Mareko 15

Ŋei Edo Yesu Pailat Wane Kaitko Iwenka Arikoi

1Kepe qae qaewo mosop ŋei ŋetne so Kaisale papa togon welaine ŋei, Skribe, so Yuda ware ware ŋei so kaunsol korop eŋe ikopka lewage more don ma togolekoi. Eŋe Yesu metine mulap togoleŋo lukka more iwenka ari Pailat wane meteo birakakoi. 2Pailat eŋe Yesu qesonkake, Ge Yuda wane kepe wareware suwaine me mida? Yesu eŋe mainge rake, Oo, mo yewa goŋom ramaine yale. 3Mosop ŋei ŋetne eŋe don qesat manerop qesatkakoi. 4Eya wane Pailat eŋe koso qesonkake, Ge don mane mi mainge raikene me? Ge detnom! Eŋe don qesat loutne rau geŋano sarimaike! 5Yesu eŋe eŋane don dere more koso mi mainge raki, Pailat eŋe oŋaine qaeke.

Pailatŋo Yesu Kibego Qekei Wane Rake

6Aŋelo Loloŋon Loloŋon wane Naso, Pailat eŋe mulap ŋei mane qeliŋkamaŋke. Eŋe ŋei ŋerep edom Pailat eŋe mulap ŋei mane eŋetine oramaŋkoi, rokop qesonka eŋe simileene mogare so qeliŋkamaŋke. 7Naso yewao, ŋei mane mulap urumgo metke, eŋetine Barabas. Eŋe ŋei kawali qe more kepe ware ware yuwanka more, ŋei natne enguki seukkoi, eŋerop mulap urumgo waketkoi. Ŋei magu yewa eŋano ŋine mane eŋetine Barabas. 8Naso yewao ŋei ŋerep magu eŋe sari Pailat qesonka more, naso baŋem okanmaŋke, yale mulap ŋei mane qeliŋkayakane olatkoi. 9Pailat eŋe qesonone rake, Maine na Yuda wane kepe ware ware suwaine iwa qeliŋkawe ŋinano sariyake me mida? 10Eŋe detke, mosop ŋei ŋetne eŋe Yesu wane umat mane suwaine mida, eŋe yaup dere worik okane more eŋane kaitko kine midaine ma wakone dongo birakakoi. 11Mosop ŋei ŋetne, pris, eŋe ŋei ŋerep magu wetko ketket okane taleone more, Pailat wano rau, Barabas qeliŋkaki, eŋano sariyakane rakoi. 12Pailat eŋe ŋei ŋerep magu koso qesonone rake, Ŋine ŋei iwa Yuda kepe ware ware oramami, eya wane na dalino okanikale? 13Eŋe mainge boka rakoi, Eŋe kibego qeu! 14Pailatŋo qesononge, Onoka sotwane? Eŋe umat dalino okange? Eŋe zok manerop togoleka rakoi, Eŋe kibeŋ qabego qeu! 15Pailatŋo ŋei ŋerep wetene ma peseyakane Barabas qeliŋkaki eŋano ariki Yesu kawali ŋei magu eŋane meteo bira kaki edo qe rasu qolok qe qolok mau paki, kumunam seleineŋo dime more, masi kine kine korop okanka more ŋado kibego ma ari qekoi.

Kawali Ŋei Edo Yesu Isi Bela Qebela Okankakoi

16Kawali ŋei edo Yesu kepe ware ware wane mat wane sen koto iwenka ari more eŋane magu kawali ŋei korop edorau arikoi. 17Eŋe Yesu kepe ware ware takot birakakoi. Eŋe takot weŋemka so marok okolerop eya lewino motkoi. 18Eŋe Yesu wano isi bela qebela okanka ewine kito rakoi, Oo! Ge Yuda kepe ware ware suwaine naso kiroroine ge waikene! 19Eŋe zoroŋŋo lewine qe more, sotkau pakiso wawetene qe more bakom isisine kitokoi. 20Eŋe eŋane isi bela qebela don olatpi qoeki, takot weŋemka yewa kitoqokka more eŋine takot eyaŋo biraka more kibego qekei wane iwenka arikoi.

Eŋe Yesu Kibego Qekoi

21Eŋe dumao ari ŋei mane eŋetne Saimon, eŋe mat suwaino wayakane sariki, eŋe maratka more sorinkau Yesu wane kibeŋ qesiŋka tewekki arikoi. Saimon eŋe Sairini matko ŋine sarike, eŋane gipoletkine Alekzander so Rupus. Saimon eŋe, kawali ŋei edo ma more, qebinkau Yesu wane kibeŋ tewekke. 22Eŋe Yesu ma more kepe mane eŋetne Golgota yewa ma arikoi. Kepe eŋetne eya wane kine iwa yale, “Lewet Setnenane Kepe.” 23Eŋe yewao Yesu qelaŋ qeyakane ra more wain so qelaŋ qeqe wane kinin yewarop maingekoi. Eya manbi, Yesu eŋe mi neke. 24Pakimo, eŋe kibego qe more takotine so laplapine so maloine yewa wezu qe more yuwane damo qe amanagukoi. 25Sakoka, 9 kilok, eŋe Yesu kibego qekoi. 26Eŋe kibeŋ kutno kibi isi qesat don qe motkoi, Yuda Wane Ware Ware Suwaine.

