Luk 3
3
Röbö Pal Nölɨb Nöbö Jon mönö yad nölöŋa
(Mat 3:1-12; Mak 1:2-8; Jon 1:19-28)
1Rom gapman nöbö dib ödöriö Sisa Taibirias mögörɨb piaku piaku nugwidɨx mɨdmɨda kɨma akuyöbö yöniö pɨnöŋ mac adokwebö kwo (15). Makwam nuŋ pad piaku mɨdön, nöbö nugwidɨx mɨdɨb höglöm yöbö nuŋ bli yad nɨgmɨn, du mögörɨb bli nugwidɨx mɨdmɨdöia. Nöbö nuŋ Podias Pailot mögörɨb Judia nöbö mö akuyöbö nugwidɨx mɨdmɨda. Nöbö nuŋwa Herod mögörɨb Galili nöbö mö akuyöbö nugwidɨx mɨdmɨda. Herod pɨgnɨŋ nuŋwa Pilip mögörɨb Iduria nöbö mö akuyöbö aipam, mögörɨb Trakonaitis nöbö mö akuyöbö aipam nugwidɨx mɨdmɨda. Nöbö nuŋwa Laisenias mögörɨb Abilini nöbö mö akuyöbö nugwidɨx mɨdmɨda. 2Makwam wop aku, nöbö nagö Anas Kaiapas yöŋö, God ap höjöpal ur nölɨb nöbö dib ödöriö hogwa Jerusalem mɨdmɨdöia.
Makwam wop mibɨl yöraku, Sekaraia ha nuŋwa Jon, nöbö mö mɨga mɨdmɨdölöi, mögörɨb rɨg kap mibɨl piaku hölɨmön mɨdmɨda. Mibɨl piaku hölɨmön mɨdmɨn nugugɨrön, God nuŋ Jon nugwo rɨba nölmɨn, 3#Apos 13:24mögörɨb röbö Jodan yuö pö piaku yönmɨdmɨn nugwön nöbö mö akuyöbö höm, ñɨgö mönö yad nölmɨdöŋa, “Ap kib mag gwogwo röi aku, pödpöd rɨmɨn aliö alölɨŋö, rön, röböxön nɨ höŋ, nɨ ñɨgö röbö pal nölmön, God ap kib mag gwogwo röi bla nugwön röböxaŋ,” me rɨmɨdöŋa. 4#Ais 40:3-5Jon ñɨgö mönö yad nölmɨdöŋ aku, God mönö yadɨb nöbö Aisaia maduar ör rɨg cönɨŋö, rön, kai kɨtöŋ mag akwör röŋa. Aisaia mönö aku kai kɨtön yadöŋa,
“Nöbö i, mögörɨb nöbö mö mɨga mɨdölöi,
mögörɨb rɨg kap mibɨl yöra du mɨdön, wö rön yajöna,
‘Nöbö Dib aku hömɨdö, rön,
nugwo pöx mɨjöña!
Makwam, ödöi höña pisö pibö rɨg mɨjön piaku,
pɨd kwol pɨlɨx rɨg mɨjön piaku, pɨn wödön ri abön ösös rɨ gɨr mɨjöña.
5Makwam, mögö up röx möl bla pɨn wöd ri abön,
pɨd bla pɨn wöd ösös rɨ ri abön,
ödöi um nɨgön cön yör bla, paxdöriö röbön,
rɨg bla pa abön rɨ ri abmɨjöña.
6Makwam akuyöbö aiöñ aku, nöbö mö bla magalɨg nugwöña,
God nuŋ mag pödiöm rön ñɨgö kömö pönɨŋö,’ cönɨŋö,” röŋa.
7 #
Mat 12:34; 23:33 Jon nuŋ Aisaia kai kɨtöŋ mönö akuyöbö yad nölɨm nugugɨrön, nöbö mö mɨga akwör nuŋ mɨdöŋ yöra hön yadmä, “Anɨŋ röbö pal nölö,” rɨmä. Jon ñɨgö yadyöxön yadöŋa, “Ñɨŋ kas halöu ha kɨyöbö! Agö rɨbɨm yöxön bör hömɨdöi? ‘Röbö palɨŋ, God nöbö mö bli ñɨgö yadyöxön cön wop aku, an yadyöxölaŋ,’ me rön, bör hömɨdöi ä? 8#Jon 8:33,39Ñɨŋ röbö yaxnöb cöñ aku, ap kib mag gwogwo röi aku, pödpöd rɨmɨn aliö alölɨŋö, rön, röböxön tar mɨd ri aböña. Akuyöbö alɨŋ mönö, nöbö mö nugwöña, ñɨŋ ap kib mag gwogwo rɨmɨdöi mag akuyöbö röböxöia. Jɨ ñɨŋ rɨb i yöx nugwöña, ‘An nöso maduebö Ebraham halöu ha nuŋwa mɨdölɨŋö,’ rön, rɨb aku yöx nugumɨjeñ. An Ebraham halöu ha nuŋ me röi aku hör ap! God rɨg bɨlɨk pön, Ebraham halöu ha nuŋ akuyöbö rɨ nɨgɨnö, rön, rɨ nɨgöna! 9#Mat 7:19Nugw ri abi! God bɨ aku ila alɨg römalɨba, yu aku bɨ ila mämäl gɨ mɨda. Bɨ i mag nɨmɨb wä bli yaxen aku, römaxdörön pɨ rɨn yön mɨd möl bö abönɨŋö,” röŋa.
