Lík 21

Anaale ahoke áyinool li asen wahawu feh wan abajumuu

(Maak 12:41-44)

1Muñeˈe Yéesu li agegoo téetiwool, li ajuk bukan kabaje min kuwalenemuu ujuuñakawu wooliil tan ukaaneyimuu li eluufayi yata Ateemit. 2Li ajuk foof anaale ahoke áyinool agaye ŋáa’, li akaan dó muhanjal múl̥uba mata sídalam sata fálam. 3Muñeˈe Yéesu li aan:

— Li mal̥egenamu fan ilobuul, anaalaawu ummu ahokumuu áyinool ban li akaan an agaye, lasensen haŋ kaabuku feh. 4Mata kaabuku kusensen sídalamasu san kuhaasutumuu waa kóomi li kukaan li so. Bale okila, maayeet min agayimuu ŋáa’, li asen wahawu feh wan ahine abajumuu boot buloŋool.

Yéesu li alob mata kahumowaku kata eluufayi yata Ateemit

(Máciya 24:1-2; Maak 13:1-2)

5Emmuu bukan kukee kulakolako elob mata eluufayi yata Ateemit, li buu ésangenumimuu li kuyitik kajake, li wahawu wasenimuu Ateemit, muñeˈe Yéesu li aaniil:

6— Inti jijuke wahawu unwu feh? Hunakahu fan húliiŋ nan huyitik hano hootutumuu hulemboo li hufaal ho huyitik, ho báhoolulooti.

Wahawu wammuu li ubil ubaj tówum adunaayi eban

(Máciya 24:3-14; Maak 13:3-13)

7Muñeˈe bukanabuku li kugel̥l̥en Yéesu koonool:

— Anahaan, waa woote ulako búhiisenum nan wahawu unwu wommuu ulako li úliiŋ?

8Yéesu li aaniil:

— Jíkaanum, jakum bil an abuntuul. Mata bukan kameeŋ fan kubilum li kajawaku kúmbaam, min kunaak koon: «Injé emmuu Afakenaawu!» Ban «Taŋayi éliiŋulo!» Bale jakum jinab li buko. 9Nan jommuu li jijam bukanabuku li kulob mata kutiik, li mata kágibijoo, jakum jíkoli. Mata wahawu unwu wóotisooti ujand ubaj, bale let yaan lako kabanaku kata adunaayi.

10Fúlum tó, Yéesu li alaañen aaniil:

— Esúk fan eyito etiik li ésuk, jáyii li jitiik li jáyii. 11Etaamayi fan egoloo ŋáa’, ban, fan baj bamuufaay li úsomut wahile kátif bukan, ban bameeŋe. Fan baj wah wájaahaleniye wákoyileniye ŋáa’ li úhiisenum wáamak wabilumulo li emitayi. 12Bale, fan kujokuul ban li kúlaatenuul, fan kujokuul kujow kusen kunahaanaku kata siluufasu sata kal̥awaku kutiib, min kukul̥uul, fan kújowetumuul hákil kúyii li kunahaanaku kata sísuk mata ínje íji, tówum wahawu unwu ubaj. 13Tó jóotummuu jíbaj bútin min jilob bukanabuku ínje emmuu ayi. 14Jihaas li uyinumuul jak joon jootut jiyinoo jíkibben mata kulimaku kan jóotimuu jilob min jicahenoolo. 15Mata ínje humumom fan isenuul kulim kata bújallo, kan anoowan li kulatoolawuul aatut ayili aceeŋ, mantee áhoogul. 16Maayeet situubawuul li sijaawuul, kutuyuul, bukanuul, kubukewuul, fan kubetuul li kuŋen bukan. Ban fan kumuk kameeŋe li bukuluul. 17Bukanabuku feh fan kulatuul mata ínje íji. 18Bale maayeet kal kano li húkowuul let kújim. 19Jítukumuu lit, fan jifaken buloŋabu booluul.

