San Juan 7
7
Jesure cʉ̃ acabijirã Judea diꞌtapʉ majãmitojadutiꞌque niꞌi
1Jesú masãrẽ buꞌéca beꞌro Galileapʉ ĩꞌacusiawĩ. Cʉ̃ judío masã wẽjẽrĩ nígʉ̃, Judea diꞌtapʉre waꞌasĩꞌrĩtiwĩ. 2Titare judío masã ñecʉ̃sʉmʉa wiꞌseriacã na weeꞌquere wãcũsiruturãtirã weewã. Tojo weerã ti bosenʉmʉ niatji dʉporoacã Jesú acabijirã cʉ̃rẽ niwã:
3—Aꞌtopʉre tojaqueꞌaticãꞌña. Mʉꞌʉ buꞌesere siruturã tiro Judeapʉ tojaagʉsaꞌa. Topʉ napʉre weeĩꞌogʉ̃ waꞌaya. 4Masã mʉꞌʉrẽ masĩcã ʉagʉ, yaꞌyioropʉ weeĩꞌoticãꞌrõʉaꞌa. Mʉꞌʉ tere weeĩꞌogʉ̃, nipeꞌtirã ĩꞌorõpʉ weeĩꞌogʉ̃ waꞌaya, niwã.
5Cʉ̃ acabijirãpʉta cʉ̃rẽ ẽjõpeotiwã. 6Jesú narẽ niwĩ:
—Yʉꞌʉ noꞌo ʉaro waꞌamasĩtisaꞌa. Yʉꞌʉ pacʉ yʉꞌʉre cũuꞌque ejaweꞌe yujupʉ. Mʉsã pũrĩcãrẽ wioweꞌe; noꞌo ʉaro waꞌamasĩꞌi. 7Aꞌti ʉmʉcocjãrã ñaꞌarõ weerã́ mʉsãrẽ ĩꞌatuꞌtitima. Na ñaꞌarõ nisetiꞌquere werecã, yʉꞌʉre ĩꞌatuꞌtima. 8Mʉsã bosenʉmʉrẽ ĩꞌarã waꞌaya. Yʉꞌʉ pacʉ yʉꞌʉre cũuꞌcaro ejaweꞌe. Tojo weegʉ niꞌcãrõacãma yʉꞌʉa waꞌaweꞌe, niwĩ Jesú. 9Tojo níca beꞌro Galileapʉta tojacãꞌwĩ.
Jesú wiꞌseriacã weeri bosenʉmʉrẽ ĩꞌagʉ̃ waꞌaꞌque niꞌi
10Cʉ̃ acabijirã Jerusalẽ́pʉ bosenʉmʉ ĩꞌarã waꞌawã. Beꞌropʉ Jesú quẽꞌrã cʉ̃ acabijirãrẽ sirutuwãꞌcãwĩ. Topʉre ne etagʉ, masã́ĩꞌotiwĩ. Cʉ̃rẽ masĩcã ʉatiwĩ. 11Ti bosenʉmʉ nicã, judío masã wiorã Jesure aꞌmarã, “Sõꞌonícʉ waro ¿noꞌopʉ nisari?” nicãrã niwã.
12Jesure pãjãrã masã aꞌtiro nicãrã niwã. Ãpẽrã “Añugʉ̃ nimi”, nicãrã niwã. Ãpẽrã peꞌe “Nitimi, masãrẽ nisoogʉ ñaꞌagʉ̃ nimi”, nicãrã niwã.
13Judío masã wiorãrẽ uirã, nipeꞌtirã tʉꞌoropʉ Jesú ye cjasere ucũtiwã.
14Jerusalẽ́pʉ bosenʉmʉ decótiari cura Jesú Õꞌacʉ̃ wiꞌipʉ sãjãa, masãrẽ buꞌewĩ. 15Cʉ̃ buꞌesere tʉꞌorã, judío masã wiorã tʉꞌomarĩawã.
—Ãꞌrĩ buꞌetimigʉ̃, ¿deꞌro weegʉ tocãꞌrõ masĩti? niwã.
