Luka 17
17
Nu ti fё sebepi ti amartii
1Jezus ll'u xësi a dishepujllu a lluj: “Tuc pot s'fakë llath sh kad tu amartii, ma kavaj di acej ci li ping amartiili. 2Ti nës us ara ma gjini s'lëga tu zverrkë unë shkëmbë di môrë, shi s'ja mëna tu amari, dipi s'i fëcja sebepi ti amartii ti ma njicjë. 3S'avec mintja! Ma kë fratëtu faci llath vërjau. Ma s'feci pishmani, hërxjau. 4Ma s'fakë amartii dininti a ta shapti or n'xuë, shi shapti or s'tôrrë sh xëci ‘feç llath’, ‘hërxjau’.” 5Dapoja apostujë i'j xësërë a Domnëlu: “Avdaxënu pistusera”. 6Shi Domnëlu ll'u xësi: “Ma s'pistusjat kit sëmica a sinap, us i'j xëcjat a shtëlluj çërriçu: ‘zbatëti di aô, shi sjamëti tu amari’, ell ashë us fëcja. 7Kaj di voj, ma s'avja un ysmeqar ci llukraxë tu agur iti pashti ojli, us i'j xëcja a lluj kënd s'i turra di pi lluk: ‘Hajdi di-unôrë sh apunëti tas mëc!’? 8A nu us i'j xëcja: ‘Fënju etëmë cina, tôrrë mënëcli, sh fënj ysmeti tas mëk sh tas bjau mini, shi dapoja poc tas mëc shi s'bje shi tini’.
9Naka vëhj u efharistiseshti ysmeqarru kë feci llukërru a lluj? 10Ashë sh voj, kënd s'fëcec llukërru ci avec ti fëceri, xëcec: ‘Est ysmeqar. Avem faptë aca ci i'nj tukueshti’”.
Jezus pëstreshti xaci llëndic ku lebrë
11Kënd ara nqësit ti Jerusalem, Jezus tërku pit Samarii shi Galilei. 12Kënd intrë tu unë hôrë, i'j s'apurqarë xaci llëndic ku lebrë. Ej stëtja dëparti sh gra: 13“Jezus, mvëcëtor s'ic jinë krimë ti noj!” 14Jezus i'j vëxu sh ll'u xësi: “Fuxic shi adunacvë ku prefcjë”. Sh kënd nqësirë kala, ej s'vindëkarë. 15Dapoja un di nësh, kënd u vëxu ci ara pëstrit, s'turrë sh allëvda Dumëxë ku bôci analltë. 16Ell gëxu përdinc, tu çëçôrrë a Jezus shi u efharistisi. Ell ara Samaritan. 17Astumsëna Jezus u tërbë: “A nu ara xaci acej ci s'i vindikarë? Ma nau allanc ju sënt? 18Nu s'i afllë içvërr di nësh, tas s'i turra, shi s'allavda Dumëxë, ma gôllë aist ksenu?” 19Dapoja i'j xësi a lluj: “Skôllë sh fux. Pistusera a ta t'i skëpë”.
Vinera a kratu a Dumëxë
20Unôrë kënd farisenjjë u tërbarë Jezus, kë kënd us jinë kratu a Dumëxë, Ell ll'u xësi: “Kratu a Dumëxë nu jini ku bujë. 21Nu us xëkë, ‘Ja ju esti aô!’ iti ‘Ja ako!’. Kë kratu a Dumëxë esti nunt lla voj.” 22Jezus ll'u xësi a dishepujllu: “Ma jin xëlili kënd us vrec s'vëdec unë di xëlili a Hjiju a Omu, ma nu us u vëdec. 23Astumsëna us v'i xëkë: ‘Ja ju esti ako!’ iti ‘Ja aô!’ Nu fuxic ako, sh nu j'ashtërrac! 24Ashë kum skapërë dit cerl tu pllôji, shi u llunjinëseshti cerlu tu tuti përcli, ashë us hjibë sh Hjiju a Omu xua ci us jinë. 25Ma, ma ninti Ell prindi s'strragë mullt kë nu us'i aprôqë di aistë filii di ômënj. 26Sh ashë kum s'feci tu xëlili a Noeu, ashë us'i fakë sh tu xëlili a Hjiju a Omu. 27Tu acell qëro, ômënjjë mëka shi bja, s'i sura shi s'mërta, pën di xua kënd Noeu intrë tu kutii, sh dapoja vini nëkara sh l'i rrustunë tuti. 28Ashë kum s'feci shi tu xëlili a Lot, ômënjjë mëka sh bja, kupura sh vindja, sëmëna shi skulla kasi, 29ma xua kënd Lot s'dëpërtë di Sodoma, gëxu fok sh squfur dit cerl shi i'j vëtëmë tuc. 30Ashë us'i fakë xua kënd us jinë Hjiju a Omu. 31Ma kë aca xuë vërr us hjibë pi çatii, ma pleçkëli a lluj us l'ajbë akasë, s'nu dëpunë tas l'i ja. Shi, ma kë vërr us tihjisjastë tu agur, niki ell s'nu s'i tôrrë. 32Aduqicvë ti mujera a Lot! 33Kaj s'çukuteshti tas u vjagjë bana a lluj, us'u qarë aca, sh acell ci us'u qarë bana a lluj, us'u skapë. 34Mini ma v'i xëk: aca sjarë, di doj ish ci us hjibë tu un kërvat, un us'i ja, sh allant us'i allasë.”
35-36“Di dau mujer ci us hjibë lla môre ti mëcënari, unë us'i ja sh allantë us'i allasë”.
37Dapoja u tërbarë: “Ma ju, Domne a nost?”.
Ell llu xësi: “Ju esti kërrma, ako s'i adunë shi skifterënjjë”.
Currently Selected:
Luka 17: ARUM
Highlight
Share
Copy
Want to have your highlights saved across all your devices? Sign up or sign in
Gospel of Luke in Albanian Aromanian © Interconfessional Bible Society of Albania, 2013.
Evanghelu pi dupi Luka (Ungilli i Lukes arumanisht) © Shoqëria Biblike, 2013.
