Luk 21

Inyinyi ogwu nwakpa ge onyibe

(Mak 12:41-44)

1Jisọs onenibene chieen̄ imun̄ ubọk owuwa ebi ìbọbọọn̄ ubọọn̄ ekinu initap ikpoko kiban̄ me emen okop ekitap ikpoko me Uwu Mbuban ya. 2Mgbọ îkikpọ si, imumun̄ nwakpa ge, ogwu ugbọọn̄, onube, mè initap asabọn ikpoko ekwe iba#21:2 Otu ewe ikpoko cha îsip enenen igak ata ikpoko ge me emen okop ya.

3Jisọs onenitumu inyi ebi udun̄ kan̄ ibe, “Me atikọ, ǹkitumu inyi enyi ibe, me etete otutuuk ebi ìtatap ikpoko me emen okop ya, îre ugbọọn̄ nwakpa ya otap ikpoko iwa ichit. 4Mije, ebibilọ cha otutuuk emọnọ sọntiik me lek ogbogbo inu ubọọn̄ ema ekaan̄be isa ininyi. Ire, ogwu nwakpa ya ìsa me irek ugbọọri kan̄ inyi otutuuk inu îkaan̄be ibosa iluk ugwem, ìkasun̄ geege ìnyi lek kan̄.”

Inu ijejeen̄ ofolek òta mgbọ:

1. Mêgbugbọ Uwu Mbuban

(Mat 24:1-2; Mak 13:1-2)

5Usini ebi udun̄ kè Jisọs ekukup me lek kiban̄, mè ikitọn̄ uja ewuuk esabe inama Uwu Mbuban, mè otutuuk inu geelek ebi ene echebe inyi Awaji, echi esabe igbaalek ibala uwu ya. Jisọs onọnọ, mè itumu inyi ema ibe, 6“Me lek otutuuk inu chi enyi ekimun̄ me ere yi, mgbọ òkinu me isi, mgbọ enyi kpebeyaka imun̄ ewuuk geege otoon̄be me inyọn̄ ge. Mêgbugbọ otutuuk ewuuk chi igwook me ijọn̄.”

2. Ufialek mè tukutuku

(Mat 24:3-14; Mak 13:3-13)

7Ema enenido Jisọs ibe, “Ogwu Ijejeen̄, ìre mgbọ owa ke inu chi obomọnọ irek? Ìre kpasi inu ijejeen̄ ke ebi ene ebesa iriọọn̄ mgbọ inu chi obomọnọ irek?”

8Jisọs otutumu inyi ema ibe, “Ìgwọk chieen̄, ikachieek ibe ene geege ifiaan̄ enyi. Mije, owuwa ene mênu me erieen̄ n̄a. Ogwu inu, mônikitumu ibe, ‘Òta mgbọ îre isan̄a! Emi nre ogwu unyan̄a ya ogwu Awaji otọkọbe aran̄ me ibot.’ Ife chi isinu, ikagọọk! 9Enyi isikinọ ukpatu akọn̄ melek ùrioon̄ òkup esese esese, ikafieek owot, mije, me atikọ, inu chi môdasi imọnọ irek. Ire, òta mgbọ ìkponu mgbọ yaage.”

10Inenitumu si inyi ema ibe, “Ido môtim akọn̄ ikeme ido, ama ubọọn̄ môtim akọn̄ ikeme ama ubọọn̄. 11Ijọn̄ môsisik unye unye me owuwa ere. Akan̄ mè owuwa chieen̄ orukan̄ òkup esese esese mônin̄ me owuwa ere me linyọn̄. Inu ukpook mè owuwa uyeke uyeke inu môkimọnọ irek me isinyọn̄.

12“Ire, sabum otutuuk inu chi ònorọ, ebi ene mêtet enyi, mè itutuku enyi, mè isa enyi isi emen uwu ntitiin̄ kiban̄ isi isibi oyerebet me ibot, mè itap enyi me uwu mkpọn. Mêtaba si enyi isi isi ebi ubọọn̄ mè ebi ibot mkpulu ibe esibi enyi oyerebet me ibot. Otutuuk inu chi eberọ enyi, ìbore mije enyi echieekbe me lek n̄a. 13Mgbọ ema mêkitutuku enyi, enyi mêkisa irek keya ikilook ema ata etip. 14Ire, ikasisaak ejit kinyi ìkikeek inu enyi ebetumu isa inyan̄a lek kinyi me isi ife cha. 15Mije, mgbọ ya isikem, emi mâjeen̄ enyi ikọ enyi ebetumu, mè inyi enyi si ifuk-ibot ike enyi ebesa itumu ikọ, inyi ebi ochicha kinyi ekakọt ìgbini, mè ìgwak. 16Ebi nte kinyi mè nga kinyi, mè ebi ngwan̄ kinyi, mè ebi uwu kinyi, mè ebi unene kinyi mêleke enyi itap me emen ufialek, mè irọ inyi ekpan̄ usini kinyi. 17Otutuuk ebi ene mêcha enyi mije n̄a. 18Ire, emi mâbem enyi. Kpunu ukut ijeek ibot kinyi geege òbonan̄a ichep. 19Ire enyi ikeke inye, enyi mênwọnọ, mè ikaan̄ unyan̄a.