16Jesú narẽ niwĩ:
—Yʉꞌʉ buꞌese, yé mejẽta niꞌi. Yʉꞌʉ pacʉ, yʉꞌʉre oꞌóꞌcʉ ye niꞌi. 17Noꞌo Õꞌacʉ̃ ʉaro weesĩꞌrĩgʉ̃nojõ yʉꞌʉ ucũsere “Diacjʉ̃ta niꞌi”, ni masĩgʉ̃sami. “Õꞌacʉ̃ dutiro buꞌemi. Cʉ̃ ʉaro buꞌetimi”, nigʉ̃sami. 18Niꞌcʉ̃ cʉ̃ ʉaro ucũmaꞌagʉ̃ “Cʉ̃ añurõ ucũmeꞌrĩmi” nicã tʉꞌosĩꞌrĩsami. Apĩ Õꞌacʉ̃ ʉaro weregʉ peꞌe masã “Õꞌacʉ̃rẽ añuyʉꞌrʉami” nicã ʉasami. Cʉ̃ pũrĩcã nisooti, diacjʉ̃ ucũsami.
19»Mʉsãrẽ Õꞌacʉ̃ dutiꞌquere Moisé oꞌocʉ niwĩ. Tojo weemicã, mʉsã ne niꞌcʉ̃ te dutisere weeweꞌe. ¿Deꞌro weerã mʉsã yʉꞌʉre wẽjẽsĩꞌrĩti? ni sẽrĩtiñaꞌwĩ.
20Masã cʉ̃rẽ niwã:
—¿Noa mʉꞌʉrẽ wẽjẽsĩꞌrĩti? Mʉꞌʉ wãtĩ sãjãnoꞌcʉ nisaꞌa.
21Jesú narẽ niwĩ:
—Sijamasĩtigʉre sauru nicã yʉꞌrʉocã ĩꞌaʉcʉatjĩarã, yʉꞌʉre wẽjẽsĩꞌrĩꞌi. 22¿Deꞌro weerã mʉsã ʉcʉati? Moisé mʉsãrẽ aꞌtiro duticʉ niwĩ: “Mʉsã põꞌrã ʉmʉarẽ niꞌcã semana bajuáca beꞌro na õꞌrẽcjʉ yapa caserore yejecõꞌaña”, nicʉ niwĩ. Cʉ̃ tojo dutise dʉporo mʉsã ñecʉ̃sʉmʉa maata tojo weemʉjãtitojacãrã niwã. Apetero na sauru nicã bajuabosama. Na bajuáca beꞌro niꞌcã semana queoro sauruta nibosaꞌa tja. 23Mʉsã Moisé dutiꞌquere queoro weesĩꞌrĩrã, sauru nimicã, na õꞌrẽcjʉ yapa caserore yejecõꞌasaꞌa. Tojo weemirã, yʉꞌʉ sauru nicã niꞌcʉ̃rẽ yʉꞌrʉocã ĩꞌarã, ¿yʉꞌʉ meꞌrã tʉꞌsaweti? 24Buꞌicjase bajuyoropʉ cjase diaꞌcʉ̃rẽ ĩꞌabeseticãꞌña. Queoro ĩꞌatojarãpʉ beseya, niwĩ Jesú.
Jesú cʉ̃ ʉꞌmʉsepʉ aꞌtiꞌquere ucũꞌque niꞌi
25Jesú masãrẽ buꞌeri cura ãpẽrã Jerusalẽ́cjãrã niwã:
—¿Ãꞌrĩta niti na wẽjẽsĩꞌrĩ wapagʉ́? 26Cʉ̃ nipeꞌtirã ĩꞌorõpʉ buꞌegʉ weemi. Na cʉ̃rẽ ne mejẽcã nitiama. ¿Apetero weerã wiorã ãꞌrĩ Õꞌacʉ̃ macʉ̃ cʉ̃ beseꞌcʉ nimi nisere ẽjõpeosari? 27Ãꞌrĩ Õꞌacʉ̃ beseꞌcʉ nitisami. Cʉ̃ ya macãrẽ marĩ masĩꞌi. Õꞌacʉ̃ beseꞌcʉ nicã pũrĩcãrẽ, marĩ cʉ̃ aꞌtiꞌcaropʉre masĩtiboapã, niwã.
