Lík 9
9
Yéesu li aboñ kúgoomaku koola
(Máciya 10:5-15; Maak 6:7-13)
1Yéesu li áhooñul kúgoomaku koola kuŋen li kúl̥uba kubil kuwoog, min aseniil sembe li kayile kata kakesoo uyinumawu wajakutumuu li kata kafaken bukan kásomute. 2Fúlum tó, li aboñiil kujow kawaale Jáyiiyaju jata Ateemit, min kufaken kásomutumuu. 3Nan kulakomuu li kujow, Yéesu li aaniil:
— Jakum jiŋa’ wahoowah boot mata kañahoolaku: inti hunuk, inti kaboote, inti hutiñuul, inti sídalam. Jakum an li bukuluul ájowetumoo újufo úl̥uba. 4Jinokenumuu li eluuf li kuyabuul, li jílako ló boot yok nan jommuu jífu’ li ésukayi. 5Li bil nokoo loon ban jijowe bukanabuku li kuhoy kuyabuul, jífu’ li ésukayi inyu, ban li jihank kafolaku kata kootaku kooluul min híisiil kaanaku kukaanut jak.
6Mal̥egen kúgoomaku kata Yéesu li kuwuj. Li kujow li sísukasu feh min kuwaale Hulimahu Hásuumaahu, ban li kufaken banooban kásomutumuu.
Buyina li bujok Elod mata Yéesu
(Máciya 14:1-12; Maak 6:14-29)
7Muñeˈe nan águubelunaalawu Elod ajamumuu li kulob mata wahawu feh wabajumuu, li aliiwo. Mata kukee kunaanaak koon: «Laalu Saŋ Batiis ayitowumulo li eketayi.» 8Kaabuku li koon: «Laalu Elí álaañulo.» Kukee foof li koon: «Laalu akee li kufulofetaku kata naanaŋ, ayitowulo li eketayi.» 9Bale Elod li aan:
— Injé humumom ilobumuu min kúfalenul húkowahu hata Saŋ. Kama ánayinaawu ummu an ijamemuu li kulob wahawu unwu feh kuya li akila, akila ammuu ayi?
Muñeˈe Elod li alako huŋes boot min ajuk Yéesu.
Yéesu li ákuumen bukan koono sínjunne hutok
(Máciya 14:13-21; Maak 6:30-44; Saŋ 6:1-14)
10Muñeˈe nan kufootalaku kúlaañulumuu, li kukitten Yéesu wahawu feh wan kukaanumuu. Yéesu li aŋaliil, min kuñako kujow kulako baleyiil li halaab hata ésuk yakee yan koone Betisayida. 11Nan búsukabu bujamumuu, li bunabenool. Yéesu li ayabiil jak, ban li alobiil mata Jáyiiyaju jata Ateemit. Li afaken kásomutumuu kafañumuu min kufak.
12Emmuu banakabu bo bajowe boot kajon, kúgoomaku kuŋen li kúl̥ubaabuku li kuloh Yéesu min koonool:
— Ulob búsukabu min bujow boot li sísukasu, li siluufasu sammuu li halaabahu hata so, mantee li kubaj bo tan kóomi li kuŋot li wah wan kóomi li kutiñ. Mata taate tan oomaamee, wayitowayito.
13Bale Yéesu li aaniil:
— Jiseniil bukuluul humumuul kutiñ.
Kúgoomaku li koonool:
— Kúmbuulu hutok li muwol múl̥uba bale jooke. Kama yo yommuu min jijow jínoomul mutiñaay boot li búsukabu umbu feh.
14(Kánayinaabuku kalako tomuu kuyilo kúliiŋ sínjunne hutok.) Yéesu li aan kúgoomaku koola:
— Jikaaniil kubah kukaan kúmim kata bukan koono kúyii kúl̥uba li kuŋen.
15Mal̥egen kúgoomaku li kukaan loon Yéesu alobiilumuu, min kukaaniil feh kubah. 16Muñeˈe Yéesu li aŋa’ kúmbuuluwaku hutokayi li muwolamu múl̥ubaamu ban, li al̥uyo emitayi min ásooniyen kúmbuuluwaku li muwolamu li kal̥aw aban, li amuncul kúmbuuluwaku li muwolamu asen kúgoomaku kugaben ésukayi. 17Bukanabuku feh li kutokoñ kujow kufooñ. Muñeˈe kúgoomaku li kuwomen kumunculaku kasaŋomuu, kujow kuyok kumeeŋen utekel woono kuŋen li úl̥uba kuteb kújowetum.
Fiyeel li alob aan Yéesu ammuu Afakenaawu
(Máciya 16:13-19; Maak 8:27-29)
18Li líiŋ hunak hakee, Yéesu li alako li kakaŋ balewool min al̥aw, kúgoomaku koola li kubil kutookulool to. Li agel̥l̥eniil aaniil:
— Kama muñowu ésukayi yoone ínje emmuu ayi?