27Eŋe kobu ŋei etke Yesu wane wazaino nat nat weneŋ kibego etkukoi. 28Kaisale wane ekapko don mane iwa yale pamaike, eya wele wakonge, “Eŋe kobu ŋei eŋerop qekei.” 29Ŋei ŋerep ari sari okane ka more, ebeene bonepke isi bela qebela okanka rakoi, Ge Kaisale Wane Bakom Urum kitopoke more, kaiwe karewe koso mane musele maikenane rakone. 30Eya wane ge geŋone qesiŋnagu more kibego ŋine qelige qoe ket arinom! 31Mosop ŋei ŋetne so Kaisale papa togon welaine ŋei eŋe yalewaka Yesu wano isi bela qebela don okanka more auye rakoi, Eŋe ŋei ŋerep natne maine qesiŋonge, ŋo, eŋine maine mi qesiŋnagumaike! 32Eŋe, Kristo, Israel wane kepe ware ware suwaine. Eŋe kibego ŋine maine qoe ketki ŋene ka more malipkaikene. Kobu ŋei etke ere weneŋ Yesurop etkukoi, ere yalewaka Yesu don qotkoine olatkoik.

Yesu Eŋe Seukke

33Oŋabango kepe korop panamane paki, ari kepe deine zingeki rarap wano 3 kilok okange. 34Okangi, Yesu eŋe togoleka boka rake, Eloi, Eloi, lema sabaktani? Don kine iwa yale, Kaisalene, Kaisalene ge onoka wane qeliŋnanmaine? 35Ŋei ŋerep natne osino okorakoi, eŋe yewa dere more rakoi, Detkau! Eŋe Elaiya oramaike. 36Ŋei mane eŋe biririke ari more wain dokune tabainerop eya laplapŋo qe muruge more kudupko pise more piino neyakane qe dege more rake, Tomaka kaŋem! Elaiya eŋe sari more makokka birakaki kesiyake me mida! 37Yesu eŋe koso manerop togoleka boka more asuine saki, seukke. 38Seukki laplap suwaine Kaisale Wane Bakom Urum kotino okorake, eya keuwoka bun tuk wiri sari ketki qela qoeke. 39Kawali ŋei eŋane ware ware eŋe Yesu wane osino okorake, eŋe kaki seukki mo rake, Welekakatne, iwa eŋe Kaisale wane Gipole okanmaike. 40Ŋerep natne eŋe amaŋ okora kakoi. Eŋane keuwo Mariya Magdalena, so Salome so Mariya mane, Yakop ketkele orakoi, so Yosep erane nagaetne. 41Sogino Yesu eŋe Galili metke, naso yewao ŋerep yewa ere Yesu qesiŋkakoik. So ŋerep natne eŋe Yesu weneŋ Yerusalem matko wakoi.

Yesu Wane Pareŋine Kezem Koto Motkoi

42-43Rarap wano Yosep, Arimateya ŋine, eŋe sari more mi kaet okange, eŋe Pailat wano ari more Yesu wane pareŋine mayakane qesonkake. Yosep eŋe Yuda wane ware ware mane ewinerop. Eŋe Kaisale wane qeli ewe zonom wakongi kayakane, ware ware gege tomaka geokange. Kaiwe yewao eŋe Qezareko met met wane bano nagapko kaiwe yewao ŋei ŋerep eŋe Qezareko met met eya wane kine kine maulukkoi. Eŋe qezareko urata mi makoi eya wane Yosep eŋe Pailat wano ari qesonkake. 44Pailat eŋe ikke so wiye waki kito qokkaki so kawali ŋei ŋetne oraki sariki qesonka rake, Welekatne Yesu mo seukike me mida? 45Eŋe kawali ŋei ŋetne eŋano ŋine dere more Yosep olale rake, Ge maine pareŋine maikene. 46Yosep eŋe laplap mane libeka qoleke, yewao Yesu wane pareŋine makoke ket more kawetka more deŋesereo kezem koto motke. Lom yewa mo wesi weku suwaine eya wano mau okorake. Paki, wesi suwaine mane rodiŋkaki, ari aŋaune yewa kito won geke. 47Mariya Magdalena so Mariya, Yosep wane nagaine ere ka more wareka metpik, Yosep eŋe Yesu deŋesereo dukkake.

Currently Selected:

Mareko 15: onsNT

Highlight

Copy