28Jesú cʉ̃ buꞌeri cura na tojo ni ucũcã tʉꞌogʉ, tutuaro narẽ niwĩ:
—Mʉsã yʉꞌʉre masĩꞌi, nimiba. Tojo nicã yʉꞌʉ aꞌtiꞌcaropʉre masĩsaꞌa. Yʉꞌʉ ʉaro meꞌrã aꞌtitiwʉ. Yʉꞌʉre oꞌóꞌcʉ diacjʉ̃ weegʉ́ nimi. Mʉsã cʉ̃rẽ masĩweꞌe. 29Yʉꞌʉ cʉ̃ tiropʉ níꞌcʉ niꞌi. Tojo weegʉ cʉ̃rẽ masĩꞌi, niwĩ Jesú.
30Cʉ̃ tojo nicã tʉꞌorã, cʉ̃rẽ buꞌiri daꞌreri wiꞌipʉ miasĩꞌrĩmiwã. Õꞌacʉ̃ cũuꞌque ejatiyucã, cʉ̃rẽ miatiwã. 31Masã pãjãrã cʉ̃rẽ ẽjõpeowã. Aꞌtiro niwã:
—¿To pũrĩcãrẽ Õꞌacʉ̃ beseꞌcʉ Cristo aꞌtigʉ, ãꞌrĩ weeĩꞌoꞌque nemorõ weegʉsari? niwã.
Jesure buꞌiri daꞌreri wiꞌipʉ miasĩꞌrĩmiꞌque niꞌi
32Fariseo masã “Ãꞌrĩ Õꞌacʉ̃ beseꞌcʉ nimi” nisere tʉꞌocãrã niwã. Tojo weerã paꞌia wiorã meꞌrã Õꞌacʉ̃ wiꞌi coꞌterã surarare Jesure ñeꞌedutirã oꞌócãrã niwã. 33Jesú peꞌe masãrẽ aꞌtiro niwĩ:
—Yʉꞌʉ mʉsã meꞌrã yoaticã nigʉ̃saꞌa. Beꞌro yʉꞌʉre oꞌóꞌcʉ tiropʉ waꞌagʉti. 34Yʉꞌʉre aꞌmasiruturã, mʉsã bocasome. Yʉꞌʉ waꞌaropʉre waꞌamasĩsome.
35Judío masã wiorã aꞌmerĩ sẽrĩtiñaꞌwã:
—Ãꞌrĩ yʉꞌʉre bocasome nígʉ̃, ¿noꞌopʉ waꞌagʉsari? ¿Cʉ̃ judío masã griego masã tiropʉ waꞌasteaꞌcãrãrẽ buꞌesijagʉ waꞌagʉsari? ¿Griego masã quẽꞌrãrẽ buꞌegʉsari? 36Cʉ̃ tojo níꞌque ¿deꞌro nisĩꞌrĩrõ weeapari? ni aꞌmerĩ sẽrĩtiñaꞌwã.
Acowʉose cjasere Jesú wereꞌque niꞌi
37Jesú bosenʉmʉ na weeyapatiri nʉmʉ warore wãꞌcãnʉꞌcã, tutuaro meꞌrã niwĩ:
—Acowʉorã, yʉꞌʉ tiropʉ aꞌti, sĩꞌrĩrã aꞌtia. 38Tojo weerã yʉꞌʉre ẽjõpeocã, mʉsã ye ejeripõꞌrãrĩpʉ Espíritu Santu nigʉ̃sami. Cʉ̃ dia aco oꞌmabʉronuꞌcũrõ weronojõ nigʉ̃sami. Õꞌacʉ̃ ye queti ojáca pũrĩpʉ níꞌcaronojõta nirõsaꞌa, niwĩ Jesú.
39Cʉ̃ aco oꞌmabʉronuꞌcũsere ucũgʉ̃, Espíritu Santure ucũgʉ̃ weewĩ. Cʉ̃́ta Jesure ẽjõpeorãpʉre sãjãacjʉ nigʉ̃sami nígʉ̃, tojo niwĩ. Titare Espíritu Santu cʉ̃ aꞌtise dʉporo niwʉ̃. Jesú cʉ̃ wẽrĩ masãmʉjãatiyucã, Espíritu Santu aꞌtitiwĩ yujupʉ.
