Mareko 12
12
Wain Eu Ware Ware Eŋane Don Rokop
1Yesu eŋe don rokop natne iwa yale more edane rake, Ŋei maneŋo wain eu ebore more sen pise qeyare more, lom yaso taŋ eyaŋo wain woune lapelekeyake, eya wane mauluke more mat bosiŋine kiroine wetika weti maki yewa waki eu yewa warelukkake. Eŋe ŋei natne eŋane meteeno motki edo urata yewa ware ma geu eŋine qelige lobo kepe yewao ari geke. 2Eŋe yewa geki wain wele mena menaŋ nasoine okangi mo qelit medepine mane birakaki eu ware ware eŋano wele natne manbi ma sariyakane arike. 3Pakimo, eu ware ware eŋe wiye qelit medep yewa malipka more kiŋ quŋ kito osopkau, eŋe metineka zinge arike. 4Ariki, eu welaine eŋe koso qelit medep mane birakaki ariki eŋe yalewaka qe lewine rasipoke manerop matalikakoi. 5Eŋe soringe koso qelit medep mane birakaki ariki, eya yemo komu komune qeu seukke. Eu welaine eŋe ŋei loutne biraongi ariu eu ware ware edo kawali ma wakone more ŋei natne ziwem engukoi ŋo, natne komu komune seuseune engukoi. 6Pakimo, eŋe eŋine gipole wemedep wekuku wetineŋo malipka geke. Eya wane eu welaine eŋe iwa yale detke. ‘Ŋine nae medep iwa wane aŋaine teweke more ewine kitokei.’ Yale dere more eu ware ware eŋano birakake. 7Pakimo eu wane ware ware ŋei eŋe medep yewa ka more auye rakoi, ‘Medep yewa eŋe gemage magainane eu so kine kine eu koto pamaike, iwa ŋebu ma more eya wane welaine okane wareoniyake. Eya wane ŋene qeŋem seukkiso ŋedo eu iwa welaine okane warekene.’ 8Yale rau paki ma more qeu seukki pareŋine eya eu ŋadino birakau ketke. 9Pakimo, eu welaine eŋe dalino okaniyake? Eŋe sari eu ware ware yewa engu, rasu pelekki eŋe korop seuke midakei. Midau mo eŋe koso eu ware ware musele ma wakone biraoniyake. 10Na iwa don rokop ra qelaŋanmaile. Ŋine don nat paromine mane Kaisale wane ekapko mi dapore det okanmami mane? ‘Mat mama urata ŋei eŋe mat wane bosiŋ mane eya eki pelekine ra more qikka more yeine birakoi. Wane ŋado eŋe koso kau mat wane banega bosiŋ togogole okange. 11Waom eŋe ŋado yale okangi, ŋene kaŋem wekumane okaniyake.’ 12Yale ra edangi, Yuda ŋetne eŋe detpi Yesuŋo don rokop eya qeki, korop eŋanoka ariki rawareke. Pakimo, eŋe Yesu malipka wokom-kaikei wane wetkekoi ŋo eŋe ŋei eŋane kaetonge, yalinane eŋe yeine qeliŋka arikoi. Ŋei ŋerep eŋe Yesu wane don dere siminonge yewa wane Yuda ŋetne eŋe kaetongi, Yesu qeliŋka arikoi.
Ŋei Edo Roma Kepe Ware Ware Suwaine Takis Manikeiwane Yesu Qesonkakoi
13Yuda ŋetne eŋe Kaisale papa togon welaine ŋei, Parisaiyo, so Herot wane tego natne biraonbi Yesu wano arikoi. Ŋei yewa eŋe Yesu dongo qe isikau, don mataliki, don uratao birakakei wane arikoi. 14Eŋe ari more Yesu olale rakoi, Kito ebo ebon, ŋene ge detluk ganmaine. Ge isi don mane mi raraŋone, ge don wele rara wane ŋei. Ge ŋei mane wane mi kaetgan okanmaike. Ge ŋei ŋerep natne don mane edane more koso ŋei ŋerep magu natne don mane mi edane okanmaine. Midakaka! Ge don wele so Kaisale wane masi koboboine kito, ŋei ŋerep iwa korop sikan ŋone okanmaine. Ŋenze ra rokop donze eya wane ge dalino detmaine? Maine ŋene takis Roma kepe ware ware suwaine manikene me mida? 15Ŋo, Yesu eŋe isisienane kine eya mo detone more edane rake, Onoka wane ŋine na liwek nanmami? Eso, yale wane ŋine wesi yewa mane ma sariu kawe. 16Yale raki, eŋe wesi mane ma more, Yesu wane osino ma sariu, eŋe qeson one rake, Oŋaoŋa iwa so eŋet iwa maŋane? Eŋe rakoi, Roma kepe ware ware suwaine eŋane eŋet so oŋa oŋa. 17Pakimo, Yesu eŋe donene mainge edane rake, Roma kepe ware ware suwainane biŋek kine kine eya maine eŋe eŋine manikei, ŋo Kaisale wane biŋek kine kine eya maine eŋe eŋine Kaisale manikei. Yale raki, ŋei magu yewa eŋe Yesu wane don dere oŋaene qaeke, qiselukkoi, so dereretene siukke.
