Matayu 20
20
Qeli Gege Togon So Wain Wane Don Naŋengo
1“Qeli gege togon wane numa, yemo wain eu welaine maneŋo sakoka urata ŋei natne qole-ongi, sari wain urataine makeiwane arike, eya wane rokop. 2Eŋe dereret okannagu more, wetene weku okangi, wesi darap maikei, eya ma togole more, bira-ongi wain euwo urata makei wane arikoi. 3Eŋe koso manerop 9 kilok nalu sobeŋ ŋino arike, paki ongi ŋei natne yaup eya taboŋ okorakoi. 4Eso eŋe edane rake, ‘Ŋine yaleka wain euwo ari urata mau, na baŋ lewine mayakatne qole-ŋunikale.’ 5Eso eŋe mo eya arikoi. Pakiso 12 kilok, so 3 kilok yalewaka eŋe masi wekuka okange. 6Pakiso, 5 kilok okaniyakane okangi, eŋe nalu sobeŋ ŋino koso ari ŋei natne ongi, eŋe yeka okorau qesonone rake, ‘Ŋine onoka wane kaiwe korop matali iwa yaup taboŋ okoramami?’ 7Eŋe rakoi, ‘Kine yemo onoka wane, ŋei maneŋo mi qole-ŋonike, eya wane iwa okoramaine.’ Yale rauso, eŋe edane rake, ‘Weku mane, ŋine yaleka ari wain euwo urata mau.’
8“Ruwo kereki naso okangi, wain eu welaineŋo ware wareine olatke, ‘Ge urata ŋei edoranom sariu, lewine qole-onnom, ŋeiwa ŋado ebukole, eŋano ŋine kiyeke arinom, alakan ebukole, eŋano qoeyake.’ 9Ŋeiwa 5 kilok urata kiyeke makoi, eŋe tanik wekuka qole-ongene. 10Eso ŋeiwa alakan ebuke, eŋe mo eya urata wane lewine qole-oniyakane sarikoi, eŋe wetke rakoi, wesi suwaine mane makene, ŋo eŋe tanik wekuka ebon-wareke. 11Eŋe wesi-ene ma wareu paki, kiyeke urata welaine bokaka rakoi. 12‘Ŋeiwa iwa ŋado ebuki sarimi, eŋe urata wan auwaka weku memi, ŋo ŋedo yemo kaiwe mane korop kaiwe ŋeleŋ ŋelego urata mene, ŋo siluŋ ge eŋe qoleonine rokop weku yewaka ŋene qole-ŋonmaine!’
13“Yale rau, eu welaineŋo eŋano ŋine mane olale rake, ‘Detnom, kima, na mi matali ganmaile, ge kaiwe weku urata ma more, wesi rokop wekuka makenane ra, dereret okannagune. 14Eya wane ge wesiŋone manom paki, matko arinom. Na wesi ge ginile, rokop weku yewaka ŋei iwa ŋado rawe sarimi, eŋe ebonmaile. 15Yewa yemo naŋane aboŋ, na nae simile mogare mo nae wesi biŋekneŋo rokop weku damo qile, eyaŋo mi rokopkemaike me? Onoka wane noŋo masi maine ŋei ŋado sarimi, eya okan-onbe ge dale wane dere worik okanmaine me?’ ”
16Raki pakiso, don iwa yale raki qoeke, “Eso ŋeiwa ŋado kitomami, edo baŋ naŋane qeli kepe museleo lewine alakangei. Pakimo ŋeiwa lewine alakanmami, edo baŋ ŋado kitokei.”
