Luka 2
2
Yesu Wakonge
1Naso yewao kepe ware ware Sisa Augustusŋo raki, Roma kepeo gavaman ŋei ŋerep korop eŋetene qe dapot okanwarekoi. 2Urata yaline alakan mi mamaine. Naso yewao Kirinius eŋe Siriya kepeo ware ware suwaine gekimo, kune ŋine kiyekkoi. 3Pakimo, eya wane eŋetene qe dapot okanongei wane, ŋei ŋerep korop wakon wakon mateno ariwarekoi.
4Ari-wareuso, Yosep eŋe Dawit wane ŋosa wili wiliineŋo Galili kepeo, Nazaret matko ŋine, yale waka wiye more, Yuda kepeo ŋei waom Dawit wane wako wakon matine Betlehem, yewa arike. 5Eŋe ŋerep biŋekine Mariyarop eŋetetne qekei wane medep ŋat korop iwenkaki arikoik. 6Ari Betlehem matko lotkeuk, so Mariya medep mayakane nasoine bomileke, 7pakiso, alakan medepine ma more, laplapŋo kawetka more, bulamakau kudeo birakaki pake, ŋei edo lobo mat mo watkewarekoi, wane ere qeka more, so bulamakau eŋane matko waket metkoik.
Lama Ware Ware So Aŋelo
8Kepe mat yewaoka ŋei natne eŋe ruwo lama-kopene wareone metkoi,
9Pakiso, Waom wane aŋelo maneŋo eŋano wakongi, Waom wane qilauneŋo qelaŋan-onge, pakiso, eŋe ka more zok kaetonge. 10Pakiso, aŋeloŋo edane rake, “Mi kaet ŋungep! Na iwa ŋinane wet maep don magemaile, eya wane weleine ŋei ŋerep korop ŋinano wet pesek wakoniyake, 11ukude kaiwe iwao Dawit wane matko medep ŋei wakonmaike, eŋe ŋine ma menaŋ-ŋuniyake, eŋetine Waom Yesu Kristo! 12Pakimo, ŋidanbe detpi! Ŋine medep nigatne abubu laplapŋo kawetka kawetkaine, bulamakau kudeo paki, ari maratkaikei.”
13Yale rakiso, yewaoka qeliwo ŋine aŋelo magu edo ikopka aŋelo kimaenano lewage, eŋet kito more Kaisale ma wakakoi,
14“Bakom mawa mawa Kaisale weti qeliwo so kepeo ŋei kima mauluk okanonmaike, eŋano peyam wakonmaike!”
15Aŋelo eŋe qeliwo zinge wawareuso, lama ware ware eŋe iwa yale ra more aukoi, “Ŋene Betlehem matko wa more, Waomŋo tanik wakongi ŋedanmaike, yewa kaŋem.”
16Yale ra more, ikopka arikoi, ari Mariya so Yosep maratore so, kau medep abubu laplapŋo kawetka kawetkaine, bulamakau kudeo pake. 17Ka more, medep wane don kisi aŋeloŋo edange, yewa ra wakongoi. 18Pakiso, lama ware ware eŋane piwo ŋine don kisiwa detkoi, eŋe korop welelepkekoi. 19Mariyaŋo yemo don yewa wetke more, dere detsorok qasorok okane geke. 20Pakiso, lama ware ware eŋe aŋelo edange, rokop kakoi, so detkoi, eya wane zinge more, eŋet kito more Kaisale bakomine kitokoi.
Yesu Eŋetne Orakoi
21Soda qoeki, kaiwe 8 okangiso, medep yaine solaine kitareso, eŋetine Yesu orakoi, eŋet yewa mo medep eŋe mi wakongi, aŋeloŋo ra wakonge.
Mariya So Yosep Eto Yesu Kaisale Wane Bakom Urumgo Ma Wakoik.
22Pakiso, Mose wane ra rokop don pake, yewa Mariyaŋo teweke more titi ge more, sola ma more Yosep korop medep Yerusalem matko ma wa more, so Waom wane biŋek qekoik. 23Waom wane ra rokop dongo iwa yale qekoi, “Medep ŋei mikepka wakonbi, Waom wane biŋek qekei.” 24Ere yale waka Waom wane soe soep mitkeik wane, ra rokop dongo naŋi baluse etke me baluse nigatne etke, ma more arikoik.