Masã na dʉcawatise niꞌi
40Ãpẽrã Jesú ucũꞌquere tʉꞌorã, aꞌtiro niwã:
—Diacjʉ̃ta niꞌi. Ãꞌrĩ “Õꞌacʉ̃ ye queti weremʉꞌtãrĩ masʉ̃ aꞌtiacjʉ niapʉ” na níꞌcʉta nimi.
41Ãpẽrã aꞌtiro niwã:
—Ãꞌrĩ Õꞌacʉ̃ beseꞌcʉ Cristo nimi, niwã.
Ãpẽrã peꞌe “Õꞌacʉ̃ beseꞌcʉ deꞌro Galileacjʉ̃ nibosabe. 42Õꞌacʉ̃ ye queti ojáca pũrĩpʉ aꞌtiro niwʉ̃: ‘Õꞌacʉ̃ beseꞌcʉ Davi weronojõ Belẽcjʉ̃́ nigʉ̃sami. Cʉ̃ pãrãmi nituriagʉpʉ nigʉ̃sami’, ni ojanoꞌwʉ̃”, niwã.
43Jesure masã niꞌcãrõnojõ wãcũtiwã. Tojo weerã dʉcawatia waꞌawã. 44Ãpẽrã cʉ̃rẽ buꞌiri daꞌreri wiꞌipʉ miasĩꞌrĩwã. Tojo weesĩꞌrĩmirã, weetiwã.
Judío masã wiorã Jesure ẽjõpeotiꞌque niꞌi
45Õꞌacʉ̃ wiꞌi coꞌterã surara Jesure ñeꞌedutirã oꞌónoꞌcãrã aꞌtiro weewã. Na oꞌóꞌcãrã tiro fariseo masã, tojo nicã paꞌia wiorã tiropʉ majãmitojaawã. Topʉ na etacã, wiorã narẽ sẽrĩtiñaꞌcãrã niwã:
—¿Deꞌro weerã Jesure ñeꞌe miititiati? nicãrã niwã.
46Surara narẽ yʉꞌticãrã niwã:
—Ne niꞌcʉ̃ cʉ̃ weronojõ ucũcã, tʉꞌotirã nicãti.
47Fariseo masã narẽ nicãrã niwã:
—¿Mʉsã quẽꞌrã cʉ̃ buꞌeꞌquere tʉꞌorã, ẽjõpeoati? ¿Nisoonoꞌati? 48Añurõ tʉꞌomasĩña. Ne niꞌcʉ̃ wiogʉ, ne niꞌcʉ̃ fariseo masʉ̃ cʉ̃rẽ ẽjõpeotima. 49Sõjã pãjãrã cʉ̃ weresere ẽjõpeorã, Õꞌacʉ̃ Moisére dutise cũuꞌquere masĩtibutiama. Õꞌacʉ̃ narẽ buꞌiri daꞌregʉsami, nicãrã niwã surarare.
50Nicodemo ñamipʉ Jesure ĩꞌagʉ̃ ejaꞌcʉ fariseo masʉ̃ nicʉ niwĩ. Cʉ̃ meꞌrãcjãrã wiorãrẽ aꞌtiro nicʉ niwĩ:
51—Marĩrẽ dutise aꞌtiro niꞌi: “Niꞌcʉ̃ cʉ̃ ñaꞌarõ weeꞌquere ĩꞌatojarãpʉ, buꞌiri daꞌreroʉaꞌa”, niꞌi, nicʉ niwĩ.
52Na cʉ̃rẽ niwã:
—¿Mʉꞌʉ quẽꞌrã Galileacjʉ̃ niti? Õꞌacʉ̃ ye queti ojáca pũrĩpʉ buꞌeya. Ne niꞌcʉ̃ Õꞌacʉ̃ ye quetire weremʉꞌtãrĩ masʉ̃ Galileacjʉ̃ nitimi, nicãrã niwã.
Ñaꞌarõ weegore weresãꞌque niꞌi
53Nipeꞌtirã masã Jerusalẽ́pʉ bosenʉmʉ ejaꞌcãrã na ye wiꞌseripʉ dajatojaawã.
Currently Selected:
San Juan 7: touC
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved.