3. Mêgbugbọ Jeruselem igwook

(Mat 24:15-21; Mak 13:14-19)

20“Ofifi si, enyi isimun̄ urum ebi akọn̄ ekanabe Jeruselem okokop, ìriọọn̄ ibe ke mgbọ ebegbugbọ ama ya îkem. 21Me mgbọ ya, ebi geelek ìkup me Judia elibi enene inyọn̄ ogoon̄ echi òkup me agan̄ ya. Ebi ìkup me emen ama Jeruselem enan̄a esibi etele ama ya. Ebi ìkup me asabọn ama òkukup iriaak Jeruselem ekayaka ìnin̄ Jeruselem. 22Mije, îre mgbọ ya ke Awaji obosulu ebi Jeruselem osusut, isasa irọ otutuuk inu egebe me Ikpa Mbuban ibak Jeruselem iso. 23Ufialek môkup enenen inyi ebibaan̄ ìkup me owot, mè ebi ìkakaan̄ nsabọn ebi ekabange ebe me ubọk. Ufialek òmimin enenen môkup me inyọn̄ ijọn̄ yi. Unaan̄-ejit Awaji si môkeme ife chi me mgbọ ya. 24Mêkpan̄ usini kiban̄ me akọn̄, mè ikpulu usini kiban̄ me akọn̄ isa ifo owuwa ofifi ido. Ebi ekarege ebi Ju mênu initim akọn̄ ikpan̄ ebi Jeruselem, mè ijak Jeruselem me ukot, mè ikikpulu ebi Jeruselem mege ire mgbọ mgbọ Awaji osun̄be ibe ebi ekarege ebi Ju ekpulu ebi Ju môsobe.

4. Inunu eyi Gwun̄ Ebilene

(Mat 24:29-31; Mak 13:24-27)

25“Me ike mgbọ cha, uyeke uyeke inu ijejeen̄ môrọ me lek ura, mè onyan̄, mè ntoronyan̄. Otutuuk mgbọ ya, ido geelek me linyọn̄ keyi môkup me uga ukpook, mije ikpele ekoon̄ mè ogbururu òbonin̄ okwaan̄. 26Mgbọ ebi ene mêkikpọ chieen̄ me lek inu òkinu me linyọn̄, ukpook môtet ema ire lek ema mêkigak iweek, mije, inu geelek òkinyi utoon̄ me isinyọn̄ môsisik, mè ijibi inan̄a me akpat. 27Mgbọ inu chi môkimọnọ irek, ebi ene mêmun̄ Gwun̄ Ebilene okinu me emen oduku inyọn̄, me unye mè ikpele ujamgbugbo. 28Eya orọ, mgbọ inu chi isibene ikirọ, enyi ìnan̄a ìkeke, mè ìbene ibot kinyi ìfo inyọn̄, mije, mgbọ ebefaka enyi isibi îgbet.”

Ikween̄ inu ònan̄a me lek uti figi

(Mat 24:32-35; Mak 13:28-31)

29Jisọs onenito urọk ge inyi ebi udun̄ kan̄ ibe, “Ìkpọ-nu uti figi melek otutuuk uti geelek. 30Mgbọ geelek enyi isimun̄ uti chi ogen̄be inwan̄ isan̄a, ayaya inwan̄ oyayaka ibene ikisek me lek, enyi mîra imun̄, mè iriọọn̄ ibe ke mgbọ ura îra igbet. 31Ikeya si, enyi isimun̄ inu chi geelek okirọ, ìriọọn̄ ibe ke mkpulu eyi Awaji îra igbet.

32“Me atikọ, ǹkitumu inyi enyi ibe ke ebi ukot keyi kpebekwaan̄ otutuuk isan̄a mege ire mgbọ otutuuk inu chi geelek môrọbe iso. 33Inyọn̄ mè ijọn̄ môraka isan̄a, ire, ikọ n̄a ìbokekeke inye ire mgbọ geelek.

34“Eya orọ, ìgbala chieen̄. Ikawuuk lek, mè ìfiat otutuuk mgbọ kinyi me lek uga irerie mè inwọnwọ miin̄, mè ikekeek ekiket mbọm mè ubọk iluk ugwem. Mije, ire otutuuk ejit kinyi ikup me lek inu chi gaalek mgbọ geelek, usen inunu Gwun̄ Ebilene mônu enyi me uwuuk-lek, mè itet enyi kubọk ufe otet anam. 35Uyọrọlek yi isinu, môre lek otutuuk ebi ìkup me linyọn̄. 36Eya orọ, enyi ìkup me mbem mgbọ geelek, mè ìkiriaak uriaak, inyi enyi ekọt enwọnọ otutuuk inu chi òbomọnọ irek, mè ekọt ekeke me isi Gwun̄ Ebilene.”

37Me otutuuk ike mgbọ ya, Jisọs ìkisi ijeen̄ inu me Uwu Mbuban usen geelek, mè ikisi ikup me inyọn̄ ogoon̄ Olifu ikakwun̄ geelek. 38Ata ewelegwe ewelegwe usen geelek, ebi ene mîra ikigbuku inu me Uwu Mbuban inikigban̄ inu ìkijeen̄.

Currently Selected:

Luk 21: ANNa

Highlight

Copy