Ŋei Edo Ŋei Seu Seuwo Ŋine Wisikae Wiye Wiye Eya Wane Yesu Qesonkakoi
18Yuda ŋei ŋetne, Sadusi natne, eŋe Yesu wano sarikoi. Magu yewa eŋe yale ra okangoi, ŋei seuseune eŋe koso mi wiyekei. Eya wane eŋe Yesu qesonka rakoi, 19Kito ebo ebon, sogino, Moseŋo ŋenze don mane iwa yale qeke. ‘Ŋei mane eŋe seukeyake, eŋe medeune midaine, ŋo, ŋanomine eŋe yeka geyake, pakimo ŋei seukke eŋane ŋole eŋe tatine qesiŋka more ŋerep yewa oŋo koso ma more medep mane ma wakoniyake.’ 20Ŋenane donkisi detnom. Donkisi iwa eŋe tati ŋon sewen (7) yale gekoi. Wane tatene suwaine eŋe ŋerep ma ge more medep mane mi ma wakone eŋe yaup seukke. 21Pakimo, ŋole kebaŋine oŋo tatinane mala eya make. Eŋe yaleka medep mane mi ma wakone more eŋe seukki, ŋole ŋorikine eŋe yalewaka okange. 22Yalewaka tati ŋon sewen (7) yewa eŋe ŋerep wekuka makoi, ŋo, medep mane mi ma wakone more, eŋe yaup seukwarekoi. Pakimo ŋerep yewa eŋe yaleka ŋado baŋ seukke. 23Boaŋ naso ŋei seuseune eŋe wisikae wiyekei, yewao ŋerep yewa eŋe maŋane ŋerep biŋek okaniyake? Ge detmaine. Ŋei tati ŋon sewen eŋe ŋanomene weku yewa makoi. 24Yesu eŋe mainge rake, Ŋine Kaisale wane ekapko don pamaike, eya ŋine mi detlukmami. So ŋine Kaisale wane zonomine eya ŋaŋaeka more eya wane don yewa qeyau ramami. 25Ŋei seuseune eŋe deŋesereo ŋine wisikae wiyekei, naso yewao eŋe koso ŋao ŋanom mi okanikei. Midakaka! Eŋe qeliwo aŋelo yale gekei. 26Ŋei seuseune eŋe wisikae wiyekei, eŋane don yewa Moseŋo kibi qeke. Ŋine yewa mi dapotkoi me? Naso yewao eki nigatnane kutno gerep zeke, eyao yewa wane donkisi Kaisaleŋo Mose olatke, ‘Na Abraham wane Kaisale, so Isak wane Kaisale so Yakop wane Kaisale okanmaile.’ 27Kaisale eŋe ŋei wisika gemami eŋane Kaisale. Don eya wane kine iwa yale, Abraham, Isak, Yakop eŋe kepe solaŋo seukkoi, ŋo oŋa oŋa eneŋo naso iwao eŋe wisika gemami! Kaisale eŋe ŋei seuseune eŋane Kaisale midakaka! Ŋine don yewa qeyau rawaremami!