25Naso yewaoka, ŋei mane, eŋetne Simeon eŋe Yerusalem matko geke, eŋe koboboine Kaisale ewine kito ge more, Israel ŋei magu menaŋgei wane toma geke, pakiso, Asu Koboboineŋo weneŋ kotino geke. 26Ge more, don iwa yale ra wakone olatke, “Ge ikop mi seukkene, ge ge more, deŋoneŋo Waom wane Mesiya wakongi kaikene.” 27Pakiso, Asuŋo Simeon talekaki, Kaisale Wane Bakom Urumgo wake, wakiso, Mariyaŋo Yosep ere ra rokop don teweke more, Yesu medep yewaka ma more Kaisale Wane Bakom Urumgo ma wakoik. 28Pakiso, Simeonŋo Yesu medep ma more kowaŋka okoraso, Kaisale bakomine kito more rake,
29“O, Waom, ge ukude donŋone rakone yewa warekamaine, eya wane qelit ŋeiŋone maine birakanom peyamgo ariyake. 30Na dene qomineŋo geŋane medep kaulukmaile, eŋe baŋ ŋado ŋei ŋerep ma menaŋ oniyake. 31Ge mauluk mauluk medep eya kepe baŋem ŋei ŋerep korop eŋane deeneŋo kaikei wane matu zupke more ma wakonkamaine, 32medep yewaŋo qelaŋ eŋano geŋane qelaŋanŋo wetene ma qelaŋanmaike, ŋo ŋei ŋerewekopŋone Israel eŋane eŋet biŋekene ma wiyemaike.”
33Simeonŋo medep wane don yale rakimo, naga magaine ere detpik manerop wawaine okangi, oŋaetne qaeke. 34Simeonŋo mosopone, so medep nagaine Mariya olale rake, “Detmaine! Kaisaleŋo medep iwa birakake, eŋano Israel ŋei poripkekei wane raraine, natne eŋe eŋano kito sorodoge kito yau more ket rasu warekei, ŋo natne eŋe eŋano kito togole more menaŋgei. So ŋei loutne numaene leŋleŋinane ma ket biraka zok manerop okankaikei, 35eya wane ŋei loutne eŋane kineene wakoniyake, so geŋone wet borik tabaineŋo qomŋone rasu tabaeyake, tanik yaline wakoniyake.”
36Pakimo, sele ŋerep mane geke, eŋetne Ana, Panuel wane borasine, Aser wane tegoo ŋine, eŋe natewenino ŋei ma more geki, koma 7 okangi mo, ŋaune seukke. 37Seukkimo, eŋe mala okane ge ari mage komaine 84 rutupke, so sele okange, eŋe Kaisale wane Bakom Urumgo tako rakot ruwo kaiwe, wawa ket ket okane, so Kaisale wane ra wage, so meŋen meŋen urata mageke. 38Naso, yewaoka eŋe Kaisale wane Bakom Urumgo wa more so Kaisale bakomine kitoke, so Yesu medep wane don kisiine ra wakone, ŋei ŋerep korop Kaisaleŋo Yerusalem koso siwot-oniyakane toma pakoi, eŋe edange.
Yosep Eŋe Koso Nazaret Zingeke
39Yosep ŋo Mariya ere Waom wane ra rokop dongo raraine yalewa okanbik qoekiso koso zinge more Nazaret mateno, Galili kepeo arikoik. 40Yewa geukso, Kaisaleŋo Yesu medep kito qesiŋ okankaki, suwa togole okangi, dereretine suwake. Pakiso, Kaisale wane mosopŋo kutino wa pake.
