Matayu 22

Zokit Mau Eya Wane Ŋara Soepine Ma Ne Okanmami. Eya Wane Naŋengo More Rake

1Yesu eŋe koso manerop ŋei ŋerep don naŋengo more edane rake, 2“Qeli gege togon mat koto wakesikei wane masi tanikine, yemo ŋei waom maneŋo gipole zokit mayakane ŋara soep mauluke newanonge, eya wane rokop. 3Eŋe qelit medewekoune taleongi ari, ŋei ŋerep newan onge, eya edangoi sari ŋara soep nekeiwane, ŋo eŋe siluŋ sarikei wane mi onge. 4Eso eŋe qelit medewekoune natne don iwa yale edane more taleonge, ‘Ŋei ŋerep newan-onile eŋe edanbi, “Naŋane ŋara soep mo mauluke mot-waremaile, naŋane so bulamakau medeune giuqom, mo weneŋ engu kitare motmaile, so yeye kine kine korop mo mauluke mot-waremaile, zokit mama wane ŋara soepko sariu!” ’ 5Ŋo ŋei ŋerep newan-onge, eŋe siluŋ don eya desikei wane bauene waki, urataeno urataeno ariwarekoi, mane eŋe bulamakau urataino arike, mane eŋe mere euino arike. 6Ŋo natne eŋe qelit medep eya malipone more morapŋo dime-ongoi, paki enguwi seukwarekoi. 7Yale okanbi, ŋei waom eŋe zok sotine osike, paki eŋe kawali ŋeikoune taleongi, eŋe ari ŋeiwa enguwi seukkoi, eya engu wareu paki, matene suwaine eya gerepŋo kuwakeu zewareke. 8Pakiso, eŋe koso qelit medewekoune edoraki sariu edane rake, ‘Naŋane zokit mama wane ŋara soepne mo mauluke mot-waremaile, ŋo siluŋ ŋei ŋereppa newan-onile, eŋe eya nekeiwane mi onmaike. 9Eya wane, iwa yemo numa suwaino ariu paki, ŋei ŋerep loutne marat-ongei, rokop newan-onbi zokit mama wane ŋara soep pamaike, iwao sari newarekei.’ 10Eso qelit medep eŋe mo eya numa suwaine pa arike, rokop arikoi paki, ŋei ŋerep korop marat-ongoi, rokop ebuwi sarikoi, ŋei ŋerep maine so borikine rokop wekuka, pakiso zokit mama urum suwaine eya ŋei ŋerep edo qe watke metkoi.

11“Ŋei waom eŋe ari ŋei ŋerep newan-ongi sarikoi eya onge, paki eŋe ŋei mane kaki zokit mama wane takot laplapŋo mi auki paki sari metke, 12paki, ŋei waomŋo kaki paki, qesonka rake, ‘Kima, ge daleo wane zokit mama wane takot laplapŋo mi aunom paki saket iwa metmaine?’ Ŋo ŋei eya eŋe don mane mi rake. 13Pakiso, ŋei waomŋo qelit medewekoune edane rake, ‘Ŋine wokomkau, kine so metine weneŋ paki ma birakau, qeinat solaino panaman kotino ketkep, yewao eŋe baŋ aroke, ŋet warik warikki geyake.’ ”

14Pakiso, Yesu eŋe girem don iwa yale raki qoeke, “Ŋine mo detmami, Waom eŋe ŋei ŋerep loutne newan-onge, ŋo siluŋ ewekinem-deŋoka ma wakon-ongi sari saket metkoi.”