10Jon mönö aliö akuyöbö yadmɨn, ñɨŋ nugwo paiŋö yad nugwön yadmä, “An pödpöd rɨŋ, me rön, aliö yadmɨdlaŋö?” rɨmä. Aliö rɨmɨn, Jon ñɨgö yadöŋa,
11“Nöbö mö ap uñ mös mɨjön aku, i nöbö mö ap uñ mɨden akuyöbö nölɨŋ. Nöbö mö ap mag mɨga mɨjön aku, nöbö mö ap mag mɨden akuyöbö ñɨgö bli nuöm nɨg nölɨŋ,” me röŋa.
12 #
Luk 7:29
Makwam takis pɨb nöbö bla, Jon anɨŋ röbö pal nölaŋ, me rön, hön nugwo yad nugwön yadmä, “Mönö yad nölɨb nöbö, an pödpöd cɨnɨŋ?” rɨmä.
13Aliö rɨmɨn, ñɨgö yadöŋa, “Takis aku pɨba rön, gapman rɨg yadöi akwör pöña. Hör um bli kwo pɨmɨjeñɨŋö,” röŋa.
14Makwam ami nöbö bli Jon nugwo mönö paŋ aliar yad nugwön yadmä, “An pöd cɨnɨŋ?” rɨmä.
Aliö rɨmɨn, ñɨgö yadöŋa, “Ñɨŋ inakmönö hör yadön nöbö mö bla rɨg ap ñɨŋ kib pɨmɨjeñ. Inakmönö hör yadön nöbö mö bla mönö diba yadmɨjeñ. Mabö pe pöñ aku i kwo pɨnɨŋö, rön, rɨb aku yöx nugumɨjeñɨŋö,” röŋa.
15Makwam akuyöbö alön mɨdɨp duön nöbö mö akuyöbö rɨb adö i nugwön yadmä, “Nöbö kɨ Krais öim pöx mɨdmɨdöl akuyöbö röxgö,” rɨmä. 16#Apos 13:25Aliö rɨmɨdmɨn, nuŋ mönö aku nugwön ñɨgö paiŋö yadöŋa, “Ehöu! Nɨ ñɨgö hör röbö akwör pal nölmɨdla, jɨ nɨ mai hön nöbö aku, nuŋ nɨ röxgɨb yöi; nuŋ nöbö dib ödöriö, nɨ nöbö ulmɨdö. Nɨ nugwo nugwön möigw yöxöna. Yam uñ nuŋ aku naga pɨ yaub maga nɨgölö,” röŋa. Nöbö aku nuŋ hön, ñɨgö Inöm Lei akwör pal nölön, rɨn pina pal nölön, cöna. 17“Nuŋ wit maga göj waŋ, ödör pön hö palpatöi mag akuyöbö cöna. Wit mag nɨmɨb bla keir nɨgön, wit yöj rɨb rɨb bla keir nɨgön, cöna. Akuyöbö alön, wit mag nɨmɨb bla rag pön du ram möl yuadö nuŋwa nɨgöna, jɨ rɨb rɨb akuyöbö rag du bɨ yuö öim yönmɨd möla wiönɨŋö,” röŋa.
Herod nuŋ Jon nag nɨgöŋa
18Jon, nöbö mö akuyöbö ñɨgö God mönö wä aku bli alɨg yad nölmön nugw ri abɨŋ, me rön, ñɨgö mönö wä akuyöbö ulul i yadmɨdöl. 19#Mat 14:3-4; Mak 6:17-18Makwam gapman nöbö dib Herod, ap kib mag gwogwo piaku rɨp duön, mai pɨgnɨŋ Pilip mönɨŋ nuŋwa Herodias nugwo pɨsaŋ yönmɨn, Jon nuŋ aku mag wä rölö, röŋa. 20Jon mönö aku aliö rɨmɨn, Herod nugwön, mag gwogwo i kwo aipam rön, Jon nugwo pön du nag nɨgöŋa.