Yesu Medep Komaine 12 Okangi Yerusalem Kaisale Wane Bakom Urumgo Wake
41Mariya so Yosep ere peyada baŋem aŋelo loloŋon loloŋon peyada wane Yerusalem ari okanmaŋkoik. 42Pakiso, Yesu medep mo komaine 12 okangiso, weneŋ iwenkauk so aŋelo loloŋon loloŋon peyada wane Yerusalem matko wakoi. 43Wa geu peyada qoekiso, Mariya ŋo Yosep ere Yesu medep kito qokkauk, Yerusalem matko metkiso, eretneka zinge arikoik. 44Ari more ŋei ŋerep magu natne eŋerop alakane arimi ra, kimakopetne eŋane keuweno zuwaŋka arimageuk, ruwo kereke. 45Kepe qaekiso zuwaŋka mageuk borikiso, koso zinge Yerusalem matko zuwaŋka arikoik. 46Ari zuwaŋka geuk, kaiwe karewe okangiso, ari Kaisale wane Bakom Urumgo metki, wa more maratkakoik. Eŋe yewa Yuda kito ebo ebon eŋane keuweno mere, don rau dere so kinane ra qeson okanonge. 47Pakiso, ŋei yewa weneŋ metkoi, eŋe kau qeso qesonene ewekineka ikop so koboineka mainge okange, yewa wane oŋaene zok qaeki, don dereretinane manerop welelepkekoi. 48Eŋane keuweno metki, naga magaine ere ka more oŋaetne qaeke, pakiso nagaineŋo olale rake, “Giponne, ge onoka wane yale okanŋotmaine, pakimo magaŋonerop ŋere qom suwa zok okane zuwaŋgane gemaite?”
49Rakiso etane rake, “Ŋire onoka wane zok zuwaŋnane gemamik? Na Maganane matko gekalane raraine yewa ŋire mi detmamik me?” 50Yale rakimo, ere don yewa wane kine mi detlukkoik.
51Pakiso, eŋe naga magaine ererop weneŋ Nazaret matko zinge arikoi, yewa naga magaine erane aŋaetne teweke geke, ŋo nagaineŋo yemo donine detke, rokop wetino motki paki wetke geke. 52Pakiso, Yesu eŋe dereretine so solaine, weneŋ suwa togole okangiso, Kaisale so ŋei weneŋ eŋe kau menaŋge.
Currently Selected:
Luka 2: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
Luka 2
2
Yesu Wakonge
1Naso yewao kepe ware ware Sisa Augustusŋo raki, Roma kepeo gavaman ŋei ŋerep korop eŋetene qe dapot okanwarekoi. 2Urata yaline alakan mi mamaine. Naso yewao Kirinius eŋe Siriya kepeo ware ware suwaine gekimo, kune ŋine kiyekkoi. 3Pakimo, eya wane eŋetene qe dapot okanongei wane, ŋei ŋerep korop wakon wakon mateno ariwarekoi.
4Ari-wareuso, Yosep eŋe Dawit wane ŋosa wili wiliineŋo Galili kepeo, Nazaret matko ŋine, yale waka wiye more, Yuda kepeo ŋei waom Dawit wane wako wakon matine Betlehem, yewa arike. 5Eŋe ŋerep biŋekine Mariyarop eŋetetne qekei wane medep ŋat korop iwenkaki arikoik. 6Ari Betlehem matko lotkeuk, so Mariya medep mayakane nasoine bomileke, 7pakiso, alakan medepine ma more, laplapŋo kawetka more, bulamakau kudeo birakaki pake, ŋei edo lobo mat mo watkewarekoi, wane ere qeka more, so bulamakau eŋane matko waket metkoik.
Lama Ware Ware So Aŋelo
8Kepe mat yewaoka ŋei natne eŋe ruwo lama-kopene wareone metkoi,
9Pakiso, Waom wane aŋelo maneŋo eŋano wakongi, Waom wane qilauneŋo qelaŋan-onge, pakiso, eŋe ka more zok kaetonge. 10Pakiso, aŋeloŋo edane rake, “Mi kaet ŋungep! Na iwa ŋinane wet maep don magemaile, eya wane weleine ŋei ŋerep korop ŋinano wet pesek wakoniyake, 11ukude kaiwe iwao Dawit wane matko medep ŋei wakonmaike, eŋe ŋine ma menaŋ-ŋuniyake, eŋetine Waom Yesu Kristo! 12Pakimo, ŋidanbe detpi! Ŋine medep nigatne abubu laplapŋo kawetka kawetkaine, bulamakau kudeo paki, ari maratkaikei.”