Takis Qole Qole Wane Yesu Qesonkakoi

15Parisi eŋe Yesuŋo numa so dereret natne tinka numa qeyau more ra matali edangi, dere eyaoka dongo birakaikei wane ra pise okangoi. 16Pakiso, eŋe dokoene natne so ŋei waom Herot wane magu eyao ŋine ŋei natne taleonbi, Yesu wano ari qesonka more olale rakoi, “Kito ŋebo ŋebon, ŋene detmaine, ge don welekatneka ra okanmaine, ge don wele Kaisaleŋo ŋei ŋerep eŋane wetineŋo okankake, eya wane ŋei ŋerep kito edan okanmaine, ge ŋei ŋerep eŋane mane zok mi kaetgan okanmaike, me eya wane dere mezet mi okan okanmaine, onoka wane ge ŋei mane ŋetne suwaine eŋet biŋek korop me ketkele eŋet biŋek midaine, eŋe rokop wekuka okan-onmaine. 17Eya wane ge ŋedannom, ge daleo wetkemaine? Eya ŋenze ra rokop don yuwanka more, Roma ŋei Waom Suwaine, eŋetine Sisa, takis man okanmaine, me mida?”

18Yesu eŋe isi donenane kine dere more rake, “Ŋine isiŋei nau! Ŋine onoka wane donŋo suba more isi-nanmami? 19Ŋine takis mosikei wane wesi eya sikan-nanbi kawe!”

Rakiso, eŋe wesi mane masariu kake. 20Paki qesonone rake, “Oŋa oŋa iwa maŋane kaitine so eŋetineŋo okoramaike?”

21Eŋe rakoi, “Ŋei Waom Suwaine, Sisa wane.”

Rau Yesuŋo edange. Eya maine, ŋine kine kine Sisa wane biŋek, eya eŋe maine Sisa manikei, ŋo Kaisale wane biŋek, eya eŋe maine Kaisale manikei.

22Eŋe don iwa detpi paki, oŋaene qaeke, pakiso eŋe qeliŋka arikoi.

Seu Seuwo Ŋine Wisikae Wiye Wiye, Eya Wane Kine Qesonkakoi.

23Kaiwe weku yewaoka, Sadusi natne Yesu wano sarikoi. Ŋei magu yewa eŋe yale ra okangoi, ŋei seuseune eŋe koso mi wisikae wiyekei. Eya wane kine eŋe Yesu liwekkau paki, qesonka more iwa yale rakoi, 24“Kito ŋebo ŋebon, sogino Moseŋo don mane iwa yale kito edange, ‘Ŋei mane eŋe medewekoune midaine ge more seukeyakeo, ŋanomine eŋe yeka geki, ŋoleŋo tatinane malaine eya maki paki, ŋei seukke eŋane ra more medewekopetne qepokki wakonikei.’ 25Tatiŋon sewen (7) yale iwa gekoi, tatene suwaine eŋe ŋerep maki paki, medewekoune mane mi qepokki wakonbi, yaup ge more, seukke, eso eŋe malaine eya qeliŋ-kaki gekimo, ŋole kebaŋineŋo make. 26Ŋole kebaŋine eŋe yaleka medewekoune mane mi qepoke more, yaupka geki paki, seukke, ŋole ŋorikine eŋe yalewaka tanik wekuka okange. Tatiŋon sewen (7) eŋe korop ŋerep wekuka maso, seuk-okanwarekoi, ŋo medewekopene mane mi qepokeu wakongoi. 27Pakiso ŋado bisoppa eyamo ŋereppa eya seukke, 28wane baŋ naso suwaino, ŋei seuseune wisikae wiyekei yewao, ŋerep yewa eŋe maŋane ŋanomine okaniyake? Eŋe koropŋo ŋerep weku yewaka makoi.”