Yesu Eŋe Seuke More Koso Wiyeyake Eya Wane Don Raki Atak Karewe Okange
17Yesu eŋe Yerusalem matko wayakane okane, dokoine 12 ebuki enŋeneka arikoi. Numao ari more sanka don edangi edangi arikoi. 18Eŋe edane rake, “Detmami, ŋene Yerusalem matko waikene, yewao Ŋei Wawainane Gipole baŋ ma more, Pris ŋetne so ra rokop don kito ebo ebon ŋei, eŋane meteeno bira-kakei. Edo baŋ dongo birakau paki seukeyakane ra togolekei. 19Paki, qelaŋ ŋei eŋane meteeno birakau, edo baŋ masi worik okanka more, kumunamŋo qeu paki, biriŋŋo kibeŋ qabego qeu seukeyake, paki kaiwe karewe okangi, eŋe baŋ koso ma wirik-kaki, wisikae wiyeyake.”
Yakop So Yohane Gege Togongo Ŋetne Okanikeik Wane Rakoik
20Zebedi gipoletkine erane nagaetneŋo Yesu wano gipoletkine weneŋ epuki sari, umi qe ket more rake na yeye mane wane golatpe.
21Paki Yesuŋo qesonka rake, “Ge onokaka wane ganmaike?” Eŋe rake, “Ge ranom gipoletkene etke iwa, ere ge gege togon ŋei waom gekene, naso yewao ere geŋane won ŋono so kana ŋono mesikeik.”
22Raki Yesuŋo mainge edange, “Ŋine kine mi detlukeu paki qesonmami. Na laseo ŋine wikile doku ŋet zoitne nekale, eya ŋire maine mi nekeik.” Ere rakoik, “O, ŋere maine okangete.”
23Yale raukso, “Yesuŋo etane rake, ŋire welekakatne naŋane laseo ŋine doku ŋet zoitne baŋ nekeik, ŋo siluŋ noŋo maine mi rawe, maŋo naŋane wonno so kanano metkeik, met met eya yemo korop naŋane Maganeŋo ŋei natne eŋane biŋek maulukke.”
24Dokoine natne 10 eŋe don iwa detpi paki, tati ŋon etke erane sotene osike. 25Eso Yesu eŋe edoraki, korop eŋino sariu rake, “Ŋine detmami, kepe ware ware eŋe ŋei ŋerep waom okanonbi, eŋe eŋane bango gemami, so eŋane ŋetne kopene edo wareonbi, eŋe baneno gemami. 26Numa iwa yaline eyaŋo ŋinane keu ŋino mane misuk payake. Ŋinano ŋine maneŋo suwaine okaniyakane detmaikeo, yemo eŋe natne ŋinane qelit mama maine okane geyake. 27So ŋinano ŋine mane eŋe lewine okaniyakane detmaikeo, yemo eŋe ŋinane urata mama ŋei maine okane geyake. 28Ŋei Wawainane Gipoleŋo okange yale, eŋe qelitine qekeiwane mi sarike, midakaka. Ŋo eŋe oŋom qesiŋ one more, qelitene qeyakane, paki gegeine qaisikka more, ŋei ŋerep korop qoleongi, koso Kaisale wano zingekei wane ketke.”
Ŋei Depilik Etke Eto Yesu Wane Kine Ra Wakongoik
29Eŋe Yeriko mat qelige ariu, ŋei ŋerep magu suwaineŋo Yesu ŋadino mogare arikoi. 30Ŋei de pilik etke ere numa wazaino mere, detpik Yesu eŋe mo osoetno arike, eso eŋe kiyeke boka rakoik, “Dawit wane qerakine suwaine, ge ŋerane wetŋone borikep!”
31Ŋei ŋerep magu suwaine eŋe kuroŋore more, don etne midaine tik mesikeik wane rawot otkoi. Ŋo ere siluŋ suwaineka manerop boka more rakoik, “Dawit wane qerakine suwaine, ge ŋerane wetŋone borikep!”
32Yesu eŋe okoraso, etora rake, “Ŋire noŋo daleo okan ŋusikalane ŋutmaike?”
33Ere rakoik, “Suwaine, ŋere goŋo dese malotkekenane ŋotmaike!”
34Raukso, Yesuŋo erane wetine boriki, deetno make, pakiso eyaka de etne lotkeki, maine potkoik, paki Yesu ŋadino mogare arikoik.
Currently Selected:
Matayu 20: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