13Yale rakiso, yewaoka qeliwo ŋine aŋelo magu edo ikopka aŋelo kimaenano lewage, eŋet kito more Kaisale ma wakakoi,
14“Bakom mawa mawa Kaisale weti qeliwo so kepeo ŋei kima mauluk okanonmaike, eŋano peyam wakonmaike!”
15Aŋelo eŋe qeliwo zinge wawareuso, lama ware ware eŋe iwa yale ra more aukoi, “Ŋene Betlehem matko wa more, Waomŋo tanik wakongi ŋedanmaike, yewa kaŋem.”
16Yale ra more, ikopka arikoi, ari Mariya so Yosep maratore so, kau medep abubu laplapŋo kawetka kawetkaine, bulamakau kudeo pake. 17Ka more, medep wane don kisi aŋeloŋo edange, yewa ra wakongoi. 18Pakiso, lama ware ware eŋane piwo ŋine don kisiwa detkoi, eŋe korop welelepkekoi. 19Mariyaŋo yemo don yewa wetke more, dere detsorok qasorok okane geke. 20Pakiso, lama ware ware eŋe aŋelo edange, rokop kakoi, so detkoi, eya wane zinge more, eŋet kito more Kaisale bakomine kitokoi.
Yesu Eŋetne Orakoi
21Soda qoeki, kaiwe 8 okangiso, medep yaine solaine kitareso, eŋetine Yesu orakoi, eŋet yewa mo medep eŋe mi wakongi, aŋeloŋo ra wakonge.
Mariya So Yosep Eto Yesu Kaisale Wane Bakom Urumgo Ma Wakoik.
22Pakiso, Mose wane ra rokop don pake, yewa Mariyaŋo teweke more titi ge more, sola ma more Yosep korop medep Yerusalem matko ma wa more, so Waom wane biŋek qekoik. 23Waom wane ra rokop dongo iwa yale qekoi, “Medep ŋei mikepka wakonbi, Waom wane biŋek qekei.” 24Ere yale waka Waom wane soe soep mitkeik wane, ra rokop dongo naŋi baluse etke me baluse nigatne etke, ma more arikoik.
25Naso yewaoka, ŋei mane, eŋetne Simeon eŋe Yerusalem matko geke, eŋe koboboine Kaisale ewine kito ge more, Israel ŋei magu menaŋgei wane toma geke, pakiso, Asu Koboboineŋo weneŋ kotino geke. 26Ge more, don iwa yale ra wakone olatke, “Ge ikop mi seukkene, ge ge more, deŋoneŋo Waom wane Mesiya wakongi kaikene.” 27Pakiso, Asuŋo Simeon talekaki, Kaisale Wane Bakom Urumgo wake, wakiso, Mariyaŋo Yosep ere ra rokop don teweke more, Yesu medep yewaka ma more Kaisale Wane Bakom Urumgo ma wakoik. 28Pakiso, Simeonŋo Yesu medep ma more kowaŋka okoraso, Kaisale bakomine kito more rake,
29“O, Waom, ge ukude donŋone rakone yewa warekamaine, eya wane qelit ŋeiŋone maine birakanom peyamgo ariyake. 30Na dene qomineŋo geŋane medep kaulukmaile, eŋe baŋ ŋado ŋei ŋerep ma menaŋ oniyake. 31Ge mauluk mauluk medep eya kepe baŋem ŋei ŋerep korop eŋane deeneŋo kaikei wane matu zupke more ma wakonkamaine, 32medep yewaŋo qelaŋ eŋano geŋane qelaŋanŋo wetene ma qelaŋanmaike, ŋo ŋei ŋerewekopŋone Israel eŋane eŋet biŋekene ma wiyemaike.”