29Yesuŋo mainge edane rake, “Ŋine don matalimami! Yemo onoka wane ŋine Kaisale wane ekapko don pamaike, eya mi detlukmami, me Kaisale wane zonom eya ŋaŋae-kamami, eya wane ŋine don matali ramami. 30Ŋei seuseune eŋe wisikae wiyekei, naso yewao, eŋe baŋ aŋelo qeliwo gemami, yale gekei, paki ŋei so ŋerep eŋe ŋao ŋanom mi okane gekei, i midakaka! 31Ŋo ŋei seuseuneŋo wisikae wiye gege, don eya wane na qeson-ŋunmaile, ŋine Kaisaleŋo don ŋidange, eya mane mi detluk-kakoi me? Eŋe iwa yale rake. 32‘Na Abraham wane Kaisale, Isak wane Kaisale, so Yakop wane Kaisale.’ Eya wane kine yemo yale, eŋe ŋei seuseune eŋane Kaisale midakaka, eŋe ŋei wisikap gemami, eŋane Kaisale. Abraham, Isak so Yakop mo seukoi, eŋane Kaisale, oŋo ŋei magu eya baŋ eŋane ra more wisikae wiyekei Kaisale eŋe Waom eya wane eŋe mo yalewa oŋom dere qelaŋan-one more dere detki kilipkemaike, eŋe baŋ korop wiye-warekei.”

33Ŋei ŋerep magu eŋe don iwa detpi, ewe bibiinerop okangi, oŋaene qaeke.

Ra Rokop Don Suwaine Eya Wane Kine Yesu Qeson-kakoi

34Parisi eŋe detpi, Yesu wane donŋo Sadusi ŋei eŋane don rara wane aŋaene ma wongeki, eŋe wekuwoka sari qeturaŋgoi. 35Paki eŋano ŋine mane eŋe ra rokop don kito ebon ebon, oŋo Yesu liwekka more iwa yale qesonka rake, 36“Kito ŋebo ŋebon, ra rokop don suwaine diyawaŋo ra rokop don wane numa natne, eyao korop yuwan-one more, oŋo zok manerop rokop wawaine okane pamaike?”

37Yesuŋo iwa yale olale rake, “Yemo iwa yaleŋo ra rokop don suwaine okanmaike, ‘Ŋine Kaisale wane simin-ŋuniyake, oŋo yemo suwaineze, ŋine wet dereret sola so asu oŋa oŋaŋine so mali malipŋine, eya koropka Waom ŋine Kaisale wet maep okan-kaikei.’ 38Yewaŋo ra rokop don suwaine so wele okanmaike. 39So naba tu ra rokop don mane wele okanmaike, eŋe yalineka, yemo iwa yale, ‘Ge geŋonane ganmaike, kop yalewaka ŋei kimakopŋone eŋane okan-ganiyake’ 40Mose wane Numa korop, so propet eŋane don yemo, ra rokop don etke iwa eto kine qepot-kemamik.”

Yesu Eŋe Mesiya Wane Kinane Parisi Qesononge

41Parisi eŋe wanok nagu sari wekuwoka qeturage metpi, Yesuŋo qeson one rake, 42“Ŋine Mesiya Kaisaleŋo bira-kayake, eya wane daleo wetkemami? Eŋe maŋane qerakine?”

Raki eŋe olale rakoi. Eŋe Dawit wane qerakine.

43Rauso, Yesuŋo qesonone rake, “Pakimo, onoka wane Asuŋo Dawit wetino motki, ‘Waom’ orake? Onoka wane Dawitŋo raki qekoi,

44‘Magak Waomŋo naŋane Waom Mesiya olale rake. “Ge iwa naŋane wonno zonom gorop met magenom, na geŋane ŋabakopŋone kiyeŋonane bango bira onikale.’ 45Dawit eŋe Mesiya wane ra more, ‘Naŋane Waom’ orakeo, yemo ŋine daleo Mesiya eŋe Dawit wane ŋaboine, ŋeika rau rap? Eya mi kopkeke!”

46Raki detpi, ŋei maneŋo eweke more, Yesu wane don turuŋine weku mane mi mainge olatkoi, pakiso kaiwe eya ŋine kiyeke, ŋei maneŋo Yesu qesonka qesonka eyamo ŋado mi okangoi.

Currently Selected:

Matayu 22: onsNT

Highlight

Copy