Kaisale Wane Rara Togon Iwaŋo Ŋetne Okanmaike
28Yesu eŋe yale raki, eŋe don auye kitat metpi, Kaisale papa togon welaine ŋei mane eŋe sari detkaki, Yesu eŋe don koboboine mainge edangi, eŋe Yesu qesonka rake, Ge ranom! Kaisale wane ra rokop don eŋano ŋine diyawaŋo ŋetne bosiŋine okanmaike? 29Yesu eŋe donine mainge rake, Eyamo iwa yaleŋo Kaisale wane ra rokop don ŋetne so bosiŋine okanmaike. ‘Israel ŋei ŋerep ŋine detpi! Waom eŋe ŋenane Kaisale okanmaike! Eŋe waom wekuku! 30Ŋine wet dereretŋine, so oŋa oŋa ŋine so zonomŋine korop eya koropka Waom ŋine Kaisale eŋane simin-ŋungi eŋe wekuku ma qotkau!’ 31Kaisale wane ra rokop don ŋetne yewa wane bano, koso mane etke okanmamik yemo, ‘Ŋine wetŋineŋo ŋidomka ma qot nagu gekei! Yalewaka ŋei ŋerepkopŋine korop wetŋineŋo ma qotonikei.’ Kaisale wane ra rokop don etke yewa koso maneŋo etke iwa mi yuwan otmaike. 32Kaisale papa togon welaine ŋei yewa eŋe Yesu olale rake, Kito Ŋebon Ŋebon ge don maine ramaine! Oo welekatne! Waom eŋe wekuŋo Kaisale okanmaike. Koso mane mi gemaike. 33Ŋene wet dereretze so oŋaoŋaze so zonomze koropka Kaisale wane simin-ŋongi, ma qot-kaŋem! So ŋenze wetzeŋo ma qotnagukene. Yalewaka ŋei ŋerep korop ma qotonikene. Ŋene ra rokop don etke iwa mogasikeneo, masi etke eyaŋo Kaisale wane bakom natne lama bulamakaŋo mire okanmami, eya korop yuwan onikeik. 34Yesu eŋe ŋei yewa don raraine detkaki weku mane koboboine ŋei dereret koropŋo ramami, yale mainge raki, detka more ŋei yewa olale rake, Ge Kaisaleŋo ŋei ŋerep ware-ŋuniyakane kine daleo eya detkenane qou qou okanmaine. Yesu eŋe don yale raki, ŋei ŋerep natne eŋe don natne Yesu qeson-kaikeiwane kaet-ongi, koso don mane mi qeson-kakoi.
Yesuŋo Ŋei Ŋerep Mesiya Wane Kine Edange
35Yesu eŋe Kaisale Wane Bakom Urum koto mere ŋei ŋerep kito ebone more iwa yale rake, Ŋo onoka wane Kaisale wane papa togon welaine ŋei, Skribe, eŋe Mesiya wane ramami, eŋe eŋineka Dawit wane ŋaboine, kepe ŋei eŋineka. 36Mesiyaŋo ŋei ŋerep ma menaŋ oniyakane, Kaisaleŋo ma wakonkake. Kaisale wane Asu Koboboineŋo Dawit dereret mange, pakimo, Dawit oŋom rake, ‘Magak Suwaineŋo naŋane suwaine Mesiya iwa yale olatke, Ge naŋane wonnoken mesikene, pakimo, noŋo ŋabakopŋone, eŋe biraonbe, geŋane banŋono mesikei.’ 37Dawit oŋom Mesiya wane eŋe suwainene rake, wane mo eŋe daleo wane Dawit wane ŋaboine?
Yesuŋo Kaisale Wane Papa Togon Welaine Skribe Ŋei Eŋane Girem Don Ŋei Ŋerep Edange
Ŋei ŋerep magu suwaine eŋe Yesu wane don dere more, siminongi bakom kitokoi. 38Yesu eŋe iwa yale kito ebonge, Ŋine Kaisale wane papa togon welaine ŋei eŋane kaulukonikei! Eŋe takot kiroine kibinerop bira more arikei wane siminone okanmaike. So eŋe lewa lewaŋ sobego taŋ tuŋ zarak zurak geu ŋei ŋerep edo one ma wa one more eweene kitou geokanmami. 39Eŋe Yuda lewa lewaŋ urum koto so epa kebu eyao met met ŋetno mesikeiwane okan okanmami. 40Eŋe yale okane more ŋerep mala eŋane mat oma one okanmaŋkei. Omakone more eŋe sari Yuda lewa lewaŋ urum koto ŋei ŋerep eŋane deo okora Kaisale wano meŋe meŋen kiroroine meŋenka okanmaŋkei. Ŋei yaline yewa eŋe gemage ŋado Kaisaleŋo wikile suwaine eboniyake.
Ŋerep Mala Maneŋo Kaisale Bakomine Kitoke
41Yesu eŋe Kaisale Wane Bakom Urum wane wesi katapa osino metke. Mere ŋei ŋerep one metki ari wesi katapa koto birau ketke. Ŋei wesi aboŋene suwaine loutne eŋe wesi suwaine motkoi. 42Paki mo, ŋerep mala wesi aboŋine nigatnemde eŋe sari toeya etke biraki ketke. 43Eya wane Yesu eŋe dokoine edoraki sariu edange, Na welekatne ŋidanmaile, ŋerep mala ŋaune mo seuseune, aboŋine nigatnemde eyaŋo wesi manerop motmaike, eŋe ŋei ŋerep wesi aboŋene suwaine eŋane bakom wane wesi motmami, eya yuwan-onmaike. 44Ŋei ŋerep wesi aboŋene suwaine pake, eya ŋine nigatnemde so natka Bakom Urum wane laseo motkoi, ŋo ŋerep mala iwa eŋe zok wesi wane ziyaŋ lulukke, ŋo eŋe koropka birawareke, eŋe wesiine mane doku ŋara qoleyakane maune mi motki metke.
Currently Selected:
Mareko 12: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