19Kúgoomaku li koonool:
— Kukee koone awu ommuu Saŋ Batiis, kaabuku li koon awu ommuu Elí, kukee foof li koon awu akee li kufulofetaku kata no ayitowumulo li eketayi.
20Yéesu li agel̥l̥eniil aaniil:
— Bukuluul li joon ínje emmuu ayi?
Fiyeel li aanool:
— Awu ommuu Afakenaawu an Ateemit áboñulumuu.
Yéesu li alob ákibben mata sílaamasu soola li eketayi yoola
(Máciya 16:13-19; Maak 8:30–9:1)
21Yéesu li anuulooliil aaniil:
— Jakum ban li jilob mo an.
22Li afamen aan:
— Añool-An laate álaam ŋáa’. Ban Kunahaanaku kata ésukayi, li huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, fan kuhoyool. Fan kumukool, bale nan emmuu jow baj kunak kúhaaji, fan ayitowumul li eketayi.
Buu nabemuu li Yéesu
(Máciya 16:24-28; Maak 8:34–9:1)
23Nan fú’ tómuu, Yéesu li aan bukanabuku feh:
— An afañumuu min ánabul lí ínje, li akat kayinoo mata buloŋool. Ateb hunakoohunak ekuluwaayi yoola#9:23 Ateb hunakoohunak ekuluwaayi yoola: Yo yommuu kaan éehe’ min usuuweni, li úlaam, min uket loon Yéesu, min ánabul lí ínje. 24Mata an aŋesumuu kafaken buloŋool, buloŋabu bábaneliitumuu fan bufakool. Bale an aketumuu mata ínje íji, fan abil abaj buloŋ bábaneliit. 25Jáliŋ buu yoom to, an babaje wahawu feh wata adunaayi ban li ájimen buloŋool, mantee li akajenoolo okila humumool? 26Li mal̥egenamu, an asuuwommuu ban li asuu kulimaku kúmbaam, ínje Añool-An fan isuuwool, nan emmuu li ibil li máyiineniyamu múmbaam, li mata Atuubaawu, li mata kumalakaaku kanabaaku. 27Li mal̥egenamu fan ilobuul, kukee li bukuluul kaanomee taate, let kuket buko bajukut Jáyiiyaju jata Ateemit.
Yéesu li máyiineniyamu moola
(Máciya 17:1-8; Maak 9:2-8)
28Muñeˈe nan Yéesu alobumuu kulimaku unku jow yili baj kunak koono hútok lí kúhaaji, li aŋa’ Fiyeel, Saŋ li Saak kuŋito li huyuuy boot kul̥aw. 29Nan Yéesu alakomuu kal̥awaku, buulabu boola li búbutoo, wañawu woola li uhiit falala’. 30Muñeˈe li baj to kánayine kúl̥uba kalakowe elob li okila: Móyiis buko li Elí.
31Buko kúl̥uba li kúlaŋul li máyiineniyamu mata emitayi. Li kulako elob Yéesu mata eketayi yoola li ésukayi yata Yeelusalem loon Ateemit afañumuu. 32Muñeˈe Fiyeel li kufaalool li kúmooli kúnafen. Bale nan kúliwomuu li kujuk máyiineniyamu mata Yéesu, li kánayinaabuku kúl̥uba kan kuyito tomuu. 33Nan kánayinaabuku umbuku kulakomuu li kukatoo li Yéesu, Fiyeel li aanool:
— Anahaan, jaajak min ulakowaal taate. Ukob min jikaan úfooyum úhaaji, kano boot li awu, kano boot li Móyiis, kano boot li Elí.
(Bale Fiyeel ahaasut li mal̥egen waa lalakowe elob.)
34Nan Fiyeel alakomuu elobayi loon muñowu, kafaal li kuyaan kubil kúhimeniil li máyiinowamu mata ko. Muñeˈe kúgoomaku li kúkoli ŋáa’, nan kujukumuu kafaalaku unku li kúhimeniil. 35Hulim li húfulumul li kafaalaku haane:
— Laale Añoolom an il̥usumuu. Jijantenool!
36Nan hulimahu hujamimuu, li kujuk to Yéesu balewool. Kúgoomaku li kulu li mo, ban no unnu, kulobut anoowan wahawu wan kujukumuu.
Yéesu li afaken añiil áyine an buyinum bajakut bújufoye
(Máciya 17:14-18; Maak 9:14-27)
37Hunak hukaten, Yéesu li kúgoomaku li kulako káwalowul li huyuuyahu, búsuk báamak li bubil bufam li okila. 38Muñeˈe ánayine akee li álobul butiya li tut búsukabu aan:
— Anahaan, liyaaki, ujuke añoolom! Okila bale libaje añiil. 39Buyinum bajakut fan bújufowool, min ayaan akaaw butiya. Fan búlilliŋenool li sembe min bukaan butumabu boola buhoohet. Fan búlaamenool, ban káfulaku kata bo li okila li kúsengi ŋáa’. 40Liyaakooyaakoo kúgoomaku kooli mantee li kukesoo bo, bale kuyilaat.
