum li sinuukayila, li sil̥anguu, min jiheek sembaasu feh sata alatoolaawu. Ban wahoowah wajakut let ubajuul. 20Bale jakum ésuumansuum elako li bukuluul min uyinumawu wajakutumuu útuuluulumuu. Esúumansuum yoote elako li bukuluul min ujawawu wooluul ukiicimuu li emitayi.

Yéesu li akaan bañiilabu batitabu buhaas Atuubawool

(Máciya 11:25-27; 13:16-17)

21No unnu, ésuumansuum li elako li Yéesu li búkaanum bata Buyinumabu Banabaabu, li aan:

— Lisali Ateemit Atuubawom, awu ammuu Amaaŋenawu ata emitayi li etaamayi, mata luyoyyo wahawu unwu bukanabuku kájallomuu li katuukomuu, min úhiis wó bañiilabu. Mal̥egen, Atuubawom lisalisal, mata li húfañum huya lúkaanum mó.

22Atuubawom lasenonsen wahoowah feh. Anoowan ahaasut ayi ammuu Añiilawu, Atuubaawu bale. Anoowan ahaasut ayi ammuu Atuubaawu, Añiilawu bale, li bukanabuku kan Añiilawu afañumuu min áhiisiil ó’.

23Muñeˈe Yéesu li átiiwo ajooŋoo li kúgoomaku koola ban li alobiil buko baleyiil aaniil:

— Awólo, bukuluul jajukumuu wahawu wan jijukemuu li wo. 24Mata fan ilobuul, kufulofet kameeŋe li kúyii kameeŋe kufañeene kujuk wahawu wan jijukemuu li wo, bale kujukut wo. Li kufañeen min kujam wahawu wan jijamemuu li wo, bale kujamut wo.

Yéesu li aŋa’ an ata Samali akaane jak, akaan bukittenoolum

25Muñeˈe akee li kaliikenemuu ésukayi eluwaayi ésukayi eluwaayi yata Móyiis li ayito agel̥l̥en Yéesu, kagel̥l̥en kata kabuutoolool, aanool:

— Anahaan, waa léemi li ikaan min ibaj buloŋabu bábaneliitumuu?

26Yéesu li aanool:

— Waa ukiici li eluwaayi? Buu lúnaanum wo eeno?

27Anáyinaawu li aan Yéesu:

— «Loote ufañ Amaaŋenawu Ateemit ooli li buyinumi feh, li yaali feh, li sembeyi feh, li kayinooli feh. Ban foof loote ufañ afaali an loon awu humumi ufañoolomuu.»

28Yéesu li aanool:

— Lulobe jak. Ukaan loon muñaˈa, fan uloŋ.

29Bale ánayinaawu aliikenemuu ésukayi eluwaayi yata Móyiis li afañ min akooŋenoolo, li agel̥l̥en Yéesu aanool:

— Kama ayi ammuu afaalom an?

30Yéesu li aanool:

— Bile baj ánayine akee abilume Yeelusalem alako ejow boot Séliko. Nan alakomuu ejowayi, li alo li kuŋen bukan kál̥afute. Li kubot wañawu woola, min kutekool ajow alako li aket, li kukatool to min kujow. 31Muñeˈe li baj Alámba ájowume li bútinabu umbu. Nan alakomuu ejowayi, li ajuk ánayinaawu an kutekumuu, li ájowumool li kakaŋ awuj. 32Li baj foof aŋatak ájowum tó, li ajuk ánayinaawu, li ájowumool li kakaŋ awuj. 33Bale li baj ánayine akine Samali alakowe ejow kañaahoo, li ájowum li bútinabu tin ánayinaawu an kucokenumuu alakomuu. Nan ajukoolumuu, li áyiyenool ŋáa’. 34Li akooj ánayinaawu an kucokenumuu, min aŋa’ múyit li bunuk akaan li ucokawu woola aban, li aŋa’ ul̥aac min abooñen wo. Nan abanumuu, li atebool akaan li asumawu oola humumool, min ájowetumool ajow akaan li eluuf yata kayab ejawoola min acookoolool ló. 35Hunak hukaten, ánayinaawu akinumuu Samali li áfulen sihanjal sata sídalam soono síl̥uba asen anawu alakomuu bulokabu li eluufayi, ban li aanool:

«Ucookoolom ánayinaawu umme, nan emmuu ílaañumul taate, ínje humumom fan icaami wahawu feh wan ommuu ukaanool haŋ to.»

36Yéesu li agel̥l̥enool aanool:

— Muñowu li kayinooli, ayi li kánayinaabuku umbuku kúhaaji, aanomuu afaal ánayinaawu an kál̥afutumuu kutekumuu?

37Anáyinaawu aliikenemuu ésukayi eluwaayi yata Móyiis li aan Yéesu:

— Anáyinaawu akaanoolumuu majake.

Muñeˈe Yéesu li aanool:

— Ujow, ban li ukaan awu humumi foof loon okila.

Maaluta li Mali li kuyab Yéesu booliil

38Muñeˈe Yéesu li alako ejow li bútin li kúgoomaku koola ló, li anoken ásuk akee. Anaale akee an koone Maaluta, li ayab Yéesu boola. 39Maaluta li abaj atuyaay an koone Mali. Mali li ajow abah bata kootaku kata Amaaŋenawu, min alako bajanten wahawu wan alakomuu elobayi. 40Maaluta bugoloolabu bata eluufayi li buheekool, li abil aan Yéesu:

— Amaaŋen, kaanuti wahoowah min atuyom akatommuu balewom min eeno li bugoloolabu? Kama ulobool min alambenom.

41Amaaŋenawu li aanool:

— Maaluta, Maaluta luyinooyinoo ban li oono li kalilliwoo mata wah wameeŋe. 42Bale wah wano bale ubaje jáliŋ. Mali lamamman wahawu wahaŋumuu majak, ban an let áfulen wo li okila.

Currently Selected:

Lík 10: cskDBL

Highlight

Copy