Yéesu li alob mata jayiisaju jata Yeelusalem

(Máciya 24:15-21; Maak 13:14-19)

20— Nan jommuu jijuk kutiika li kúwooñen Yeelusalem, li jihaas joon jayiisaju jata yo muñeˈe lí jíliiŋ. 21No unnu, bukanabuku kammuu kulako li etaamayi yata Súde koote kutey boot li kuyuuyaku. Bukanabuku kammuu li kulako Yeelusalem koote kúfu’ ló. Bukanabuku kammuu kulako bata ul̥ibawu, jakum kuŋes min kúnokenul li ésukayi. 22Mata kunakaku unku fan kulako kunak kata buluken, nan wahawu feh wan Bakiicelabu bulobumuu mata wo wommuu li ubaj. 23Iyéno, kanaalaabuku kammuu kuhalet, li kammuu li kulako kalaahen li kunakaku unku! Mata bukanabuku kammuu li etaamayi fan kulako li sílaam sáamak, ban Ateemit fan atek bukanabuku umbuku. 24Bukan kukee fan kumukumiil síkundu, kaabuku fan kujokiil kújowetum li sísukasu feh. Bukanabuku kákaanumutumuu li Ateemit balewool fan kúkakul Yeelusalem boot yok nan taŋayi yooliil yommuu li eban.

Eláañulayi yata Añool-An

(Máciya 24:29-31; Maak 13:24-27)

25— Fan baj búhiisenum li banakabu, li hul̥eeñahu li bawuutabu. Li etaamaye, bukanabuku feh fan kaaniil kásabali, kál̥iilaku kata husamuwahu li kata kulambajaku fan kúkoyileniil. 26Bukan kameeŋe fan kuket li ekole buko bayinoole mata wahawu wáamimuu li ubil ubaj li etaamayi feh, mata Ateemit fan ákatenul sembaasu feh sammuu li emitayi. 27Muñeˈe bukanabuku fan kujuk Añool-An li abilumul li kafaal, li sembe sáamak li máyiineni máamak ló. 28Nan wahawu unwu wommuu li útoŋ ubaj, jiyito ban jíl̥aalulo, mata kafakaku kooluul kúkoojulo.

Bukittenoolum bata bul̥el̥u

(Máciya 24:32-35; Maak 13:28-31)

29Fúlum to, Yéesu li alobiil bukittenoolumabu umbe:

— Jikooñaam bul̥el̥u, li unuunuken waawu feh. 30Nan jommuu jijuk wo li úyawul elelleeb, li jihaas joon húl̥iyahu húkoojulo. 31Li manolamu, bukuluul foof nan jommuu li jijuk wahawu unwu li ubaj, li jihaas joon Jáyiiyaju jata Ateemit jíkoojulo. 32Li mal̥egenamu fan ilobuul, bukanabuku kata muñeˈe let kuket foofiil feh tówum wahawu unwu feh ubaj. 33Emitayi fan ebil ébujo, etaamayi foof fan ebil ébujo, bale kulimaku kúmbaam let kuniilo maayeet.

Jíkaanum, jakum jímooli

34— Jíkaanum! Jakum jiŋa’ buyinumuul feh jikaan li kagaan li ehob, mantee foof li buyinaabu bata buloŋabu umbe. Jikaan momuu, hunakahu nan Añool-An ammuu li álaañul fan huyaan hugoobuul. 35Mata loon embaal egoobemuu siwol, mo foof hunakahu unhu hommuu hugoob bukanabuku feh kakinumuu li etaamayi. 36Jijuke to, min jinaak jil̥aw nanoonan, mantee li jibaj sembe min jifak li wahawu wammuu li ubaj, min jiyito hákil Añool-An.

37Hunakoohunak, Yéesu li aliiken bukanabuku Hulimahu hata Ateemit li eluufayi yata Ateemit. Bale tijowumuu tijon, li ajow aŋot li huyuuyahu haaneyimuu Huyuuyahu hata Olíibiye. 38Líiŋumuu li bújom bíb, ésukayi feh li ejow boot li eluufayi yata Ateemit bajantenool.

Currently Selected:

Lík 21: cskDBL

Highlight

Copy