41Yéesu li aan kúgoomaku koola:
— Huwaj, akila bukuluul? Jibajut káyinen, ban li jinaak jíkaandomaayiiñ. Boot min ilako li bukuluul boot yok nay? Kama boot min ímuñuul boot yok nay? Uŋálulom jífulaju jooli taate.
42Nan añiilawu alakomuu ebilayi, buyinumabu bajakutaabu li bubetool teetaam ban li búlilliŋenool li sembe. Bale Yéesu li anuuloo buyinumabu bajakutumuu, min afaken añiilawu ban li alaañenool asen atuubawool. 43Esúkayi feh li esego mata sembaasu sata Ateemit.
Yéesu li alaañen alob mata eketayi yoola
(Máciya 17:22-23; Maak 9:30-32)
Muñeˈe emmuu anoowan baloŋe li asego mata wahawu feh wan Yéesu akaanumuu, Yéesu li aan kúgoomaku koola:
44— Bukuluul jijanten jak wahawu wan emmuu li ilobuul: Añool-An fan abeti li kuŋen bukan.
45Bale kúgoomaku kuliitikenut hulimahu unhu. Wahawu wan hulimahu hufañumuu hulob, Ateemit layoliiyo wo jakum bil kuyili kúnaanum wo, ban li kúkoli kugel̥l̥en Yéesu min akitteniil waa lafañe alob.
Ayi ahaŋumuu kufaalool hákil Ateemit?
(Máciya 18:1-5; Maak 9:33-37)
46Muñeˈe kúgoomaku li kulako búwonnoo boot min kuhaas ayi li buko ahaŋumuu maluukeni li kufaalool feh. 47Nan Yéesu ahaasumuu kayinoolaku kooliil, li aŋa’ añiil atit akaan téetiwool. 48Ban li aaniil:
— An ayabumuu boola añiilawu umme mata ínje íji, ínje humumom layabe boola. An li ayabom boola jak, anawu áboñulommuu foof layabe boola jak. Mata anawu ahaŋumuu matitiyenoolo li bukuluul feh, okila ahaŋuulumuu feh.
An aletumuu alatoolawuul booluul lalaañe
(Maak 9:38-40)
49Muñeˈe Saŋ li aan Yéesu:
— Anahaan, jijuujuk ánayine akee li kaŋa’ kajawaku kooli min akesoo uyinum wajakut úfu’ li bukan, li joonool akat, mata alet li ololaal.
50Yéesu li aaniil:
— Jooteenut jíhilool ákaanum mo. Li mal̥egenamu, an aletumuu alatoolawuul, booluul lalaañe.
Li kuhoy bayab Yéesu li ésuk yata Samali
51Muñeˈe nan kunakaku kulehenumuu nan Yéesu ammuu li ajow boot li emitayi, li ajok li mal̥egenool min ajow boot Yeelusalem. 52Li aboñ bukan kujow ló. Li kulako ejowayi, li kunoken li ásuk akee li etaamayi yata Samali boot kafalewool tan ammuu alako. 53Bale kata ésukayi li kuhoy kuyab Yéesu mata ejow lalakowe boot Yeelusalem. 54Muñeˈe nan kúgoomaku li Saŋ kujukumuu loon muñaˈa li koon:
— Anahaan, lufañe min jilob min sambun sibilumul haatiya emitayi sibil sileemeniil?
55Bale Yéesu li átiiwowul ajooŋoo li buko min awateteniil#9:55 Síliibal sakee li sihaanasu sibabbaj kulimaku unke: «Jihaasut buyinum buu bukiluul; mata Añool-An abilut boot jamuk bukan, bale boot kafakeniil.». 56Li kújowum tó boot li ésuk yakee.
Buu kafañumuu kunab li Yéesu koote kukaan?
(Máciya 8:19-22)
57Nan kulakomuu ejowayi, ánayine akee li abil aan Yéesu:
— Anahaan, fan inab li awu tanootan tan ujowe.
58Yéesu li aanool:
— Kugeewuwaku kubaje uwokaay. Basuuwabu bata haatiya bubaje useeh. Bale Añool-An abajut tan aate ahinto min ayool̥o.
59Yéesu li aan ánayine akee:
— Unábul lí ínje.
Bale ánayinaawu li aanool:
— Anahaan, ukatom min ijand ijow ihok atuubawom.
60Yéesu li aanool:
— Ukat bukanabuku kaketumuu min buko humumiil kuhok bukaniil kaketumuu, min awu ujow uyiiŋen hulimahu hata Jáyiiyaju jata Ateemit.
61Anáyine akee li alaañen aan Yéesu:
— Anahaan, fan inab li awu, bale ukatom min ijand ijow jíkatoolul li butoŋom.
62Yéesu li aanool:
— An átoŋumuu awañ li kajanduwool ban li ágegul búsolool, anawu ummu akaanuti boot li Jáyiiyaju jata Ateemit.
Currently Selected:
Lík 9: cskDBL
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