33Simeonŋo medep wane don yale rakimo, naga magaine ere detpik manerop wawaine okangi, oŋaetne qaeke. 34Simeonŋo mosopone, so medep nagaine Mariya olale rake, “Detmaine! Kaisaleŋo medep iwa birakake, eŋano Israel ŋei poripkekei wane raraine, natne eŋe eŋano kito sorodoge kito yau more ket rasu warekei, ŋo natne eŋe eŋano kito togole more menaŋgei. So ŋei loutne numaene leŋleŋinane ma ket biraka zok manerop okankaikei, 35eya wane ŋei loutne eŋane kineene wakoniyake, so geŋone wet borik tabaineŋo qomŋone rasu tabaeyake, tanik yaline wakoniyake.”
36Pakimo, sele ŋerep mane geke, eŋetne Ana, Panuel wane borasine, Aser wane tegoo ŋine, eŋe natewenino ŋei ma more geki, koma 7 okangi mo, ŋaune seukke. 37Seukkimo, eŋe mala okane ge ari mage komaine 84 rutupke, so sele okange, eŋe Kaisale wane Bakom Urumgo tako rakot ruwo kaiwe, wawa ket ket okane, so Kaisale wane ra wage, so meŋen meŋen urata mageke. 38Naso, yewaoka eŋe Kaisale wane Bakom Urumgo wa more so Kaisale bakomine kitoke, so Yesu medep wane don kisiine ra wakone, ŋei ŋerep korop Kaisaleŋo Yerusalem koso siwot-oniyakane toma pakoi, eŋe edange.
Yosep Eŋe Koso Nazaret Zingeke
39Yosep ŋo Mariya ere Waom wane ra rokop dongo raraine yalewa okanbik qoekiso koso zinge more Nazaret mateno, Galili kepeo arikoik. 40Yewa geukso, Kaisaleŋo Yesu medep kito qesiŋ okankaki, suwa togole okangi, dereretine suwake. Pakiso, Kaisale wane mosopŋo kutino wa pake.
Yesu Medep Komaine 12 Okangi Yerusalem Kaisale Wane Bakom Urumgo Wake
41Mariya so Yosep ere peyada baŋem aŋelo loloŋon loloŋon peyada wane Yerusalem ari okanmaŋkoik. 42Pakiso, Yesu medep mo komaine 12 okangiso, weneŋ iwenkauk so aŋelo loloŋon loloŋon peyada wane Yerusalem matko wakoi. 43Wa geu peyada qoekiso, Mariya ŋo Yosep ere Yesu medep kito qokkauk, Yerusalem matko metkiso, eretneka zinge arikoik. 44Ari more ŋei ŋerep magu natne eŋerop alakane arimi ra, kimakopetne eŋane keuweno zuwaŋka arimageuk, ruwo kereke. 45Kepe qaekiso zuwaŋka mageuk borikiso, koso zinge Yerusalem matko zuwaŋka arikoik. 46Ari zuwaŋka geuk, kaiwe karewe okangiso, ari Kaisale wane Bakom Urumgo metki, wa more maratkakoik. Eŋe yewa Yuda kito ebo ebon eŋane keuweno mere, don rau dere so kinane ra qeson okanonge. 47Pakiso, ŋei yewa weneŋ metkoi, eŋe kau qeso qesonene ewekineka ikop so koboineka mainge okange, yewa wane oŋaene zok qaeki, don dereretinane manerop welelepkekoi. 48Eŋane keuweno metki, naga magaine ere ka more oŋaetne qaeke, pakiso nagaineŋo olale rake, “Giponne, ge onoka wane yale okanŋotmaine, pakimo magaŋonerop ŋere qom suwa zok okane zuwaŋgane gemaite?”
49Rakiso etane rake, “Ŋire onoka wane zok zuwaŋnane gemamik? Na Maganane matko gekalane raraine yewa ŋire mi detmamik me?” 50Yale rakimo, ere don yewa wane kine mi detlukkoik.
51Pakiso, eŋe naga magaine ererop weneŋ Nazaret matko zinge arikoi, yewa naga magaine erane aŋaetne teweke geke, ŋo nagaineŋo yemo donine detke, rokop wetino motki paki wetke geke. 52Pakiso, Yesu eŋe dereretine so solaine, weneŋ suwa togole okangiso, Kaisale so ŋei weneŋ eŋe kau menaŋge.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.