Jon nuŋ Jisas nugwo röbö pal nölöŋa
(Mat 3:13-17; Mak 1:9-11)
21-22 #
Jon 1:32
Makwam Herod Jon nugwo nag nɨgölöŋ wop aku, nuŋ nöbö mö piaku ñɨgö röbö pal nölmɨda. Jisas nugwo wobiö röbö pal nölöŋa. Jisas nugwo röbö pal nölmɨn, nuŋ Nuö God höjöpal mɨdmɨn nugugɨrön, adöx yöd röul adö kau sö uba rödmɨn, Inöm Leia yöur döpwö röxgön bɨbɨ rɨ Jisas höŋa. Aliö höm nugugɨrön, mönö i adöx yöd röul adö kau sebö yadöŋa, “Nagö Ha madmag yöbö nɨ ödöriö. Nagö nugumön, nɨ mɨ wä rö,” röŋa.
Jisas nöhönɨŋ nöbö
(Mat 1:1-17)
23 #
Luk 4:22; Jon 6:42 Makwam Jisas kɨm nuŋ akuyöbö padokwo paŋyöbö i höuöiliö hö wölu mɨj sö (30) yönmɨn nugugɨrön, nuŋ ila nɨgön nöbö mö God Mönö maga yad nölöŋa. Nöbö mö piaku Jisas nuö nuŋwa Josep, me rön rɨbyöx nugumä.
Josep nuö nuŋwa Heli.
24Heli nuö nuŋwa Matat.
Matat nuö nuŋwa Lipai.
Lipai nuö nuŋwa Melkai.
Melkai nuö nuŋwa Janai.
Janai nuö nuŋwa Josep.
25Josep nuö nuŋwa Matataias.
Matataias nuö nuŋwa Emos.
Emos nuö nuŋwa Neham.
Neham nuö nuŋwa Esli.
Esli nuö nuŋwa Nagai.
26Nagai nuö nuŋwa Meat.
Meat nuö nuŋwa Matataias.
Matataias nuö nuŋwa Semein.
Semein nuö nuŋwa Josek.
Josek nuö nuŋwa Joda.
27Joda nuö nuŋwa Joanan.
Joanan nuö nuŋwa Resa.
Resa nuö nuŋwa Serababel.
Serababel nuö nuŋwa Sialtiel.
Sialtiel nuö nuŋwa Nerai.
28Nerai nuö nuŋwa Melkai.
Melkai nuö nuŋwa Adai.
Adai nuö nuŋwa Kosam.
Kosam nuö nuŋwa Elmadam.
Elmadam nuö nuŋwa Er.
29Er nuö nuŋwa Josua.
Josua nuö nuŋwa Eliesa.
Eliesa nuö nuŋwa Jorim.
Jorim nuö nuŋwa Matat.
Matat nuö nuŋwa Lipai.
30Lipai nuö nuŋwa Simion.
Simion nuö nuŋwa Juda.
Juda nuö nuŋwa Josep.
Josep nuö nuŋwa Jonam.
Jonam nuö nuŋwa Eliakim.
31Eliakim nuö nuŋwa Melea.
Melea nuö nuŋwa Mena.
Mena nuö nuŋwa Matata.
Matata nuö nuŋwa Natam.
Natam nuö nuŋwa Depid.
32 #
Rut 4:17-22
Depid nuö nuŋwa Jesi.
Jesi nuö nuŋwa Obed.
Obed nuö nuŋwa Boas.
Boas nuö nuŋwa Salmon.
Salmon nuö nuŋwa Nason.
33Nason nuö nuŋwa Aminadap.
Aminadap nuö nuŋwa Admin.
Admin nuö nuŋwa Arni.
Arni nuö nuŋwa Hesron.
Hesron nuö nuŋwa Peres.
Peres nuö nuŋwa Juda.
34Juda nuö nuŋwa Jekop.
Jekop nuö nuŋwa Aisak.
Aisak nuö nuŋwa Ebraham.
Ebraham nuö nuŋwa Tera.
Tera nuö nuŋwa Nahor.
Nahor nuö nuŋwa Seruk.
35Seruk nuö nuŋwa Rehu.
Rehu nuö nuŋwa Pelek.
Pelek nuö nuŋwa Eber.
Eber nuö nuŋwa Sela.
36 #
Jen 11:10-26
Sela nuö nuŋwa Kenam.
Kenam nuö nuŋwa Apaksad.
Apaksad nuö nuŋwa Sem.
Sem nuö nuŋwa Noa.
Noa nuö nuŋwa Lemek.
37Lemek nuö nuŋwa Metusela.
Metusela nuö nuŋwa Inok.
Inok nuö nuŋwa Jaret.
Jaret nuö nuŋwa Malelael.
Malelael nuö nuŋwa Kenan.
38 #
Jen 4:25-26
Kenan nuö nuŋwa Inos.
Inos nuö nuŋwa Set.
Set nuö nuŋwa Adam.
Adam nuö nuŋwa God.
Currently Selected:
Luk 3: tmd
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
